୨ ଯୋହନ 1 - New Testament in Pengo Parja Languageପ୍ରାଚିନ୍ 1 ଆନେଙ୍ଗ୍ ଯୋହନ, ଆରେ ଆନେଙ୍ଗ୍ ର ମଣ୍ଡ୍ଲିନି ପ୍ରାଚିନ୍। ଆନେଙ୍ଗ୍ ଇ ଚିଟି ଈଶ୍ୱର ବାଚିକିତି କଗ୍ଲେଙ୍ଗ୍ ଆରେ ତା ମେହିର୍ କାଜିଙ୍ଗ୍ ଲେକିକିନାଙ୍ଗା। ଆନେଙ୍ଗ୍ ଇନେସ୍କି ଈଶ୍ୱର ସତ୍ତିଙ୍ଗ୍ ପୁଚି ମାନାୟାରିଙ୍ଗ୍ ପା ଲାଡ୍ କିନାଙ୍ଗା, ହେଲେକେ ଆନେଙ୍ଗ୍ ହେ କଗ୍ଲେଙ୍ଗ୍ ତା ମେହିରିଙ୍ଗ୍ ଲାଡ୍ କିନାଙ୍ଗା। 2 ଆନେଙ୍ଗ୍ ମିଙ୍ଗେଙ୍ଗ୍ ଲାଡ୍ କିଦ୍ନାଙ୍ଗା, ଆରେ ହେ ସତ୍ ମା ଗରବ୍ତାକେ ମାଞ୍ଜେଙ୍ଗ୍ ହିତ୍ତାନ୍ନା, ଲାଗିଙ୍ଗ୍ ଆପେଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିନାପା। ଆରେ ହେ ସତ୍ ମା ଗରବ୍ତାକେ ୱିଜୁଦିନ୍ କାଜିଙ୍ଗ୍ ମାନ୍ଙ୍ଗାନାତ୍। 3 ଆବା ଈଶ୍ୱର ଆରେ ତା ମେହି ଯୀଶୁ ଖ୍ରୀଷ୍ଟତାଙ୍ଗ୍ ଆଶ୍ରିବାଦ୍, ଦୟା ଆରେ ଶାନ୍ତି ମା କାଜିଙ୍ଗ୍ ଆୟେତ୍। ଇନେସ୍କି ଆପେଙ୍ଗ୍ ସତ୍ ଅନୁସାରେ ମାନାପା, ଆରେ ଜାର୍-ଜାର୍ବିତ୍ରେ ଲାଡ୍ କିନାପା। ଈଶ୍ୱର ଆଦେସ୍ ମାନିକିନାକା ଆରେ ମିଚ୍ ହିକ୍ଷାତିଙ୍ଗ୍ ଆହ୍ୱି କାତା 4 ଆନେଙ୍ଗ୍ ବେସି ୱାରିୟା ଆତାଙ୍ଗ୍, ଇନେସ୍କି ମି ହିମ୍ଣାଙ୍ଗ୍ ବିତ୍ରେତାଙ୍ଗ୍ କେତ୍ଜାଣ୍ ଈଶ୍ୱର ଇଚା କିନିଲେକେ ସତ୍ ଯିବୁନ୍ କାଟିକିନାରା, ଇନେସ୍ ଆବା ଈଶ୍ୱର ମାଙ୍ଗେଙ୍ଗ୍ ଆଦେସ୍ ହିତ୍ତାନ୍ନା। 5 ଏ ନା ଲାଡ୍ନି ତଣ୍ଦେଲେ, ଆନେଙ୍ଗ୍ ନି କାଜିଙ୍ଗ୍ ଇନା ପୁନି ନିୟମ୍ ଲେକିକିଉଙ୍ଗା। ମାତର୍ ଆଗେ ଇମ୍ଣି ନିୟମ୍ ଆସେଙ୍ଗ୍ ଗାଟା ଆଜି ମାଚାସ୍, ହେଦାଙ୍ଗ୍ ମି କାଜିଙ୍ଗ୍ ଲେକିକିନାଙ୍ଗା ଆସେଙ୍ଗ୍ ଜାର୍-ଜାର୍ବିତ୍ରେ ଲାଡ୍କିନି ଦର୍କାର୍। 6 ଆରେ ଆସେଙ୍ଗ୍ ଈଶ୍ୱର ଆଦେସ୍ତିଙ୍ଗ୍ ମାନିକିଜି ଜିନାକାନେ, ଈଶ୍ୱରତିଙ୍ଗ୍ ଲାଡ୍ କିନାକା। ଜାର୍-ଜାର୍ବିତ୍ରେ ଲାଡ୍ କିଦେଙ୍ଗ୍, ଈଶ୍ୱର ଆଗେ ମିଙ୍ଗେଙ୍ଗ୍ ଆଦେସ୍ ହିଜି ମାନ୍ଚାନ୍। 7 ଇନେସ୍କି କେତେକ୍ ମିଚ୍ ହିକ୍ଷା ହିକାୟ୍ କିଜି ଟକାୟ୍ କିନାକାର୍ ପୁର୍ତିତାକେ ହତ୍ତାର୍ନା, ହେୱାର୍ ୱେଚ୍ନାର୍ ଯୀଶୁ ଖ୍ରୀଷ୍ଟ ମାନାୟ୍ ରୁପ୍ ଆଜି ପୁର୍ତିତାକେ ୱାୱାତାନ୍ନା। ଇ ଲେଗ୍ଦି ମାନାୟ୍ ଖ୍ରୀଷ୍ଟଙ୍ଗ୍ ବିରଦ୍ କିଜି ମାନାୟାରିଙ୍ଗ୍ ଟକାୟ୍ କିନାକାର୍। 8 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଜାଗ୍ରତ୍ ଆଜି ମାନାଟ୍, ଇ ଲେଗ୍ଦି ମାନାୟ୍ ମିଙ୍ଗେଙ୍ଗ୍ ଟକାୟ୍ କିଦ୍ମେର୍, ଇନେସ୍ ଏପେଙ୍ଗ୍ ଇମ୍ଣି ପୁରଷ୍କାର୍ ପାୟା ଆଦେଙ୍ଗ୍ କଷ୍ଟ କିନାଦେରା ହେଦାଙ୍ଗ୍ ପାଙ୍ଗ୍ୱା ଆଉତ୍। ମାତର୍ ଏପେଙ୍ଗ୍ ହେ କାମାୟ୍ କାଜିଙ୍ଗ୍ ଆଶ୍ରିବାଦ୍ ପାୟାଆଡ, ଇମ୍ଣାକା ଈଶ୍ୱର ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିତାନ୍ନା। 9 ଯଦି ଇମ୍ଣି ମାନାୟ୍ ଖ୍ରୀଷ୍ଟ ହିକ୍ଷାତିଙ୍ଗ୍ ଆରେ ତା ହିକ୍ଷାତିଙ୍ଗ୍ ମାହାୟ୍ କିନାନ୍, ଆରେ ଖ୍ରୀଷ୍ଟ ହିକ୍ଷାତିଙ୍ଗ୍ ପାର୍ତି କିଉନ୍। ଲାଗିଙ୍ଗ୍ ହେୱାନ୍ ଈଶ୍ୱରତିଙ୍ଗ୍ ମାହା ବିଡ଼ା ଆଜି ମାନୁନା। ମାତର୍ ଇମ୍ଣି ମାନାୟ୍ ହେ ହିକ୍ଷାତିଙ୍ଗ୍ ପାର୍ତିକିନାନ୍, ହେୱାନ୍ ଆବା ଈଶ୍ୱରତିଙ୍ଗ୍ ଆରେ ତା ମେହି ଯୀଶୁଙ୍ଗ୍ ମାହାଆଜି ମାନାନ୍। 10 ଇମ୍ଣି ମାନାୟ୍ ଯଦି ମିତାକେ ୱାଜି ଖ୍ରୀଷ୍ଟ ବିଷୟନି ସତ୍ ହିକ୍ଷାତିଙ୍ଗ୍ ହିଦ୍ୱାଦାଙ୍ଗ୍ ଅଲ୍ଗା ହିକ୍ଷା ହିଦ୍ନାନ୍। ଲାଗିଙ୍ଗ୍ ଏପେଙ୍ଗ୍ ହେୱାନିଙ୍ଗ୍ ମି ଇଞ୍ଜ ଅସାହାଲ୍ମାଟ୍ କି ଜୁୱାର୍ କିମାଟ୍। 11 ଇମ୍ଣି ମାନାୟ୍ ହେୱାନିଙ୍ଗ୍ ଈଶ୍ୱରତାଙ୍ଗ୍ ୱାତାଙ୍ଗ୍ନା ଇଞ୍ଜି ଜୁୱାର୍ କିନାନ୍, ହେୱାନ୍ ତା ହୁଦାଙ୍ଗ୍ ମାହାଆଜି ପାପ୍ କିନାନା। ଯୋହନତି ସେସ୍ କାତା 12 ମି କାଜିଙ୍ଗ୍ କେତେକ୍ ବିଷୟ ଲେକିକିନାକା ମାନାତ୍, ମାତର୍ ଆନେଙ୍ଗ୍ କାଗଜ୍ ଆରେ ପେନ୍ ହୁଦାଙ୍ଗ୍ ଲେକିକିଦେଙ୍ଗ୍ ଆହା କିଉଙ୍ଗା। ଆନେଙ୍ଗ୍ ଇଚା କିନାଙ୍ଗା ଯେ, ମିତାକେ ୱାଜି ମୁଖାମୁଖି କାତାବାର୍ତା କିଦ୍ନାଙ୍ଗ୍। ଲାଗିଙ୍ଗ୍ ମା ୱାରି ପୁରାଆନାତ୍। 13 ଏ ଈଶ୍ୱର ବାଚି କିତ୍ତି କଗ୍ଲେନି ମେହିର୍ ମିଙ୍ଗେଙ୍ଗ୍ ଜୁୱାର୍ କିଦ୍ନାରା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation