୨ କରନ୍ତିୟ 9 - New Testament in Pengo Parja Languageଜେକନି ମଣ୍ଡ୍ଲିନି ଖ୍ରୀଷ୍ଟାନାର୍ କାଜିଙ୍ଗ୍ ସାଇଜ କିନି କାତା 1 ଯିରୁଶାଲାମନି ଖ୍ରୀଷ୍ଟାନ୍ ଟଣ୍ଡାରିଙ୍ଗ୍ ଡାବୁଙ୍ଗ୍ ହିନି ବିଷୟରେ, ଆନେଙ୍ଗ୍ ମିଙ୍ଗେଙ୍ଗ୍ ଲେକିକିନି ଦର୍କାର୍ ଆକାୟ୍। 2 ଇନେସ୍କି ଆନେଙ୍ଗ୍ ପୁଚାଙ୍ଗ୍ନା ଏପେଙ୍ଗ୍ ହେୱାରିଙ୍ଗ୍ ସାଇଜ କିଦେଙ୍ଗ୍ କେତେକ୍ ତେର୍-ତେର୍ ଆନାଦେରା। ଆରେ ଏପେଙ୍ଗ୍ ଆକାୟା ସହର୍ନି ପାର୍ତିକିନି ମାନାୟାର୍ ର ବାର୍ହୁ ଆଗେ ଦାନ୍ ହିଜି ସାଇଜ କିନି ବିଷୟରେ ଆନେଙ୍ଗ୍ ନା ମାକଦନିଆ ସହର୍ନି ସାଙ୍ଗର୍ ଆଗେ ବାଟ୍ପାଣ୍ ଆଜି ୱେଚ୍ନାଙ୍ଗା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ତେର୍-ତେର୍ ଆଜି ସାଇଜ କିନାକା ହୁଡ଼୍ଜି, ବେସିହେନି ମାନାୟାର୍ ସାଇଜ କିତାର୍। 3 ମାତର୍ ଆନେଙ୍ଗ୍ ଇ ଟଣ୍ଡେନିଙ୍ଗ୍ ପୁନି କାଜିଙ୍ଗ୍ ପକ୍ତାନାଙ୍ଗା ଯେ, ଏପେଙ୍ଗ୍ ରେଡି ମାନାଦେର୍, ଇନେସ୍ ଆନେଙ୍ଗ୍ ହେୱାରିଙ୍ଗ୍ ୱେଚ୍ଚି ମାଚାଙ୍ଗ୍ ଏପେଙ୍ଗ୍ ଡାବୁଙ୍ଗ୍ ରୁଣ୍ଡାୟ୍ କିତାଦେର୍ନା। ଇନେସ୍କି ଆନେଙ୍ଗ୍ ଇଚା କିଉଙ୍ଗା ଯେ, ମି ବିଷୟରେ ବାଟ୍ପାଣ୍ ଆଜିମାଚି କାତା ମିଚ୍ ଆମେତ୍। 4 ଇନେସ୍କି ଯଦି ଇନେର୍ ମାକଦନିଆ ସହର୍ତାଙ୍ଗ୍ ନା ହୁଦାଙ୍ଗ୍ ୱାଜି ଏପେଙ୍ଗ୍ ସାଇଜ କିନି କାଜିଙ୍ଗ୍ ରେଡି ଆୱାତାକା ହୁଡ଼୍ନାନ୍, ଲାଗିଙ୍ଗ୍ ଆପେଙ୍ଗ୍ ମି ଜପି ପାର୍ତିକିତି କାଜିଙ୍ଗ୍ ଲାଜ୍ ପାୟାଆନାତ୍। ମାତର୍ ଏପେଙ୍ଗ୍ ନାବେତାଙ୍ଗ୍ ଆଦିକ୍ ଲାଜ୍ ପାୟାଆନାଦେର୍। 5 ଲାଗିଙ୍ଗ୍ ଆନେଙ୍ଗ୍ ୱାନି ଆଗେ ତିତସତିଙ୍ଗ୍ ମି ଲାଗେ ପକ୍ତାତାନାଙ୍ଗା, ଇଦାଙ୍ଗ୍ ପୁନି କାଜିଙ୍ଗ୍ ଯେ, ଏପେଙ୍ଗ୍ ପାର୍ମାଣ୍କିତି ଚାନ୍ଦା ଡାବୁଙ୍ଗ୍ ହିଦେଙ୍ଗ୍ ରେଡି କିତାଦେର୍ନା କି ଆକାୟ୍। ମାତର୍ ଆନେଙ୍ଗ୍ ଇଚା କିନାଙ୍ଗା ଯେ, ମିଙ୍ଗେଙ୍ଗ୍ ଇନେର୍ ଜବର୍ ଦସ୍ତ୍ କିତିସ୍ ହିମାଟ୍, ମାତର୍ ଜାର୍ ଇଚାତାଙ୍ଗ୍ ଦାନ୍ ହିୟାଟ୍। 6 ଏପେଙ୍ଗ୍ ମାନ୍ତ ଇଟାଟ୍ ଯେ, ଇମ୍ଣି ଚାଷି ଅଲପ୍ ବିୟାନ୍ ୱିତ୍ନାନ୍ ହେୱାନ୍ ଅଲପ୍ ତାସ୍ ପାୟା ଆନାନ୍, ମାତର୍ ଇନେର୍ ଜବର୍ ବିୟାନ୍ ୱିତ୍ନାନ୍ ହେୱାନ୍ ବେସି ଜବର୍ ତାସ୍ ପାୟା ଆନାନ୍। 7 ଲାଗିଙ୍ଗ୍ ଇନେର୍ ଯଦି ମିଙ୍ଗେଙ୍ଗ୍ ଦାନ୍ ହିଦେଙ୍ଗ୍ ଜବର୍ ଦସ୍ତ୍ କିଦ୍ନାର୍ ଏପେଙ୍ଗ୍ ହିମାଟ୍, ମାତର୍ ଏପେଙ୍ଗ୍ ନିଜେ ଇଚା କିଜି ଏଚେକ୍ ଦାନ୍ ହିନାଦେର୍ ଚିନ୍ତା କିୟାଟ୍, ଇନେସ୍କି ଇମ୍ଣି ମାନାୟାର୍ ୱାରିୟା ଆଜି ହିନାର୍ ଈଶ୍ୱର ହେୱାରିଙ୍ଗ୍ ଲାଡ୍ କିନାନ୍। 8 ଆରେ ଈଶ୍ୱର ମିଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ତାଙ୍ଗ୍ ଆଦିକ୍ ଆଶ୍ରିବାଦ୍ କିଦେଙ୍ଗ୍ ଆଡ଼୍ଦାନାତ୍, ଆରେ ଜେକନିକାର୍ କାଜିଙ୍ଗ୍ ହାର୍ କାମାୟ୍ କିଦେଙ୍ଗ୍ ମିତାକେ ୱିଜୁଦିନ୍ ୱିଜୁ ଜିନିଷ୍ ଆଦିକ୍ ମାନ୍ଗାନାତ୍। 9 ଈଶ୍ୱର ଗରିବ୍ ଲଗାଙ୍ଗ୍ ଦୟାକିଜି ଦାନ୍ ହିନାନ୍, ହେୱାନ୍ କିନି କାମାୟ୍ ୱିଜୁ ଟିକ୍ ଆରେ ହେଲେକେ ୱିଜୁଦିନ୍ କିଜି ମାନାନ୍। 10 ଟିକ୍ ହେଲେକେ ହେୱାନ୍ ମିଙ୍ଗେଙ୍ଗ୍ ହାର୍କିନି କାଜିଙ୍ଗ୍ ହାର୍ ସୁଯଗ୍ ହିଦ୍ନାନ୍, ଆରେ ହେୱାନ୍ ମିଙ୍ଗେଙ୍ଗ୍ ଗରିବ୍ ମାନାୟାରିଙ୍ଗ୍ ଦାନ୍ ହିଦେଙ୍ଗ୍ ଆଦିକ୍ତାଙ୍ଗ୍ ଆଦିକ୍ ମାନ୍ ହିଦ୍ନାନ୍। ଇନେସ୍କି ଈଶ୍ୱରନେ ତାସ୍ କିନାକାରିଙ୍ଗ୍ ବିୟାନ୍ ଆରେ ଚିଞ୍ଜେଙ୍ଗ୍ କାଦି ହିନାନ୍। 11 ଆଁ ହେୱାନ୍ ମିଙ୍ଗେଙ୍ଗ୍ ୱିଜୁ ନିପଣ୍ ଆଶ୍ରିବାଦ୍ କିଦ୍ନାନ୍, ଲାଗିଙ୍ଗ୍ ୱାରିୟା ଆଜି ୱିଜୁଦିନ୍ ହିଦେଙ୍ଗ୍ ଆଡ୍ନାଦେର୍। ଆରେ ଏପେଙ୍ଗ୍ ଏଚେକାଡ଼୍ଦ ଗରିବ୍ ଲାଗିଙ୍ଗ୍ ଦାନ୍ କିନାଦେର୍, ହେ ମାନାୟାର୍ ଈଶ୍ୱରତିଙ୍ଗ୍ ଦନ୍ଯବାଦ୍ କିନାର୍। 12 ଏପେଙ୍ଗ୍ ଯଦି ଡାବୁଙ୍ଗ୍ ହିନାଦେର୍, ଲାଗିଙ୍ଗ୍ ରିଣ୍ଡାଙ୍ଗ୍ ଜିନିଷ୍ ପୁରାଆନାତ୍। ପାର୍ତୁମ୍ ଯିରୁଶାଲାମ ସହର୍ନି ପାର୍ତିକିନି ଟଣ୍ଡାରିଙ୍ଗ୍ ଦର୍କାର୍ଆନି ଜିନିଷ୍ ପୁରାଆନାତ୍, ଆରେ ହେୱାର୍ ୱାରିୟା ଆଜି ଈଶ୍ୱରତିଙ୍ଗ୍ ଦନ୍ଯବାଦ୍ ହିନାର୍। 13 ଆରେ ଏପେଙ୍ଗ୍ ପା ମାନାୟାରିଙ୍ଗ୍ ସାଇଜ କିନି କାଜିଙ୍ଗ୍ ଡାବୁଙ୍ଗ୍ ହିଜି ଈଶ୍ୱରତିଙ୍ଗ୍ ଗୌରବ କିନାଦେର୍, ଇନେସ୍କି ଏପେଙ୍ଗ୍ ଖ୍ରୀଷ୍ଟତି ହାର୍ଦିକାବୁର୍ତିଙ୍ଗ୍ ସତ୍ ଇଞ୍ଜି ଇନାଦେରା ଆରେ ଏପେଙ୍ଗ୍ ନିଜେ ୱେଚ୍ଚି କାତାତିଙ୍ଗ୍ ମାନି କିନାଦେରା। 14 ଆରେ, ଈଶ୍ୱରତି ଚାନିଆଆନି ଦୟା ମି କାଜିଙ୍ଗ୍ ହେୱାରିଙ୍ଗ୍ କିଜିମାଚି କାଜିଙ୍ଗ୍, ହେୱାର୍ ମି କାଜିଙ୍ଗ୍ ବେସି ଲାଡ୍ତାଙ୍ଗ୍ ପାର୍ତାନା କିନାର୍। 15 ଆସେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନି ଦର୍କାର୍, ଇନେସ୍କି ହେୱାନ୍ ଚାନିଆଆନି ଦାନ୍ ଯୀଶୁ ଖ୍ରୀଷ୍ଟଙ୍ଗ୍ ମା କାଜିଙ୍ଗ୍ ହିତ୍ତାନ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation