୨ କରନ୍ତିୟ 8 - New Testament in Pengo Parja Languageଗରିବ୍ ମାନାୟାରିଙ୍ଗ୍ ଡାବୁଙ୍ଗ୍ ହିଜି ସାଇଜ କିନି ବିଷୟ 1 ଏ ଲାଡ୍ନି ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ପୁନି କିଦ୍ଦେଙ୍ଗ୍ ଇଚା କିନାଙ୍ଗା ଯେ, ମାକଦନିଆ ସହର୍ତାକେ ମାନି ମଣ୍ଡ୍ଲିନି ପାର୍ତିକିନି ମାନାୟାର୍ କାଜିଙ୍ଗ୍ ଇନାକା ୱିଜୁ ଈଶ୍ୱର ଦୟାକିଜି କିତାନ୍। 2 ମାନାୟାର୍ ହେୱାରିଙ୍ଗ୍ ବେସି ଦୁଃକ୍ କଷ୍ଟ ହିଜି ପରିକ୍ଷା କିତିସ୍ ପା ହେୱାର୍ ବେସି ୱାରି କିନାରା ଆରେ ହେୱାର୍ ବେସି ଗରିବ୍ ମାଚିସ୍ ପା, ହେୱାର୍ ଜେକନିକାରିଙ୍ଗ୍ ପାର୍ତିକିନି ଟଣ୍ଡାରିଙ୍ଗ୍ ୱାରିୟା ଆଜି ବେସି ସାଇଜ କିନାରା। 3 ଆନେଙ୍ଗ୍ ହେୱାର୍ ବିଷୟରେ ସାକି ହିଦ୍ନାଙ୍ଗା ଯେ, ହେୱାର୍ ଜାର୍ ଇଚାତାଙ୍ଗ୍ ହିନାରା। ହେୱାର୍ ଏଚେକ୍ ହିଦେଙ୍ଗ୍ ଶାକ୍ତି ମାନାତ୍ ତାବେ ଆଦିକ୍ ହିଜି ପାର୍ତିକିନି ମାନାୟାରିଙ୍ଗ୍ ସାଇଜ କିନାରା। 4 ଯିରୁଶାଲାମ୍ ସହର୍ନି ପାର୍ତିକିନି ମାନାୟାରିଙ୍ଗ୍ ଡାବୁଙ୍ଗ୍ ହିଜି ସାଇଜ କିନି ମାନାୟାର୍ ହୁଦାଙ୍ଗ୍ ମାହାଆଜି ଡାବୁଙ୍ଗ୍ ହିଜି ସାଇଜ କିନି କାଜିଙ୍ଗ୍ ହେୱାର୍ ମାଙ୍ଗେଙ୍ଗ୍ ବାରମ୍-ବାରମ୍ ଗୁୱାରି କିଜି ମାନ୍ଞ୍ଚାର୍। 5 ଆପେଙ୍ଗ୍ ହେୱାର୍ତାକେ ଆହା କିଜି ମାଚାପ୍, ମାତର୍ ହେୱାର୍ ମା ଆହାତାଙ୍ଗ୍ ଆଦିକ୍ ଡାବୁଙ୍ଗ୍ ହିଜି ସାଇଜ କିଜି ମାନ୍ଞ୍ଚାର୍। ଇନେସ୍କି ହେୱାର୍ ପାର୍ତୁମ୍ ମା ମାପୃ ଯୀଶୁଙ୍ଗ୍ ୱାରିକିନି କାଜିଙ୍ଗ୍ ତାପାଚେ ମାଙ୍ଗେଙ୍ଗ୍ ୱାରି କିଦ୍ନି କାଜିଙ୍ଗ୍ କିଜି ମାଚାର୍। ଇନେସ୍ ଈଶ୍ୱର ହେୱାର୍ କିଏର୍ ଇଞ୍ଜି ଇଚା କିଜି ମାଚାନ୍। 6 ଲାଗିଙ୍ଗ୍ ଆପେଙ୍ଗ୍ ମା ହୁଦାଙ୍ଗ୍ ମାନି ପାର୍ତିକିନି ଟଣ୍ଡେନ୍ ତିତସତିଙ୍ଗ୍ ଗୁୱାରି କିଜି ୱେଚ୍ଚାପ୍ ଯେ, ମିଙ୍ଗେଙ୍ଗ୍ ପାର୍ତୁମ୍ ଡାବୁଙ୍ଗ୍ ଅରାୟ୍ କିଦେଙ୍ଗ୍ ସାଇଜ କିଜି ମାନ୍ଞ୍ଚାନ୍। ହେୱାନ୍ ମିତାକେ ଆରେରଗ ଲେଉଟା ଆଜି ୱାଜି, ଏପେଙ୍ଗ୍ ଡାବୁଙ୍ଗ୍ ଅରାୟ୍ କିଦେଙ୍ଗ୍ ହେବା ପୁରାୟ୍ କିନି କାଜିଙ୍ଗ୍ ସାଇଜ କିଦେନ୍। 7 ଲାଗିଙ୍ଗ୍ ଆନେଙ୍ଗ୍ ପୁଚାଙ୍ଗ୍ନା ଏପେଙ୍ଗ୍ ପାର୍ତି କିଜି ମାନି କାଜିଙ୍ଗ୍ ଏପେଙ୍ଗ୍ ୱିଜୁ ନିପଣ୍ ହାର୍ କାମାୟ୍ କିନାଦେରା। ଈଶ୍ୱର ଆତ୍ମା ମିଙ୍ଗେଙ୍ଗ୍ ତା କାତା ୱେଚ୍ଚେଙ୍ଗ୍ ଶାକ୍ତି ହିତ୍ତାନ୍ନା ହେୱାନ୍ ମିଙ୍ଗେଙ୍ଗ୍ ବୁଦି ହିତ୍ତାନ୍ନା। ଏପେଙ୍ଗ୍ ମାନାୟାରିଙ୍ଗ୍ ସାଇଜ କିଦେଙ୍ଗ୍ ବେସି ଇଚା କିନାଦେରା ଆରେ ମାଙ୍ଗେଙ୍ଗ୍ ପା ଏପେଙ୍ଗ୍ ଲାଡ୍ କିଦ୍ନାଦେରା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଇଚା କିନାଙ୍ଗା ଯେ, ଏପେଙ୍ଗ୍ ଜାର୍ ଇଚାତାଙ୍ଗ୍ ବେସି ଦାନ୍ ହିଦେଙ୍ଗ୍ ଉପାୟ୍ କିୟାଟ୍। 8 ଆନେଙ୍ଗ୍ ମିଙ୍ଗେଙ୍ଗ୍ ଇଲେକେ ନେ କିୟାଟ୍ ଇଞ୍ଜି ଆଦେସ୍ ହିଦୁଙ୍ଗା। ମାତର୍ ଜେକନି ମଣ୍ଡ୍ଲିନି ପାର୍ତି କିନାକାର୍ ସାଇଜ କିଦେଙ୍ଗ୍ ବେସି ଇଚା କିଜି ଲାଡ୍ କିନିଲେକେ, ଏପେଙ୍ଗ୍ ଜେକନି ପାର୍ତିକିନି ଗରିବ୍ ମାନାୟାରିଙ୍ଗ୍ ଲାଡ୍ କିନାଦେରା କି ଆକାୟ୍ ପୁଞ୍ଜେଙ୍ଗ୍ ଇଲେକେ ଇଞ୍ଜ୍ନାଙ୍ଗା। 9 ଏପେଙ୍ଗ୍ ପୁଚାଦେର୍ନା ଯେ, ମା ମାପୃ ଯୀଶୁ ଖ୍ରୀଷ୍ଟ ନିଜେ ଇଚା କିଜି ମାଙ୍ଗେଙ୍ଗ୍ ଦୟା କିତ୍ତାନ୍ନା। ହେୱାନ୍ ଗରିବ୍ ଆତି କାଜିଙ୍ଗ୍ ଆସେଙ୍ଗ୍ ହାଉକାର୍ ଆୟା ଆନାତ୍, ଲାଗିଙ୍ଗ୍ ହେୱାର୍ ହାଉକାର୍ ମାଚିସ୍ ପା ହେୱାନ୍ ମା କାଜିଙ୍ଗ୍ ଗରିବ୍ ଆଜି ମାଚାନ୍। 10 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ର ହିକ୍ଷା ହିଦ୍ନାଙ୍ଗା ଯେ, ଏପେଙ୍ଗ୍ ଇମ୍ଣି ହାର୍ କାମାୟ୍ ର ବରଷ୍ ଆଗେ ଆରମ୍ କିଜି ମାଚାଦେର୍ ହେଦାଙ୍ଗ୍ ପୁରାୟ୍ କିୟାଟ୍। ହାଚି ବରଷ୍ ଏପେଙ୍ଗ୍ ପାର୍ତୁମ୍ ସାଇଜ କିଜି ମାଚାଦେର୍, ଆରେ ପା ଏପେଙ୍ଗ୍ ନେ ପାର୍ତୁମ୍ ଇ କାମାୟ୍ତିଙ୍ଗ୍ ଆରମ୍ କିଜି ମାଚାଦେର୍। 11 ଲାଗିଙ୍ଗ୍ ଏପେଙ୍ଗ୍ ଇମ୍ଣି ଦାନ୍ହିନି କାମାୟ୍ ଆରମ୍ କିତାଦେର୍ନା ନଙ୍ଗୟ୍ ହେଦାଙ୍ଗ୍ ପୁରାୟ୍ କିନି ଦର୍କାର୍। ଏପେଙ୍ଗ୍ ଇନେସ୍ ପାର୍ତୁମ୍ ଦାନ୍ ହିଦେଙ୍ଗ୍ ଇଚା କିଜି ମାଚାଦେର୍ ହେଲେକେ ଏପେଙ୍ଗ୍ ନଙ୍ଗୟ୍ ଏଚେକ୍ ଦାନ୍ ହିଦେଙ୍ଗ୍ ଆଡ୍ନାଦେର୍ ହେ ଏଚେକ୍ ହିୟାଟ୍। 12 ଏପେଙ୍ଗ୍ ଆଡ୍ୱି ଏଚେକ୍ ଦାନ୍ ହିୱାଦାଙ୍ଗ୍, ଜାର୍ ଇଚାତାଙ୍ଗ୍ ଏଚେକ୍ ହିଦେଙ୍ଗ୍ ଆଡ୍ନାଦେର୍ ହେ ଏଚେକ୍ ଦାନ୍ ହିୟାଟ୍, ହେଦାଙ୍ଗ୍ ଈଶ୍ୱର ଆହ୍ନାନ୍। 13 ଆନେଙ୍ଗ୍ ଇଲେକେ ୱେଚ୍ଚୁଙ୍ଗା ଯେ, ଏପେଙ୍ଗ୍ ଜେକନିକାରିଙ୍ଗ୍ ସାଇଜ କିଦେଙ୍ଗ୍ ମିଦି ୱିଜୁ ହିୟାଟ୍ ଆରେ ନିଜେ ଗରିବ୍ ଆଡ, ମାତର୍ ଆନେଙ୍ଗ୍ ଇଲେକେ ଇଚା କିନାଙ୍ଗା ଯେ, ଜେକନି ପାର୍ତିକିନି ଗରିବ୍ ମାନାୟାର୍ ପା ମିହୁଦାଙ୍ଗ୍ ହାମାନ୍ ଆଏର୍। 14 ନଙ୍ଗୟ୍ ମିତାକେ ବେସି ମାନାତ୍ ଆରେ ଏପେଙ୍ଗ୍ ଜେକନିକାର୍ ପାର୍ତିକିନି ଗରିବ୍ ଲଗାଙ୍ଗ୍ ସାଇଜ କିଦେଙ୍ଗ୍ ଆଡ୍ନାଦେର୍। ପାଚେ ଏଚେପାଦ୍ନା ହେୱାରିଙ୍ଗ୍ ବେସି ଆନାତ୍, ଲାଗିଙ୍ଗ୍ ମିଙ୍ଗେଙ୍ଗ୍ ଦର୍କାର୍ ଆଦ୍ନିହିଙ୍ଗ୍ ହେୱାର୍ ପା ମିଙ୍ଗେଙ୍ଗ୍ ସାଇଜ କିଦ୍ନାର୍, ହେଲେକେ ଏପେଙ୍ଗ୍ ଜାର୍-ଜାର୍ବିତ୍ରେ ସାଇଜ କିବା ଆନାଦେର୍। 15 ଇନେସ୍ ଦରମ୍ ସାସ୍ତର୍ତାକେ ଲେକାଆତାତ୍ନା, “ଇମ୍ଣି ମାନାୟାର୍ ବେସିକିଜି ଅରାୟ୍ କିତାର୍ନା ହେୱାରିଙ୍ଗ୍ ଅଲପ୍ପା ହାର୍ୱାତାତ୍ନା, ଆରେ ଇମ୍ଣାକାର୍ ଅଲପ୍ ନେ ଅରାୟ୍ କିତାର୍ନା ହେୱାରିଙ୍ଗ୍ ବେସି ଆତାତ୍ନା।” ତିତସ ଆରେ ତା ହୁଦାଙ୍ଗ୍ ମାଚି ଟଣ୍ଡାରିଙ୍ଗ୍ ଜୟ୍-ଜୟ୍ କିତି କାତା 16 ମାତର୍ ଆନେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଙ୍ଗା, ଇନେସ୍କି ମା ପାର୍ତିକିନି ଟଣ୍ଡେନ୍ ତିତସ ନା ଲେକେ ମିଙ୍ଗେଙ୍ଗ୍ ଡାବୁଙ୍ଗ୍ ଅରାୟ୍ କିଦେଙ୍ଗ୍ ସାଇଜ କିଦ୍ନି କାଜିଙ୍ଗ୍ ବେସି ଇଚା କିନାନା। 17 ହେୱାନ୍ ନଙ୍ଗୟ୍ ମିଙ୍ଗେଙ୍ଗ୍ ବେଟା ଆଦ୍ଦେଙ୍ଗ୍ ୱାନାନା, ତାଙ୍ଗେଙ୍ଗ୍ ଆପେଙ୍ଗ୍ ମିତାକେ ୱାଦେଙ୍ଗ୍ ଗୁୱାରି କିତି କାଜିଙ୍ଗ୍ ମିତାକେ ୱାଉନା, ମାତର୍ ହେୱାନ୍ ନିଜେ ଇଚା କିଜି ମିତାକେ ୱାଦେଙ୍ଗ୍ ୱାରିୟା ଆନାନା। 18 ଆପେଙ୍ଗ୍ ତିତସ ହୁଦାଙ୍ଗ୍ ଆରେ ରକାନିଙ୍ଗ୍ ମିତାକେ ୱାଦେଙ୍ଗ୍ ପକ୍ତାନାପା, ତାଙ୍ଗେଙ୍ଗ୍ ୱିଜୁ ମଣ୍ଡ୍ଲିନି ମାନାୟାର୍ ଜୟ୍-ଜୟ୍ କିନାରା, ଇନେସ୍କି ହେୱାନ୍ ପା ଖ୍ରୀଷ୍ଟତି ହାର୍ଦିକାବୁର୍ ଶୁଣାୟ୍ କିନାନା। 19 ଯିରୁଶାଲାମ ସହର୍ନି ପାର୍ତିକିନି ମାନାୟାରିଙ୍ଗ୍ ସାଇଜ କିଦେଙ୍ଗ୍ ଅରାୟ୍ କିତି ଡାବୁଙ୍ଗ୍ ମା ହୁଦାଙ୍ଗ୍ ମାହାଆଜି ଅସିହିନି କାଜିଙ୍ଗ୍ ମଣ୍ଡ୍ଲିନି ମାନାୟାର୍ ତାଙ୍ଗେଙ୍ଗ୍ ବାଚିକିତାର୍ନା। ହେଦାଙ୍ଗ୍ ଇଲେକେ ହେବା ଯେ, ମାପୃ ଗୌରବ ପାୟାଆନାତ୍ ଆରେ ଆସେଙ୍ଗ୍ ହେୱାରିଙ୍ଗ୍ ବେସି ସାଇଜ କିନି ଇଚା ଚଚ୍ଚାନାତା। 20 ମି ବିତ୍ରେତାଙ୍ଗ୍ ଇନେର୍ ପା, ଜେକନି ପାର୍ତିକିନି ଟଣ୍ଡାରିଙ୍ଗ୍ ସାଇଜ କିଦେଙ୍ଗ୍ ଅରାୟ୍ କିତି ଡାବୁଙ୍ଗ୍ ଅତାର୍ ଇଞ୍ଜି ମାଙ୍ଗେଙ୍ଗ୍ ଦସ୍ ହିଦ୍ମେର୍ ଇଞ୍ଜି ମା ହୁଦାଙ୍ଗ୍ ମାନି ହେ ପାର୍ତିକିନି ଟଣ୍ଡେନିଙ୍ଗ୍ ପା ତିତସ ହୁଦାଙ୍ଗ୍ ଡାବୁଙ୍ଗ୍ ଅସିହିନି କାଜିଙ୍ଗ୍ ପକ୍ନାପା। 21 ଆପେଙ୍ଗ୍ ମାପୃତାଙ୍ଗ୍ ସନ୍ମାନ୍ ପାୟାଆନି କାଜିଙ୍ଗ୍ ବେସି ଜାଗ୍ରତ୍ ଆନାପା, ମାତର୍ ଜେକନିକାର୍ ପା ପୁନାର୍ ଆସେଙ୍ଗ୍ ଟିକ୍ କିନାସା ଆରେ ସନ୍ମାନ୍ ହିଦ୍ନାର୍। 22 ଆପେଙ୍ଗ୍ ଆରେ ରକାନିଙ୍ଗ୍ ହେୱାର୍ ହୁଦାଙ୍ଗ୍ ପକ୍ନାପା, ହେୱାନ୍ କେତ୍ହଟ୍ ମାପୃ କାଜିଙ୍ଗ୍ ଟିକ୍ କାମାୟ୍ କିତାକାନ୍ ଇଞ୍ଜି ପୁନ୍ୟା ଆତାତ୍ନା, ଆରେ ପା ହେୱାନ୍ କେତେକ୍ ବାହାକାଙ୍ଗ୍ ଜାର୍ ଇଚାତାଙ୍ଗ୍ ବେସି ମାପୃ ହେବା କିତାନ୍ନା। ଇନେସ୍କି ହେୱାନ୍ ଜାର୍ତିଙ୍ଗ୍ ହାର୍ କିଜି ପୁଚାନ୍ନା ଯେ, ହେୱାନ୍ ହେୱାର୍ତାଙ୍ଗ୍ ଆଦିକ୍ ଡାବୁଙ୍ଗ୍ ଅସିହିନି ହେବା କିଦେଙ୍ଗ୍ ବେସି ଇଚା କିନାନା। 23 ଯଦି ଇନେର୍ ମିଙ୍ଗେଙ୍ଗ୍ ତିତସ ବିଷୟରେ ୱେନ୍ବା ଆଦ୍ନାର୍, ଏପେଙ୍ଗ୍ ୱେଚାଟ୍ ଯେ ହେୱାନ୍ ନା ହୁଦାଙ୍ଗ୍ ମାନ୍ଞ୍ଜି କାମାୟ୍ କିନାନା, ଆରେ ହେୱାନ୍ ନାଙ୍ଗେଙ୍ଗ୍ କାମାୟ୍ କିଦେଙ୍ଗ୍ ସାଇଜ କିଦ୍ନାନା। ଆରେ ଇମ୍ଣି ଟଣ୍ଡେନିଙ୍ଗ୍ ମଣ୍ଡ୍ଲିନି ମାନାୟାର୍ ବାଚିକିତାର୍ନା, ହେ ଟଣ୍ଡେନ୍ ହୁଦାଙ୍ଗ୍ ଆପେଙ୍ଗ୍ ପକ୍ତାପ୍ନା, ଆରେ ହେୱାର୍ ଖ୍ରୀଷ୍ଟଙ୍ଗ୍ ସନ୍ମାନ୍ ହିନି କାଜିଙ୍ଗ୍ ଇ ୱିଜୁ କାମାୟ୍ ଟିକ୍ ବାବ୍ରେ କିନାର୍। 24 ଲାଗିଙ୍ଗ୍ ଏପେଙ୍ଗ୍ ହେୱାରିଙ୍ଗ୍ ଲାଡ୍ କିୟାଟ୍, ଆରେ ୱିଜୁ ମଣ୍ଡ୍ଲିନି ପାର୍ତିକିନି ମାନାୟାରିଙ୍ଗ୍ ପୁନି କିୟାଟ୍ ଯେ, ଆପେଙ୍ଗ୍ ମି ବିଷୟରେ ହେୱାର୍ ମୁମ୍ଦ ବାଟ୍ପାଣ୍ ଆଜି ୱେଚ୍ନାକା ମିଚ୍ ଆକାୟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation