୨ କରନ୍ତିୟ 7 - New Testament in Pengo Parja Language1 ଏ ନା ଲାଡ୍ନି ପାର୍ତିକିନି ଟଣ୍ଡାର୍କାଦେର୍, ଈଶ୍ୱର ମାଙ୍ଗେଙ୍ଗ୍ ତା ହିମ୍ଣାୱାକ୍ଡ଼ା ଆଦେଙ୍ଗ୍ ପାର୍ମାଣ୍ କିତ୍ତାନ୍ନା। ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ କରାପ୍ କାମାୟ୍ ୱିଜୁ କିନାକା ବନ୍ଦ୍ କିନି ଦର୍କାର୍ ଇମ୍ଣାକା ମା ଗାଗାଡ଼୍ତିଙ୍ଗ୍ ଆରେ ଆତ୍ମାତିଙ୍ଗ୍ କରାପ୍ କିନାତା। ଆରେ ଆସେଙ୍ଗ୍ ଈଶ୍ୱରତିଙ୍ଗ୍ ସନ୍ମାନ୍ କିଜି ମାନି କାଜିଙ୍ଗ୍ ଆସେଙ୍ଗ୍ ଈଶ୍ୱର ଇଚା କିନିଲେକେ କାମାୟ୍ କିନି ଦର୍କାର୍। ପାଉଲ ୱାରିୟା ଆତାନ୍ 2 ଏ ଟଣ୍ଡାର୍କାଦେର୍ ଆପେଙ୍ଗ୍ ଇଚା କିନାପା ଯେ, ଏପେଙ୍ଗ୍ ମାଙ୍ଗେଙ୍ଗ୍ ମି ଗରବ୍ତାଙ୍ଗ୍ ଲାଡ୍ କିଦାଟ୍। ଆପେଙ୍ଗ୍ ଇନେରିଙ୍ଗ୍ ପା ଅନ୍ୟାୟ୍ କିୱାତାପ୍ନା, ଇନେରିଙ୍ଗ୍ ନଷ୍ଟ କିୱାତାପ୍ନା କି ଇନେର୍ତି ଲସ୍ କିୱାତାପ୍ନା। 3 ଆନେଙ୍ଗ୍ ମିଙ୍ଗେଙ୍ଗ୍ ଦସ୍ କିଦ୍ଦେଙ୍ଗ୍ ଇ ୱିଜୁ ବିଷୟରେ ୱେଚ୍ଚୁଙ୍ଗା, ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ଆଗେ ପା ୱେଚ୍ଚି ମାନ୍ଞ୍ଚାଙ୍ଗ୍ ଯେ, ଆସେଙ୍ଗ୍ ହାଃତିସ୍ କି ଜିବୁନ୍ ମାଚିସ୍ ପା ମାହାଆଜି ମାନାସ୍। ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ନା ଗରବ୍ତାଙ୍ଗ୍ ଲାଡ୍ କିଦ୍ନାଙ୍ଗା। 4 ଆନେଙ୍ଗ୍ ମି କାଜିଙ୍ଗ୍ ବେସି ପାର୍ତି କିନାଙ୍ଗା, ଆରେ ମି କାଜିଙ୍ଗ୍ ଆନେଙ୍ଗ୍ ବେସି ବାଟ୍ପାଣ୍ ଆନାଙ୍ଗା। ଏପେଙ୍ଗ୍ ନାଙ୍ଗେଙ୍ଗ୍ ବେସି ସାସ୍ ହିତ୍ତାଦେର୍, ଆରେ ଆସେଙ୍ଗ୍ ବେସି ଦୁଃକ୍ କଷ୍ଟ ପାୟାଆତି ବାଦୁଲ୍ରେ ନାଙ୍ଗେଙ୍ଗ୍ ବେସି ୱାରି କିତ୍ତାଦେର୍। 5 ଏଚେପାଦ୍ନା ଆପେଙ୍ଗ୍ ତ୍ରୁୟାସ୍ ସହର୍ତିଙ୍ଗ୍ ପିସ୍ତି ମାକଦନିଆ ସହର୍ତାକେ ୱାତାପ୍, ଆପେଙ୍ଗ୍ ଜମ୍ୱାଦାଙ୍ଗ୍ ମାଚାପ୍। ଇନେସ୍କି ମା ଚାରିବେଣ୍ତାଙ୍ଗ୍ ଗଣ୍ଡ୍ଗଲ୍ ଆଜି ମାଚାର୍ ଆରେ ଆପେଙ୍ଗ୍ ବେସି ପାଣ୍ଡ୍ରାଆଜି ମାଚାପ୍। 6 ମାତର୍ ସାସ୍ ହିଲି ମାନାୟାରିଙ୍ଗ୍ ସାସ୍ ହିନି ଈଶ୍ୱର ତିତସ୍ତିଙ୍ଗ୍ ପକ୍ଚି ମାଙ୍ଗେଙ୍ଗ୍ ସାସ୍ ହିତ୍ତାନ୍। 7 ହେୱାନ୍ ୱାତି କାଜିଙ୍ଗ୍ ଆନେଙ୍ଗ୍ ବେସି ୱାରିୟା ଆତାଙ୍ଗ୍, ମାତର୍ ଏଚେପାଦ୍ନା ଆନେଙ୍ଗ୍ ୱେଚାଙ୍ଗ୍ ଏପେଙ୍ଗ୍ ତିତସତିଙ୍ଗ୍ ସାସ୍ ହିତାଦେର୍ ଆନେଙ୍ଗ୍ ଆରେ ଆଦିକ୍ ସାସ୍ ଆତାଙ୍ଗ୍। ଏଚେପାଦ୍ନା ହେୱାନ୍ ନାଙ୍ଗେଙ୍ଗ୍ ୱେଚ୍ଚାତାନ୍, ଏପେଙ୍ଗ୍ ଆନେଙ୍ଗ୍ ୱାନି ହାଜିତିଙ୍ଗ୍ କାନାଦେରା, ଆରେ ଇନାକା ୱିଜୁ ଗଟାଆତାତ୍ନା ହେଦାଙ୍ଗ୍ କାଜିଙ୍ଗ୍ ଦୁଃକ୍ ଆନାଦେରା ଆରେ ଏପେଙ୍ଗ୍ ନାଙ୍ଗେଙ୍ଗ୍ ହାତ୍ପା ଲାଡ୍କିନି ବିଷୟରେ ୱେନ୍ଞ୍ଜି ବେସି ୱାରିୟା ଆତାଙ୍ଗ୍। 8 ଆନେଙ୍ଗ୍ ମି କାଜିଙ୍ଗ୍ ଲେକିକିଜି ମାଚି ଚିଟି କାଜିଙ୍ଗ୍ ଦୁଃକ୍ ଆଜି ମାଚାଦେର୍, ମାତର୍ ଆନେଙ୍ଗ୍ ଟିକ୍ କିତାଙ୍ଗ୍ନା ଇଞ୍ଜି ବାବିକିଜି ମାଚାଙ୍ଗ୍। ଏପେଙ୍ଗ୍ ଅଲପ୍ଦିନ୍ କାଜିଙ୍ଗ୍ ଦୁଃକ୍ କିତାକା ହୁଡ଼୍ଜି ଆନେଙ୍ଗ୍ ପାର୍ତୁମ୍ ବୁଲ୍ କିତାଙ୍ଗ୍ ଇଞ୍ଜି ବାବିକିଜି ମାଚାଙ୍ଗ୍। 9 ମାତର୍ ନଙ୍ଗୟ୍ ଆନେଙ୍ଗ୍ ହେ ଚିଟି ମିଙ୍ଗେଙ୍ଗ୍ ଲେକିକିଜି ମାଚି କାଜିଙ୍ଗ୍ ୱାରିୟା ଆନାଙ୍ଗା, ଏପେଙ୍ଗ୍ ଦୁଃକ୍ କିତି କାଜିଙ୍ଗ୍ ଆକାୟ୍, ମାତର୍ ହେ ଦୁଃକ୍ ମି ମାନ୍ତିଙ୍ଗ୍ ବାଦ୍ଲାୟ୍ କିତ୍ତାତ୍। ଆରେ ଏପେଙ୍ଗ୍ ବୁଲ୍ କିତାପ୍ନା ଇଞ୍ଜି ଈଶ୍ୱରତିଙ୍ଗ୍ କେମା ଏନ୍ତାଦେର୍। ଇଦାଙ୍ଗ୍ ହେ ଦୁଃକ୍ ଈଶ୍ୱର ଲକ୍ ପାୟା ଆଏର୍ ଇଞ୍ଜି ଈଶ୍ୱର ଇଚାକିନାନ୍, ଲାଗିଙ୍ଗ୍ ମା କାଜିଙ୍ଗ୍ ମିଦାଙ୍ଗ୍ ଇନାକା ଲସ୍ ଆୱାତାତ୍ନା। 10 ଇନେସ୍କି ଈଶ୍ୱର ଇଚା ଅନୁସାରେ ଯଦି ଆସେଙ୍ଗ୍ ଇ ଦୁଃକ୍ ପାୟାଆନାସ୍, ଲାଗିଙ୍ଗ୍ ଆସେଙ୍ଗ୍ ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିଜି ଉଦାର୍ ପାୟାଆନି କାଜିଙ୍ଗ୍ ଉପାୟ୍ କିନାସ୍। ଆରେ ଇଲେକେ ଦୁଃକ୍ କାଜିଙ୍ଗ୍ ଆସେଙ୍ଗ୍ ମାନ୍ ଦୁଃକ୍ ଆଉସ୍। ମାତର୍ ଇ ପୁର୍ତିନି ମାନାୟାର୍ ପାପ୍ କାମାୟ୍ ପିହ୍ୱାଦାଙ୍ଗ୍ ମାନ୍ବାଦ୍ଲାୟ୍ କିୱିତିସ୍, ହେୱାର୍ ପାୟାଆନି ଦୁଃକ୍ କଷ୍ଟ ୱିଜୁଦିନ୍ ଦଣ୍ଡ୍ ହିନାତ୍। 11 ଈଶ୍ୱର ଇଚା ଅନୁସାରେ ଏପେଙ୍ଗ୍ ଦୁଃକ୍ କଷ୍ଟ ପାୟାଆତି କାଜିଙ୍ଗ୍ ମି ବିତ୍ରେ ଇନାକା ବାଦ୍ଲା ଆତାତ୍ନା ହେଦାଙ୍ଗ୍ ଏପେଙ୍ଗ୍ ପୁନାଟ୍। ହାର୍ କାମାୟ୍ କିଦେଙ୍ଗ୍ ବେସି ସାସ୍ ପାୟା ଆତାଦେର୍ନା, ମି ବିରଦ୍ତାକେ ୱାତି କାତାତିଙ୍ଗ୍ ମିଚ୍ ଇଞ୍ଜି ଚଚ୍ଚେଙ୍ଗ୍ ଆଡ୍ନାଦେରା ଆରେ ଅନ୍ୟାୟ୍ ବିଷୟରେ ରିସା ଆଦେଙ୍ଗ୍, ଜାର୍ତିଙ୍ଗ୍ ବେସି ଜାଗ୍ରତ୍ କିଦେଙ୍ଗ୍ ହିକା ଆତାଦେର୍ନା। ଏପେଙ୍ଗ୍ ନାଙ୍ଗେଙ୍ଗ୍ ମାହା ଆଦ୍ଦେଙ୍ଗ୍ ବେସି ଇଚା କିନାଦେରା, ଆରେ ଏପେଙ୍ଗ୍ ନା ଆଦେସ୍ତିଙ୍ଗ୍ ମାନି କିଦେଙ୍ଗ୍ ବେସି ଇଚା କିତାଦେର୍ ଆରେ ବୁଲ୍ କାମାୟ୍ କିନାକାରିଙ୍ଗ୍ ଦଣ୍ଡ୍ ହିଦେଙ୍ଗ୍ ରେଡି ଆତାଦେର୍ନା। ଏପେଙ୍ଗ୍ ପାର୍ମାଣ୍ କିତାଦେର୍ନା ଯେ ୱିଜୁ ଟିକ୍ଟାକ୍ ବିଷୟରେ ଅଲପ୍ପା ପିହ୍ୱାତାଦେର୍ନା। 12 ଆନେଙ୍ଗ୍ ମି କାଜିଙ୍ଗ୍ କେତେକ୍ ଚିଟି ଲେକିକିଜି ମାଚାଙ୍ଗ୍ ହେଦାଙ୍ଗ୍ କରାପ୍ କାମାୟ୍ କିନାକାରିଙ୍ଗ୍ ଦଣ୍ଡ୍ ହିଦେଙ୍ଗ୍ ଆକାୟ୍, ମାତର୍ ଏପେଙ୍ଗ୍ ଈଶ୍ୱର ଆଗେ ଚଚ୍ଚେଙ୍ଗ୍ ଆଡ୍ନାଦେର୍ ଯେ, ଏପେଙ୍ଗ୍ ମାଙ୍ଗେଙ୍ଗ୍ ବେସି ସନ୍ମାନ୍ କିଦ୍ନାଦେରା। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଲେକିକିଜି ମାଚାଙ୍ଗ୍। 13 ଆପେଙ୍ଗ୍ ଇ ୱିଜୁ ବିଷୟ କାଜିଙ୍ଗ୍ ବେସି ସାସ୍ ଆତାପ୍। ମା ନିଜର୍ ସାସ୍ ହୁଦାଙ୍ଗ୍ ତିତସ୍ତିଙ୍ଗ୍ ଏପେଙ୍ଗ୍ ଆସ୍ତାଦେର୍ ଆରେ ତା ମାନ୍ତିଙ୍ଗ୍ ଏପେଙ୍ଗ୍ ୱାରି କିତାଦେର୍, ହେଦାଙ୍ଗ୍ ହୁଡ଼୍ଜି ଆପେଙ୍ଗ୍ ବେସି ୱାରିୟା ଆତାପ୍। 14 ଆନେଙ୍ଗ୍ ତାଙ୍ଗେଙ୍ଗ୍ ୱେଚ୍ଚି ମାଚାଙ୍ଗ୍ ଯେ, ମି କାଜିଙ୍ଗ୍ ଆନେଙ୍ଗ୍ କେତେକ୍ ବାଟ୍ପାଣ୍ ଆନାଙ୍ଗା, ଆରେ ନାଙ୍ଗେଙ୍ଗ୍ ଏପେଙ୍ଗ୍ ଲାଜ୍ କିଦ୍ୱାତାଦେର୍ନା। ଆନେଙ୍ଗ୍ ମିଙ୍ଗେଙ୍ଗ୍ ୱିଜୁଦିନ୍ ସତ୍ ୱେଚ୍ଚାତାଙ୍ଗ୍ନା, ଆରେ ମି କାଜିଙ୍ଗ୍ ତିତସ ଆଗେ ଆନେଙ୍ଗ୍ ବାଟ୍ପାଣ୍ ଆଜି ୱେଚ୍ଚି କାତା ସତ୍ ଇଞ୍ଜି ପୁନ୍ୟା ଆତାତ୍। 15 ହେୱାନ୍ ଆଗେତାଙ୍ଗ୍ ନଙ୍ଗୟ୍ ଆଦିକ୍ ଚିନ୍ତା କିନାନା ଏଚେପାଦ୍ନା ହେୱାନ୍ ମି ବିଷୟରେ ବାବିକିନାନା, ଏପେଙ୍ଗ୍ ଇନେସ୍କିଜି ତାଙ୍ଗେଙ୍ଗ୍ ସନ୍ମାନ୍ ହୁଦାଙ୍ଗ୍ ଆସ୍ତାଦେର୍, ତା କାତା ୱେଚାଦେର୍ ଆରେ ତା ଜାତୁନ୍ ଅଜି ମାଚାଦେର୍। 16 ଆନେଙ୍ଗ୍ ନଙ୍ଗୟ୍ ବେସି ୱାରିୟା ଆନାଙ୍ଗା, ଇନେସ୍କି ଆନେଙ୍ଗ୍ ମି ଜପି ପୁରା ପାର୍ତି କିନାଙ୍ଗା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation