୨ କରନ୍ତିୟ 6 - New Testament in Pengo Parja Language1 ଆନେଙ୍ଗ୍ ଈଶ୍ୱର ହୁଦାଙ୍ଗ୍ ମାହାଆଜି କାମାୟ୍ କିନାଙ୍ଗା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଜି ୱେଚ୍ଚାନାଙ୍ଗା ଯେ, ହେୱାନ୍ ମିଙ୍ଗେଙ୍ଗ୍ ଦୟାକିଜି ହିତ୍ତି ଚାନିଆଆନି ହାର୍ଦିକାବୁର୍ତିଙ୍ଗ୍ ଆହାଟ୍। 2 ଇନେସ୍କି ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା, “ଟିକ୍ ଟାଇମ୍ତାଙ୍ଗ୍ ଆନେଙ୍ଗ୍ ବେଣ୍ ୱେନ୍ଞ୍ଜି ମାଚାଙ୍ଗ୍। ଆରେ ଉଦାର୍ ପାୟାଆନି ନାଞ୍ଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ସାଇଜ କିଜି ମାନ୍ଞ୍ଚାଙ୍ଗ୍।” ଲାଗିଙ୍ଗ୍ ନଙ୍ଗୟ୍ ମିଙ୍ଗେଙ୍ଗ୍ ସାଇଜ କିଦ୍ନି କାଜିଙ୍ଗ୍ ଜାଗ୍ରତ୍ ଆତାନ୍ନା। ନେଞ୍ଜେଙ୍ଗ୍ ଉଦାର୍ ପାୟାଆନିଦିନ୍। 3 ଆପେଙ୍ଗ୍ ଈଶ୍ୱର ହୁଦାଙ୍ଗ୍ ମାହାଆଜି ହେବା କିନାପା, ଆରେ ଇନେର୍ ପା ମା ହେବା କିନି କାଜିଙ୍ଗ୍ ଦସ୍ ହିଦ୍ଦେଙ୍ଗ୍ ଆଡ଼୍ଦୁର୍। ହେଦାଙ୍ଗ୍ ଆପେଙ୍ଗ୍ ଇଲେକେ ଜିବୁନ୍ କାଟି କିଦେଙ୍ଗ୍ ଉପାୟ୍ କିନାପା ଯେ, ଲାଗିଙ୍ଗ୍ ଇନେର୍ ପା ମା କାମାୟ୍ କାଜିଙ୍ଗ୍ ମାପୃଙ୍ଗ୍ ଦାସ୍ତେଙ୍ଗ୍ କଷ୍ଟ ପାୟା ଆଉର୍। 4 ମାତର୍ ୱିଜୁ ପର୍କାର୍ ଦୁଃକ୍ କଷ୍ଟ ୱାତିସ୍ ପା ଆପେଙ୍ଗ୍ ସାସ୍ ଆଜି ସମ୍ବାଲି କିନାପା, ଲାଗିଙ୍ଗ୍ ଆସେଙ୍ଗ୍ ଇନାକା କିତିସ୍ ପା ଆସେଙ୍ଗ୍ ହାତ୍ପା ଈଶ୍ୱରତିଙ୍ଗ୍ ହେବା କିନାପା ଇଞ୍ଜି ଚଚ୍ଚେଙ୍ଗ୍ ଉପାୟ୍ କିନାପା। 5 ମାଙ୍ଗେଙ୍ଗ୍ ମାନାୟାର୍ ଟ୍ରାକ୍ତାତାର୍, ଜଇଲ୍ ଇଞ୍ଜ ଇଡ଼୍ଦାତାର୍, ମାଙ୍ଗେଙ୍ଗ୍ ରିସା ଆତ୍ତାର୍, ଆପେଙ୍ଗ୍ ୱାହ୍ନି ପାତେକ୍ କାମାୟ୍ କିଜି ମାଚାପ୍, ଆପେଙ୍ଗ୍ କେତ୍ଦିନ୍ ହୁଞ୍ଜ୍ୱାଦାଙ୍ଗ୍ ମାଚାପ୍, ଆରେ ଆପେଙ୍ଗ୍ କେତ୍ହଟ୍ ନାସ୍କି ମାଚାପ୍। 6 ଆପେଙ୍ଗ୍ ଜାର୍ତିଙ୍ଗ୍ ପବିତ୍ର କିତାପ୍, ଆପେଙ୍ଗ୍ ୱିଜୁ ବିଷୟରେ ବୁଜାଆତାପ୍, ଆପେଙ୍ଗ୍ ସାସ୍ ଆତାପ୍, ଆପେଙ୍ଗ୍ ମାନାୟାରିଙ୍ଗ୍ ଦୟା କିତାପ୍। ଆରେ ଆପେଙ୍ଗ୍ ମାନାୟାରିଙ୍ଗ୍ ହାତ୍ପା ଲାଡ୍ କିତାପ୍ ଆରେ ଆପେଙ୍ଗ୍ ପବିତ୍ର ଆତ୍ମାତିଙ୍ଗ୍ ସାଇଜ କିଦେତ୍ ଇଞ୍ଜି ଆହା କିତାପ୍। 7 ଆପେଙ୍ଗ୍ ଈଶ୍ୱର ଶାକ୍ତିତାଙ୍ଗ୍ ସତ୍ ହାର୍ଦିକାବୁର୍ତିଙ୍ଗ୍ ଶୁଣାୟ୍ କିତାପ୍। ଆରେ ର ସେନା ଯୁଜ୍ତାକେ ଅସ୍ତର୍ ସସ୍ତର୍ ବ୍ୟବହାର୍ କିନାନ୍, ହେଲେକେ ଆପେଙ୍ଗ୍ ଦରମ୍ଆଜି ଜିବୁନ୍ କାଟିକିଜି ମା ବିରଦ୍ନି ମାନାୟାରିଙ୍ଗ୍ ଆରାୟ୍ କିତାପ୍। 8 ଆସେଙ୍ଗ୍ ଈଶ୍ୱର ହେବା କିନାପା, ମାନାୟାର୍ ମାଙ୍ଗେଙ୍ଗ୍ ସନ୍ମାନ୍ ହିଦେର୍ କି ଗିଣ୍ କିଦେର୍, ହେୱାର୍ ମାଙ୍ଗେଙ୍ଗ୍ କରାପ୍ ଇଞ୍ଜି ଜେକନିକାରିଙ୍ଗ୍ ୱେଚେର୍ କି ମା ଜୟ୍-ଜୟ୍ କିୟେର୍। ଆପେଙ୍ଗ୍ ଦରମ୍ ଲକ୍, ମାତର୍ ହେୱାର୍ ମାଙ୍ଗେଙ୍ଗ୍ ମିଚ୍ୱା ଇଞ୍ଜି ଇଞ୍ଜ୍ନାରା। 9 କେତ୍ଜାଣ୍ ମାଙ୍ଗେଙ୍ଗ୍ ହାର୍ କିଜି ପୁନ୍ଞ୍ଚାର୍ନା, ମାତର୍ କେତ୍ଜାଣ୍ ମାଙ୍ଗେଙ୍ଗ୍ ପୁଞ୍ଜ୍ୱିତିଲେକେ ବ୍ୟବହାର୍ କିଦ୍ନାରା। ମାନାୟାର୍ ମାଙ୍ଗେଙ୍ଗ୍ ୱିଜୁଦିନ୍ ମାର୍ନେ ଅସ୍ତେଦେଙ୍ଗ୍ ଉପାୟ୍ କିନାରା, ମାତର୍ ଆପେଙ୍ଗ୍ ନଙ୍ଗୟ୍ ପାତେକ୍ ଜିବୁନ୍ ମାନାପ୍। ମାଙ୍ଗେଙ୍ଗ୍ କେତ୍ହଟ୍ ମାନାୟାର୍ ଟ୍ରାକ୍ତାତାର୍ନା, ମାତର୍ ମାର୍ନେ ଅସ୍ତାୱାତାର୍ନା। 10 ଆପେଙ୍ଗ୍ ବେସି ଦୁଃକ୍ତ ମାନାପ୍, ମାତର୍ ଆପେଙ୍ଗ୍ ୱିଜୁଦିନ୍ ୱାରି କିନାପା। ଆପେଙ୍ଗ୍ ଗରିବ୍, ମାତର୍ ଆପେଙ୍ଗ୍ ପବିତ୍ର ଆତ୍ମାନି ଦନ୍ ଜେକନିକାରିଙ୍ଗ୍ ହିନାପା। ଆପେଙ୍ଗ୍ ଆର୍ଜା ଆୱାତାପ୍ନା ମାତର୍ ମା ତାକେ ୱିଜୁ ଜିନିଷ୍ ମାନାତ୍। 11 ଏ ଲାଡ୍ନି କରନ୍ତିୟ ସହର୍ନି ପାର୍ତିକିନି ଟଣ୍ଡାର୍କାଦେର୍, ଆପେଙ୍ଗ୍ ମିଙ୍ଗେଙ୍ଗ୍ ଦରମ୍ଆଜି ୱେଚ୍ଚି ମାନ୍ଞ୍ଚାପ୍, ଇନେସ୍କି ମିଙ୍ଗେଙ୍ଗ୍ ମା ଗରବ୍ତାଙ୍ଗ୍ ଲାଡ୍ କିଦ୍ନାପା। 12 ଆପେଙ୍ଗ୍ ମିଙ୍ଗେଙ୍ଗ୍ ଲାଡ୍ କିଦ୍ନାକା ବନ୍ଦ୍ କିଉପା, ମାତର୍ ଏପେଙ୍ଗ୍ ମାଙ୍ଗେଙ୍ଗ୍ ଲାଡ୍ କିଦ୍ନାକା ବନ୍ଦ୍ କିନାଦେରା। 13 ଏପେଙ୍ଗ୍ ନା ଜାର୍ ମାଜିର୍ଲେକେ, ଲାଗିଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା ଏପେଙ୍ଗ୍ ନାଙ୍ଗେଙ୍ଗ୍ ମି ଗରବ୍ତାଙ୍ଗ୍ ଲାଡ୍ କିଦାଟ୍। ଜିବୁନ୍ ମାନି ଈଶ୍ୱର ମନ୍ଦିର୍ 14 ହାର୍ ଆରେ ଅଦରମ୍ ରବେ ମାହାଆଜି ମାନୁକ୍, ଅଜଡ଼୍ ଆରେ ମାଜ୍ଗା ରବେ ମାନୁକ୍, ହେ ଲେକେ ଏପେଙ୍ଗ୍ ପାର୍ତିକିୱି ମାନାୟାର୍ ହୁଦାଙ୍ଗ୍ ହାମାନ୍ ଆକାୟ୍। ଲାଗିଙ୍ଗ୍ ଏପେଙ୍ଗ୍ ହେୱାର୍ ଦଳ୍ ହୁଦାଙ୍ଗ୍ ମାହା ଆମାଟ୍। 15 ଖ୍ରୀଷ୍ଟ ଆରେ ଶୟତାନ୍ ରବେ ମାନୁର୍, ଲାଗିଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତିକିନି ମାନାୟ୍ କାଦେର୍ ଖ୍ରୀଷ୍ଟଙ୍ଗ୍ ପାର୍ତିକିୱି ମାନାୟାର୍ ହୁଦାଙ୍ଗ୍ ମାହା ଆମାଟ୍। 16 ହେଲେକେ ଈଶ୍ୱର ମନ୍ଦିର୍ତାକେ ମୁର୍ତିତିଙ୍ଗ୍ ଇଟ୍ୟା ଆଉତ୍, ଇନେସ୍କି ହେଦାଙ୍ଗ୍ ଟିକ୍ ଆକାୟ୍। ଈଶ୍ୱର ୱେଚ୍ଚାନ୍ ଆସେଙ୍ଗ୍ ଜିବୁନ୍ ମାନି ଈଶ୍ୱର ମନ୍ଦିର୍, “ଆନେଙ୍ଗ୍ ଇ ମାନାୟାର୍ ହୁଦାଙ୍ଗ୍ ମାହାଆଜି ମାନାଙ୍ଗ୍। ଆନେଙ୍ଗ୍ ହେୱାର୍ ଈଶ୍ୱର ଆନାଙ୍ଗ୍ ଆରେ ହେୱାର୍ ନାଲକ୍ ଆଦ୍ନାର୍। 17 ହେଦାଙ୍ଗ୍ କାଜିଙ୍ଗ୍ ମାପୃ ୱେଚ୍ଚାତ୍, ଏପେଙ୍ଗ୍ ହେୱାର୍ତାଙ୍ଗ୍ ହସି ୱାଡ, ଇମ୍ଣି ମାନାୟାର୍ ଈଶ୍ୱରତିଙ୍ଗ୍ ମାନି କିଉରା। ଏପେଙ୍ଗ୍ ହେୱାର୍ କିନି ମୁର୍ତି ପୁଜାତାଙ୍ଗ୍ କରାପ୍ କାମାୟ୍ତାଙ୍ଗ୍ ଦେହା ମାନାଟ୍, ଆରେ ଆନେଙ୍ଗ୍ ମିଙ୍ଗେଙ୍ଗ୍ ଆସ୍ତାନାଙ୍ଗ୍। 18 ୱିଜୁ ଶାକ୍ତିମାନି ଈଶ୍ୱର ଇଲେକେ ଇନାତା ଯେ, ଆନେଙ୍ଗ୍ ମି ଆବା ଆନାଙ୍ଗ୍ ଆରେ ଏପେଙ୍ଗ୍ ନା ହିମ୍ଣାଙ୍ଗ୍ ଆନାଦେର୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation