୨ କରନ୍ତିୟ 5 - New Testament in Pengo Parja Languageମା ଇଲ୍ ସରଗ୍ତାକେ ମାନାତ୍ 1 ଇନେସ୍କି ଆସେଙ୍ଗ୍ ପୁଚାସ୍ନା ଯେ, ମା ଗାଗାଡ଼୍ ଇ ପୁର୍ତିତାକେ ପିରିତାଙ୍ଗ୍ ରସ୍ତି କୁଡ଼ିଆତାକେ ମାନିଲେକେ ମାନାସା। ଯଦି ଆସେଙ୍ଗ୍ ହାଃନାସ୍, ଲାଗିଙ୍ଗ୍ ଈଶ୍ୱର ନିଜେ ରସ୍ତି ୱିଜୁଦିନ୍ ମାନି ପୁନି ଗାଗାଡ଼୍ତିଙ୍ଗ୍ ର ଇଲ୍ ଲେକେ ସରଗ୍ତାକେ ହିଦ୍ନାନା, ହେଦାଙ୍ଗ୍ ମାନାୟାର୍ ରସ୍ତି ଲେକେ ଆକାୟ୍। 2 ଆସେଙ୍ଗ୍ ନଙ୍ଗୟ୍ ଇ ଗାଗାଡ଼୍ କାଜିଙ୍ଗ୍ ବେସି ଦୁଃକ୍ କଷ୍ଟ ପାୟାଆନାସା, ଆରେ ଆସେଙ୍ଗ୍ ର ପୁନି ହେନ୍ଦ୍ରା ଉସ୍ପିତିଲେକେ ସରଗ୍ନି ପୁନି ଗାଗାଡ଼୍ତିଙ୍ଗ୍ ଉସ୍ପେଦେଙ୍ଗ୍ ହେ ଦିନ୍ତିଙ୍ଗ୍ କାନାସା। 3 ଏଚେପାଦ୍ନା ଆସେଙ୍ଗ୍ ସରଗ୍ନି ଗାଗାଡ଼୍ତିଙ୍ଗ୍ ପାୟାଆନାସ୍, ହେପାଦ୍ନା ଆସେଙ୍ଗ୍ ହେନ୍ଦ୍ରା ଉସ୍ପିତିଲେକେ ମା ଗାଗାଡ଼୍ ଚଞ୍ଜ୍ନାତ୍। 4 ମା ହାଃନି ଗାଗାଡ଼୍ ମାଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍ନାତା। ମାତର୍ ଆସେଙ୍ଗ୍ ପୁର୍ତିତାକେ ମାନି ଗାଗାଡ଼୍ତିଙ୍ଗ୍ ପିସ୍ତେଙ୍ଗ୍ ଇଚା କିଉସା, ଆସେଙ୍ଗ୍ ଇଚା କିନାସା ଯେ, ଈଶ୍ୱର ମାଙ୍ଗେଙ୍ଗ୍ ସରଗ୍ନି ଗାଗାଡ଼୍ ହିଦେନ୍। ଲାଗିଙ୍ଗ୍ ମା ପୁନି ଗାଗାଡ଼୍, ମା ହାଃନି ଗାଗାଡ଼୍ତିଙ୍ଗ୍ ୱିଜୁଦିନ୍ କାଜିଙ୍ଗ୍ ବାଦ୍ଲାୟ୍ କିନାତ୍। 5 ଈଶ୍ୱର ନିଜେ ମା କାଜିଙ୍ଗ୍ ଇଲେକେ କିତାନ୍ନା, ହେଦାଙ୍ଗ୍ କାଜିଙ୍ଗ୍ ହେୱାନ୍ ତା ପବିତ୍ର ଆତ୍ମାତିଙ୍ଗ୍ ଗେରେଣ୍ଟିଲେକେ ମାଙ୍ଗେଙ୍ଗ୍ ହିତ୍ତାନ୍ନା। 6 ଲାଗିଙ୍ଗ୍ ଆସେଙ୍ଗ୍ ହାର୍ କିଜି ପୁଚାପ୍ନା ଯେ, ଆସେଙ୍ଗ୍ ପୁନ୍ଞ୍ଜି ମାଚିସ୍ ପା ଆସେଙ୍ଗ୍ ଇ ଗାଗାଡ଼୍ତାକେ ମାନି କାଜିଙ୍ଗ୍ ଆସେଙ୍ଗ୍ ମାପୃ ମାନି ବାହା ସରଗ୍ତାକେ ନଙ୍ଗୟ୍ ପାତେକ୍ ହାଲୁସେ। 7 ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ହୁଡ଼୍ଜି ଜିବୁନ୍ କାଟି କିଉସା ମାତର୍ ତାଙ୍ଗେଙ୍ଗ୍ ପାର୍ତି କିଜି ଜିବୁନ୍ କାଟି କିନାସା। 8 ଆଁ, ଆସେଙ୍ଗ୍ ହାର୍ କିଜି ପୁଚାପ୍ନା, ଏଚେପାଦ୍ନା ଆସେଙ୍ଗ୍ ଇ ପୁର୍ତିନି ଗାଗାଡ଼୍ତିଙ୍ଗ୍ ପିହ୍ନାସ୍, ତା ଅର୍ତ ଆସେଙ୍ଗ୍ ହାଃନାସ୍, ହେପାଦ୍ନା ଆସେଙ୍ଗ୍ ଈଶ୍ୱର ହିଦ୍ନି ପୁନି ଗାଗାଡ଼୍ତାଙ୍ଗ୍ ମାପୃ ହୁଦାଙ୍ଗ୍ ମାନାସ୍। 9 ଲାଗିଙ୍ଗ୍ ମାଦାଙ୍ଗ୍ ର ଇଚା ମାନି ଦର୍କାର୍ ଯେ, ଆସେଙ୍ଗ୍ ଇ ଗାଗାଡ଼୍ତାକେ ମାଚିସ୍ କି ଇ ଗାଗାଡ଼୍ତାଙ୍ଗ୍ ଦେହା ମାଚିସ୍, ହେୱାନ୍ ୱାରିୟା ଆନିଲେକେ କାମାୟ୍ ୱିଜୁଦିନ୍ କିଜି ମାନାସ୍। 10 ଇନେସ୍କି ଆସେଙ୍ଗ୍ ବିଚାର୍ ଆନି କାଜିଙ୍ଗ୍ ଯୀଶୁ ଖ୍ରୀଷ୍ଟ ବିଚାର୍କିନି ବାହାତାକେ ନିଲ୍ୟା ଆନାତ୍, ଆସେଙ୍ଗ୍ ଇନାକା ମା ଗାଗାଡ଼୍ତାକେ କିଜି ମାନାସ୍ ହେୱାନ୍ ମାଙ୍ଗେଙ୍ଗ୍ ମା ହାର୍ ଆରେ କରାପ୍ କାମାୟ୍ କାଜିଙ୍ଗ୍ ପୁରଷ୍କାର୍ ହିଦ୍ନାନ୍। ଆପେଙ୍ଗ୍ ଈଶ୍ୱର ବାଦୁଲ୍ ତାକେ ହାର୍ଦିକାବୁର୍ ଶୁଣାୟ୍ କିନି ମାନାୟ୍ 11 ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାପା ଯେ, ଏପେଙ୍ଗ୍ ଆପେଙ୍ଗ୍ ୱେଚ୍ଚିତି ସତ୍ତିଙ୍ଗ୍ ପାର୍ତିକିୟାଟ୍। ଈଶ୍ୱର ମା ବିଷୟରେ ହାର୍ କିଜି ପୁଚାନ୍ନା ଆରେ ଆନେଙ୍ଗ୍ ଆହା କିନାଙ୍ଗା ଯେ, ଏପେଙ୍ଗ୍ ପା ଇ ବିଷୟରେ ପୁନ୍ଞ୍ଜି ମାନାଦେର୍। 12 ଆପେଙ୍ଗ୍ ଆରେରଗ ମି ଆଗେ ଗାଜାକାପ୍ ଇଞ୍ଜି ଚଞ୍ଜିଆ ଆନି କାଜିଙ୍ଗ୍ ଉପାୟ୍ କିଉପା, ମାତର୍ ମା ହୁଦାଙ୍ଗ୍ ମାହାଆଜି ବାଟ୍ପାଣ୍ ଆନି କାଜିଙ୍ଗ୍ ସୁଯଗ୍ ହିଦ୍ନାପା। ଲାଗିଙ୍ଗ୍ ଏପେଙ୍ଗ୍ ଗରବ୍ ବିଷୟ କାଜିଙ୍ଗ୍ ବାଟ୍ପାଣ୍ ଆୱାଦାଙ୍ଗ୍ ବାର୍ତ ବାଟ୍ପାଣ୍ ଆନାକାରିଙ୍ଗ୍ ଉତର୍ ହିଦେଙ୍ଗ୍ ଆଡ୍ନାଦେର୍। 13 ଯଦି ଇନେର୍ ମାଙ୍ଗେଙ୍ଗ୍ ଇଞ୍ଜ୍ନାର୍ ଏପେଙ୍ଗ୍ ପାଗଲ୍, ହେଦାଙ୍ଗ୍ ଈଶ୍ୱର କାଜିଙ୍ଗ୍ ଗୌରବ ଆନାତ୍। ଆରେ ଯଦି ଇନେର୍ ଇଞ୍ଜ୍ନାର୍ ମି ମାନ୍ ଟିକ୍ ମାନାତ୍, ହେଦାଙ୍ଗ୍ ତା କାଜିଙ୍ଗ୍ ହାର୍ ବିଷୟ ଆନାତ୍। 14 ଇନେସ୍କି ଖ୍ରୀଷ୍ଟ ଲାଡ୍ ମାଙ୍ଗେଙ୍ଗ୍ କଣ୍ଟ୍ରୁଲ୍ କିଦ୍ନାତା, ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ପାର୍ତି କିନାସା ଯେ, ଖ୍ରୀଷ୍ଟ ୱିଜାର୍ କାଜିଙ୍ଗ୍ ହାଃତାନ୍, ଆରେ ଆସେଙ୍ଗ୍ ଇଦାଙ୍ଗ୍ ପାର୍ତି କିନାସା ଯେ, ଆସେଙ୍ଗ୍ ପା ତା ହୁଦାଙ୍ଗ୍ ହାଃତାସ୍ନା। 15 ଖ୍ରୀଷ୍ଟ ୱିଜାର୍ ମାନାୟାର୍ କାଜିଙ୍ଗ୍ ହାଃତାନ୍, ଲାଗିଙ୍ଗ୍ କେତେକ୍ ମାନାୟାର୍ ହେୱାନ୍ ହିତି ପୁନି ଜିବୁନ୍ତିଙ୍ଗ୍ ପାୟାଆତାର୍ନା, ଜାର୍ତିଙ୍ଗ୍ ୱାରି କିଦେଙ୍ଗ୍ ଉପାୟ୍ କିମେର୍। ମାତର୍ ଇନେର୍ ହାଃଜି ଆରେରଗ ହେୱାର୍ କାଜିଙ୍ଗ୍ ଜିବୁନ୍ ଆତାନ୍ନା ତାଙ୍ଗେଙ୍ଗ୍ ୱାରି କିଦେଙ୍ଗ୍ ଉପାୟ୍ କିନାର୍। 16 ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ଇ ପୁର୍ତିନି ମାନାୟାର୍ ବୁଦି ଅନୁସାରେ ଜେକନିକାରିଙ୍ଗ୍ ବିଚାର୍ କିନାକା ବନ୍ଦ୍ କିତାପ୍। ରଗ ଆନେଙ୍ଗ୍ ଖ୍ରୀଷ୍ଟ ବିଷୟରେ ବୁଲ୍ ବାବିକିଜି ମାଚାଙ୍ଗ୍, ହେୱାନ୍ ରକାନ୍ ନାର୍ ମାନାୟ୍, ମାତର୍ ଆନେଙ୍ଗ୍ ନଙ୍ଗୟ୍ ତା ବିଷୟରେ ଅଲ୍ଗା ବାବିକିନାଙ୍ଗା। 17 ଲାଗିଙ୍ଗ୍ ଇ ଅର୍ତ ଇନାକା? ଯଦି ରୱାନ୍ ଖ୍ରୀଷ୍ଟାନ୍ ଆନାନ୍ ଲାଗିଙ୍ଗ୍ ହେୱାନ୍ ପୁନାକାନ୍ ଆନାନ୍ କି? ଆଁ ହେୱାର୍ ଆରେ ଆଗେଲେକେ ହାମାନ୍ ମାନ୍ଗୁର୍, ଇନେସ୍କି ଆଗେଲେକେ ଜିବୁନ୍ କାଟି କିନାକା ନଷ୍ଟ ଆତାତ୍ନା, ମାତର୍ ନଙ୍ଗୟ୍ ପୁନି ଜିବୁନ୍ କାଟି କିନାକା ଆରମ୍ ଆତାତ୍ନା। 18 ଇ ୱିଜୁ ପୁନି ବିଷୟ ମା ଜିବୁନ୍ତାକେ ଆନାତା, ହେଦାଙ୍ଗ୍ ଈଶ୍ୱରତାଙ୍ଗ୍ ୱାତାତ୍ନା। ହେୱାନ୍ ଖ୍ରୀଷ୍ଟ କାଜିଙ୍ଗ୍ ଆରେରଗ ମାଙ୍ଗେଙ୍ଗ୍ ତାବେ ଲେଉଟାୟ୍ କିଜି ତାହି ୱାତ୍ତାନ୍ନା, ଆରେ ମାନାୟାରିଙ୍ଗ୍ ଆରେରଗ ତାବେ ମାହାୟ୍ କିନି କାଜିଙ୍ଗ୍ ମାଙ୍ଗେଙ୍ଗ୍ କାମାୟ୍ ହିତ୍ତାନ୍ନା। 19 ଇନେସ୍କି ଈଶ୍ୱର ଖ୍ରୀଷ୍ଟ ବିତ୍ରେ ମାଚାନ୍, ଆରେ ହେୱାନ୍ ନିଜେ ପୁର୍ତିନି ମାନାୟାରିଙ୍ଗ୍ ତା ହୁଦାଙ୍ଗ୍ ମାହାୟ୍ କିନାନା, ଆରେ ହେୱାନ୍ ମାନାୟାର୍ ପାପ୍ତିଙ୍ଗ୍ ତା ବିରଦ୍ତାଙ୍ଗ୍ ଗାଣା କିଉନ୍। ଇ ଚାନିଆଆନି ହାର୍ଦିକାବୁର୍ ହେୱାନ୍ ମାଙ୍ଗେଙ୍ଗ୍ ମାନାୟାରିଙ୍ଗ୍ ୱେଚ୍ନି କାଜିଙ୍ଗ୍ ହିତ୍ତାନ୍ନା। 20 ଆସେଙ୍ଗ୍ ଖ୍ରୀଷ୍ଟ ବାଦୁଲ୍ତ ହାର୍ଦିକାବୁର୍ ଶୁଣାୟ୍ କିନି ମାନାୟ୍ ଆତାସ୍ନା, ଆରେ ଈଶ୍ୱର ମିହୁଦାଙ୍ଗ୍ ବେଣ୍କିଦେଙ୍ଗ୍ ମାଙ୍ଗେଙ୍ଗ୍ ବ୍ୟବହାର୍ କିଦ୍ନାନା। ଖ୍ରୀଷ୍ଟ ଇବେ ମାନ୍ଞ୍ଜି ଗୁୱାରି କିତିଲେକେ ଆପେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାପା, “ଏପେଙ୍ଗ୍ ଈଶ୍ୱର ହୁଦାଙ୍ଗ୍ ଆରେରଗ ମାହାଆଡ।” 21 ଇନେସ୍କି ଈଶ୍ୱର ଇନାୱେଡ଼ାଙ୍ଗ୍ ପାପ୍ କିୱିତି ଖ୍ରୀଷ୍ଟଙ୍ଗ୍ ମା ପାପ୍ କାଜିଙ୍ଗ୍ ହାଃଦେଙ୍ଗ୍ ହିତ୍ତାନ୍, ହେଦାଙ୍ଗ୍ କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ଖ୍ରୀଷ୍ଟ କାଜିଙ୍ଗ୍ ତା ମୁମ୍ଦ ଦରମ୍ ମାନାୟ୍ କିଦ୍ଦେଙ୍ଗ୍ ଆଡ୍ନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation