୨ କରନ୍ତିୟ 4 - New Testament in Pengo Parja Languageହାର୍ଦିକାବୁର୍ନି ଅଜଡ଼୍ 1 ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ଈଶ୍ୱରତାଙ୍ଗ୍ ଦୟା ପାୟାଆତାପ୍ନା ଆରେ ଆପେଙ୍ଗ୍ ତା ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ସାସ୍ ଆତାପ୍ନା। 2 ଆପେଙ୍ଗ୍ ୱିଜୁ ଲାଜାଆନି କାମାୟ୍ ଆରେ ମାନାୟାର୍ତାଙ୍ଗ୍ ଡ଼ୁକ୍ଚି କିନି କାମାୟ୍ କିଉସା। ଆପେଙ୍ଗ୍ ମିଙ୍ଗେଙ୍ଗ୍ ଟକାୟ୍ କିଦ୍ଦେଙ୍ଗ୍ ଉପାୟ୍ କିଉପା, ଆରେ ଆପେଙ୍ଗ୍ ଈଶ୍ୱର କାତାତିଙ୍ଗ୍ ଚାଲାକି କିଜି ୱେଚ୍ଚୁପା। ଆପେଙ୍ଗ୍ ଈଶ୍ୱର ମୁମ୍ଦ ସତ୍ ୱେଚ୍ନାପା ଆରେ ୱିଜୁ ଦରମ୍ ମାନାୟାର୍ ପୁଚାର୍ନା ଯେ ଆପେଙ୍ଗ୍ ସତ୍ ୱେଚ୍ନାପା। 3 ଆସେଙ୍ଗ୍ ଶୁଣାୟ୍ କିନି ହାର୍ଦିକାବୁର୍ ଯଦି ଇନେର୍ କାଜିଙ୍ଗ୍ ପାର୍ଦା ଡାବାଇ କିତିଲେକେ କିଲେର୍ ଆକାୟ୍, ଲାଗିଙ୍ଗ୍ ହେଦାଙ୍ଗ୍ ହେୱାର୍ କାଜିଙ୍ଗ୍ ବିନାସ୍ ଆନି ର ଚିନ୍। 4 ଆସେଙ୍ଗ୍ ଶୁଣାୟ୍ କିନି ହାର୍ଦିକାବୁର୍ତିଙ୍ଗ୍ ପାର୍ତିକିୱି ମାନାୟାରିଙ୍ଗ୍ ଇ ପୁର୍ତିତିଙ୍ଗ୍ ସାସନ୍ କିନି ଶୟତାନ୍, ତା ମାନ୍ତିଙ୍ଗ୍ କଣ୍ଟ୍ରୁଲ୍ କିନାତା ଆରେ ବୁଜା ଆଦେଙ୍ଗ୍ ହିଉତା। ଲାଗିଙ୍ଗ୍ ଈଶ୍ୱରଲେକେ ଚଞ୍ଜ୍ନି ଖ୍ରୀଷ୍ଟ ଯୀଶୁ ବିଷୟନି ହାର୍ଦିକାବୁର୍ ଆରେ ତା ଗୌରବତିଙ୍ଗ୍ ବୁଜା ଆଦେଙ୍ଗ୍ ଆଡୁରା। 5 ଆପେଙ୍ଗ୍ ଜାର୍ ବିଷୟରେ ଶୁଣାୟ୍ କିଉପା। ମାତର୍ ଆପେଙ୍ଗ୍ ଯୀଶୁ ଖ୍ରୀଷ୍ଟ ନେ ମାପୃ ଇଞ୍ଜି ଶୁଣାୟ୍ କିନାପା। ଆପେଙ୍ଗ୍ ଜାର୍ ବିଷୟରେ ଇଦାଙ୍ଗ୍ କାଜିଙ୍ଗ୍ କିନାଙ୍ଗା ଯେ, ହେୱାନ୍ ମା କାଜିଙ୍ଗ୍ ଇନାକା କିତାନ୍ନା, ହେଦାଙ୍ଗ୍ ଆପେଙ୍ଗ୍ ମି ଚାକର୍ ଆତାପ୍ନା। 6 ଇନେସ୍କି ଈଶ୍ୱର ଆଗେ ୱେଚ୍ଚି ମାଚାନ୍, “ମାଜ୍ଗାତାକେ ଅଜଡ଼୍ ଆଏତ୍” ଆରେ ଇଲେକେ କିଜି ହେୱାନ୍ ତା ଗୌରବ ବୁଜାୟ୍ କିଜି ମାଚାତ୍ ଯେ, ହେ ଅଜଡ଼୍ଲେକେ ତା ଗୌରବ ଯୀଶୁ ଖ୍ରୀଷ୍ଟ ମୁମ୍ଦ ଚନ୍ଞ୍ଜି ମାଚାତ୍। ଚିକ୍ଲା ଟାଣ୍ଡିତାକେ ଇଡ଼୍ତି ଦନ୍ 7 ଆସେଙ୍ଗ୍ ବେଗି ନଷ୍ଟ ଆନି ର ଚିକ୍ଲା ଟାଣ୍ଡିଲେକେ ମାନାସ୍। ଆରେ ମା ବିତ୍ରେ ଦାମ୍ଦି ଦନ୍ ଅଜଡ଼୍ଲେକେ ଖ୍ରୀଷ୍ଟତି ହାର୍ଦିକାବୁର୍ ମାନାତା, ଲାଗିଙ୍ଗ୍ ହେଦାଙ୍ଗ୍ ମାଙ୍ଗେଙ୍ଗ୍ ପୁନି କିଦ୍ନାତା ଯେ, ମା ବିତ୍ରେ ମାନି ଶାକ୍ତି ମାଦାଙ୍ଗ୍ ଆକାୟ୍ ମାତର୍ ହେଦାଙ୍ଗ୍ ଈଶ୍ୱରତି ଗାଜା ଶାକ୍ତି। 8 ଆପେଙ୍ଗ୍ ୱିଜୁ ନିପଣ୍ ଦୁଃକ୍ କଷ୍ଟ ପାୟାଆନାପା, ମାତର୍ ଆପେଙ୍ଗ୍ ଈଶ୍ୱରତିଙ୍ଗ୍ ଆହା କିନାକା ବନ୍ଦ୍ କିୱାତାପ୍ନା। ଆପେଙ୍ଗ୍ ଇନା ଇନାୱେଡ଼ାଙ୍ଗ୍ ଇ ଦୁଃକ୍ କଷ୍ଟ ନାଞ୍ଜିଙ୍ଗ୍ ଇନାକା କିନାପ୍ ଇଞ୍ଜି ପୁଞ୍ଜେଙ୍ଗ୍ ଆଡୁପା, ମାତର୍ ଆପେଙ୍ଗ୍ ୱେଚୁପା ଯେ ଈଶ୍ୱର ମାଙ୍ଗେଙ୍ଗ୍ ହେ ଦୁଃକ୍ କଷ୍ଟ ହିଦ୍ନାନା। 9 ମାନାୟାର୍ ମାଙ୍ଗେଙ୍ଗ୍ ୱିଜୁଦିନ୍ ହେ ଦୁଃକ୍ କଷ୍ଟ ହିଦ୍ନାରା, ମାତର୍ ଈଶ୍ୱର ମାଙ୍ଗେଙ୍ଗ୍ ଇନାୱେଡ଼ାଙ୍ଗ୍ ପା ପିସ୍ତାୱାତାନ୍ନା। ଆପେଙ୍ଗ୍ କେତ୍ତର୍ ମାନାୟାର୍ତାଙ୍ଗ୍ ମାଟ୍ ଚିନ୍ଞ୍ଜି ଗାଗାଡ଼୍ତ ଗାଉ ଆତ୍ତାତ୍ନା, ମାତର୍ ଈଶ୍ୱର ମାଙ୍ଗେଙ୍ଗ୍ ହାଃଦେଙ୍ଗ୍ ହିଦ୍ୱାତାନ୍ନା। 10 ଯୀଶୁ ଖ୍ରୀଷ୍ଟ ହାଃତିହିଙ୍ଗ୍ ଇମ୍ଣି ଦୁଃକ୍ କଷ୍ଟ ପାୟାଆଜି ମାଚାନ୍, ଆସେଙ୍ଗ୍ ପା ତା ଲେକେ ମା ଗାଗାଡ଼୍ତାକେ ୱିଜୁଦିନ୍ ଦୁଃକ୍ କଷ୍ଟ ପାୟାଆନାସା, ଲାଗିଙ୍ଗ୍ ମାନାୟାର୍ ମା କାମାୟ୍ତିଙ୍ଗ୍ ହୁଡ଼୍ଜି ଯୀଶୁ ଖ୍ରୀଷ୍ଟ କିଜି ମାଚାକା ପୁନାର୍। 11 ଆପେଙ୍ଗ୍ ଯୀଶୁଙ୍ଗ୍ ହେବା କିନାପା, ଆରେ ତା ଜିବୁନ୍ ମା ହାଃନି ଗାଗାଡ଼୍ତାକେ ଚଚ୍ନି କାଜିଙ୍ଗ୍ ଆପେଙ୍ଗ୍ ୱିଜୁଦିନ୍ ହାଃନି ବିପତ୍ତାକେ ହାନାପା। 12 ଆପେଙ୍ଗ୍ ୱିଜୁଦିନ୍ ମାରାଣ୍ ମୁମ୍ଦ ମାନାପା ଇନେସ୍କି ଆପେଙ୍ଗ୍ ପୁଚାପ୍ନା ଯେ, ମା ଇ କାମାୟ୍ କାଜିଙ୍ଗ୍ ମାଙ୍ଗେଙ୍ଗ୍ ୱିଜ୍ୱି ଜିବୁନ୍ ଗାଟାଆଦ୍ନାତ୍। 13 ମାତର୍ ଆପେଙ୍ଗ୍ ୱିଜୁଦିନ୍ ହାର୍ଦିକାବୁର୍ତିଙ୍ଗ୍ ଶୁଣାୟ୍ କିନାପା ଇନେସ୍କି କେର୍କଣ୍ ଲେକିକିତି ମାନାୟ୍ ପାର୍ତିଲେକେ ମା ପାର୍ତି ମାନାତ୍, ହେୱାନ୍ ଇଲେକେ ଇନାନା, ଆନେଙ୍ଗ୍ ଈଶ୍ୱରତିଙ୍ଗ୍ ପାର୍ତି କିତାଙ୍ଗ୍, ଲାଗିଙ୍ଗ୍ ଆନେଙ୍ଗ୍ ଇଚାଙ୍ଗ୍। 14 ଆପେଙ୍ଗ୍ ପୁଚାପ୍ନା ଯେ, ଈଶ୍ୱର ଆରେରଗ ମା ମାପୃ ଯୀଶୁଙ୍ଗ୍ ହାଃତିତାଙ୍ଗ୍ ଜିବୁନ୍ କିତାନ୍ନା। ଆରେ ମାଙ୍ଗେଙ୍ଗ୍ ପା ହେୱାନ୍ ଆରେରଗ ଜିବୁନ୍ କିଦ୍ନାନ୍ ଇନେସ୍କି ଆସେଙ୍ଗ୍ ଯୀଶୁ ଲକ୍ ଆତାସ୍ନା, ଆରେ ତା ହୁଦାଙ୍ଗ୍ ମାଞ୍ଜେଙ୍ଗ୍ ମାଙ୍ଗେଙ୍ଗ୍ ଆରେ ମିଙ୍ଗେଙ୍ଗ୍ ତା ଲାଗାୟ୍ ତାହିୱାଦ୍ନାନ୍। 15 ଆପେଙ୍ଗ୍ ଇ ୱିଜୁ ଦୁଃକ୍ କଷ୍ଟ ମି ଲାବ୍ କାଜିଙ୍ଗ୍ ପାୟାଆନାପା। ଲାଗିଙ୍ଗ୍ ଈଶ୍ୱର ବେସି ଦୟା କିଦ୍ନାନ୍ ଇଞ୍ଜି ଆଦିକ୍ତାଙ୍ଗ୍ ଆଦିକ୍ ମାନାୟାର୍ ପୁନାର୍ ଆରେ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାର୍, ଆରେ ପା ହେୱାର୍ ଈଶ୍ୱରତିଙ୍ଗ୍ ଆଦିକ୍ ଜୟ୍-ଜୟ୍ କିନାର୍ ଆରେ ହେୱାନ୍ ହେୱାର୍ତାଙ୍ଗ୍ ଆଦିକ୍ତାଙ୍ଗ୍ ଆଦିକ୍ ଗୌରବ ପାୟା ଆନାନ୍। 16 ମା ଗାଗାଡ଼୍ ହାଃଜି ମାଚିସ୍ ପା ଆପେଙ୍ଗ୍ ହାର୍ଦିକାବୁର୍ ଶୁଣାୟ୍ କିନାକା ବନ୍ଦ୍ କିଉପା, ମାତର୍ ମା ଆତ୍ମା ୱିଜୁଦିନ୍ ପୁନାକା ଆନାତା। 17 ଇନେସ୍କି ଆସେଙ୍ଗ୍ ନଙ୍ଗୟ୍ ପାୟାଆନି ଦୁଃକ୍ କଷ୍ଟ ୱିଜୁ ହିରୁ ଆରେ ବେସିଦିନ୍ ମାନ୍ଗୁତ୍। ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ୱିଜ୍ୱି ଜିବୁନ୍ ପାୟାଆନାସ୍, ଇମ୍ଣାକା କି ୱିଜୁ ଜିନିଷ୍ତାଙ୍ଗ୍ ଗାଜା ଆରେ ୱିଜୁଦିନ୍ ମାନ୍ଗାନାତ୍। 18 ଲାଗିଙ୍ଗ୍ ନଙ୍ଗୟ୍ ଆସେଙ୍ଗ୍ ପାୟାଆନି ଦୁଃକ୍ କଷ୍ଟ ହୁଡ଼୍ୱି ଦର୍କାର୍, ତା ବାଦୁଲ୍ରେ ଈଶ୍ୱର ମା କାଜିଙ୍ଗ୍ ଇଡ଼୍ତି ହୁଡ଼୍ୱି ଜିନିଷ୍ତିଙ୍ଗ୍ ପାୟାଆନି କାଜିଙ୍ଗ୍ ଆହାକିନି ଦର୍କାର୍। ଇନେସ୍କି ଇମ୍ଣି ଦୁଃକ୍ କଷ୍ଟ ନଙ୍ଗୟ୍ ହୁଡ଼୍ନାସା ହେଦାଙ୍ଗ୍ ବେସି ଆଗେ ସେସ୍ ଆନାତ୍, ମାତର୍ ଇମ୍ଣି ୱାରି ପାଚେ ଈଶ୍ୱର ମାଙ୍ଗେଙ୍ଗ୍ ହିଦ୍ନାନ୍ ହେଦାଙ୍ଗ୍ ୱିଜୁଦିନ୍ ମାନ୍ଗାନାତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation