୨ କରନ୍ତିୟ 3 - New Testament in Pengo Parja Languageପୁନି ନିୟମ୍ନି ଦାସ୍ 1 ଆପେଙ୍ଗ୍ ଅରେରଗ ମି କାଜିଙ୍ଗ୍ ଜୟ୍-ଜୟ୍ ପାୟା ଆଦେଙ୍ଗ୍ ହାର୍ଦି ମାନାୟ୍ ଇଞ୍ଜି ଚଞ୍ଜି ଆଉପା। ଇନେସ୍କି କେତେକ୍ ମାନାୟ୍ ମାନାର୍ ହେୱାର୍ ନିଜେ ହାର୍ ଇଞ୍ଜି ଚଞ୍ଜିଆନି କାଜିଙ୍ଗ୍ ଚିଟି ଆସ୍ତି ୱାନାର୍, ନଇଲେ ହେୱାର୍ କେତେକ୍ ହାର୍ ଇଞ୍ଜି ଜାର୍ତିଙ୍ଗ୍ ପୁନିକିଦେଙ୍ଗ୍ ମିଙ୍ଗେଙ୍ଗ୍ ଚିଟି ଲେକିକିଦେଙ୍ଗ୍ ୱେଚ୍ଚାନାର୍। 2 ଏପେଙ୍ଗ୍ ନିଜେ ନେ ର ଚିଟି ଲେକେ ଆପେଙ୍ଗ୍ କିତି କାମାୟ୍ତିଙ୍ଗ୍ ଈଶ୍ୱର ୱିଜୁ ମାନାୟାରିଙ୍ଗ୍ ୱେଚ୍ଚାନାନା, ଆରେ ହେଦାଙ୍ଗ୍ତିଙ୍ଗ୍ ୱିଜୁ ମାନାୟ୍ ପଡ଼ିକିଜି ପୁନାରା ଯେ, ଆପେଙ୍ଗ୍ ମି ବିତ୍ରେ ଗରବ୍ତାକେ ମାନାପ୍। 3 ଆରେ କିଲେର୍ ବାବ୍ରେ ପୁନ୍ୟା ଆନାତା ଯେ, ମା କାମାୟ୍ କାଜିଙ୍ଗ୍ ଏପେଙ୍ଗ୍ ଖ୍ରୀଷ୍ଟ ଲେକିକିତି ଚିଟି ଲେକେ ଆତାଦେର୍ନା। ହେଦାଙ୍ଗ୍ ସିରା କି କାଲ୍ଜପି ଲେକାଆୱାତାତ୍ନା, ମାତର୍ ଜିବୁନ୍ ମାନି ଈଶ୍ୱରତି ପବିତ୍ର ଆତ୍ମା ହୁଦାଙ୍ଗ୍ ମାନାୟାର୍ ଗରବ୍ତାକେ ଲେକାଆତାତ୍ନା। 4 ଆପେଙ୍ଗ୍ ଇଲେକେ ୱେଚ୍ଚାନାପା ଇନେସ୍କି ଖ୍ରୀଷ୍ଟ କାଜିଙ୍ଗ୍ ଆପେଙ୍ଗ୍ ଈଶ୍ୱରତିଙ୍ଗ୍ ବେସି ପାର୍ତି କିନାପା। 5 ଆପେଙ୍ଗ୍ ୱେଚ୍ଚୁପା ଯେ, ଆପେଙ୍ଗ୍ ନିଜେ ଇ ୱିଜୁ ବିଷୟ କିଦେଙ୍ଗ୍ ଶାକ୍ତି ମାନାତ୍, ମାତର୍ ଇ ୱିଜୁ କିଦେଙ୍ଗ୍ ଈଶ୍ୱର ମାଙ୍ଗେଙ୍ଗ୍ ଶାକ୍ତି ହିଦ୍ନାନା। 6 ଈଶ୍ୱର ତା ପୁନି ନିୟମ୍ନି ସାସ୍ତର୍ ହେବା କିନାକାର୍ ମାଙ୍ଗେଙ୍ଗ୍ କିତ୍ତାନ୍ନା। ଚିଟି ଲେକେ ଇ ପୁନି ନିୟମ୍ ଆକାୟ୍, ମାତର୍ ପବିତ୍ର ଆତ୍ମାକାଙ୍ଗ୍ ଇ ପୁନି ନିୟମ୍ ଲେକାଆତାତ୍ନା। ପାନି ନିୟମ୍ ମାରାଣ୍ ତାସିୱାନାତ୍, ମାତର୍ ପବିତ୍ର ଆତ୍ମା ଜିବୁନ୍ ହିଦ୍ନାତ୍। 7 ଏଚେପାଦ୍ନା ମୋଶା ଲେକିକିତି ଦରମ୍ ସାସ୍ତର୍ କାଲ୍ଜପି ଲେକାଆଜି ମାଚାତ୍, ହେପାଦ୍ନା ଈଶ୍ୱର ଅଜଡ଼୍ଲେକେ ଗୌରବ ଚଞ୍ଜିଆଆଜି ମାଚାତ୍। ହେ ଗୌରବ ଅଲପ୍ ସମୟ୍ ନେ ମାଚାତ୍, ଆତିସ୍ପା ଇସ୍ରାଏଲନି ମାନାୟାର୍ ହେ ଗୌରବତିଙ୍ଗ୍ ହୁଡ଼୍ଦେଙ୍ଗ୍ ଆଡ୍ୱାତାର୍। 8 ଏଚେପାଦ୍ନା ପବିତ୍ର ଆତ୍ମା ମାଙ୍ଗେଙ୍ଗ୍ ୱିଜ୍ୱି ଜିବୁନ୍ ହିଦ୍ନାତା, ହେପାଦ୍ନା ଆସେଙ୍ଗ୍ ଆଦିକ୍ ଗୌରବ ପାୟାଆନି କାଜିଙ୍ଗ୍ ଆହା କିନାସ୍। 9 ଯଦି ହେ ଦସି କିଦ୍ନି ପାନି ପାର୍ମାଣ୍ ଗୌରବ ମାଚାତ୍, ଲାଗିଙ୍ଗ୍ ହେୱାନ୍ତାଙ୍ଗ୍ ଇ ପୁନି ପାର୍ମାଣ୍ ଇମ୍ଣାକା ଈଶ୍ୱର ମୁମ୍ଦ ଦରମ୍ ମାନାୟ୍ କିଦ୍ନାନ୍ ହେଦାଙ୍ଗ୍ ଆଦିକ୍ ଗୌରବ ମାନାତ୍। 10 ଇନେସ୍କି ହେ ପାନି ପାର୍ମାଣ୍ନି ଗୌରବ ନଙ୍ଗୟ୍ ଆରେ ଗୌରବ ଲେକେ ଆକାୟ୍, ଇନେସ୍କି ହେ ପୁନି ପାର୍ମାଣ୍ ହେୱାନ୍ତାଙ୍ଗ୍ ଆଦିକ୍ ଗୌରବ ଆତାତ୍ନା। 11 ମୋଶା ଲେକିକିତି ଦରମ୍ ସାସ୍ତର୍ତିଙ୍ଗ୍ ଗୌରବତାଙ୍ଗ୍ ହିଜି ମାନ୍ଞ୍ଚାତ୍ ଆରେ ହେଦାଙ୍ଗ୍ ବେସିଦିନ୍ ପାତେକ୍ କାମାୟ୍ ହିୱାତାତ୍, ମାତର୍ ଇ ପୁନି ପାର୍ମାଣ୍ନି ହେୱାନ୍ତାଙ୍ଗ୍ ଆଦିକ୍ ଗୌରବ ଆରେ ୱିଜୁଦିନ୍ କାଜିଙ୍ଗ୍ ମାନ୍ଗାନାତ୍। 12 ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ଇ ପୁନି ପାର୍ମାଣ୍ତାଙ୍ଗ୍ ଆହା ପାୟାଆଜି ସାସ୍ ଆତାପ୍ନା। 13 ଆରେ ଇସ୍ରାଏଲନି ମାନାୟାର୍ ହେ ସେସ୍ଆନି ଗୌରବତିଙ୍ଗ୍ ହୁଡ଼୍ୱି କାଜିଙ୍ଗ୍ ମୋଶା ତା ମୁମ୍ଦ ପାର୍ଦା ପାକ୍ଚି ମାଚାନ୍, ମାତର୍ ଆପେଙ୍ଗ୍ ହେୱାନିଙ୍ଗ୍ ଜେକ କିଉପା। 14 ଇନେସ୍କି ଆସେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତିକିତି କାଜିଙ୍ଗ୍ ନେ ହେ ପାର୍ଦା ପେଜିୟା ଆନାତ୍। ମାତର୍ ମାନାୟାର୍ ନଙ୍ଗୟ୍ ପାତେକ୍ ହେ ପାନି ପାର୍ମାଣ୍ତିଙ୍ଗ୍ ପଡ଼ିକିତିସ୍ ପା ବୁଜା ଆଦେଙ୍ଗ୍ ଆଡୁରା। ଇନେସ୍କି ହେୱାର୍ ମାନ୍ତିଙ୍ଗ୍ ପାର୍ଦା ଡାବାଇ କିତାତ୍ନା ଆରେ ହେୱାର୍ ମାନ୍ ଗାର୍ବିୟା ମାଚି କାଜିଙ୍ଗ୍ ସତ୍ ବୁଜା ଆଦେଙ୍ଗ୍ ଇଚା କିଉର୍। 15 ଆଁ ହେୱାର୍ ଗରବ୍ ନେଞ୍ଜେଙ୍ଗ୍ ପାତେକ୍ ପାର୍ଦା ହୁଦାଙ୍ଗ୍ ଡାବା ଆତାତ୍ନା ଆରେ ହେୱାର୍ ମୋଶା ଲେକିକିତି ଦରମ୍ ସାସ୍ତର୍ନି ନିୟମ୍ତିଙ୍ଗ୍ ପଡ଼ି କିନିହିଙ୍ଗ୍ ବୁଜାଆଉଦେରା। 16 ମାତର୍ ଇମ୍ଣି ମାନାୟ୍ ଏଚେପାଦ୍ନା ମାପୃ ଯୀଶୁଙ୍ଗ୍ ପାର୍ତିକିନାନ୍, ହେପାଦ୍ନା ତା ପାର୍ଦାତିଙ୍ଗ୍ ଉନ୍ଦ୍ଦି ହିଦ୍ନାର୍। 17 ନଙ୍ଗୟ୍ ମାପୃ ନେ ଆତ୍ମା, ଆରେ ହେ ମାପୃ ଆତ୍ମା ମାଙ୍ଗେଙ୍ଗ୍ ପାନି ପାର୍ମାଣ୍ତାଙ୍ଗ୍ ମୁକ୍ତି ହିଦ୍ନାନ୍। 18 ଆପେଙ୍ଗ୍ ୱିଜାକାପ୍ ଦାର୍ପାଣ୍ ଲେକେ ମାପୃ ମୁମ୍ଦ ପାର୍ଦା ହିଲ୍ୱି ଗୌରବ ଲେକେ ଚଞ୍ଜ୍ନାଦେର୍। ଈଶ୍ୱର ମାଙ୍ଗେଙ୍ଗ୍ ତା ଲେକେ ଆନି କାଜିଙ୍ଗ୍ ଆଦିକ୍ତାଙ୍ଗ୍ ଆଦିକ୍ ଗୌରବ ବାଡାୟ୍ କିନାନା, ହେଦାଙ୍ଗ୍ ମାପୃ ପବିତ୍ର ଆତ୍ମା କିନାନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation