୨ କରନ୍ତିୟ 2 - New Testament in Pengo Parja Language1 ଏପେଙ୍ଗ୍ ଇନେସ୍କି ଆରେରଗ ଦୁଃକ୍ କଷ୍ଟ ପାୟା ଆଉଦେର୍ ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମି ଲାଗେ ୱାୱେଦେଙ୍ଗ୍ ଇଚା କିତାଙ୍ଗ୍। 2 ଇନେସ୍କି ଆନେଙ୍ଗ୍ ଯଦି ମିଙ୍ଗେଙ୍ଗ୍ ଦୁଃକ୍ ଆରେ କଷ୍ଟ ହିଦ୍ନାଙ୍ଗ୍, ଲାଗିଙ୍ଗ୍ ଇନେର୍ ନାଙ୍ଗେଙ୍ଗ୍ ୱାରି କିଦ୍ନାନ୍? 3 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଇନେସ୍ କିଜି ମାଚାଙ୍ଗ୍ ହେଲେକେ ଆନେଙ୍ଗ୍ ନା ସେସ୍ ଚିଟିତାକେ ଲେକିକିତାଙ୍ଗ୍ନା। ଏଚେପାଦ୍ନା ଆନେଙ୍ଗ୍ ମିତାକେ ୱାନାଙ୍ଗ୍, ନାଙ୍ଗେଙ୍ଗ୍ ସାର୍ଦା କିଦ୍ନି ମାନାୟାର୍ କାଜିଙ୍ଗ୍ ଆନେଙ୍ଗ୍ ଦୁଃକ୍ ଆଉଙ୍ଗ୍ ଆରେ ଆନେଙ୍ଗ୍ ମିଙ୍ଗେଙ୍ଗ୍ ପୁରାପୁରି ବାବ୍ରେ ପାର୍ତି କିନାଙ୍ଗା। ଏପେଙ୍ଗ୍ ପା ନା ହୁଦାଙ୍ଗ୍ ମାହାଆଜି ୱାରିୟା ଆନାଦେର୍। 4 ଆନେଙ୍ଗ୍ ମିଙ୍ଗେଙ୍ଗ୍ ଇ ଚିଟି ଲେକିକିନିହିଙ୍ଗ୍ ବେସି ଦୁଃକ୍ ଆରେ କଷ୍ଟ ପାୟାଆଜି ଆଡ଼୍ବି ମାଚାଙ୍ଗ୍। ହେଦାଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଦୁଃକ୍ ହିଦ୍ଦେଙ୍ଗ୍ ଇଚା କିୱାଦାଙ୍ଗ୍ ମାଚାଙ୍ଗ୍, ମାତର୍ ଆନେଙ୍ଗ୍ ମିଙ୍ଗେଙ୍ଗ୍ କେତେକ୍ ଲାଡ୍ କିଦ୍ନାଙ୍ଗା ହେଦାଙ୍ଗ୍ ୱେଚ୍ଚିନି କାଜିଙ୍ଗ୍ ଇଚା କିଜି ମାଚାଙ୍ଗ୍। ପାପ୍ କିତାକାରିଙ୍ଗ୍ କେମା କିନି କାତା 5 ଯଦି ଇମ୍ଣାକାନ୍ ପାପ୍ କାମାୟ୍ କିଜି ଦୁଃକ୍ ହିତ୍ତାନ୍ନା, ହେୱାନ୍ ନାଙ୍ଗେଙ୍ଗ୍ ଦୁଃକ୍ ହିତ୍ତାନ୍ନା, ମାତର୍ ନାବେତାଙ୍ଗ୍ ଆଦିକ୍ ମିଙ୍ଗେଙ୍ଗ୍ ଦୁଃକ୍ ହିତ୍ତାନ୍ନା, ଆରେ ଆନେଙ୍ଗ୍ ତା ପାପ୍ କାମାୟ୍ତିଙ୍ଗ୍ ଆଦିକ୍ କିଜି ୱେଚ୍ଚେଙ୍ଗ୍ ଇଚା କିଉଙ୍ଗା। 6 ନଙ୍ଗୟ୍ ମି ବିତ୍ରେତାଙ୍ଗ୍ ବେସିହେନି ମାନାୟାର୍ ତାଙ୍ଗେଙ୍ଗ୍ ଦଣ୍ଡ୍ ହିତାର୍ନା। ଆରେ ହେୱାର୍ ତାଙ୍ଗେଙ୍ଗ୍ ହିତି ଦଣ୍ଡ୍ ତା କାଜିଙ୍ଗ୍ ହାମାନ୍ ଆନାତ୍। 7 ନଙ୍ଗୟ୍ ଏପେଙ୍ଗ୍ ତାଙ୍ଗେଙ୍ଗ୍ କେମା କିନି ଦର୍କାର୍, ଆରେ ସାସ୍ ହିନି ଦର୍କାର୍। ଆରେ ଯଦି ଏପେଙ୍ଗ୍ ହେଲେକେ କିଉଦେର୍, ଲାଗିଙ୍ଗ୍ ହେୱାନ୍ ଆଦିକ୍ ଦୁଃକ୍ ଆନାନ୍, ଆରେ ହେୱାନ୍ ଖ୍ରୀଷ୍ଟଙ୍ଗ୍ ପାର୍ତି କିନାକା ବନ୍ଦ୍ କିନାନ୍। 8 ଆରେ ଏପେଙ୍ଗ୍ ତାଙ୍ଗେଙ୍ଗ୍ ନଙ୍ଗୟ୍ ପାତେକ୍ ପା ଲାଡ୍ କିଦ୍ନାପା ଇଞ୍ଜି ୱେଚାଟ୍। 9 ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ଲେକିକିତି ୱିଜୁ ଆଦେସ୍ତିଙ୍ଗ୍ ମାନିକିନାଦେର୍ କି ଆକାୟ୍ ଇଞ୍ଜି ପୁଞ୍ଜେଙ୍ଗ୍, ଆନେଙ୍ଗ୍ ଇ ଚିଟି ଲେକିକିଜି ମାଚାଙ୍ଗ୍। 10 ଏଚେପାଦ୍ନା ଏପେଙ୍ଗ୍ ହେୱାନ୍ କିଜିମାଚି ପାପ୍ତିଙ୍ଗ୍ କେମା କିନାଦେର୍, ଲାଗିଙ୍ଗ୍ ଆନେଙ୍ଗ୍ ପା ତାଙ୍ଗେଙ୍ଗ୍ କେମା କିନାଙ୍ଗ୍। ଆରେ ଆନେଙ୍ଗ୍ ଏଚେପାଦ୍ନା ତାଙ୍ଗେଙ୍ଗ୍ କେମା କିନାଙ୍ଗ୍ ମି ହାର୍ କାଜିଙ୍ଗ୍ ଖ୍ରୀଷ୍ଟ ଅଦିକାର୍ତାଙ୍ଗ୍ କିନାଙ୍ଗ୍, ଇନେସ୍କି ଆନେଙ୍ଗ୍ କେମା ପାୟାଆନି ବିଷୟତିଙ୍ଗ୍ ନେ କେମା କିନାଙ୍ଗ୍। 11 ଲାଗିଙ୍ଗ୍ ଶୟତାନ ମା ଜପି ଜିତା ଆଦେଙ୍ଗ୍ ଆଡୁତ୍, ଇନେସ୍କି ଆପେଙ୍ଗ୍ ପୁଚାପ୍ନା ଯେ, ହେ ଶୟତାନ ୱିଜୁଦିନ୍ ମାଙ୍ଗେଙ୍ଗ୍ ପାପ୍ କାମାୟ୍ କିୟିକିଦେଙ୍ଗ୍ ଉପାୟ୍ କିନାତା। ପାଉଲ ତ୍ରୋୟା ଦ୍ୱିପ୍ତାକେ ହାଚି କାତା 12 ଆରେ ଏଚେପାଦ୍ନା ଆନେଙ୍ଗ୍ ଖ୍ରୀଷ୍ଟ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ତ୍ରୋୟା ସହର୍ତାକେ ହାଚାଙ୍ଗ୍, ମାପୃ ନାଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ବେସି ଗାଜା ସୁଯଗ୍ ହିଜିମାନ୍ଞ୍ଚାନ୍। 13 ମାତର୍ ନା ମାନ୍ତ ଶାନ୍ତି ହିଲାତାତ୍, ଇନେସ୍କି ନା ଲାଡ୍ନି ଟଣ୍ଡେନ୍ ତିତସ ମିବେତାଙ୍ଗ୍ କାବୁର୍ ନାଙ୍ଗେଙ୍ଗ୍ ୱେଚ୍ଚେଦେଙ୍ଗ୍ ୱାୱାଦାଙ୍ଗ୍ ମାଚାନ୍। ଲାଗିଙ୍ଗ୍ ଆନେଙ୍ଗ୍ ତ୍ରୟା ସହର୍ନି ପାର୍ତିକିନି ମାନାୟାରିଙ୍ଗ୍ ହାନାଙ୍ଗା ଇଞ୍ଜି ୱେଚ୍ଚି ମାକଦନିଆ ସହର୍ତାକେ ହାଚାଙ୍ଗ୍। 14 ମାତର୍ ଆନେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଙ୍ଗା, ଇନେସ୍କି ଆସେଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ମାହାଆତାସ୍ନା, ହେୱାନ୍ ମାଙ୍ଗେଙ୍ଗ୍ ହାଜି ଚଚ୍ଚାନାନା ଆରେ ମାଙ୍ଗେଙ୍ଗ୍ ଜିତାୟ୍ କିଦ୍ନାନ୍। ନଙ୍ଗୟ୍ ହେ ଖ୍ରୀଷ୍ଟ ବିଷୟନି ଜ୍ଞାନ୍, ର ସେଣ୍ଟ୍ଲେକେ ୱିଜୁ ନିପଣ୍ ମା କାଜିଙ୍ଗ୍ ବାସ୍ନା ଆନାତା। 15 ଆସେଙ୍ଗ୍ ଖ୍ରୀଷ୍ଟ ଲେକେ ଈଶ୍ୱର କାଜିଙ୍ଗ୍ ର ଦୁପ୍କାଟିନି ବାସ୍ନାଲେକେ ଆତାସ୍ନା। ଇନେସ୍କି ଆସେଙ୍ଗ୍ ଏଚେକ୍ ରକ୍ଷା ପାୟାତାସ୍ନା, ଆରେ ଏଚେକ୍ ବିନାସ୍ ଆନାରା ହେୱାରିଙ୍ଗ୍ ଇମ୍ଣି ହାର୍ଦିକାବୁର୍ ଆସେଙ୍ଗ୍ ଶୁଣାୟ୍ କିନାସା ଇଦାଙ୍ଗ୍ ରଞ୍ଜି ହାର୍ଦି ବାସ୍ନାଲେକେ ୱିଜାର୍ ମାନାୟାର୍ କାଜିଙ୍ଗ୍ ଆନାତା। 16 ମା ହାର୍ଦିକାବୁର୍ ବିନାସ୍ ଆନି ମାନାୟାର୍ କାଜିଙ୍ଗ୍ ରଞ୍ଜି ପାଣ୍ଡ୍ରୁତିଙ୍ଗ୍ ହାଃନି ବାସ୍ନାଲେକେ, ମାତର୍ ଇ ହାର୍ଦିକାବୁର୍ ଉଦାର୍ ପାୟାଆତି ମାନାୟାର୍ କାଜିଙ୍ଗ୍ ଜିବୁନ୍ହିନି ବାସ୍ନାଲେକେ ଆରେ ଇ କାମୟ୍ତିଙ୍ଗ୍ ଇନେର୍ ପା କିଦେଙ୍ଗ୍ ଆଡୁର୍। 17 ଆରେ ଏପେଙ୍ଗ୍ ପୁଚାଦେର୍ନା ଯେ, ଆପେଙ୍ଗ୍ ହେୱାନ୍ ପନି ମାନାୟାର୍ଲେକେ ଆକାୟ୍। ଇମ୍ଣି ମାନାୟାର୍ ଡାବୁଙ୍ଗ୍ କାଜିଙ୍ଗ୍ ହାର୍ଦିକାବୁର୍ ଶୁଣାୟ୍ କିନାରା, ମାତର୍ ମାଙ୍ଗେଙ୍ଗ୍ ପକ୍ତିତି ଈଶ୍ୱର ଚଚ୍ଚାନାନା ଇଞ୍ଜି ପୁନ୍ଞ୍ଜି ଆପେଙ୍ଗ୍ ଦରମ୍ଆଜି ଖ୍ରୀଷ୍ଟ ଅଦିକାର୍ ହୁଦାଙ୍ଗ୍ ଈଶ୍ୱରତି ହାର୍ଦିକାବୁର୍ ଶୁଣାୟ୍ କିନାପା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation