୨ କରନ୍ତିୟ 13 - New Testament in Pengo Parja Languageପାଉଲତି ସେସ୍ ହିକ୍ଷା 1-2 ସାସ୍ତର୍ତାକେ ଇଲେକେ ଲେକାଆତାତ୍ନା, ୱିଜୁ ବିଷୟତିଙ୍ଗ୍ ସମାଦାନ୍ କିନି କାଜିଙ୍ଗ୍ ରିୟାର୍ କି ତିନ୍ଜାଣ୍ ସାକି ମାନି ଦର୍କାର୍। ଆନେଙ୍ଗ୍ ଏଚେପାଦ୍ନା ମିତାକେ ରିହା ୱାଜି ମାଚାଙ୍ଗ୍, ପାପ୍ କିନି ମାନାୟାରିଙ୍ଗ୍ ଆଗେ ନେ ସାବ୍ଦାନ୍ କିଜି ମାଚାଙ୍ଗ୍ ଆରେ ଆଗେ କିତିଲେକେ ଇ ଚିଟିତାକେ ପା ହେ ପାପ୍ କାମାୟ୍ କିନାକାରିଙ୍ଗ୍ ୱିଜାରିଙ୍ଗ୍ ସାବ୍ଦାନ୍ କିନାଙ୍ଗା। ନଙ୍ଗୟ୍ ଆନେଙ୍ଗ୍ ଆରେରଗ ୱାଦେଙ୍ଗ୍ ଇଚା କିନାଙ୍ଗା ଆରେ ଯଦି ଆନେଙ୍ଗ୍ ୱାନାଙ୍ଗ୍ ଇଦାଙ୍ଗ୍ ହୁଦାଙ୍ଗ୍ ତିନ୍ହଟ୍ ଆନାତ୍, ଆରେ ହେୱାର୍ ଯଦି ପାପ୍ କିନାକା ବନ୍ଦ୍ କିୱାତାର୍ନା ଲାଗିଙ୍ଗ୍ ହେୱାର୍ ଦଣ୍ଡ୍ ପାୟାଆନାର୍, ଆରେ ହେୱାରିଙ୍ଗ୍ ଇନେର୍ ପା ରକ୍ଷା କିଦେଙ୍ଗ୍ ଆଡୁର୍। 3 ଆନେଙ୍ଗ୍ ମିଙ୍ଗେଙ୍ଗ୍ ପୁନି କିଦ୍ନାଙ୍ଗା ଯେ ଖ୍ରୀଷ୍ଟ ନା କାଜିଙ୍ଗ୍ ୱେଚ୍ଚାତାନ୍ନା। ଏଚେପାଦ୍ନା ଖ୍ରୀଷ୍ଟ ମିଙ୍ଗେଙ୍ଗ୍ ଟିକ୍ ମାନାୟ୍ ଆନି କାଜିଙ୍ଗ୍ ହିକ୍ଷା ହିଦ୍ନାନ୍, ହେୱାନ୍ ଦୁର୍ବଲ୍ ମାନାୟ୍ ଲେକେ ଆଉନ୍, ମାତର୍ ହେୱାନ୍ ତା ଶାକ୍ତି ହୁଦାଙ୍ଗ୍ ମିଙ୍ଗେଙ୍ଗ୍ ଟିକ୍ ମାନାୟ୍ ଆନି କାଜିଙ୍ଗ୍ ହିକ୍ଷା ହିଦ୍ନାନ୍। 4 ଖ୍ରୀଷ୍ଟ କୃଶକାଟ୍ତାକେ ହାଃତିହିଙ୍ଗ୍ ଦୁର୍ବଲ୍ ମାଚାନ୍, ମାତର୍ ନଙ୍ଗୟ୍ ହେୱାନ୍ ଈଶ୍ୱର ଶାକ୍ତିତାଙ୍ଗ୍ ଜିବୁନ୍ ମାନାନ୍। ହେଲେକେ ଆସେଙ୍ଗ୍ ପା ଦୁର୍ବଲ୍ ଇନେସ୍ ଖ୍ରୀଷ୍ଟ ଦୁର୍ବଲ୍ ମାଚାନ୍, ମାତର୍ ଆପେଙ୍ଗ୍ ଏଚେପାଦ୍ନା ମିଙ୍ଗେଙ୍ଗ୍ ଟିକ୍ ମାନାୟ୍ ଆଦେଙ୍ଗ୍ ହିକ୍ଷା ହିଦ୍ନାପ୍। ଆସେଙ୍ଗ୍ ତା ହୁଦାଙ୍ଗ୍ ଜିବୁନ୍ ମାନ୍ଗାନାସ୍ ଆରେ ଈଶ୍ୱର ଶାକ୍ତି ମା ହୁଦାଙ୍ଗ୍ ମାନ୍ଗାନାତ୍। 5 ଏପେଙ୍ଗ୍ ହାତ୍ପା ଈଶ୍ୱରତିଙ୍ଗ୍ ପାର୍ତି କିନାଦେରା କି ଆକାୟ୍ ଇଞ୍ଜି ଏପେଙ୍ଗ୍ ଜାର୍ତିଙ୍ଗ୍ ପରିକ୍ଷା କିୟାଟ୍। ଏପେଙ୍ଗ୍ ହାର୍ କିଜି ପୁଚାଦେର୍ନା ଯେ ଯୀଶୁ ଖ୍ରୀଷ୍ଟ ମି ବିତ୍ରେ ମାନାନ୍, ଆତିସ୍ପା କେତେକ୍ ମାନାୟାର୍ ମାନାର୍ ହେୱାର୍ ଈଶ୍ୱରତିଙ୍ଗ୍ ପାର୍ତି କିୱିଲେକେ ବ୍ୟବହାର୍ କିନାରା। 6 ମାତର୍ ଆନେଙ୍ଗ୍ ଆହା କିନାଙ୍ଗା ଯେ ଏପେଙ୍ଗ୍ ଜାର୍ତିଙ୍ଗ୍ ପରିକ୍ଷା କିଜି ପୁନାଦେର୍, ହାତ୍ପା ଈଶ୍ୱର ମାଙ୍ଗେଙ୍ଗ୍ ବାଚି କିତ୍ତାନ୍ନା। 7 ଆପେଙ୍ଗ୍ ଈଶ୍ୱରତିଙ୍ଗ୍ ପାର୍ତାନା କିନାପା ଯେ, ଆପେଙ୍ଗ୍ ମିଙ୍ଗେଙ୍ଗ୍ ଟିକ୍ ମାନାୟ୍ ଆଡ ଇଞ୍ଜି ହିତ୍ତି ହିକ୍ଷାତିଙ୍ଗ୍ ଆହ୍ନାଦେର୍, ଇମ୍ଣାକା କି ହାର୍ ବିଷୟ। ଆନେଙ୍ଗ୍ ଆହା କିନାଙ୍ଗା ଯେ ଆପେଙ୍ଗ୍ ଏଚେପାଦ୍ନା ମିତାକେ ୱାନାପ୍ ଈଶ୍ୱର ମାଙ୍ଗେଙ୍ଗ୍ ହିତ୍ତି ଅଦିକାର୍ ବିଷୟରେ ମିଙ୍ଗେଙ୍ଗ୍ ବୁଜାୟ୍ କିଦ୍ନି ଦର୍କାର୍ ଆକାୟ୍। ମି ବିତ୍ରେତାଙ୍ଗ୍ କେତ୍ଜାଣ୍ ଈଶ୍ୱର ମାଙ୍ଗେଙ୍ଗ୍ ତା ଚେଲାର୍ କିଦ୍ୱାତାନ୍ନା ଇଞ୍ଜି ବାବିକିଜି ମାଚିସ୍ ପା, ଆପେଙ୍ଗ୍ ୱାୱି ଆଗେ ଏପେଙ୍ଗ୍ ହାର୍ କାମାୟ୍ କିଜି ମାନାଟ୍। 8 ଇନେସ୍ ଆପେଙ୍ଗ୍ ସତ୍ତିଙ୍ଗ୍ ବିରଦ୍ କିଦେଙ୍ଗ୍ ଆଡୁପ୍, ମାତର୍ ଆପେଙ୍ଗ୍ ୱିଜୁଦିନ୍ ସତ୍ କାମାୟ୍ ନେ କିନାପା। 9 ଆପେଙ୍ଗ୍ ଦୁର୍ବଲ୍ ମାନିହିଙ୍ଗ୍ ଏପେଙ୍ଗ୍ ଯଦି ଶାକ୍ତି କାଟାକାଦେର୍ ଆତାଦେର୍ନା ଆପେଙ୍ଗ୍ ୱାରିୟା ଆନାପା, ଆରେ ଏପେଙ୍ଗ୍ ଗାଜାକାର୍ ଆନି କାଜିଙ୍ଗ୍ ଈଶ୍ୱରତାକେ ପାର୍ତାନା କିନାପା। 10 ଆନେଙ୍ଗ୍ ଇ ଚିଟି ମିତାକେ ୱାୱି ଆଗେ ମି କାଜିଙ୍ଗ୍ ଲେକିକିନାଙ୍ଗା, ଆନେଙ୍ଗ୍ ଆହା କିନାଙ୍ଗା ଯେ ଏଚେପାଦ୍ନା ଆନେଙ୍ଗ୍ ମିତାକେ ୱାନାଙ୍ଗ୍ ମାପୃ ନାଙ୍ଗେଙ୍ଗ୍ ହିତ୍ତି ଅଦିକାର୍ତିଙ୍ଗ୍ ବ୍ୟବହାର୍ କିଜି ଦଣ୍ଡ୍ ହିଦ୍ଦେଙ୍ଗ୍ ଦର୍କାର୍ ଆକାୟ୍। ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ବିନାସ୍ କିଦ୍ଦେଙ୍ଗ୍ ଇଚା କିଉଙ୍ଗା, ମାତର୍ ହେ ଅଦିକାର୍ତିଙ୍ଗ୍ ବ୍ୟବହାର୍ କିଜି ଈଶ୍ୱରତିଙ୍ଗ୍ ଆଦିକ୍ ପାର୍ତିକିୟାଟ୍ ଇଞ୍ଜି ଆନେଙ୍ଗ୍ ସାଇଜ କିଦ୍ଦେଙ୍ଗ୍ ଇଚା କିନାଙ୍ଗା। ପାଉଲତି ସେସ୍ ଜୱାର୍ 11 ଏ ଲାଡ୍ନି ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ସେସ୍ କାତା ୱେଚ୍ଚି ଇ ଚିଟି ଲେକିକିନାକା ବନ୍ଦ୍ କିନାଙ୍ଗା, ଏପେଙ୍ଗ୍ ୱିଜୁଦିନ୍ ୱାରି କିୟାଟ୍। ଏପେଙ୍ଗ୍ ଗାଜାକାର୍ ଲେକ ବୁଦି କାଟାକାଦେର୍ ଆଡ। ଏପେଙ୍ଗ୍ ଜାର୍-ଜାର୍ବିତ୍ରେ ସାସ୍ ହିବାଆଡ। ଏପେଙ୍ଗ୍ ର ମାନ୍ଆଜି ଶାନ୍ତିତାଙ୍ଗ୍ ମାନାଟ୍। ଲାଗିଙ୍ଗ୍ ଲାଡ୍ ଆରେ ଶାନ୍ତିନି ଈଶ୍ୱର ମିହୁଦାଙ୍ଗ୍ ମାନ୍ଗାନାନ୍। 12 ଏପେଙ୍ଗ୍ ଜାର୍-ଜାର୍ବିତ୍ରେ ଲାଡ୍ ହୁଦାଙ୍ଗ୍ ଜୱାର୍ କିବା ଆଡ। 13 ଇବେ ମାନି ୱିଜୁ ଯୀଶୁ ଖ୍ରୀଷ୍ଟର୍ ଲକ୍ ମିଙ୍ଗେଙ୍ଗ୍ ଜୱାର୍ କିଦ୍ନାରା। 14 ମା ମାପୃ ଯୀଶୁ ଖ୍ରୀଷ୍ଟ ଦୟା, ଈଶ୍ୱର ଲାଡ୍, ଆରେ ପବିତ୍ର ଆତ୍ମା ମି ୱିଜାଦେର୍ ହୁଦାଙ୍ଗ୍ ମାହାଆଜି ମାନେତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation