୨ କରନ୍ତିୟ 12 - New Testament in Pengo Parja Languageପାଉଲ କେଞ୍ଚାକା ଆରେ ତା ଗାଗାଡ଼୍ତ ମାନି ୱାଡ଼ି ମାନି କାତା 1 ଆନେଙ୍ଗ୍ ଜାର୍ କାଜିଙ୍ଗ୍ ବାଟ୍ପାଣ୍ ଆନାକା ହାର୍ ଆକାୟ୍, ଇନେସ୍କି ନାଙ୍ଗେଙ୍ଗ୍ ମାପୃ ଚଞ୍ଜିଆଆଜି ମାନ୍ଞ୍ଚାତ୍ ଆରେ ନା ବିଷୟରେ ୱେଚ୍ଚି ମାନ୍ଞ୍ଚାନ୍। 2-3 ଚଉଦ ବାର୍ହୁ ଆଗେ ମାପୃ ଯୀଶୁ ଖ୍ରୀଷ୍ଟ ନାଙ୍ଗେଙ୍ଗ୍ ତିନ୍ ନମ୍ବର୍ନି ସରଗ୍ତାକେ ଅଜି ମାନ୍ଞ୍ଚାନ୍। ହେ ତିନ୍ ନମ୍ବର୍ନି ସରଗତାକେ ନା ଗାଗାଡ଼୍ ହାଲ୍ଜି ମାଚାତ୍ କି ନା ଆତ୍ମା ହାଲ୍ଜି ମାଚାତ୍ ଆନେଙ୍ଗ୍ ପୁନୁଙ୍ଗ୍, ମାତର୍ ଈଶ୍ୱର ପୁଚାନ୍ନା। 4 ମାତର୍ ଆନେଙ୍ଗ୍ ଇଦାଙ୍ଗ୍ ପୁଚାଙ୍ଗ୍ନା ଯେ, ନାଙ୍ଗେଙ୍ଗ୍ ମାପୃ ଈଶ୍ୱର ମାନି ସରଗ୍ତାକେ ଅଜି ମାନ୍ଞ୍ଚାତ୍, ଆରେ ହେବେ ମାନି ଚାନିଆଆନି ବିଷୟ ୱିଜୁ ଆନେଙ୍ଗ୍ ୱେଚାଙ୍ଗ୍, ଇମ୍ଣାକା କି ଇନେରିଙ୍ଗ୍ ୱେଚ୍ଚିୟା ଆଉତ୍। 5 ଲାଗିଙ୍ଗ୍ ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ବାଟ୍ପାଣ୍ ଆଜି ୱେଚ୍ଚେଙ୍ଗ୍ ଆଡ୍ନାଙ୍ଗ୍, ମାତର୍ ଆନେଙ୍ଗ୍ ହେଲେକେ କିଉଙ୍ଗ୍। ଆନେଙ୍ଗ୍ ୱାରା ଇ ବିଷୟରେ ୱେଚ୍ନାଙ୍ଗ୍ ଇମ୍ଣାକା ମାନାୟାର୍ ନାଙ୍ଗେଙ୍ଗ୍ ଦୁର୍ବଲ୍ ଇଞ୍ଜି ବାବିକିନାରା। 6 ଆନେଙ୍ଗ୍ ବେସି ବିଷୟରେ ବାଟ୍ପାଣ୍ ଆଦେଙ୍ଗ୍ ଆଡ୍ନାଙ୍ଗ୍, ମାତର୍ ଆନେଙ୍ଗ୍ ହେଲେକେ କିଉଙ୍ଗା, ଇନେସ୍କି ଆନେଙ୍ଗ୍ ସତ୍ ୱେଚ୍ଚି ମାନାଙ୍ଗ୍। ମାତର୍ ଆନେଙ୍ଗ୍ ଇଲେକେ ୱେଚୁଙ୍ଗ୍। ଆନେଙ୍ଗ୍ ଇଚା କିଉଙ୍ଗା ଯେ ଇନେର୍ ପା ନାଙ୍ଗେଙ୍ଗ୍ ଆଦିକ୍ ଗାଜାକାନ୍ ଇଞ୍ଜି ବାବିକିମେର୍, ଇମ୍ଣାକା ହେୱାର୍ ଆନେଙ୍ଗ୍ ଜିବୁନ୍ କାଟି କିନାକା ହୁଡ଼୍ଜି ଆରେ ନା ହିକ୍ଷା ୱେନ୍ଞ୍ଜି ଇଞ୍ଜ୍ନାର୍। 7 ମାତର୍ ଈଶ୍ୱର ନାଙ୍ଗେଙ୍ଗ୍ ଚଚ୍ଚି ମାନ୍ଞ୍ଚି ଚାନିଆଆନି ବିଷୟରେ ଚଞ୍ଜିଆ ଆନି ଦର୍କାର୍ ଆକାୟ୍। ଇନେସ୍କି ଶୟତାନନି ଡାଣ୍ଡାସି ନା ଗାଗାଡ଼୍ତାକେ ର ୱାଡ଼ି କଷ୍ଟ ପାୟା ଆଦେଙ୍ଗ୍ ହିତ୍ତାନ୍ନା ଆରେ ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ବାଟ୍ପାଣ୍ ଆଦେଙ୍ଗ୍ ଆଡୁଙ୍ଗା। 8 ମାପୃଙ୍ଗ୍ ତିନ୍ହଟ୍ ନା ଗାଗାଡ଼୍ନି ୱାଡ଼ିତିଙ୍ଗ୍ ଉନ୍ନ୍ଦେଙ୍ଗ୍ ପାର୍ତାନା କିଜି ମାଚାଙ୍ଗ୍। 9 ଆରେ, ହେୱାନ୍ ନାଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାନ୍ ନା ଦୟାନି କାଜିଙ୍ଗ୍ ଜତେଷ୍ଟ, ଇନେସ୍କି ଏନେଙ୍ଗ୍ ଦୁର୍ବଲ୍ ମାଚିସ୍ ନେ ନା ଶାକ୍ତି ନିତାକେ ପୁରାଆନାତ୍। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ନା ଦୁର୍ବଲ୍ କାଜିଙ୍ଗ୍ ବାଟ୍ପାଣ୍ ଆନାଙ୍ଗା, ଲାଗିଙ୍ଗ୍ ଖ୍ରୀଷ୍ଟ ଶାକ୍ତି ନା ଜପି ମାନ୍ଗାନାତ୍। 10 ଆନେଙ୍ଗ୍ ପୁଚାଙ୍ଗ୍ନା ଯେ, ଇ ୱିଜୁ ଖ୍ରୀଷ୍ଟ କାଜିଙ୍ଗ୍ ଆନାତା, ଆନେଙ୍ଗ୍ ଦୁର୍ବଲ୍ ମାଚିସ୍ କି, ମାନାୟାର୍ ଇନସ୍ତା କିତ୍ତିସ୍ କି, ନାଙ୍ଗେଙ୍ଗ୍ କଷ୍ଟଆଜି ମାଚିସ୍ କି, ମାନାୟାର୍ ଦୁଃକ୍ କଷ୍ଟ ହିଜି ମାନ୍ଞ୍ଚିସ୍ କି ଆରେ ନାଙ୍ଗେଙ୍ଗ୍ ବିପତ୍ ୱାତିସ୍ ପା ଆନେଙ୍ଗ୍ ୱାରିତାଙ୍ଗ୍ ମାନାଙ୍ଗ୍। ଇନେସ୍କି ଏଚେପାଦ୍ନା ଆନେଙ୍ଗ୍ ଦୁର୍ବଲ୍ ମାନାଙ୍ଗା ହେପାଦ୍ନା ଆନେଙ୍ଗ୍ ଶାକ୍ତି ଆନାଙ୍ଗା। କରନ୍ତିୟ ମଣ୍ଡ୍ଲି କାଜିଙ୍ଗ୍ ପାଉଲତି ବଜ୍ 11 ଆନେଙ୍ଗ୍ ବକ୍ୱା ଲେକେ ବ୍ୟବହାର୍ କିନାଙ୍ଗା, ଇନେସ୍କି ଏପେଙ୍ଗ୍ ନାଙ୍ଗେଙ୍ଗ୍ ହେଲେକେ କିଦେଙ୍ଗ୍ ବାଦ୍ୟ କିତ୍ତାଦେର୍। ଇନେସ୍କି ଏପେଙ୍ଗ୍ ନାଙ୍ଗେଙ୍ଗ୍ ହାର୍ ଇଞ୍ଜି ଇଞ୍ଜ୍ନାକା ମାଚାତ୍, ଲାଗିଙ୍ଗ୍ ଆନେଙ୍ଗ୍ ବେକାର୍ ଆଜି ମାଚିସ୍ ପା, ଆନେଙ୍ଗ୍ ଗାଜା ବାଚିକିତି ଚେଲାର୍ତାଙ୍ଗ୍ ହିରୁକାଙ୍ଗ୍ ଆକାୟ୍। 12 ଆନେଙ୍ଗ୍ ଏଚେପାଦ୍ନା ମିତାକେ ମାଚାଙ୍ଗ୍, ଈଶ୍ୱର ନାଙ୍ଗେଙ୍ଗ୍ ମିତାକେ ପକ୍ତାତାନ୍ନା ଆରେ ଆନେଙ୍ଗ୍ ହାତ୍ପା ରକାଙ୍ଗ୍ ଈଶ୍ୱର ବାଚିକିତି ଚେଲାଇଞ୍ଜି ୱେଚ୍ଚି ମାଚାଙ୍ଗ୍। ଇନେସ୍କି ଆନେଙ୍ଗ୍ ସାସ୍ ଆଜି ବେସି ଚାନିଆଆନି ଚିନ୍, ଚାନିଆଆନି କାମାୟ୍ ଆରେ ଶାକ୍ତିନି କାମାୟ୍ ୱିଜୁ ମିତାକେ କିଜି ମାଚାଙ୍ଗ୍। 13 ଆନେଙ୍ଗ୍ ର ବିଷୟ କିଉଙ୍ଗା ଇମ୍ଣାକା ଜେକନି ମଣ୍ଡ୍ଲିକାଙ୍ଗ୍ କିନାଙ୍ଗା, ହେଦାଙ୍ଗ୍ ନାଙ୍ଗେଙ୍ଗ୍ ସାଇଜ କିଦାଟ୍ ଇଞ୍ଜି ୱେଚ୍ନାଙ୍ଗା। ହେଦାଙ୍ଗ୍ କାଜିଙ୍ଗ୍ ହେ ବୁଲ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ କେମା କିଦାଟ୍ ଇଞ୍ଜି ଗୁୱାରି କିଦ୍ନାଙ୍ଗା। 14 ଇଦାଙ୍ଗ୍ ହୁଦାଙ୍ଗ୍ ତିନ୍ହଟ୍ ଆନାତ୍ ମିତାକେ ୱାନାଙ୍ଗା, ଆରେ ଆନେଙ୍ଗ୍ ମିଙ୍ଗେଙ୍ଗ୍ କଷ୍ଟ ହିଦ୍ଦେଙ୍ଗ୍ ଇଚା କିଉଙ୍ଗା। ଆନେଙ୍ଗ୍ ମିବେତାଙ୍ଗ୍ ଆରେ ସାଇଜ ପାୟା ଆଦେଙ୍ଗ୍ ଇଚା କିଉଙ୍ଗା, ମାତର୍ ମିଙ୍ଗେଙ୍ଗ୍ ଜାର୍ ଲକ୍ କିଦ୍ଦେଙ୍ଗ୍ ୱାନାଙ୍ଗା। ଇନେସ୍କି ହିମ୍ଣାଙ୍ଗ୍ ଆୟା ଆବାର୍ କାଜିଙ୍ଗ୍ କାଦି ରୁଣ୍ଡାୟ୍ କିଉର୍, ମାତର୍ ଆୟା ଆବାର୍ ହିମ୍ଣାଙ୍ଗ୍ କାଜିଙ୍ଗ୍ କାଦି ରୁଣ୍ଡାୟ୍ କିନାର୍। 15 ଏପେଙ୍ଗ୍ ଈଶ୍ୱରତିଙ୍ଗ୍ ଆଦିକ୍ ପାର୍ତିକିନି କାଜିଙ୍ଗ୍ ନାବେ ମାନି ଦାନ୍ ଜାର୍ତିଙ୍ଗ୍ ପା ହିଦେଙ୍ଗ୍ ୱାରିୟା ଆନାଙ୍ଗ୍, ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଆଦିକ୍ ଲାଡ୍ କିତ୍ତିସ୍ ପା ଏପେଙ୍ଗ୍ ନାଙ୍ଗେଙ୍ଗ୍ ଅଲପ୍ ଲାଡ୍ କିଦ୍ନିଲେକେ ଆନାତା। 16 ଏପେଙ୍ଗ୍ ପୁଚାଦେର୍ନା ନାଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ କାଜିଙ୍ଗ୍ ମିଙ୍ଗେଙ୍ଗ୍ ଆହା କିଦୁଙ୍ଗା, ମାତର୍ ମି ବିତ୍ରେ କେତ୍ଜାଣ୍ ମାନାର୍, ହେୱାର୍ ନାଙ୍ଗେଙ୍ଗ୍ ଇଞ୍ଜ୍ନାରା ଚାଲାକି ହୁଦାଙ୍ଗ୍ ମାବେତାଙ୍ଗ୍ ଡାବୁଙ୍ଗ୍ ଅନାନା। 17 ଆନେଙ୍ଗ୍ ତିତସ କି ଜେକନିକାରିଙ୍ଗ୍ ବ୍ୟବହାର୍ କିଜି ମିବେତାଙ୍ଗ୍ ଡାବୁଙ୍ଗ୍ ପାୟା ଆୱାତାଙ୍ଗ୍ନା। 18 ଏଚେପାଦ୍ନା ଆନେଙ୍ଗ୍ ତିତସ ଆରେ ଜେକନି ଟଣ୍ଡାରିଙ୍ଗ୍ ମିତାକେ ୱାଦେଙ୍ଗ୍ ଗୁୱାରି କିତାଙ୍ଗ୍ ହେୱାର୍ ମିବେତାଙ୍ଗ୍ ଇନା ପାଇଦା ପାୟା ଆୱାତାର୍ମା, ଇନେସ୍କି ଆପେଙ୍ଗ୍ ରିୟାର୍ ମାନ୍ ରଲେକେ ଆରେ ଆପେଙ୍ଗ୍ ୱିଜୁ କାମାୟ୍ ରଲେକେ କିନାପା। 19 ଏପେଙ୍ଗ୍ ବାବିକିଜି ମାନାଦେର୍ ଯେ, ମା ବିରୁଦ୍ତାକେ ୱେଚ୍ଚି ମାନି ୱିଜୁ ବିଷୟତିଙ୍ଗ୍ ବନ୍ଦ୍ କିଦେଙ୍ଗ୍ ଇ ୱିଜୁ ଲେକିକିନାଙ୍ଗା, ହେଲେକେ ଆକାୟ୍, ମାତର୍ ଆପେଙ୍ଗ୍ ଖ୍ରୀଷ୍ଟତାକେ ଚାକର୍ ଆଜିମାଚି କାଜିଙ୍ଗ୍ ଇ ୱିଜୁ ୱେଚ୍ଚାନାପା। ଇ ୱିଜୁ ଜିନିଷ୍ ମି ଲାବ୍ କାଜିଙ୍ଗ୍ କିନାପା, ଇନେସ୍କି ଆପେଙ୍ଗ୍ ପୁଚାପ୍ନା ଯେ ଈଶ୍ୱର ମାଙ୍ଗେଙ୍ଗ୍ ୱେଞ୍ଜ୍ନାନା। 20 ଆନେଙ୍ଗ୍ ଏଚେପାଦ୍ନା ମିତାକେ ୱାନାଙ୍ଗ୍, ଆନେଙ୍ଗ୍ ମିଙ୍ଗେଙ୍ଗ୍ ଇନେସ୍ ହୁଡ଼୍ଦେଙ୍ଗ୍ ଇଚା କିତାଙ୍ଗ୍ନା ହେଲେକେ ହୁଡ଼୍ଦିୱିତିସ୍, ଆନେଙ୍ଗ୍ ଇନେସ୍ ବ୍ଯବହାର୍ କିଦ୍ନାଙ୍ଗ୍ ହେଦାଙ୍ଗ୍ତିଙ୍ଗ୍ ଆହୁଦେର୍ ଇଞ୍ଜି ଆନେଙ୍ଗ୍ ପାଣ୍ଡ୍ରାଆନାଙ୍ଗା। ଇନେସ୍କି ମି ବିତ୍ରେ ଗଣ୍ଡ୍ଗଲ୍, ଆକାର୍, ରିସା, ଲବ୍ ଆନି ବୁଦି, ଲକାର୍ ବିରୁଦ୍ତାକେ ଇନାକା, ଲକାର୍ ବିରୁଦ୍ତାକେ ଗାଣ୍ଜୁ କିନାକା ଆରେ କରାପ୍ ବ୍ୟବହାର୍ କିନି ବିଷୟରେ ଆନେଙ୍ଗ୍ ପାଣ୍ଡ୍ରାଆନାଙ୍ଗା। 21 ମିତାକେ ୱାଦେଙ୍ଗ୍ ଆନେଙ୍ଗ୍ ପାଣ୍ଡ୍ରାଆନାଙ୍ଗା, ଈଶ୍ୱର ନାଙ୍ଗେଙ୍ଗ୍ ମି କାଜିଙ୍ଗ୍ ଦରମ୍ କିଦେତ୍। ନଇଲେ ଆନେଙ୍ଗ୍ ଦୁଃକ୍ ଆନାଙ୍ଗ୍, ଇନେସ୍କି ମିବେତାଙ୍ଗ୍ ବେସିହେନି ମାନାୟାର୍ ଇ ୱିଜୁ ପାପ୍, ଆରେ ପବିତ୍ର ଆୱାତାର୍ନା। ଆରେ ଦାରି କାମାୟ୍ କିନି ଇଚାତାଙ୍ଗ୍ ମାନ୍ବାଦ୍ଲାୟ୍ କିୱାତାଦେର୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation