୨ କରନ୍ତିୟ 11 - New Testament in Pengo Parja Languageପାଉଲ ଆରେ ମିଚ୍ ୱେଚ୍ନି ବାଚିକିତି ଚେଲା 1 ଏପେଙ୍ଗ୍ ଜେକନିକାରିଙ୍ଗ୍ ଆହ୍ନାଦେରା, ଇନେର୍କି ଜାର୍ତିଙ୍ଗ୍ ହାର୍ଦାକାଙ୍ଗ୍ ଇଞ୍ଜି ୱେଚ୍ନାରା, ହେଦାଙ୍ଗ୍ କାଜିଙ୍ଗ୍ ଯଦି ଆନେଙ୍ଗ୍ ହେୱାର୍ ଲେକେ ବକ୍ୱା ବ୍ୟବହାର୍ କିନାଙ୍ଗା। ଲାଗିଙ୍ଗ୍ ଆନେଙ୍ଗ୍ ଆହା କିନାଙ୍ଗା ଯେ ଏପେଙ୍ଗ୍ ନାଙ୍ଗେଙ୍ଗ୍ ପା ଆସ୍ତାନାଦେର୍। 2 ଈଶ୍ୱର ଚିନ୍ତା କିତିଲେକେ ଆନେଙ୍ଗ୍ ମି କାଜିଙ୍ଗ୍ ଚିନ୍ତା କିନାଙ୍ଗା। ଆନେଙ୍ଗ୍ ମିଙ୍ଗେଙ୍ଗ୍ ଖ୍ରୀଷ୍ଟଙ୍ଗ୍ନେ ହିଦ୍ଦେଙ୍ଗ୍ ପାର୍ମାଣ୍ କିତାଙ୍ଗ୍ନା ହେଦାଙ୍ଗ୍ ଇଲେକେ ଯେ, ର ଆବା ତା ବେଣ୍ଡିଆ ଗାଡ଼୍ଚେଙ୍ଗ୍ ବିବା ଆନିହିଙ୍ଗ୍ ତା ଡକ୍ରାହିଙ୍ଗ୍ ସର୍ପି କିନାନ୍। 3 ମାତର୍ ପାର୍ତୁମ୍ କଗ୍ଲେଙ୍ଗ୍ ହବାଙ୍ଗ୍ ଶୟ୍ତାନ୍ ରାଚ୍ ହେଲେକେ ଆଜି ଟକାୟ୍ କିତାତ୍। ହେଲେକେ ଶୟ୍ତାନ୍ ମିଚ୍ ହିକ୍ଷାହିନି ମାନାୟାର୍ଲେକେ ଆଜି ମିଙ୍ଗେଙ୍ଗ୍ ପା ଚାଲାକି କିଜି ଟକାୟ୍ କିଦ୍ନାତ୍ ଆରେ ଏପେଙ୍ଗ୍ ଖ୍ରୀଷ୍ଟଙ୍ଗ୍ ହେବା କିନାକା ବନ୍ଦ୍ କିନାଦେର୍ ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ପାଣ୍ଡ୍ରାଆନାଙ୍ଗା। 4 ଆପେଙ୍ଗ୍ ଯୀଶୁ ବିଷୟରେ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାପ୍, ଏପେଙ୍ଗ୍ ପବିତ୍ର ଆତ୍ମାତିଙ୍ଗ୍ ପାୟାଆଜି ମାଚାଦେର୍ ଆରେ ଆପେଙ୍ଗ୍ ୱେଚ୍ଚିତି ହାର୍ଦିକାବୁର୍ତିଙ୍ଗ୍ ଆସ୍ତି ମାଚାଦେର୍। ମାତର୍ ଏପେଙ୍ଗ୍ ନଙ୍ଗୟ୍ ଜେକନି ଯୀଶୁ ବିଷୟରେ ୱେଚ୍ନି ମାନାୟାରିଙ୍ଗ୍ ଆହ୍ନାଦେରା, ଏପେଙ୍ଗ୍ ଜେକନି ଆତ୍ମାତିଙ୍ଗ୍ ଆରେ ଜେକନି ହାର୍ଦିକାବୁର୍ତିଙ୍ଗ୍ ଆସ୍ତେଙ୍ଗ୍ ରେଡି ଆତାଦେର୍ନା। ଏପେଙ୍ଗ୍ ହେ ହିକ୍ଷାତିଙ୍ଗ୍ ଆସ୍ତି ବେସିବୁଲ୍ କିନାଦେରା। 5 ମାତର୍ ଆନେଙ୍ଗ୍ ଜାର୍ତିଙ୍ଗ୍ ହେ ବାଚିକିତି ଚେଲାର୍ ଆଗେ ହିରୁକାଙ୍ଗ୍ ଇଞ୍ଜି ବାବିକିଉଙ୍ଗା ଇନେର୍ ମିଙ୍ଗେଙ୍ଗ୍ ଇଲେକେ ହିକ୍ଷା ହିଦ୍ୱାତାର୍ନା। 6 ଆନେଙ୍ଗ୍ ହେୱାର୍ ଲେକେ ଚାଲାକି ହୁଦାଙ୍ଗ୍ ମିଚ୍ ହିକ୍ଷା ମିଙ୍ଗେଙ୍ଗ୍ ହିଦୁଙ୍ଗା, ମାତର୍ ନାଙ୍ଗେଙ୍ଗ୍ ବୁଦି ମାନାତ୍। ଆନେଙ୍ଗ୍ ମିଙ୍ଗେଙ୍ଗ୍ କେତେହଟ୍ ଇ ବିଷୟରେ କିଲେର୍ କିଜି ପୁନି କିଜି ମାନ୍ଞ୍ଚାଙ୍ଗ୍। 7 ଆନେଙ୍ଗ୍ ଜାର୍ତିଙ୍ଗ୍ ମି ମୁମ୍ଦ ଦରମ୍ଆଜି, ମିଙ୍ଗେଙ୍ଗ୍ ଈଶ୍ୱର ହାର୍ଦିକାବୁର୍ ଉପ୍କା ଶୁଣାୟ୍ କିଜି ମାନ୍ଞ୍ଚାଙ୍ଗ୍, ଆରେ ଆନେଙ୍ଗ୍ ହେଲେକେ କାମାୟ୍ କିଜି ପାପ୍ କିୱାଦାଙ୍ଗ୍ ମାଚାଙ୍ଗ୍। 8 ଏପେଙ୍ଗ୍ ଇନେସ୍ ଆନେଙ୍ଗ୍ ଇଲେକେ କିନାକା ବୁଲ୍ ଇଞ୍ଜି ଇନୁଦେର୍, ହେଦାଙ୍ଗ୍ କାଜିଙ୍ଗ୍ ନାଙ୍ଗେଙ୍ଗ୍ ଜେକନି ମଣ୍ଡ୍ଲିନି ପାର୍ତିକିନି ମାନାୟାର୍ ସାଇଜ କିତ୍ତି କାଜିଙ୍ଗ୍ ଆନେଙ୍ଗ୍ ମିତାକେ ହେବା କିନାଙ୍ଗା। 9 ଆନେଙ୍ଗ୍ ମିହୁଦାଙ୍ଗ୍ ମାନିହିଙ୍ଗ୍ ନାଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ତିଙ୍ଗ୍ ପୁରା କିୟାଟ୍ ଇଞ୍ଜି ଆନେଙ୍ଗ୍ ମିଙ୍ଗେଙ୍ଗ୍ ବଜ୍ ହିଦ୍ୱାଦାଙ୍ଗ୍ ମାନ୍ଞ୍ଚାଙ୍ଗ୍। ଇନେସ୍କି ମାକଦନିଆ ସହର୍ତାଙ୍ଗ୍ ୱାଜିମାଚି ପାର୍ତିକିନି ଟଣ୍ଡାର୍ ନାଙ୍ଗେଙ୍ଗ୍ ଦର୍କାର୍ ଆଦ୍ନି ୱିଜୁ ଜିନିଷ୍ତିଙ୍ଗ୍ ହିଜି ମାନ୍ଞ୍ଚାର୍। ନାଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ ପୁରାୟ୍ କିନି କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ବଜ୍ ହିଦ୍ୱାତାଙ୍ଗ୍ନା କି ପାଚେ ପା ହିଦୁଙ୍ଗ୍। 10 ଆରେ ଏପେଙ୍ଗ୍ ପୁଚାଦେର୍ନା ଯେ, ଖ୍ରୀଷ୍ଟତି ସତ୍ ନା ବିତ୍ରେ ମାନାତା, ଲାଗିଙ୍ଗ୍ ଆନେଙ୍ଗ୍ ଇ ବିଷୟରେ ବାଟ୍ପାଣ୍ ଆନାକା, ଆକାୟା ସହର୍ ନିକାର୍ ଇନେର୍ ପା ନାଙ୍ଗେଙ୍ଗ୍ ବନ୍ଦ୍ କିଦ୍ଦେଙ୍ଗ୍ ଆଡ଼୍ଦୁର୍। 11 ଆନେଙ୍ଗ୍ ମିବେତାଙ୍ଗ୍ ଡାବୁଙ୍ଗ୍ ଅୱାତାଙ୍ଗ୍ନା, ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ଲାଡ୍ କିଦ୍ନାଙ୍ଗା, ଆରେ ହେଦାଙ୍ଗ୍ ଈଶ୍ୱର ପୁଚାନ୍ନା। 12 ଲାଗିଙ୍ଗ୍ ଆନେଙ୍ଗ୍ ହେ ମିଚ୍ ଚେଲାରିଙ୍ଗ୍ ବନ୍ଦ୍ କିଦେଙ୍ଗ୍ ଆଡ୍ନାଙ୍ଗ୍, ଇମ୍ଣାକାର୍ ମା ହୁଦାଙ୍ଗ୍ ହାମାନ୍ ଇଞ୍ଜି ଜାର୍ତିଙ୍ଗ୍ ବାବିକିନାର୍। ହେୱାର୍ ହାତ୍ପା ବାଟ୍ପାଣ୍ ଆନି କାଜିଙ୍ଗ୍ ଉପାୟ୍ ଦାହ୍ନାରା, ଲାଗିଙ୍ଗ୍ ହେୱାର୍ ମା ହୁଦାଙ୍ଗ୍ ହାମାନ୍ ଇଞ୍ଜି ଚଚ୍ଚେଙ୍ଗ୍ ଆଡ୍ନାର୍। 13 ଇଲେଗ୍ଦି ମାନାୟାର୍ ହାତ୍ପା ବାଚିକିତି ଚେଲା ହିଲୁର୍। ହେୱାର୍ ଜାର୍ତିଙ୍ଗ୍ ଖ୍ରୀଷ୍ଟର୍ ବାଚିକିତି ଚେଲାଇଞ୍ଜି ୱେଚ୍ନାରା, ଆରେ ହେୱାର୍ ମାନାୟାରିଙ୍ଗ୍ ଟକାୟ୍ କିନାରା। 14 ମାତର୍ ହେୱାର୍ କାଜିଙ୍ଗ୍ ଆନେଙ୍ଗ୍ ଚାନିଆ ଆଉଙ୍ଗା, ଇନେସ୍କି ଶୟତାନ ଜାର୍ତିଙ୍ଗ୍ ଅଜଡ଼୍ନି ଦୁତ୍ ଇଞ୍ଜି ୱେଚ୍ନାତା। 15 ଲାଗିଙ୍ଗ୍ ହେଦାଙ୍ଗ୍ ଇନା ଚାନିଆଆନି ବିଷୟ ଆକାୟ୍, ଇନେସ୍କି ଶୟ୍ତାନ୍ ଚାକରାର୍ ପା ଦରମ୍ନି ଚାକର୍ ଆତାପ୍ନା ଇଞ୍ଜି ୱେଚ୍ନାର୍। ମାତର୍ ହେୱାର୍ କରାପ୍ କାମାୟ୍ କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍। ପାଉଲ ବେସି ଦୁଃକ୍ କଷ୍ଟ ପାୟାଆତି ବିଷୟ 16 ମାତର୍ ଏଚେପାଦ୍ନା ଏପେଙ୍ଗ୍ ନା ହିକ୍ଷା ଆସ୍ତିଲେକେ ହେ ବକ୍ୱାର୍ ହିକ୍ଷାତିଙ୍ଗ୍ ଆହ୍ନାଦେର୍, ଲାଗିଙ୍ଗ୍ ଆନେଙ୍ଗ୍ ପା ମି ମୁମ୍ଦ ବାଟ୍ପାଣ୍ ଆୟା ଆନାତ୍ ଆରେ ଇଲେକେ ଆନେଙ୍ଗ୍ ୱେଚ୍ନି ବକ୍ୱାର୍ କାତା ଟିକ୍ ଇଞ୍ଜି ବାବିକିନାଙ୍ଗା। 17 ଯଦି ଇଲେକେ ବାଟ୍ପାଣ୍ ଆନାଙ୍ଗା ହେଦାଙ୍ଗ୍ ମାପୃତାଙ୍ଗ୍ ଆକାୟ୍, ମାତର୍ ଆନେଙ୍ଗ୍ ବକ୍ୱାର୍ ଲେକେ ବ୍ୟବହାର୍ କିନାଙ୍ଗା। 18 ଲାଗିଙ୍ଗ୍ ଜେକନିକାର୍ ଜାର୍ କାମାୟ୍ କିଜି ପାୟାଆତି କାଜିଙ୍ଗ୍ ବାଟ୍ପାଣ୍ ଆନାରା, ଯଦି ହେଦାଙ୍ଗ୍ ଟିକ୍ ଲାଗିଙ୍ଗ୍ ଆନେଙ୍ଗ୍ ପା ହେୱାର୍ ଲେକେ ବାଟ୍ପାଣ୍ ଆଦେଙ୍ଗ୍ ଆଡ୍ନାଙ୍ଗ୍। 19 ଆନେଙ୍ଗ୍ ହାର୍ କିଜି ପୁଚାଙ୍ଗ୍ନା ଯେ ଏପେଙ୍ଗ୍ ଜାର୍ତିଙ୍ଗ୍ ବୁଦି କାଟାକାପ୍ ଇଞ୍ଜି ବାବିକିନାଦେରା, ମାତର୍ ଏପେଙ୍ଗ୍ ବକ୍ୱାର୍ ୱେଚ୍ଚିତି ହିକ୍ଷାତିଙ୍ଗ୍ ୱାରିୟା ଆଜି ଆହ୍ନାଦେରା। 20 ମାନାୟାର୍ ଏଚେପାଦ୍ନା ମିଙ୍ଗେଙ୍ଗ୍ ଚାକର୍ କିଦ୍ଦେଙ୍ଗ୍ ଉପାୟ୍ କିନାର୍ ଏପେଙ୍ଗ୍ ରାଜି ଆନାଦେରା। ହେୱାର୍ ମିବେ ମାନି ୱିଜୁ ଜିନିଷ୍ତିଙ୍ଗ୍ ଅନିହିଙ୍ଗ୍, ହେୱାର୍ ମିଙ୍ଗେଙ୍ଗ୍ ତା କାମାୟ୍ କାଜିଙ୍ଗ୍ ବ୍ୟବହାର୍ କିଦ୍ନିହିଙ୍ଗ୍, ହେୱାର୍ ୱିଜୁ ଜିନିଷ୍ତିଙ୍ଗ୍ କଣ୍ଟ୍ରୁଲ୍ କିନିହିଙ୍ଗ୍ ଆରେ ହେୱାର୍ ମି ମୁମ୍ଦ ଚାପ୍ଡ଼ା ଇଡ଼୍ଦିନିହିଙ୍ଗ୍ ମାନିକିଜି ମାନାଟ୍। 21 ଆନେଙ୍ଗ୍ ଇଦାଙ୍ଗ୍ ୱେଚ୍ଚେଙ୍ଗ୍ ଲାଜା ଆନାଙ୍ଗା ଯେ, ଆପେଙ୍ଗ୍ ହେଲେକେ କାମାୟ୍ କିଦେଙ୍ଗ୍ ବେସି ଦୁର୍ବଲ୍ ଆତାପ୍ନା। ମାତର୍ ହେୱାର୍ ଇମ୍ଣି ବିଷୟରେ ବାଟ୍ପାଣ୍ ଆଦେଙ୍ଗ୍ ସାସ୍ ଚଚ୍ନାରା, ଆନେଙ୍ଗ୍ ପା ହେୱାର୍ ଲେକେ ନା କାମାୟ୍ କାଜିଙ୍ଗ୍ ବାଟ୍ପାଣ୍ ଆତାଙ୍ଗ୍ମା, ଆରେ ହେଦାଙ୍ଗ୍ ର ବକୁୱା ମାନାୟ୍ ୱେଚ୍ନିଲେକେ ଆନେଙ୍ଗ୍ ୱେଚ୍ନାଙ୍ଗା। 22 ହେୱାର୍ ଏବ୍ରୀ ଜାତିନି ମାନାୟ୍ ଇଞ୍ଜି ବାଟ୍ପାଣ୍ ଆତିସ୍, ଆନେଙ୍ଗ୍ ପା କିଦେଙ୍ଗ୍ ଆଡ଼୍ତାଙ୍ଗ୍ମା। ହେୱାର୍ ଇସ୍ରାଏଲ ଜାତିନି ମାନାୟ୍ ଇଞ୍ଜି ବାଟ୍ପାଣ୍ ଆତିସ୍, ଆନେଙ୍ଗ୍ ପା କିଦେଙ୍ଗ୍ ଆଡ଼୍ତାଙ୍ଗ୍ମା। ହେୱାର୍ ଅବ୍ରାହାମ କୁଟୁମ୍ ନିକାର୍ ଇଞ୍ଜି ବାଟ୍ପାଣ୍ ଆତିସ୍, ଆନେଙ୍ଗ୍ ପା କିଦେଙ୍ଗ୍ ଆଡ଼୍ତାଙ୍ଗ୍ମା। 23 ଯଦି ହେୱାର୍ ଖ୍ରୀଷ୍ଟଙ୍ଗ୍ ହେବା କିନାପା ଇଞ୍ଜି ବାଟ୍ପାଣ୍ ଆତିସ୍, ଆନେଙ୍ଗ୍ ରକାଙ୍ଗ୍ ପାଗଲ୍ ମାନାୟ୍ ୱେଚ୍ଚିଲେକେ ଆନେଙ୍ଗ୍ ହେୱାର୍ତାଙ୍ଗ୍ ବେସି ବାଟ୍ପାଣ୍ ଆଜି ୱେଚ୍ଚାଙ୍ଗ୍ମା। ଇନେସ୍କି ଆନେଙ୍ଗ୍ ଖ୍ରୀଷ୍ଟଙ୍ଗ୍ ହେବାକିନି କାଜିଙ୍ଗ୍ ବେସି କଷ୍ଟ କାମାୟ୍ କିତାଙ୍ଗ୍ନା। ହେ କାମାୟ୍ କାଜିଙ୍ଗ୍ କେତେହଟ୍ ଜଇଲ୍ ଇଞ୍ଜ ହାଲ୍ଜି ମାଚାଙ୍ଗ୍। ମାନାୟାର୍ ନାଙ୍ଗେଙ୍ଗ୍ କେତ୍ହଟ୍ ଟ୍ରାକ୍ତାତାର୍ନା ଆରେ ମାନାୟାର୍ ନାଙ୍ଗେଙ୍ଗ୍ ମାର୍ନେ ଅସ୍ତେଦେଙ୍ଗ୍ ଉପାୟ୍ କିଜି ମାଚାର୍। 24 ପାଞ୍ଚ୍ହଟ୍ ବିନେ-ବିନେ ନାଞ୍ଜିଙ୍ଗ୍ ଯିହୁଦିର୍ ନେତାର୍ ନାଙ୍ଗେଙ୍ଗ୍ ତିରିଶ୍ ନହଟ୍ ବେତ୍ ବେଡ୍ଗା ହୁଦାଙ୍ଗ୍ ଟ୍ରାକ୍ଚି ମାନ୍ଞ୍ଚାର୍। 25 ବିନେ-ବିନେ ନାଞ୍ଜିଙ୍ଗ୍ ତିନ୍ହଟ୍ ରମିୟ ସର୍କାର୍ନି ଅପିସର୍କୁ ବେତ୍ ବେଡ୍ଗା ହୁଦାଙ୍ଗ୍ ଟ୍ରାକ୍ଚି ମାନ୍ଞ୍ଚାର୍, ଆରେରଗ ମାନାୟାର୍ ନାଙ୍ଗେଙ୍ଗ୍ କାଲ୍କୁ ହୁଦାଙ୍ଗ୍ ମାର୍ନେ ଅସ୍ତେଦେଙ୍ଗ୍ ଉପାୟ୍ କିଜି ମାଚାର୍। ଆରେ ବିନେ-ବିନେ ନାଞ୍ଜିଙ୍ଗ୍ ତିନ୍ହଟ୍ ନା ଡଙ୍ଗା ଡ୍ରିଙ୍ଗ୍ଜି ମୁନ୍ଞ୍ଜି ମାଚାତ୍, ଆରେରଗ ଆନେଙ୍ଗ୍ ହାର୍ତାନାଣା ଆରେ ୱେଡ଼ାବୁଡି ହାମ୍ଦୁର୍ତାକେ କେଡ଼ା ଆଜି ମାଚାଙ୍ଗ୍। 26 ଆନେଙ୍ଗ୍ କେତ୍ହଟ୍ ବେସି ଦେହା ଖ୍ରୀଷ୍ଟ ହେବା କିଦେଙ୍ଗ୍ ହାଲ୍ଜି ମାଚାଙ୍ଗ୍। ଆନେଙ୍ଗ୍ ହାମ୍ଦୁର୍ତାକେ ହାନିହିଙ୍ଗ୍ ବିପତ୍ତାକେ ପଡ଼ାଆଜି ମାଚାଙ୍ଗ୍, ଆରେ କେତ୍ହଟ୍ ଆନେଙ୍ଗ୍ ଡାକୁର୍ତାକେ ଦରା ପଡ଼ାଆଜି ମାଚାଙ୍ଗ୍। ନା ଜାର୍ ଯିହୁଦି ଜାତିନି ମାନାୟାର୍ ଆରେ ବିନ୍ଜାତିନି ମାନାୟାର୍ ପା ନାଙ୍ଗେଙ୍ଗ୍ ମାର୍ନେ ଅସ୍ତେଦେଙ୍ଗ୍ ଉପାୟ୍ କିଜି ମାଚାର୍। ନାଙ୍ଗେଙ୍ଗ୍ ସହର୍ତାକେ, ଟାଙ୍ଗ୍ରାବାହାତାକେ ଆରେ ହାମ୍ଦୁର୍ତାକେ ବିପତ୍ ୱାଜି ମାଚାତ୍ ଆରେ ଇମ୍ଣାକାର୍ ଜାର୍ତିଙ୍ଗ୍ ପାର୍ତି କିନାକାପ୍ ଇଞ୍ଜି ୱେଚ୍ନାରା ମାତର୍ ସତ୍ ପାର୍ତି କିନାକାର୍ ଆକାୟ୍, ହେୱାର୍ ପା ନାଙ୍ଗେଙ୍ଗ୍ ବିପତ୍ତାକେ ପକାୟ୍ କିଜି ମାନ୍ଞ୍ଚାର୍। 27 ଆନେଙ୍ଗ୍ କେତ୍ହଟ୍ ନାଣାଲିଙ୍ଗ୍ ହୁଞ୍ଜ୍ୱାଦାଙ୍ଗ୍ ବେସି ସମୟ୍ ପାତେକ୍ କଷ୍ଟ କାମାୟ୍ କିଜି ମାଚାଙ୍ଗ୍। ଆନେଙ୍ଗ୍ ନାସ୍କି ଆରେ ଏସ୍କି ପାୟାଆଜି ମାଚାଙ୍ଗ୍ ଆରେ ଆନେଙ୍ଗ୍ କେତ୍ହଟ୍ କାଦି ତିନ୍ୱାଦାଙ୍ଗ୍ ହାଲ୍ଜି ମାଚାଙ୍ଗ୍। ଆନେଙ୍ଗ୍ ପିନିତିଙ୍ଗ୍ ବେସି ତ୍ରିଗ୍ଜି ମାଚାଙ୍ଗ୍, ଇନେସ୍କି ନାବେ ହେନ୍ଦ୍ରାଙ୍ଗ୍ ହିଲିତିକ୍। 28 ଲାଗିଙ୍ଗ୍ ଆନେଙ୍ଗ୍ ଇ ୱିଜୁ ବିଷୟରେ ଚିନ୍ତା କିଉଙ୍ଗା, ମାତର୍ ୱିଜୁଦିନ୍ ଆନେଙ୍ଗ୍ ୱିଜୁ ମଣ୍ଡ୍ଲିନି ମାନାୟାର୍ କାଜିଙ୍ଗ୍ ଚିନ୍ତା କିନାଙ୍ଗା। 29 ଇନେର୍ ଯଦି ଈଶ୍ୱରତିଙ୍ଗ୍ ପାର୍ତି କିନାକା ଦୁର୍ବଲ୍ ଆନାନା, ଲାଗିଙ୍ଗ୍ ଆନେଙ୍ଗ୍ ପା ଦୁର୍ବଲ୍ ଆନାଙ୍ଗା ଇଞ୍ଜି ପୁନାଙ୍ଗା। ଆରେ ଇମ୍ଣି ପାର୍ତିକିନି ଟଣ୍ଡେନ୍ ଜେକନି ପାର୍ତିକିନି ଟଣ୍ଡେନ୍ ବିରୁଦ୍ତାକେ ପାପ୍ କିତାକା ପୁନାଙ୍ଗା, ଲାଗିଙ୍ଗ୍ ଆନେଙ୍ଗ୍ ବେସି ରିସା ଆନାଙ୍ଗା। 30 ଯଦି ଆନେଙ୍ଗ୍ ବାଟ୍ପାଣ୍ ଆନାଙ୍ଗ୍, ଲାଗିଙ୍ଗ୍ ଆନେଙ୍ଗ୍ ଇ ଦୁର୍ବଲ୍ କାଜିଙ୍ଗ୍ ବାଟ୍ପାଣ୍ ଆୟା ଆନାତ୍। 31 ମା ମାପୃ ଯୀଶୁ ଖ୍ରୀଷ୍ଟ ଲାତ୍ରାହି, ଈଶ୍ୱର ୱିଜୁଦିନ୍ ଜୟ୍-ଜୟ୍ ପାୟା ଆନାନ୍ ହେୱାନ୍ ପୁଚାନ୍ନା ଯେ ଆନେଙ୍ଗ୍ ମିଚ୍ ୱେଚୁଙ୍ଗା। 32 ଆନେଙ୍ଗ୍ ଏଚେପାଦ୍ନା ଦମେସକ ସହର୍ତାକେ ମାଚାଙ୍ଗ୍, ରାଜା ହାରେତାସ୍ ନି ଗବର୍ନର୍ ନାଙ୍ଗେଙ୍ଗ୍ ଆସ୍ତେଦେଙ୍ଗ୍ ସହର୍ନି ୱିଜୁ ଗେଟ୍କୁକାଙ୍ଗ୍ ଜାଗୁୱାଡ଼ିରିଙ୍ଗ୍ କାଇକିଜି ମାଚାନ୍। 33 ମାତର୍ ନାଙ୍ଗେଙ୍ଗ୍ ଦାଉଡ଼ାତାକେ ମେତ୍ତି ଡରି ହୁଦାଙ୍ଗ୍ ଜର୍କା ନିପଡାଙ୍ଗ୍ ସହର୍ ବାର୍ତ ଜୁତ୍ତି ମାନ୍ଚାର୍, ହେଲେକେ ଆନେଙ୍ଗ୍ ସାସନ୍ କିନାକାର୍ତାଙ୍ଗ୍ ରକ୍ଷା ପାୟାଆଜି ମାଚାଙ୍ଗ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation