୨ କରନ୍ତିୟ 10 - New Testament in Pengo Parja Languageପାଉଲ ଖ୍ରୀଷ୍ଟତାଙ୍ଗ୍ ଆଦିକାର୍ ପାୟାଆତାଙ୍ଗ୍ନା ଇଞ୍ଜି ୱେଚ୍ନି କାତା 1 ଆନେଙ୍ଗ୍ ପାଉଲ, ଖ୍ରୀଷ୍ଟ ଲେକେ ଆନେଙ୍ଗ୍ ଦୟା ଆରେ ଦରମ୍ଆଜି ୱେଚ୍ଚାନାଙ୍ଗା। କେତ୍ଜାଣ୍ ନାଙ୍ଗେଙ୍ଗ୍ ଇଞ୍ଜ୍ନାରା ଯେ, ଆନେଙ୍ଗ୍ ମିହୁଦାଙ୍ଗ୍ ମାନିହିଙ୍ଗ୍ ମିଙ୍ଗେଙ୍ଗ୍ ୱେଚ୍ଚେଦେଙ୍ଗ୍ ଆନେଙ୍ଗ୍ ଲାଜା ଆନାଙ୍ଗା, ମାତର୍ ମିବେତାଙ୍ଗ୍ ଦେହା ମାନିହିଙ୍ଗ୍ ସାସ୍ ଆଜି ଚିଟିତାକେ ଲେକି କିନାନା। 2 କେତ୍ଜାଣ୍ ଇଞ୍ଜ୍ନାରା ଯେ, ଆସେଙ୍ଗ୍ ଇ ପୁର୍ତିନି ମାନାୟାର୍ ବ୍ୟବହାର୍ କିତିଲେକେ ବ୍ୟବହାର୍ କିନାସା। ଲାଗିଙ୍ଗ୍ ଏଚେପାଦ୍ନା ଆନେଙ୍ଗ୍ ମିତାକେ ୱାନ୍ଙ୍ଗ୍, ଆନେଙ୍ଗ୍ ହେୱାର୍ ହୁଦାଙ୍ଗ୍ ସାସ୍ ଆଜି ବେଣ୍ କିନାଙ୍ଗ୍। ମାତର୍ ଆନେଙ୍ଗ୍ ଇଚା କିନାଙ୍ଗା ଯେ ହେୱାର୍ କାତାତିଙ୍ଗ୍ ୱେନ୍ମାଟ୍, ଲାଗିଙ୍ଗ୍ ଏଚେପାଦ୍ନା ଆନେଙ୍ଗ୍ ମିତାକେ ୱାନାଙ୍ଗ୍ ହେୱାର୍ ହୁଦାଙ୍ଗ୍ ବ୍ୟବହାର୍ କିଦେଙ୍ଗ୍ ଇଚା କିତିଲେକେ କିୟାଆଉତ୍। 3 ଆସେଙ୍ଗ୍ ଇ ପୁର୍ତିତାକେ ମାନାସା, ମାତର୍ ଆସେଙ୍ଗ୍ ଇ ପୁର୍ତି ମାନାୟାର୍ଲେକେ ମା ସତୃର୍ ହୁଦାଙ୍ଗ୍ ଯୁଜ୍ କିଉସ୍। 4 ଇନେସ୍କି ଇ ପୁର୍ତିନି ମାନାୟାର୍ ଯୁଜ୍ କିନିହିଙ୍ଗ୍ ଇମ୍ଣି ଅସ୍ତର୍ ଶସ୍ତର୍ ବ୍ୟବହାର୍ କିନାର୍ ତାବେତାଙ୍ଗ୍ ମା ଅସ୍ତର୍ ଶସ୍ତର୍ ଅଲ୍ଗା। ଆସେଙ୍ଗ୍ ଈଶ୍ୱରତି ଶାକ୍ତିମାନି ଅସ୍ତର୍ ଶସ୍ତର୍ତିଙ୍ଗ୍ ବ୍ୟବହାର୍ କିଜି ଶୟତାନନି ୱିଜୁ ଶାକ୍ତିତିଙ୍ଗ୍ ନଷ୍ଟ କିନାସ୍। 5 ଆସେଙ୍ଗ୍ ହେ ଅସ୍ତର୍ ଶସ୍ତର୍ତିଙ୍ଗ୍ ବ୍ୟବହାର୍ କିଜି ଈଶ୍ୱରତିଙ୍ଗ୍ ପୁନ୍ୱି ବାଟ୍ପାଣିୟାର୍ ଜିକାଟାଣା ଆନି ବିଷୟତିଙ୍ଗ୍ ଆପେଙ୍ଗ୍ ନଷ୍ଟ କିନାପା। ଆପେଙ୍ଗ୍ ହେ ଅସ୍ତର୍ ଶସ୍ତର୍ତିଙ୍ଗ୍ ବ୍ୟବହାର୍ କିଜି ହେୱାର୍ ମାନ୍ତିଙ୍ଗ୍ କଣ୍ଟ୍ରୁଲ୍ କିନାପା, ଆରେ ଆପେଙ୍ଗ୍ ଖ୍ରୀଷ୍ଟଙ୍ଗ୍ ମାନି କିଦେଙ୍ଗ୍ ହିକ୍ଷା ହିନାପା। 6 ଏପେଙ୍ଗ୍ ଏଚେପାଦ୍ନା ଖ୍ରୀଷ୍ଟ କାତାତିଙ୍ଗ୍ ପୁରାପୁରି ମାନିକିନାଦେର୍, ତାପାଚେ ଆପେଙ୍ଗ୍ ଏଚେଜାଣ୍ ଖ୍ରୀଷ୍ଟଙ୍ଗ୍ ପୁନ୍ୱାତାର୍ନା ହେୱାରିଙ୍ଗ୍ ଦଣ୍ଡ୍ ହିନାପା। 7 ଏପେଙ୍ଗ୍ ଲକାର୍ ମୁମ୍ ହୁଡ଼୍ଜି ବିଚାର୍ କିନାଦେରା। ଯଦି ଇମ୍ଣି ମାନାୟ୍ ଖ୍ରୀଷ୍ଟ ଲକ୍ ଆତାଙ୍ଗ୍ନା ଇଞ୍ଜି ପୁରାପୁରି ପାର୍ତି କିନାନା, ଲାଗିଙ୍ଗ୍ ଆପେଙ୍ଗ୍ ଖ୍ରୀଷ୍ଟର୍ ଲକ୍ ଇଞ୍ଜି ହେୱାର୍ ପା ମାନିକିନି ଦର୍କାର୍, ଇନେସ୍ ହେୱାର୍ ଖ୍ରୀଷ୍ଟର୍ ଲକ୍ ଆତାପ୍ନା ଇଞ୍ଜି ବାଟ୍ପାଣ୍ ଆନାରା। 8 ମାପୃ ନାଙ୍ଗେଙ୍ଗ୍ ହିତ୍ତି ଅଦିକାର୍ କାଜିଙ୍ଗ୍ ବାଟ୍ପାଣ୍ ଆନାନା ଇଞ୍ଜି ଇଞ୍ଜେଙ୍ଗ୍ ଆଡ୍ନାଦେର୍। ଏପେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତି କିନାକା ବନ୍ଦ୍ କିନି କାଜିଙ୍ଗ୍ ଆକାୟ୍, ମାତର୍ ଏପେଙ୍ଗ୍ ତାଙ୍ଗେଙ୍ଗ୍ ଆଦିକ୍ ପାର୍ତିକିନି କାଜିଙ୍ଗ୍ ନାଙ୍ଗେଙ୍ଗ୍ ଇ ଆଦିକାର୍ ହିତ୍ତାନ୍ନା। ଆରେ ଆନେଙ୍ଗ୍ ମି ପାର୍ତିତିଙ୍ଗ୍ ନଷ୍ଟ କିଜି ଲାଜ୍ ପାୟା ଆଦେଙ୍ଗ୍ ଇଚା କିଉଙ୍ଗା। 9 ନଙ୍ଗୟ୍ ଆନେଙ୍ଗ୍ ମିଙ୍ଗେଙ୍ଗ୍ ପାଣ୍ଡ୍ରୁ କିଦ୍ଦେଙ୍ଗ୍ ଇଲେକେ ଚିଟିତାକେ ଲେକିକିଉଙ୍ଗା। 10 ଇନେସ୍କି କେତ୍ଜାଣ୍ ଇନାରା, ତା ଚିଟି ୱିଜୁ ତା ଆଦେସ୍ ଆରେ ନନାକା ଲେକେ, ମାତର୍ ହେୱାନ୍ ବେସି ଦୁର୍ବଲ୍ ଆରେ କାତା ୱିଜୁ ବେକାର୍। 11 ଇମ୍ଣାକାର୍ ଇଲେକେ ଇନାରା ହେୱାର୍ ଚିନ୍ତା କିନାର୍ ଯେ, ଆପେଙ୍ଗ୍ ଚିଟିତାକେ ୱେଚ୍ଚିଲେକେ ହେୱାର୍ ହୁଦାଙ୍ଗ୍ ଆଦେସ୍ ଆରେ ନନାକା ଲେକେ ବ୍ୟବହାର୍ କିନାପ୍। 12 ଇମ୍ଣି ମାନାୟାର୍ ନାଙ୍ଗେଙ୍ଗ୍ ବିରଦ୍ କିଦ୍ନାରା, ହେୱାର୍ ଜାର୍ତିଙ୍ଗ୍ ଗାଜାକାଙ୍ଗ୍ ଆରେ ବେସି ହାର୍ଦାକାଙ୍ଗ୍ ଇଞ୍ଜି ମାନାୟାର୍ ଆଗେ ଚଞ୍ଜିଆ ଆନାରା। ମାତର୍ ହେୱାର୍ ନାବେତାଙ୍ଗ୍ ଗାଜାକାର୍ ଆକାୟ୍ ଆରେ ଆନେଙ୍ଗ୍ ହେୱାର୍ ହୁଦାଙ୍ଗ୍ ଜାର୍ତିଙ୍ଗ୍ ହାମାନ୍ କିଉଙ୍ଗା। ହେୱାର୍ ନିଜେ ନିୟମ୍ କିତାର୍ନା ଯେ, ଈଶ୍ୱର ଚେଲାହିର୍ ଇନେସ୍ ମାନି ଦର୍କାର୍ ଆରେ ହେୱାର୍ ନିଜେ ରସ୍ତି ନିୟମ୍ ଅନୁସାରେ ଜିବୁନ୍ କାଟିକିନାରା କି ଆକାୟ୍ ଇଞ୍ଜି ବାବିକିନାରା। ହେୱାର୍ ଇଲେକେ କିଜି ଜାର୍ତିଙ୍ଗ୍ ବକୁୱା ଲକ୍ ଇଞ୍ଜି ପୁନି କିନାରା। 13 ମାତର୍ ଆପେଙ୍ଗ୍ ଈଶ୍ୱର ହିଦ୍ୱିତି ଅଦିକାର୍ କାଜିଙ୍ଗ୍ ବାଟ୍ପାଣ୍ ଆଉପ୍। ମା ଇଚା ଇଲେକେ ଯେ, ଈଶ୍ୱର ମାଙ୍ଗେଙ୍ଗ୍ ଉପାୟ୍ କିଜି ଇମ୍ଣି ଅଦିକାର୍ ହିତ୍ତାନ୍ନା, ହେ ଅଦିକାର୍ କାଜିଙ୍ଗ୍ ଆପେଙ୍ଗ୍ ବାଟ୍ପାଣ୍ ଆନାପ୍ ଆରେ ଏପେଙ୍ଗ୍ ପା ହେ ଉପାୟ୍ ବିତ୍ରେ ମାନାଦେର୍। 14 ଇନେସ୍କି ଆପେଙ୍ଗ୍ ନେ ପାର୍ତୁମ୍ କରନ୍ତିୟ ସହର୍ନି ୱିଜୁ ନିପଣ୍ ବୁଲାଆଜି ମିତାକେ ୱାଜି ଖ୍ରୀଷ୍ଟତି ହାର୍ଦିକାବୁର୍ ଶୁଣାୟ୍ କିଜି ମାଚାପ୍, ଆରେ ମି ବିଷୟରେ ଆପେଙ୍ଗ୍ ବାଟ୍ପାଣ୍ ଆଦେଙ୍ଗ୍ ଆଡ୍ନାପ୍। ଆପେଙ୍ଗ୍ ଇଲେକେ କିଜି ମା ହାନ୍ଦି ନାଉପା। ଇନେସ୍କି ଈଶ୍ୱର ମାଙ୍ଗେଙ୍ଗ୍ ଇମ୍ଣି ବାହାତାକେ ତା କାମାୟ୍ କିଦେଙ୍ଗ୍ ହିତ୍ତାନ୍ନା ଆପେଙ୍ଗ୍ ହେ ବାହାକାଙ୍ଗ୍ ତା କାମାୟ୍ କିନାପା। 15 ଆସେଙ୍ଗ୍ ଜେକନିକାର୍ କିତି କାମାୟ୍ତିଙ୍ଗ୍ ବାଟ୍ପାଣ୍ ଆଉପା, ମାତର୍ ତା ବାଦୁଲ୍ରେ ଆପେଙ୍ଗ୍ ଆହା କିନାପା ଯେ ଏପେଙ୍ଗ୍ ଖ୍ରୀଷ୍ଟଙ୍ଗ୍ ଆଦିକ୍ ପାର୍ତିକିୟାଟ୍। ଆରେ ଆପେଙ୍ଗ୍ ମି ବିତ୍ରେ କିତି କାମାୟ୍ ଆଦିକ୍ ବାଡା ଆନାତ୍। 16 ଲାଗିଙ୍ଗ୍ ଆପେଙ୍ଗ୍ ମିବେତାଙ୍ଗ୍ ବେସି ଦେହା ହାଲ୍ଜି ଅଲଗା ବାହାକାଙ୍ଗ୍ ହାର୍ଦିକାବୁର୍ ଶୁଣାୟ୍ କିନାପ୍, ମିତାକେ ଇନେର୍ କାମାୟ୍ କିଉରା। ଲାଗିଙ୍ଗ୍ ଇନେର୍ ପା ମାଙ୍ଗେଙ୍ଗ୍ ପ୍ରଶ୍ନ ୱେନ୍ବାଆଦ୍ଦେଙ୍ଗ୍ ଆଡ଼୍ଦୁର୍ ଯେ, ଆନେଙ୍ଗ୍ ଇ ବାହାତାକେ କାମାୟ୍ କିନାଙ୍ଗା। 17 ଇନେସ୍ଲେକେ ଦରମ୍ ସାସ୍ତର୍ତାକେ ଲେକାଆତାତ୍ନା ଯେ, “ଇମ୍ଣାକାର୍ ବାଟ୍ପାଣ୍ ଆଦେଙ୍ଗ୍ ଇଚା କିନାରା, ହେୱାର୍ ମାପୃ ତା କାଜିଙ୍ଗ୍ ଇନାକା କିତାତ୍ନା ହେଦାଙ୍ଗ୍ କାଜିଙ୍ଗ୍ ବାଟ୍ପାଣ୍ ଆଏନ୍।” 18 ଇନେସ୍କି ଇମ୍ଣାକାର୍ ଜାର୍ତିଙ୍ଗ୍ ଜୟ୍-ଜୟ୍ କିନାନ୍, ଈଶ୍ୱର ହେୱାନିଙ୍ଗ୍ ଆହୁନ୍, ମାତର୍ ଇମ୍ଣାକାରିଙ୍ଗ୍ ଈଶ୍ୱର ଜୟ୍-ଜୟ୍ କିନାନ୍, ହେଦାଙ୍ଗ୍ ତାବେତାଙ୍ଗ୍ ଅଲ୍ଗା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation