୨ କରନ୍ତିୟ 1 - New Testament in Pengo Parja Languageପାଉଲ କରନ୍ତିୟ ମଣ୍ଡ୍ଲିନି ମାନାୟାରିଙ୍ଗ୍ ଜୱାର୍ କିତାନ୍ 1 ପାଉଲ ଆରେ ମା ପାର୍ତିକିନି ଟଣ୍ଡେନ୍ ତିମତି କରନ୍ତିୟ ସହର୍ ଈଶ୍ୱର ମଣ୍ଡ୍ଲିନି ପାର୍ତିକିନି ଟଣ୍ଡାର୍ କାଜିଙ୍ଗ୍, ଆରେ ଆକାୟା ସହର୍ନି ୱିଜୁ ପାର୍ତିକିନି ଟଣ୍ଡାର୍ କାଜିଙ୍ଗ୍ ଇ ଚିଟି ଲେକିକିନାପା। ଯୀଶୁ ଖ୍ରୀଷ୍ଟନି ବାଚିକିତି ଚେଲା ଆନି କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ବାଚି କିତ୍ତାନ୍ନା। 2 ମା ଆବା ଈଶ୍ୱର ଆରେ ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ତା ଦୟା ଆରେ ଶାନ୍ତି ହିଦେନ୍। ଈଶ୍ୱର ୱିଜୁ ମାନାୟାରିଙ୍ଗ୍ ଶାନ୍ତି ହିନାନ୍ 3 ଆପେଙ୍ଗ୍ ୱିଜାକାପ୍ ମା ମାପୃ ଯୀଶୁ ଖ୍ରୀଷ୍ଟନି ଆବା ଆରେ ଈଶ୍ୱରତିଙ୍ଗ୍ ଦନ୍ଯବାଦ୍ ହିନି ଦର୍କାର୍। ହେୱାନ୍ ୱିଜୁଦିନ୍ ମାଙ୍ଗେଙ୍ଗ୍ ଦୟା ଆରେ ସାଇଜ କିଦ୍ନାନା। ଆରେ ଈଶ୍ୱର ନେ ମାଙ୍ଗେଙ୍ଗ୍ ସାହାସ୍ ହିଦ୍ନାନା। 4 ହେୱାନ୍ ମା ୱିଜୁ ଦୁକ୍କଷ୍ଟ ୱେଡ଼ାଙ୍ଗ୍ ସାହାସ୍ ହିଦ୍ନାନା, ଲାଗିଙ୍ଗ୍ ଆସେଙ୍ଗ୍ ଜେକନି ମାନାୟାର୍ ଦୁକ୍କଷ୍ଟ ପାୟାଆତିହିଙ୍ଗ୍ ହେ ଈଶ୍ୱର ହିତ୍ତି ସାହାସ୍ତିଙ୍ଗ୍ ହିଦେଙ୍ଗ୍ ଆଡ୍ନାସ୍। 5 ଆପେଙ୍ଗ୍ ପୁଚାପ୍ନା ଯେ, ଆପେଙ୍ଗ୍ ଯୀଶୁ ଖ୍ରୀଷ୍ଟ କାଜିଙ୍ଗ୍ ଆଦିକ୍ ଦୁକ୍କଷ୍ଟ ପାୟାଆନାପା, ଲାଗିଙ୍ଗ୍ ଯୀଶୁ ଖ୍ରୀଷ୍ଟ କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ତାବେତାଙ୍ଗ୍ ଆଦିକ୍ ସାହାସ୍ ହିଦ୍ନାନ୍। 6 ଯଦି ଆସେଙ୍ଗ୍ ଦୁକ୍କଷ୍ଟ ପାୟାଆନାସା, ଲାଗିଙ୍ଗ୍ ହେଦାଙ୍ଗ୍ ମି କାଜିଙ୍ଗ୍ ସାହାସ୍ ଆରେ ଉଦାର୍ ଆନାତ୍। ଯଦି ଈଶ୍ୱର ମାଙ୍ଗେଙ୍ଗ୍ ସାହାସ୍ ହିତ୍ତାନ୍ନା, ଲାଗିଙ୍ଗ୍ ହେ ସାହାସ୍ ମି ଦୁକ୍କଷ୍ଟ ୱେଡ଼ାଙ୍ଗ୍ ସାମ୍ୱାଲି କିନି କାଜିଙ୍ଗ୍ ସାଇଜ କିଦ୍ନାତ୍ ଇମ୍ଣି ଦୁକ୍କଷ୍ଟ ଆପେଙ୍ଗ୍ ପାୟାଆନାପା। 7 ଆପେଙ୍ଗ୍ ପୁଚାପ୍ନା ଯେ, ଏପେଙ୍ଗ୍ ମା ହୁଦାଙ୍ଗ୍ ମାହାଆଜି ଦୁକ୍କଷ୍ଟ ପାୟାଆନାଦେରା ଆରେ ହେଲେକେ ଏପେଙ୍ଗ୍ ପା ମା ହୁଦାଙ୍ଗ୍ ମାହାଆଜି ଈଶ୍ୱର ହିତ୍ତି ଆହାତିଙ୍ଗ୍ ପାୟାଆନାଦେର୍। 8 ଏ ପାର୍ତିକିନି ଟଣ୍ଡାର୍କାଦେର୍ ଆପେଙ୍ଗ୍ ଇମ୍ଣି ଦୁକ୍କଷ୍ଟ ଏସିଆ ଦେସ୍ ଲାଗାୟ୍ ପାୟାଆଜି ମାଚାପ୍, ହେ ବିଷୟରେ ମିଙ୍ଗେଙ୍ଗ୍ ୱେଚ୍ଚାନାପା ଯେ, ଆପେଙ୍ଗ୍ ସମ୍ବାଲି କିନି ଶାକ୍ତିତାଙ୍ଗ୍ ଆଦିକ୍ କଷ୍ଟ ପାୟାଆଜି ମାଚାପ୍ ଆରେ ଆପେଙ୍ଗ୍ ଜିବୁନ୍ ମାନାପ୍ ଇଞ୍ଜି ଆରେ ଆହା ପା ହିଲାତାତ୍। 9 ହାତ୍ପା ଆପେଙ୍ଗ୍ ବାବିକିଜି ମାଚାପ୍ କି ଆପେଙ୍ଗ୍ ହାଃନାପ୍ ଇଞ୍ଜି, ମାତର୍ ଆପେଙ୍ଗ୍ ଜାର୍ ଶାକ୍ତି ଜପି ଆହା କିୱାତାପ୍, ମାତର୍ ହାଃତି ମାନାୟ୍ତିଙ୍ଗ୍ ଆରେରଗ ଜିବୁନ୍ କିଦେଙ୍ଗ୍ ଆଡ୍ନି ଈଶ୍ୱରତିଙ୍ଗ୍ ପାର୍ତି କିତାପ୍। 10 ହେୱାନ୍ ମାଙ୍ଗେଙ୍ଗ୍ ମାରାଣ୍ନି ବିପତ୍ତାଙ୍ଗ୍ ଉଦାର୍ କିତ୍ତାନ୍ ଆରେ ହେୱାନ୍ ମାଙ୍ଗେଙ୍ଗ୍ ଜେକନି ବିପତ୍ତାଙ୍ଗ୍ ପା ଉଦାର୍ କିଦ୍ନାତ୍ ଇଞ୍ଜି ଆହା ହିତ୍ତାତ୍। 11 ଏପେଙ୍ଗ୍ ମା କାଜିଙ୍ଗ୍ ପାର୍ତାନା କିଜି ସାଇଜ କିଦ୍ନାଦେରା ହେଦାଙ୍ଗ୍ କାଜିଙ୍ଗ୍ ହେୱାନ୍ ମିଙ୍ଗେଙ୍ଗ୍ ଉଦାର୍ କିଦ୍ନାତ୍। ଇନେସ୍କି ଈଶ୍ୱର ମାଙ୍ଗେଙ୍ଗ୍ ଦୟାକିଜି ଉଦାର୍ କିଦେନ୍ ଇଞ୍ଜି ପାର୍ତାନା କିନାରା। ପାଉଲ ରସ୍ତି ଉପାୟ୍ତିଙ୍ଗ୍ ବାଦ୍ଲାୟ୍ କିତାନ୍ 12 ଆସେଙ୍ଗ୍ ବାଟ୍ପାଣ୍ ଆଜି ୱେଚ୍ଚେଙ୍ଗ୍ ଆଡ୍ନାସ୍, ଇନେସ୍କି ଆପେଙ୍ଗ୍ ଦରମ୍ ଆରେ ସତ୍ ସମ୍ପର୍କ ମିହୁଦାଙ୍ଗ୍ ଇଡ଼୍ତାପ୍ନା, ହେଦାଙ୍ଗ୍ ମା ମାନ୍ତି ବାବ୍ନା ସାକି ହିନାତା। ଆସେଙ୍ଗ୍ ମା ପୁର୍ତିନି ଜ୍ଞାନ୍ତିଙ୍ଗ୍ ଆହା କିୱାଦାଙ୍ଗ୍, ଈଶ୍ୱର ଦୟାତିଙ୍ଗ୍ ଆହା କିନାପା। ହେଲେକେ ମିହୁଦାଙ୍ଗ୍ ଆରେ ୱିଜାକାର୍ ହୁଦାଙ୍ଗ୍ ଜିବୁନ୍ କାଟିକିଜି ମାଚାପ୍। 13 ଆନେଙ୍ଗ୍ ଇଲେକେ ୱେଚ୍ଚାନାଙ୍ଗା ଯେ, ଇନେସ୍କି ଆନେଙ୍ଗ୍ ମିତାକେ ଲେକିକିତି ୱିଜୁ ଚିଟି କିଲେର୍ ଆରେ ସହଜ୍ କିଜି ଲେକିକିତାଙ୍ଗ୍ନା। ହେଦାଙ୍ଗ୍ ଏପେଙ୍ଗ୍ ୱିଜୁ ପଡ଼ିକିଜି ପୁରାପୁରି ବାବ୍ରେ ବୁଜା ଆଦେଙ୍ଗ୍ ଆଡ୍ନାଦେର୍ ଇଞ୍ଜି ଆହା କିନାଙ୍ଗା। 14 ମାତର୍ ନଙ୍ଗୟ୍ ଏପେଙ୍ଗ୍ ମାଙ୍ଗେଙ୍ଗ୍ ଅଲପ୍ ନେ ବୁଜାଆନାଦେରା। ଆନେଙ୍ଗ୍ ଆହା କିନାଙ୍ଗା ଯେ, ଏପେଙ୍ଗ୍ ମାଙ୍ଗେଙ୍ଗ୍ ପୁରାପୁରି ବାବ୍ରେ ବୁଜା ଆଦେଙ୍ଗ୍ ଆଡ୍ନାଦେର୍ ଆରେ ଏପେଙ୍ଗ୍ ମା କାଜିଙ୍ଗ୍ ବାଟ୍ପାଣ୍ ଆନାଦେର୍। ଇନେସ୍ଲେକେ ଆପେଙ୍ଗ୍ ମି କାଜିଙ୍ଗ୍ ମାପୃ ଯୀଶୁ ଆରେରଗ ୱାନିହିଙ୍ଗ୍ ବାଟ୍ପାଣ୍ ଆନାପ୍। 15 ଆନେଙ୍ଗ୍ ମିତାକେ ପୁରାପୁରି ବାବ୍ରେ ଆହା ଇଡ଼୍ଜି ମାଚାଙ୍ଗ୍ ଯେ, ଆପେଙ୍ଗ୍ ମିତାକେ ପାର୍ତୁମ୍ ୱାନି ଉପାୟ୍ତିଙ୍ଗ୍ ବୁଜାଆନାଦେର୍। ଆରେ ଆନେଙ୍ଗ୍ ଇଚା କିଜି ମାଚାଙ୍ଗ୍ ଯେ, ମିତାକେ ୱାଜି ଡବଲ୍ ଆଶ୍ରିବାଦ୍ କିଦ୍ନାଙ୍ଗ୍। 16 ଆନେଙ୍ଗ୍ ଇଲେକେ ଇଚା କିଜି ମାଚାଙ୍ଗ୍ ଯେ, ମାକଦନିଆତାକେ ହାନିହିଙ୍ଗ୍ ମିଙ୍ଗେଙ୍ଗ୍ ବେଟା ଆଦ୍ନାଙ୍ଗ୍ ଆରେ ମାକଦନିଆ ହାଲ୍ଜି ଆରେରଗ ମି ଲାଗେ ଲେଉଟା ଆଜି ୱାନାଙ୍ଗ୍। ଲାଗିଙ୍ଗ୍ ଏପେଙ୍ଗ୍ ନାଙ୍ଗେଙ୍ଗ୍ ଯିହୁଦା ସହର୍ତାକେ ହାଞ୍ଜେଙ୍ଗ୍ ଦର୍କାର୍ ଆଦ୍ନି ଜିନିଷ୍ ସାଇଜ କିଦ୍ନାଦେର୍। 17 ଏପେଙ୍ଗ୍ ଇଲେକେ ବାବିକିମାଟ୍ ଯେ, ଆନେଙ୍ଗ୍ ରି ମାନ୍ୟା ଆଜି ଇ ଉପାୟ୍ କିୱାଦାଙ୍ଗ୍ ମାଚାଙ୍ଗ୍, ଆରେ ପା ଆନେଙ୍ଗ୍ ଇ ପୁର୍ତିନି ମାନାୟାର୍ ଉପାୟ୍ କିତିଲେକେ କିୱାଦାଙ୍ଗ୍ ମାଚାଙ୍ଗ୍। ହେୱାର୍ ନଙ୍ଗୟ୍ ଆଁ ଇନାର୍ ମାତର୍ ପାଚେ ଆକାୟ୍ ଇନାର୍। 18 ଈଶ୍ୱରତିଙ୍ଗ୍ ପାର୍ତି କିୟାଆନାତ୍, ଲାଗିଙ୍ଗ୍ ଆପେଙ୍ଗ୍ ମି ଲାଗେ ୱାନାପ୍ ଇଞ୍ଜି ୱେଚ୍ଚିତି ପାର୍ମାଣ୍ତିଙ୍ଗ୍ ପା ପାର୍ତିକିୟାଟ୍। 19 ଇନେସ୍କି ଆନେଙ୍ଗ୍ ଆରେ ଶିଲା ଆରେ ତିମତି ମିଙ୍ଗେଙ୍ଗ୍ ଯୀଶୁ ଖ୍ରୀଷ୍ଟ, ଈଶ୍ୱର ମେହି ବିଷୟରେ ଶୁଣାୟ୍ କିନିହିଙ୍ଗ୍ ଆଁ ଆରେ ଆକାୟ୍ ଇଞ୍ଜି ୱେଚ୍ୱାତାର୍ନା, ମାତର୍ ଆପେଙ୍ଗ୍ ଆଁ ଇଞ୍ଜିମାଚାର୍। 20 ଇନେସ୍କି ଈଶ୍ୱରତି ୱିଜୁ ପାର୍ମାଣ୍ ଖ୍ରୀଷ୍ଟତାକେ ପୁରା ଆତାତ୍ନା। ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ଖ୍ରୀଷ୍ଟ କାଜିଙ୍ଗ୍ ଈଶ୍ୱରତିଙ୍ଗ୍ ଗୌରବ ହିତିହିଙ୍ଗ୍ “ଆମେନ୍” ଇଞ୍ଜି ଇନାପା। 21 ଇଦାଙ୍ଗ୍ ଈଶ୍ୱର ନେ ମାଙ୍ଗେଙ୍ଗ୍ ଆରେ ମିଙ୍ଗେଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ତିର୍ଆଜି ମାଞ୍ଜେଙ୍ଗ୍ ଶାକ୍ତି ହିତ୍ତାନ୍ନା। 22 ହେୱାନ୍ ମାଙ୍ଗେଙ୍ଗ୍ ବାଚି କିତ୍ତାନ୍ନା, ଆରେ ହେୱାନ୍ ତା ପବିତ୍ର ଆତ୍ମା ମା ଗରବ୍ତାକେ ଗେରେଣ୍ଟିଲେକେ ଦାନ୍ ହିତ୍ତାନ୍ନା। 23 ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା ଆରେ ଈଶ୍ୱର ହେଦାଙ୍ଗ୍ ସାକି ମାନାନ୍। ଆନେଙ୍ଗ୍ ମି କରାପ୍ କାମାୟ୍ କାଜିଙ୍ଗ୍ ମିଙ୍ଗେଙ୍ଗ୍ ଦମ୍କାଇ କିଦ୍ଦେଙ୍ଗ୍ ମାନ୍ କିୱାଦାଙ୍ଗ୍ ମାଚାଙ୍ଗ୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ କରନ୍ତିୟ ସହର୍ତାକେ ଆରେରଗ ଲେଉଟା ଆଜି ୱାୱାତାଙ୍ଗ୍। 24 ମାତର୍ ତା ଅର୍ତ ଇଦାଙ୍ଗ୍ ଆକାୟ୍ ଯେ, ଆପେଙ୍ଗ୍ ମିଙ୍ଗେଙ୍ଗ୍ ସାସନ୍ କିଦ୍ନାପା ଆରେ ଆପେଙ୍ଗ୍ ୱେଚ୍ଚିତି କାତାତିଙ୍ଗ୍ ପାର୍ତି କିନାଦେର୍। ମାତର୍ ଆପେଙ୍ଗ୍ ମିହୁଦାଙ୍ଗ୍ ମାହାଆଜି ଏପେଙ୍ଗ୍ ୱାରିୟାଆନି କାଜିଙ୍ଗ୍ କାମାୟ୍ କିନାପା। ଇନେସ୍କି ଏପେଙ୍ଗ୍ ପାର୍ତିକିତି କାଜିଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ତିର୍ଆଜି ନିଲ୍ତାଦେର୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation