୧ ତିମତି 6 - New Testament in Pengo Parja Languageମାଲିକ୍ ଆରେ ଦାସ୍ନି ଦାୟିତ୍ପ 1 ଇମ୍ଣି ପାର୍ତିକିନି ଟଣ୍ଡାର୍ ଦାସ୍ ଆଜି ର ମାଲିକ୍ ତାରେନ୍ ମାନାରା, ହେୱାର୍ ତା ମାଲିକ୍ତିଙ୍ଗ୍ ୱିଜୁ କାମାୟ୍ତାକେ ସନ୍ମାନ୍ ହିନି ଦର୍କାର୍। ଲାଗିଙ୍ଗ୍ ଜେକନିକାର୍ ଈଶ୍ୱରତିଙ୍ଗ୍ ଆରେ ମା ହିକ୍ଷାତିଙ୍ଗ୍ ନିନ୍ଦା କିଦେଙ୍ଗ୍ ଆଡୁର୍। 2 ଇମ୍ଣି ମାଲିକାର୍ ପାର୍ତି କିନାକାର୍ ଆନାର୍, ହେୱାର୍ ଦାସ୍ରିଙ୍ଗ୍ ଖ୍ରୀଷ୍ଟତାକେ ପାର୍ତିକିନି ଟଣ୍ଡାର୍ ଇଞ୍ଜି ପୁନ୍ଞ୍ଜି ହେୱାରିଙ୍ଗ୍ ଇନସ୍ତା କିମେର୍। ଆରେ ହେୱାର୍ ହେୱାରିଙ୍ଗ୍ ପା ହାର୍ଦାଙ୍ଗ୍ ଦିୟାନ୍ ହିଜି ହେବା କିୟେର୍। ଇନେସ୍କି ମାଲିକ୍ତିଙ୍ଗ୍ ହେବାକିନି ଦାସାର୍ ପା ପାର୍ତି କିନାକାର୍। ଲାଗିଙ୍ଗ୍ ଦାସାର୍ ପା ଜେକନିକାରିଙ୍ଗ୍ ଲାଡ୍ କିତିଲେକେ ହେୱାରିଙ୍ଗ୍ ଲାଡ୍ କିନାର୍। ଇ ୱିଜୁ ବିଷୟ ହିକ୍ଷା ହିୟା ଆରେ ମାନି କିଦେଙ୍ଗ୍ ସାହାସ୍ ହିୟା। ହାଉକାର୍ ଆନି କାଜିଙ୍ଗ୍ ଜାଗ୍ରତ୍ କିୟିକିତ୍ତାନ୍ 3 କେତେକ୍ ମାନାୟାର୍ ବୁଲ୍ ହିକ୍ଷା ହିନାରା। ଯୀଶୁ ଖ୍ରୀଷ୍ଟ ହିଜି ମାନ୍ଞ୍ଚି ହିକ୍ଷା ଆରେ ଈଶ୍ୱରତିଙ୍ଗ୍ ସନ୍ମାନ୍ କିନି ହିକ୍ଷାତାଙ୍ଗ୍ ହେୱାର୍ ହିକ୍ଷା ମାହାଆଉତା। 4 ଇ ଲେକେ ବୁଲ୍ ହିକ୍ଷାହିନି ମାନାୟ୍ ବାଟ୍ପାଣିଆ ଆରେ ଇନାକା ପା ପୁନ୍ୱାଦାଙ୍ଗ୍ ମାନ୍ଗାନାନ୍, ଇ ଲେଗ୍ଦି ମାନାୟ୍ ଜୁକ୍ତି କିନାର୍ ଆରେ ର କାତାତିଙ୍ଗ୍ ଆଜି ମାଡ୍ଗଲ୍ ଆଦେଙ୍ଗ୍ ଇଚାକିନାର୍। ଇଦାଙ୍ଗ୍ କାଜିଙ୍ଗ୍ ଆକାର୍, ଜାର୍-ଜାର୍ବିତ୍ରେ ମାଡ୍ଗଲ୍, ଜେକନିକାରିଙ୍ଗ୍ ଅପ୍ମାନ୍ କିନାକା ଆରେ ବେକାରେ ନିନ୍ଦାକିନାକା ଗଟାଆନାତ୍, 5 ହେୱାର୍ ମାନ୍ କରାପ୍ ଚିନ୍ତାତାକେ ବାର୍ତିଆଜି ମାନ୍ଗାନାତ୍, ଆରେ ହେୱାର୍ ଜେକନିକାର୍ ହୁଦାଙ୍ଗ୍ ଜୁକ୍ତି କିଜିମାନାର୍। ହେୱାର୍ ସତ୍ ବିଷୟରେ ଅଲପ୍ପା ପୁଞ୍ଜେଙ୍ଗ୍ ଆଡୁର୍। ହେୱାର୍ ଈଶ୍ୱରତିଙ୍ଗ୍ ହେବା କିନି କାଜିଙ୍ଗ୍ ହାଉକାର୍ ଆଦେଙ୍ଗ୍ ଲାବ୍ ଆଦ୍ନାତ୍ ଇଞ୍ଜି ମାନ୍ତ ବାବିକିନାର୍। 6 ମାତର୍ ଈଶ୍ୱରତିଙ୍ଗ୍ ୱାରି ଆତିଲେକେ ଜିବୁନ୍ କାଟିକିତିସ୍ ଆରେ ମାବେ ଇନାକା ମାନାତ୍ ହେବେତାଙ୍ଗ୍ ୱାରିଆଜି ମାଚିସ୍, ମାଙ୍ଗେଙ୍ଗ୍ ହାତ୍ପା ବେସି ଲାବ୍ ଆଦ୍ନାତ୍।। 7 ଇନେସ୍କି ଆସେଙ୍ଗ୍ ଜନମ୍ ଆଜି ପୁର୍ତିତାକେ ୱାତିହିଙ୍ଗ୍ ଇନାକା ପା ତାସିୱାୱାତାସ୍, ଆରେ ହାନିହିଙ୍ଗ୍ ଇନାକା ପା ଅଦେଙ୍ଗ୍ ଆଡୁସ୍। 8 ହେଦାଙ୍ଗ୍ କାଜିଙ୍ଗ୍ କାଦି ଆରେ ହେନ୍ଦ୍ରାପାଟା ମାଚିସ୍ ମା କାଜିଙ୍ଗ୍ ଜଚେଷ୍ଟ। 9 ମାତର୍ ଇମ୍ଣାକାର୍ ହାଉକାର୍ ଆଦେଙ୍ଗ୍ ଇଚାକିନାର୍, ହେୱାର୍ ୱିଜୁ ପର୍କାର୍ ପାପ୍ କାମାୟ୍ କିନାର୍ ଆରେ ଜାଲ୍ଦ ଆର୍ନାର୍, ହେୱାର୍ ବିପତ୍ ଆରେ ବୁଦିହିଲ୍ୱି କାମାୟ୍ କିନାର୍। ଇ ଲେକେ ଇଚା ହେୱାରିଙ୍ଗ୍ ନଷ୍ଟ ଆରେ ବୁଡାଇ କିନାତ୍। 10 ଦନ୍ ଲବ୍ ଆନାକା ଆନାତା ୱିଜୁ ପାପ୍ କାମାୟ୍ନି ମୁଡ଼୍। କେତେକ୍ ମାନାୟ୍ ଦନ୍ ଲବ୍ ଆନାକା ଇଚାକିଜି ଯୀଶୁ ଖ୍ରୀଷ୍ଟ ବିଷୟନି ହିକ୍ଷାତିଙ୍ଗ୍ ପାର୍ତି କିୱାଦାଙ୍ଗ୍ ହାଜି ବାଣା ଆତାର୍ନା। ହେୱାର୍ ନିଜେ ବେସି ଦୁକ୍ତିଙ୍ଗ୍ ତାସିୱାତାର୍ନା। ପାର୍ତିକିନି କାଜିଙ୍ଗ୍ ହାର୍ଦି ସନ୍ଯ 11 ଏ ଈଶ୍ୱରତିଙ୍ଗ୍ ହେବାକିନି ତିମତି, ଏନେଙ୍ଗ୍ ଇ ୱିଜୁ ବିଷୟତାଙ୍ଗ୍ ଜେକ ଆନି ଦର୍କାର୍। ଆରେ ଏନେଙ୍ଗ୍ ଇନାକା ଟିକ୍ ହେଦାଙ୍ଗ୍ କିଦେଙ୍ଗ୍ ଉପାୟ୍ କିୟା, ଈଶ୍ୱରତିଙ୍ଗ୍ ସନ୍ମାନ୍ ଆତିଲେକେ ଜିବୁନ୍ କାଟି କିୟା, ଖ୍ରୀଷ୍ଟଙ୍ଗ୍ ପାର୍ତି କିୟା, ଜେକନିକାରିଙ୍ଗ୍ ଲାଡ୍ କିୟା। ବିପତ୍ ୱେଡ଼ାଙ୍ଗ୍ ସାହାସ୍ ଆସ୍ତି ମାନା, ରିସା ଆୱାଦାଙ୍ଗ୍ ଜେକନିକାର୍ତାକେ ହାର୍ ଆଜି ମାନା। 12 ଯୁଜ୍ କିଦେଙ୍ଗ୍ ହାଚି ସେନା ଇନେସ୍ ଯୁଜ୍ତିଙ୍ଗ୍ ପିହୁନ୍, ହେଲେକେ ଏନେଙ୍ଗ୍ ପା ଈଶ୍ୱରତିଙ୍ଗ୍ ପାର୍ତି କିନାକା ପିହ୍ମା ଆରେ ହେୱାନିଙ୍ଗ୍ ମାନିକିଜି ମାନା। ଆରେ ୱିଜ୍ୱି ଜିବୁନ୍ତିଙ୍ଗ୍ ଆରାଇ କିମା, ଇଦାଙ୍ଗ୍ କାଜିଙ୍ଗ୍ ଈଶ୍ୱର ନିଙ୍ଗେଙ୍ଗ୍ ବାଚି କିତ୍ତାନ୍ନା, ଆରେ ବେସିହେନି ମାନାୟାର୍ ମୁମ୍ଦ ଯୀଶୁତାକେ ପାର୍ତି କିନାଙ୍ଗା ଇଞ୍ଜି ସାହାସ୍ତାଙ୍ଗ୍ ୱେଚ୍ଚାଇନା। 13 ୱିଜାକାରିଙ୍ଗ୍ ଜିବୁନ୍ ହିଦ୍ନି ଈଶ୍ୱର ମୁମ୍ଦ ଆରେ ଯୀଶୁ ଖ୍ରୀଷ୍ଟ ଇନେର୍ ପନ୍ତିୟ ପିଲାତ ରାଜା ମୁମ୍ଦ ହାର୍ଦି ସାକି ହିଜିମାଚାନ୍। ହେୱାର୍ ଆଗେ ଆନେଙ୍ଗ୍ ନିଙ୍ଗେଙ୍ଗ୍ ଆଦେସ୍ ହିଦ୍ନାଙ୍ଗା, 14 ଈଶ୍ୱର ଇମ୍ଣି ଆଦେସ୍ କିଦେଙ୍ଗ୍ ନିଙ୍ଗେଙ୍ଗ୍ ୱେଚ୍ଚାତାନ୍ନା। ହେ ଆଦେସ୍ତିଙ୍ଗ୍ ମାନିକିଜି କିୟା, ଲାଗିଙ୍ଗ୍ ଇନେର୍ ପା ନିଙ୍ଗେଙ୍ଗ୍ ଦସ୍ କିତାନ୍ନା ଇଞ୍ଜି ୱେଚ୍ଚୁର୍ ଏଚେପାଦ୍ନା ମାପୃ ଯୀଶୁ ଖ୍ରୀଷ୍ଟ ପୁର୍ତିତାକେ ୱାନାନ୍। 15 ଈଶ୍ୱର ନେ ରକାନ୍ ରାଜା ଆରେ ହେୱାନିଙ୍ଗ୍ ସନ୍ମାନ୍ ହିନି ଦର୍କାର୍, ଇନେସ୍କି ହେୱାନ୍ ରାଜା ଲକାର୍ ରାଜା ଆରେ ମାପୃ ଲକାର୍ ମାପୃ। 16 ହେୱାନ୍ ରକାନ୍ ଇନାୱେଡ଼ାଙ୍ଗ୍ ପା ହାଃଉନ୍, ଆରେ ହେୱାନ୍ ବେସି ଅଜଡ଼୍ତାକେ ମାନାନ୍ ଆରେ ତା ଲାଗାୟ୍ ଇନେର୍ ପା ହାଞ୍ଜେଙ୍ଗ୍ ଆଡୁର୍। ହେୱାନିଙ୍ଗ୍ ଇନେର୍ ପା ହୁଡ଼୍ୱାତାର୍ନା କି ହୁଡ଼୍ଦେଙ୍ଗ୍ ଆଡୁର୍, ମାନାୟାର୍ ହେୱାନିଙ୍ଗ୍ ସନ୍ମାନ୍ ହିନାର୍, ଆରେ ହେୱାନ୍ ୱିଜୁଦିନ୍ ଶାକ୍ତି ମାନ୍ଗାନାନ୍। 17 ଇମ୍ଣାକାର୍ ଇ ଯୁଗ୍ତ ହାଉକାର୍, ହେୱାର୍ ଇନେସ୍ ଲେକେ ଆକାର୍ ଆଉର୍ ଆରେ ଟେବାଆୱି ଦନ୍ତିଙ୍ଗ୍ ଆହା କିଉର୍, ବାଉରା ଆଦେଙ୍ଗ୍ ୱିଜୁ ବିଷୟ ବେସି ମାଙ୍ଗେଙ୍ଗ୍ ଦାନ୍ କିଦ୍ନି ଈଶ୍ୱର ଜପି ଆହା ଇଟ୍ନାର୍। 18 ଆରେ ଜେକନିକାରିଙ୍ଗ୍ ଉପ୍କାର୍ କିଜି ୱିଜୁ ସତ୍ କାମାୟ୍ତାଙ୍ଗ୍ ହାଉକାର୍ ଆନାର୍ ଆରେ ମେଲାଆତିୟା ଆଜି ଆରେ ଦୟାନି ମାନ୍ତାଙ୍ଗ୍ ଦାନ୍ ହିଦେଙ୍ଗ୍ ହେୱାରିଙ୍ଗ୍ ଆଦେସ୍ ହିୟାଟ୍। 19 ଇଲେକେ କିତିସ୍ ହେୱାର୍ ବାକି ଜିବୁନ୍ କାଜିଙ୍ଗ୍ ହାତ୍ପା ମୁଡ଼୍ଦନ୍ ଜାର୍-ଜାର୍ କାଜିଙ୍ଗ୍ ରୁଣ୍ଡାଇ କିନାର୍, ହେଲେକେ ସତ୍ ଜିବୁନ୍ ପାୟାଆନାର୍। 20 ଏ ଟଣ୍ଡେନ୍ ତିମତି ନିଙ୍ଗେଙ୍ଗ୍ ଇନାକା ହିତ୍ତାର୍ନା, ହେଦାଙ୍ଗ୍ତିଙ୍ଗ୍ ରକ୍ଷା କିୟା। ଈଶ୍ୱରତିଙ୍ଗ୍ ପୁନ୍ୱି ଲକାର୍ତାଙ୍ଗ୍ ଆରେ ବେକାର୍ କାତା ୱେଚ୍ନାକାର୍ତାଙ୍ଗ୍ ଦେହା ଆଜି ମାନା। 21 ଇନେର୍-ଇନେର୍ ହେଦାଙ୍ଗ୍ ମାନିକିୱାଦାଙ୍ଗ୍ ପାର୍ତିକିନି ବିଷୟତାଙ୍ଗ୍ ଦେହା ଆତାର୍ନା। ଈଶ୍ୱର ମିଙ୍ଗେଙ୍ଗ୍ ଦୟା କିଦେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation