୧ ତିମତି 5 - New Testament in Pengo Parja Languageମଣ୍ଡ୍ଲିନି ମାନାୟାରିଙ୍ଗ୍ ଆଦେସ୍ ହିତି କାତା 1 ନିତାଙ୍ଗ୍ ଗାଜା ମାନାୟାରିଙ୍ଗ୍ ଅପ୍ମାନ୍ ହିତିଲେକେ ରିସା ଆମା, ମାତର୍ ହେୱାନିଙ୍ଗ୍ ମିଞ୍ଜ୍ବା ଲେକେ ବାବିକିଜି ସନ୍ମାନ୍ କିଜି ଆଦେସ୍ ହିୟା। ଆରେ ନିତାଙ୍ଗ୍ ହିରୁକାରିଙ୍ଗ୍ ଟଣ୍ଡେନ୍ ଲେକେ ବାବିକିଜି ଆଦେସ୍ ହିୟା। 2 ନିବେତାଙ୍ଗ୍ ଗାଜା କଗ୍ଲେକାଙ୍ଗ୍ ଆୟା ଲେକେ ବାବିକିଜି ହାର୍ଦି ବ୍ଯବହାର୍ କିୟା, ଆରେ ନିତାଙ୍ଗ୍ ହିରୁ ଗାଡ଼୍ଚେକାଙ୍ଗ୍ ତଣ୍ଦେକ୍ ଲେକେ ବାବିକିଜି ବ୍ଯବହାର୍ କିୟା। ଇ ୱିଜୁ ହାର୍ଦି ମାନ୍ତାଙ୍ଗ୍ କିୟା। 3 ଇନେର୍ ହିଲ୍ୱି ରାଣ୍ଡି କଗ୍ଲେକାଙ୍ଗ୍ ସନ୍ମାନ୍ ହିଜି ଜାତୁନ୍ କିୟା। 4 ମାତର୍ ଯଦି ର ରାଣ୍ଡି କଗ୍ଲେଙ୍ଗ୍ ହିମ୍ଣାୱାକ୍ଡ଼ା କି ନାତିନାତ୍ଣି ମାନ୍ଗିନିକ୍। ଲାଗିଙ୍ଗ୍ ହେୱାର୍ ଜାର୍ ପରିବାର୍ତିଙ୍ଗ୍ ଆଗେ ଜାତୁନ୍ ଆଜି ଈଶ୍ୱରତିଙ୍ଗ୍ ହେବା କିନାଙ୍ଗା ଇଞ୍ଜି ୱେଚା, ଆରେ ହେୱାର୍ ଆୟାଆବା କି ବୁଡାଦାଦାରିଙ୍ଗ୍ ଜାତୁନ୍ କିଦେଙ୍ଗ୍ ହିକ୍ଷା ହିୟା। ଇନେସ୍କି ଇଦାଙ୍ଗ୍ ଈଶ୍ୱର କାଣ୍କୁକାଙ୍ଗ୍ ହାର୍ଦି ବିଷୟ। 5 ଇମ୍ଣି ରାଣ୍ଡି କଗ୍ଲେଙ୍ଗ୍ ସାଇଜ କିଦେଙ୍ଗ୍ ଇନେର୍ ହିଲୁର୍, ହେଦେଲ୍ ଈଶ୍ୱରତାକେ ଆହା କିଜି ୱେଡ଼ା ନାଣା ଗୁୱାରି କିଜି ଈଶ୍ୱରତିଙ୍ଗ୍ ତା ସାଇଜ କିଦେଙ୍ଗ୍ ପାର୍ତାନା କିୟା। 6 ମାତର୍ ଇମ୍ଣି ରାଣ୍ଡି କଗ୍ଲେ ସୁକ୍ ଜିବୁନ୍ କାଟିକିନାତ୍, ହେଦେଲ୍ ଜିଜି ମାଚିସ୍ ପା ହାଃନି ମାନାୟ୍ ଲେକେ। 7 ହେୱାର୍ତାକେ ଇନାକା ପା ଦସ୍ ହିଲ୍ଗୁତ୍, ହେଦାଙ୍ଗ୍ କାଜିଙ୍ଗ୍ ଇ ୱିଜୁ ବିଷୟରେ ପାର୍ତି କିନାକାରିଙ୍ଗ୍ ହିକ୍ଷା ହିୟା। 8 ମାତର୍ ଯଦି ଇନେର୍ ଜାର୍ ଲକ୍ବାକ୍ତିଙ୍ଗ୍ ଆରେ ତା ଜାର୍ ପରିବାରିଙ୍ଗ୍ ଦାୟିତ୍ପ ଅଉନ୍, ହେୱାନ୍ ପାର୍ତି କିନାକା ପିହ୍ନାନ୍। ଆରେ ହେୱାନ୍ ପାର୍ତିକିୱି ମାନାୟ୍ତାଙ୍ଗ୍ ପା ବେସି କରାପ୍ ଆନାନ୍। 9 ଇମ୍ଣି ରାଣ୍ଡି କଗ୍ଲେଙ୍ଗ୍ ଶାଟେ ବାର୍ହୁତାଙ୍ଗ୍ ଆଦିକ୍ ଆଜି ମାନ୍ଗାନାତ୍, 10 ଆରେ ର ଆଣ୍ଡ୍ରା ନେ ଇଡ଼୍ଜି ମାନ୍ଗାନାତ୍, ଆରେ ହେଦେଲ୍ ହାର୍ଦି କାମାୟ୍ କାଜିଙ୍ଗ୍ ଜଣାସୁଣା କଗ୍ଲେ ଆନାତ୍। ଇନେସ୍କି ହେଦେଲ୍ ତା ହିମ୍ଣା ୱାକ୍ଡ଼ାକାଙ୍ଗ୍ ହାର୍ କିଜି ପହା କିନାତ୍, ଗତାକାଙ୍ଗ୍ ହାର୍ କିଜି ମାନିକିନାତ୍। ସାଦୁ ମାନାୟାରିଙ୍ଗ୍ କାଲ୍ପାନା ନୁଜ୍ଦି ହିନାତ୍, ଆରେ ଦୁକ୍ତାକେ ମାନାକାରିଙ୍ଗ୍ ସାଇଜ କିନାତ୍, ଆରେ ୱିଜୁ ହାର୍ଦି କାମାୟ୍ କିଦେଙ୍ଗ୍ ତିର୍କାଡ଼୍ ଆନାତ୍, ଇଲେକେ ରାଣ୍ଡି କଗ୍ଲେଙ୍ଗ୍ ରାଣ୍ଡିକ୍ ଲିଷ୍ଟ୍ତାକେ ଲେକା ଆୟେତ୍। 11 ମାତର୍ ବୟସ୍ ଆୱାଦାଙ୍ଗ୍ ରାଣ୍ଡି ଆତିକିକାଙ୍ଗ୍ ହେ ଲିଷ୍ଟ୍ତାକେ ଲେକିକିମାଟ୍, ଆରେ ହେୱେକ୍ ରାଣ୍ଡି ଆଜି ଖ୍ରୀଷ୍ଟଙ୍ଗ୍ ହେବାକିନି ପାର୍ମାଣ୍ତାଙ୍ଗ୍ ହେୱେକ୍ ଗାଗାଡ଼୍ନି ଇଚାତାଙ୍ଗ୍ ବେସି ଇଚା କିନିକ୍, ଆରେରଗ ବିବା ଆଦେଙ୍ଗ୍ ଇଚା କିନିକ୍। 12 ଆରେ ହେୱେକ୍ ଆଗେ କିତି ପାର୍ମାଣ୍ତିଙ୍ଗ୍ ବାଙ୍ଗାଇ କିନି କାଜିଙ୍ଗ୍ ଈଶ୍ୱର ହେୱେକିୟାକାଙ୍ଗ୍ ଦଣ୍ଡ୍ ହିନାନ୍। 13 ଆରେ ବୟସ୍ ଆୱାଦାଙ୍ଗ୍ ରାଣ୍ଡି ଆତି କଗ୍ଲେକ୍ ଇଲ୍-ଇଲ୍ ବୁଲାଆଜି ଆଡ଼୍ସିଆ ଆଦେଙ୍ଗ୍ ଅବ୍ୟାସ୍ ଆନିକ୍। ହେୱେକ୍ ଆଡ଼୍ସିଆ ନେ ଆଉକ୍ ମାତର୍ ହେୱେକ୍ ଜେକନିକାରିଙ୍ଗ୍ ଗାଣ୍ଜୁ କାତା ୱେଚ୍ଚି ନିଜେ ହେୱେକ୍ ଜେକନି ପରିବାର୍ତାକେ ଇଲେକେ ଆୱାକା ଇଞ୍ଜି କାତା ୱେଚ୍ଚି ହେୱାର୍ ବିତ୍ରେ ହଣିକ୍। 14 ଲାଗିଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା ଯେ ବୟସ୍ ଆୱାଦାଙ୍ଗ୍ ରାଣ୍ଡି ଆତି କଗ୍ଲେକ୍ ବିବା ଆୟେକ୍, ଆରେ ହିମ୍ଣା ଗାଟାଆୟେକ୍, ଇଞ୍ଜି କାମାୟ୍ ହୁଡ଼େକ୍, ଆରେ ନିନ୍ଦା କିଦେଙ୍ଗ୍ ଇମ୍ଣି ଶାତ୍ରୁତିଙ୍ଗ୍ ପା ସୁଯଗ୍ ହିମାଟ୍। 15 ଆନେଙ୍ଗ୍ ଇଦାଙ୍ଗ୍ ୱେଚ୍ଚାଙ୍ଗ୍ କେତେକ୍ ହେନି ରାଣ୍ଡି କଗ୍ଲେକ୍ ଈଶ୍ୱରତିଙ୍ଗ୍ ମାନିକିନାକା ପିସ୍ତି ଶୟତାନ୍ ନିପଣ୍ ହାନିକା। 16 ଯଦି ଇମ୍ଣି ପାର୍ତିକିନି କଗ୍ଲେ ଇଞ୍ଜ ରାଣ୍ଡି କଗ୍ଲେକ୍ ମାଚିସ୍, ଲାଗିଙ୍ଗ୍ ହେଦେଲ୍ ହେୱେକିୟାଙ୍ଗ୍ ଜାତୁନ୍ ଅୱେତ୍। ଏଲେଙ୍ଗ୍ ଆତିସ୍ ହେୱେକ୍ ମଣ୍ଡ୍ଲି କାଜିଙ୍ଗ୍ ବଜ୍ ଆଉକ୍, ଆରେ ମଣ୍ଡ୍ଲି ଇନେର୍ ହିଲ୍ୱି ରାଣ୍ଡି କଗ୍ଲେକାଙ୍ଗ୍ ଜାତୁନ୍ ଅଦେଙ୍ଗ୍ ଆଡ୍ନାତ୍। 17 ଇମ୍ଣି ପ୍ରାଚିନାର୍ ତା କାମାୟ୍ ହାର୍ଦାଙ୍ଗ୍ କିନାର୍, ଆରେ ହେୱାର୍ ବେସି କାମାୟ୍ କିଜି କାତା ଶୁଣାୟ୍ କିନି ମାନାୟ୍ ଆରେ ହିକ୍ଷାହିନି ମାନାୟ୍ ରି ଗୁଣ୍ ସନ୍ମାନ୍ ପାୟାଆନି ଜଗ୍ଯ ଆନି ଦର୍କାର୍। 18 ଇନେସ୍କି ନିୟମ୍ ସାସ୍ତର୍ତାକେ ଲେକାଆତାତ୍ନା, “କୁଲିଙ୍ଗ୍ ତଗିକିନିହିଙ୍ଗ୍ ବାଡ଼୍ଦୁକାଙ୍ଗ୍ ମୁମ୍ଦ କତ୍ରା ଗାଚ୍ମାଟ୍।” ଆରେ ସାସ୍ତରତାକେ ଆରେରଗ ଲେକାଆତାତ୍ନା, “କାମାୟ୍ କିନାକାର୍ ହାଜ୍ରି ପାୟାଆନି ଦର୍କାର୍।” 19 ଇମ୍ଣି ପ୍ରାଚିନ୍ତିଙ୍ଗ୍ ପା ରିକାର୍ ତିନ୍ଜାଣ୍ ସାକି ହିୱି ପାତେକ୍ ତା ବିରଦ୍ତାକେ ବିଚାର୍ କିମା। 20 ଇମ୍ଣାକାନ୍ ପାପ୍ କାମାୟ୍ କିଜି ଲାଗାନାନ୍, ହେୱାନିଙ୍ଗ୍ ୱିଜୁ ପାର୍ତି କିନାକାର୍ ମୁମ୍ଦ କେତା। ଇନେସ୍କି ଜେକନି ପାର୍ତି କିନାକାର୍ ପାଣ୍ଡ୍ରାଆଜି ମାନ୍ଗାନାର୍। 21 ଈଶ୍ୱର ଯୀଶୁ ଖ୍ରୀଷ୍ଟତି ଆରେ ବାଚିକିତି ଦୁତ୍କୁ ଆଗେ ଆନେଙ୍ଗ୍ ନିଙ୍ଗେଙ୍ଗ୍ ଆଦେସ୍ ହିଦ୍ନାଙ୍ଗା, ଏନେଙ୍ଗ୍ ଇନେରିଙ୍ଗ୍ ପା ତାନ୍ଦ୍ରା ଆଜି ବିଚାର୍ କିମା ଆରେ ମାନାୟ୍ ହୁଡ଼୍ଜି ବ୍ଯବହାର୍ କିମା। 22 ଇନାକା ବୁଜାଆୱାଦାଙ୍ଗ୍ ଇନେର୍ କାପ୍ଡ଼ା ଜପି କେଇ ତିଗ୍ଜି ପ୍ରାଚିନ୍ କିଦେଙ୍ଗ୍ ବାଚି କିମା। ଯଦି ଏଲେଙ୍ଗ୍ କିତିସ୍ ତା ପାପ୍ କାଜିଙ୍ଗ୍ ଏନେଙ୍ଗ୍ ଦାୟି, ନିଜେ ଜାଗ୍ରତ୍ ଆ ଯେ ଇଲେକେ ପାପ୍ କାମାୟ୍ କିଉଇ। 23 ନି ପଟ ବେମାର୍ ଆରେ ଅଲପ୍ତିଙ୍ଗ୍ ବେମାର୍ ଆନି କାଜିଙ୍ଗ୍ ଏଜୁଙ୍ଗ୍ ନେ ଉଣ୍ମା, ମାତର୍ ଅଲପ୍ ଅଙ୍ଗୁର୍ ରାସ୍ ପା ୱେଣ୍ଡା। 24 କେତେକ୍ ମାନାୟାର୍ ବିଚାର୍ ଆୱାଦାଙ୍ଗ୍ ନେ ଦସି ଆନାର୍, ଆରେ କେତ୍ଜାଣ୍ ବିଚାର୍ ଆଜି ୱିସ୍ତି ପାଚେ ହେୱାର୍ ପାପ୍ ପୁନିୟା ଆନାତ୍। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ୱେଚ୍ଚାନାଙ୍ଗା, ଇନେରିଙ୍ଗ୍ ପା ହୁଡ଼୍ତି ଦାପ୍ରେ ପ୍ରାଚିନ୍ କିଦେଙ୍ଗ୍ ବାଚି କିମା। 25 ଇଲେକେ କେତେକ୍ ମାନାୟାର୍ ହାର୍ଦି କାମାୟ୍ ଜେକକିନାର୍ ପୁନାର୍, ଆରେ କେତ୍ଜାଣ୍ତି ହାର୍ଦି କାମାୟ୍ତିଙ୍ଗ୍ ହେଦାପ୍ରେ ପୁନୁର୍ ମାତର୍ ହେ କାମାୟ୍ତିଙ୍ଗ୍ ଦିରେ-ଦିରେ ପୁନାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation