୧ ତିମତି 4 - New Testament in Pengo Parja Languageବୁଲ୍ ହିକ୍ଷାହିନି ମାଷ୍ଟେରାର୍ତାଙ୍ଗ୍ ସାବ୍ଦାନ୍ 1 ନଙ୍ଗୟ୍ ପବିତ୍ର ଆତ୍ମା ହାର୍ଦାଙ୍ଗ୍ ୱେଚ୍ଚାନାତା, ଇ ସେସ୍ କାଡ଼୍ଦ କେତେକ୍ ହେନି ଖ୍ରୀଷ୍ଟାନ୍ ହିକ୍ଷାତିଙ୍ଗ୍ ପାର୍ତି କିଉର୍। ଆରେ ଜେକ ହାଜ୍ଦିଙ୍ଗ୍ ଅସାହାନି କରାପ୍ ଆତ୍ମା ହିକ୍ଷାତିଙ୍ଗ୍ ଆହ୍ନାର୍, ଆରେ ବୁତ୍ଆତ୍ମାକାଙ୍ଗ୍ ୱାନି ବୁଲ୍ ହିକ୍ଷାତିଙ୍ଗ୍ ପାର୍ତିକିନାର୍। 2 ଇ ବୁଲ୍ ହିକ୍ଷା ବାଟ୍ପାଣ୍ ଆରେ ମିଚ୍ୱାର୍ ହିନାର୍, ଇନେସ୍କି ହେୱାର୍ ବୁଦି ହାଃନାତ୍। 3 ହେୱାର୍ ବିବା ଆୱେଦେଙ୍ଗ୍ ମୁନା କିନାର୍, ଆରେ କେତେକ୍ କାଦିତିଙ୍ଗ୍ ତିନ୍ୱେଦେଙ୍ଗ୍ ହିକ୍ଷା ହିନାର୍। ମାତର୍ ସତ୍ ବିଷୟରେ ପୁନ୍ଞ୍ଜିମାଚି ପାର୍ତି କିନାକାର୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିଜି ତିନି ଦର୍କାର୍, ଇନେସ୍କି ଈଶ୍ୱର ନେ ଇ ୱିଜୁ ରସ୍ତାନ୍ନା। 4 ଈଶ୍ୱର ରସ୍ତି ୱିଜୁ ବିଷୟ ହାର୍, ଲାଗିଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିଜି ଆସେଙ୍ଗ୍ ଇନାକା ପା ଚିଞ୍ଜେଙ୍ଗ୍ ଆଡ୍ନାସ୍। 5 ଇନେସ୍କି ଈଶ୍ୱରନି କାତା ଆରେ ପାର୍ତାନା କିତି କାଜିଙ୍ଗ୍ ଇଦାଙ୍ଗ୍ ଈଶ୍ୱର କାଣ୍କୁକାଙ୍ଗ୍ ହାର୍ ଆନାତ୍। ଯୀଶୁ ଖ୍ରୀଷ୍ଟଙ୍ଗ୍ ହାର୍ଦାଙ୍ଗ୍ ହେବାକିନି ମାନାୟ୍ 6 ଏନେଙ୍ଗ୍ ଯଦି ପାର୍ତିକିନି ଟଣ୍ଡାର୍ରିଙ୍ଗ୍ ୱିଜୁ ବିଷୟରେ ହିକ୍ଷା ହିନାୟ୍, ଲାଗିଙ୍ଗ୍ ଏନେଙ୍ଗ୍ ଯୀଶୁ ଖ୍ରୀଷ୍ଟନି ର ହାର୍ଦାଙ୍ଗ୍ ହେବାକିନାକାୟ୍ ଆନାୟ୍। ଆରେ ଏନେଙ୍ଗ୍ ଇମ୍ଣି ପାର୍ତି ଆରେ ହାର୍ଦି ହିକ୍ଷାତିଙ୍ଗ୍ ମାନିକିୟା, ହେ କାତାକାଜିଙ୍ଗ୍ ଏନେଙ୍ଗ୍ ବେସି ଦରମ୍ ଜିବୁନ୍ କାଟି କିଦେଙ୍ଗ୍ ଆଡ୍ନାୟ୍। 7 କାତା ଆରେ ଈଶ୍ୱରତିଙ୍ଗ୍ ସନ୍ମାନ୍ ହିୱି ଲେକେ କାତାତିଙ୍ଗ୍ ଏନେଙ୍ଗ୍ ଦିୟାନ୍ ହିମା, ମାତର୍ ଏନେଙ୍ଗ୍ ଈଶ୍ୱର ଇଚାତାଙ୍ଗ୍ ଜିବୁନ୍ କାଟି କିଦେଙ୍ଗ୍ ଜାର୍ତିଙ୍ଗ୍ ଅବ୍ୟାସ୍ କିୟା। 8 ଇନେସ୍କି ଏକ୍ସେସାଇଜ୍ କିତିସ୍ ଆପ୍କା ନି ଗାଗାଡ଼୍ତିଙ୍ଗ୍ ନେ ଲାବ୍ ଆନାତ୍। ମାତର୍ ଈଶ୍ୱର ଇଚାତାଙ୍ଗ୍ ଜିବୁନ୍ କାଟିକିତିସ୍ ଈଶ୍ୱର ଇମ୍ଣି ଜିବୁନ୍ ହିଦ୍ଦେଙ୍ଗ୍ ପାର୍ମାଣ୍ କିତ୍ତାନ୍ନା, ହେଦାଙ୍ଗ୍ ନଙ୍ଗୟ୍ନି ଯୁଗ୍ଦ ଆରେ ୱାନି ଯୁଗ୍ଦ ଏନେଙ୍ଗ୍ ହେ ଜିବୁନ୍ ପାୟାଆନାୟ୍। 9 ଇ କାତା ପୁରାପୁରି ସତ୍ ଆରେ ପାର୍ତିକିନି ଦର୍କାର୍। 10 ଇ ଜିବୁନ୍ ପାୟା ଆଦେଙ୍ଗ୍ ଆପେଙ୍ଗ୍ ହାଃଜିରିଜି କାମାୟ୍ କିନାପା, ଇନେସ୍କି ଆପେଙ୍ଗ୍ ଜିବୁନ୍ ମାନି ଈଶ୍ୱରତାକେ ଆହା କିନାପା। ଇମ୍ଣାକାନ୍ ହେୱାନ୍ତାକେ ପାର୍ତିକିନାନ୍ ହେୱାନ୍ ୱିଜାକାର୍ କାଜିଙ୍ଗ୍ ଉଦାର୍ କିଦ୍ନାକାନ୍। 11 ପାର୍ତି କିନାକାରିଙ୍ଗ୍ ଇୱିଜୁ ହିକ୍ଷାହିଜି ମାନି କିଦେଙ୍ଗ୍ ଆଦେସ୍ ହିଜି ୱେଚା। 12 ଏନେଙ୍ଗ୍ ବେଣ୍ଡିଆ ହିମ୍ଣା ଆତାଇନା ଇଞ୍ଜି ଇନେର୍ ନିଙ୍ଗେଙ୍ଗ୍ ଇନସ୍ତା କିଦ୍ମେର୍, ଲାଗିଙ୍ଗ୍ ଏନେଙ୍ଗ୍ ବେଣ୍କିନିହିଙ୍ଗ୍। ନି ଚାଲିଚଲନ୍ତାକେ, ଜେକନିକାରିଙ୍ଗ୍ ଲାଡ୍ କିନିହିଙ୍ଗ୍, ଖ୍ରୀଷ୍ଟ ପାର୍ତିତାଙ୍ଗ୍, ସାଦୁ ଜିବୁନ୍ କାଟିକିଜି ପାର୍ତି କିନାକାର୍ ମୁମ୍ଦ ହାର୍ ଆଜି ମାନା। 13 ଆନେଙ୍ଗ୍ ନି ଲାଗାୟ୍ ୱାୱି ପାତେକ୍ ଏନେଙ୍ଗ୍ ପାର୍ତି କିନାକାର୍ତାକେ ସାସ୍ତର୍ ପଡ଼ିକିଦେଙ୍ଗ୍, ଶୁଣାୟ୍ କିଦେଙ୍ଗ୍ ଆରେ ହିକ୍ଷାହିଜି ମାନା। 14 ପ୍ରାଚିନାର୍ ନି କାପ୍ଡ଼ା ଜପି କେଇ ଇଡ଼୍ଜି ଈଶ୍ୱର ହିତ୍ତି ଇମ୍ଣି କାତାତିଙ୍ଗ୍ ନିଙ୍ଗେଙ୍ଗ୍ ୱେଚ୍ଚାତାର୍ନା, ହେ ବିଷୟତିଙ୍ଗ୍ ଏନେଙ୍ଗ୍ ଏଲା ଆମା। 15 ଇ ୱିଜୁ ବିଷୟତିଙ୍ଗ୍ ଏନେଙ୍ଗ୍ ଦିୟାନ୍ ହିୟା ଆରେ ହେଦାଙ୍ଗ୍ତିଙ୍ଗ୍ ଅବ୍ୟାସ୍ କିୟା, ଲାଗିଙ୍ଗ୍ ୱିଜାକାର୍ ପୁନାର୍ ଯେ ଏନେଙ୍ଗ୍ ପାର୍ତିତାଙ୍ଗ୍ ଜିନାୟା। 16 ଏନେଙ୍ଗ୍ ଇନାକା ହିକ୍ଷା ହିନାୟା ଆରେ ନି ଚାଲିଚଲନ୍ତିଙ୍ଗ୍ ଜାଗ୍ରତ୍ ଆଜି ମାନା। ଇ ୱିଜୁ ବିଷୟରେ ୱିଜୁଦିନ୍ କିଜି ମାନା, ଇନେସ୍କି ହେଦାଙ୍ଗ୍ କିତିସ୍ ଈଶ୍ୱର ନିବେତାଙ୍ଗ୍ ନିଙ୍ଗେଙ୍ଗ୍ ଆରେ ନି କାତା ୱେନାକାରିଙ୍ଗ୍ ଦଣ୍ଡ୍ତାଙ୍ଗ୍ ଉଦାର୍ କିଦ୍ନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation