୧ ତିମତି 3 - New Testament in Pengo Parja Languageବିଶପ୍ ପାଦ୍ ପାୟା ଆଦେଙ୍ଗ୍ ଜଗ୍ଯନି ବିଷୟ 1 ଇ କାତା ସତ୍, ଇନେର୍ ଯଦି ବିଶପ୍ ପାଦ୍ ପାୟା ଆଦେଙ୍ଗ୍ ଇଚାକିନାନ୍, ହେୱାନ୍ ରଞ୍ଜାଙ୍ଗ୍ ସନ୍ମାନ୍ନି କାମାୟ୍ କିଦେଙ୍ଗ୍ ଇଚା କିନାନା। 2 ହେଦାଙ୍ଗ୍ କାଜିଙ୍ଗ୍ ବିଶପ୍ ଲାଗାୟ୍ ଇ ଗୁଣ୍ ୱିଜୁ ମାନି ଦର୍କାର୍, ମାନାୟ୍ ହେୱାନିଙ୍ଗ୍ ନିନ୍ଦା କିତିଲେକେ ଜିବୁନ୍ କାଟି କିନାକା ମାନ୍ଗାନାକା ମାନାତ୍। ହେୱାନ୍ ରଞ୍ଜାଙ୍ଗ୍ ନେ ଡକ୍ରି କିଜି ମାନି ଦର୍କାର୍, ୱିଜୁ ପରିସ୍ତିତିତାକେ ପା ହେୱାନ୍ ଶାନ୍ତିଆଜି କାମାୟ୍ କିଦେଙ୍ଗ୍ ଆଡ୍ନାକା ମାନାତ୍, କଣ୍ଟ୍ରୁଲ୍ କିଦେଙ୍ଗ୍ ଆଡ୍ନାକା ମାନାତ୍। ମାନାୟାର୍ତାଙ୍ଗ୍ ସନ୍ମାନ୍ ପାୟା ଆଦେଙ୍ଗ୍ ଜଗ୍ଯ ମାନାକା ମାନାତ୍। ହେୱାନ୍ ଗତାଙ୍ଗ୍ ମାନି କିନିଲେକେ ଆନାକା ମାନାତ୍ ଆରେ ଈଶ୍ୱରନି ହିକ୍ଷାତିଙ୍ଗ୍ ହିକାଇ କିଦେଙ୍ଗ୍ ଆଡ୍ନାକା ମାନାତ୍। 3 ହେୱାନ୍ କାଲିଙ୍ଗ୍ କି କୁର୍ଲି କିୱାକାନ୍ ଆନାକା ମାନାତ୍, ହେୱାନ୍ ସାନ୍ତସିଷ୍ଟ ମାନାୟ୍ ଆନାକା ମାନାତ୍, ଇନେରିଙ୍ଗ୍ ଜୁକ୍ତି କିୱାକାନ୍ ଆରେ ଦନ୍ ଲବ୍ରା ଆୱାକା ମାନାତ୍। 4 ହେୱାନ୍ ତା ପରିବାର୍ତିଙ୍ଗ୍ ଟିକ୍ ବାବ୍ରେ ଚାଲାଇ କିନାକା ମାନାତ୍, ଆରେ ତା ହିମ୍ଣା ୱାକ୍ଡ଼ାକାଙ୍ଗ୍ ତା କାତା ମାନିକିଜି ମାନି ଲେକେ ହିକାଇକିଜି ମାନାକା ମାନାତ୍। 5 ଇନେର୍ ଯଦି ଜାର୍ ପରିବାର୍ତିଙ୍ଗ୍ ଟିକ୍କିଜି ଦାଇତ୍ପ ଅଦେଙ୍ଗ୍ ଆଡୁନ୍, ଲାଗିଙ୍ଗ୍ ହେୱାନ୍ ଇନେସ୍ କିଜି ଈଶ୍ୱର ମଣ୍ଡ୍ଲିତିଙ୍ଗ୍ ଦାଇତ୍ପ ଅଦେଙ୍ଗ୍ ଆଡ୍ନାନ୍? 6 ହେୱାନ୍ ନୁଆଁରେ ପାର୍ତିକିନାକାନ୍ ଆୱାଦାଙ୍ଗ୍ ମାନ୍ଗାନାନ୍, ନଇଲେ ହେୱାନ୍ ବାଟ୍ପାଣିଆ ଆନାନ୍ ପାଚେ ଶୟତାନ୍ ଇନେସ୍ ବାଟ୍ପାଣିଆ ଆଜି ଦଣ୍ଡ୍ ପାୟାଆଜି ମାଚାତ୍ ହେୱାନ୍ ପା ହେଲେକେ ଦଣ୍ଡ୍ ପାୟା ଆନାନ୍। 7 ମଣ୍ଡ୍ଲିନି ମାନାୟାରିଙ୍ଗ୍ ପିସ୍ତି ଜେକନିକାର୍ ପା ସନ୍ମାନ୍ ହିନି ଦର୍କାର୍, ନଇଲେ ହେୱାନିଙ୍ଗ୍ ମାନାୟାର୍ ନିନ୍ଦାକିତିସ୍ ହେୱାନ୍ ଶୟତାନ ଜାଲ୍ଦ ପଡ଼ାଆନାନ୍। ମଣ୍ଡ୍ଲିତାକେ ହେବା କିନି ମାନାୟ୍ନି ଜଗ୍ଯନି ବିଷୟ 8 ବିଶପ୍ନି ଜଗ୍ଯ ଇଲେକେ ମଣ୍ଡ୍ଲିତାକେ ହେବାକିନାକାନ୍ ପା ମାନାୟାର୍ତାଙ୍ଗ୍ ସନ୍ମାନ୍ ପାୟାଆନାକାନ୍ ଆନାକା ମାନାତ୍। ଦରମ୍ ମାନାୟ୍ ଆନାକା ମାନାତ୍ ର କାତା ୱେଚ୍ଚି ଜେକନି କାମାୟ୍ କିୱାକାନ୍ ଆନାକା ମାନାତ୍, ମଦୁୱା ଆୱାକା ମାନାତ୍ ଆରେ ଦନ୍ ପାୟା ଆଦେଙ୍ଗ୍ ଇନା କାମାୟ୍ ପା କିୱାକାନ୍ ଆନାକା ମାନାତ୍। 9 ଈଶ୍ୱର ପୁନିକିତି ସତ୍ କାତାତିଙ୍ଗ୍ ପାର୍ତି କିଜି ହାର୍ଦି ମାନ୍ତ ମାନି ଦର୍କାର୍, 10 ମଣ୍ଡ୍ଲିତିଙ୍ଗ୍ ହେବା କିନି ମାନାୟ୍ତିଙ୍ଗ୍ ବାଚିକିନି ଆଗେ ହେୱାନିଙ୍ଗ୍ ପରିକ୍ଷା କିୟାଟ୍। ହେୱାନ୍ ଲାଗାୟ୍ ୱିଜୁ ହାର୍ଦି ଗୁଣ୍ ମାନାତ୍ କି ଆକାୟ୍। ଯଦି ମାନାୟାର୍ ତା ବିଷୟରେ ଇନା ଦସ୍ ପା ଗାଟାଆୱିତିସ୍ ହେବା କିଦେଙ୍ଗ୍ ହିୟାଟ୍। 11 ହେଲେକେ କଗ୍ଲେକ୍ ପା ସନ୍ମାନ୍ ପାୟାଆନି ତା କଗ୍ଲେ ଆନାକା ମାନାତ୍, ଗାଣ୍ଜୁ କିୱାକା ମାନାତ୍, ୱିଜୁ ପରିସ୍ତିତିତାକେ ପା ହେଦେଲ୍ କଣ୍ଟ୍ରୁଲ୍ ଆରେ ବିସ୍ବାସ୍ତ ଆଜି ମାନାକା ମାନାତ୍। 12 ମଣ୍ଡ୍ଲିତିଙ୍ଗ୍ ହେବା କିନାକାର୍ ର କଗ୍ଲେଙ୍ଗ୍ ନେ ଇଟ୍ନି କାତା ଆରେ ତା ହିମ୍ଣା ୱାକ୍ଡ଼ାକାଙ୍ଗ୍ ହାର୍ କିଜି ଚାଲାଇ କିନି ଦର୍କାର୍। 13 ଇନେସ୍କି ଇମ୍ଣାକାର୍ ମଣ୍ଡ୍ଲିତିଙ୍ଗ୍ ହାର୍ଦାଙ୍ଗ୍ ହେବା କିନାର୍ ହେୱାରିଙ୍ଗ୍ ମାନାୟାର୍ ସନ୍ମାନ୍ କିନାର୍। ହେୱାର୍ ଯୀଶୁ ଖ୍ରୀଷ୍ଟଙ୍ଗ୍ ପାର୍ତିକିନି ବିଷୟ ମାନାୟାରିଙ୍ଗ୍ ସାସ୍ ହୁଦାଙ୍ଗ୍ ୱେଚ୍ଚେଙ୍ଗ୍ ଆଡ୍ନାର୍। ପାଉଲ ଚିଟି ଲେକିକିନି ଅର୍ତ 14 ଆନେଙ୍ଗ୍ ନି ଲାଗାୟ୍ ବେଗି ୱାନାଙ୍ଗ୍ ଇଞ୍ଜି ଆହା କିନାଙ୍ଗା। 15 ମାତର୍ ଇନାୱେଡ଼ାଙ୍ଗ୍ ଆନେଙ୍ଗ୍ ୱାନାକା ଲେଟ୍ ଆନାତ୍, ଲାଗିଙ୍ଗ୍ ଆସେଙ୍ଗ୍ ଈଶ୍ୱର ପରିବାର୍ନି ମାନାୟ୍ ଆନି କାଜିଙ୍ଗ୍ ଇନେସ୍ଆଜି ମାନାକା ମାନାତ୍ ହେ ବିଷୟରେ ପୁନି ଦର୍କାର୍, ହେଦାଙ୍ଗ୍ କାଜିଙ୍ଗ୍ ଇ ଚିଟି ଲେକିକିତାଙ୍ଗ୍ନା। ଜିବୁନ୍ ମାନି ଈଶ୍ୱରନି ମଣ୍ଡ୍ଲି ଆନାତା ଈଶ୍ୱରନି ପରିବାର୍। ର ଇଲ୍ତିଙ୍ଗ୍ ପାଉଣ୍ଡେସେନ୍ ଆରେ ପିଲେର୍ ଇନେସ୍ ସପଟ୍ ଆରେ ବାଡ଼୍କାସ୍ କିନାତ୍, ହେଲେକେ ଈଶ୍ୱରତିଙ୍ଗ୍ ପାର୍ତିକିନି ମାନାୟାର୍ ପା ସତ୍ ହିକ୍ଷାତିଙ୍ଗ୍ ସପଟ୍ ଆରେ ପାର୍ତି କିଜି ମାନି ଦର୍କାର୍। 16 ଈଶ୍ୱର ମାଙ୍ଗେଙ୍ଗ୍ ଇନାକା ୱେଚ୍ଚାତାନ୍ନା ହେଦାଙ୍ଗ୍ ପୁରାପୁରି ସତ୍, ଇଦାଙ୍ଗ୍ ଇନେର୍ ପା ବୁଲ୍ ଇଞ୍ଜି ୱେଚ୍ଚେଙ୍ଗ୍ ଆଡୁର୍। ଖ୍ରୀଷ୍ଟ ମାନାୟ୍ ରୁପ୍ ଆଜି ୱାତାନ୍, ହେୱାନ୍ ଈଶ୍ୱର ମେହି ଇଞ୍ଜି ଈଶ୍ୱର ଆତ୍ମା ପୁନି କିତାତ୍। ଦୁତ୍କୁ ହେୱାନିଙ୍ଗ୍ ହୁଡ଼୍ତିକ୍, ଈଶ୍ୱର ହେୱାନିଙ୍ଗ୍ ସରଗ୍ଜପି ଅତାନ୍, ଚେଲାହିର୍ ତା ବିଷୟରେ ୱିଜୁଜାତି ନିପଣ୍ ଶୁଣାୟ୍ କିତାର୍। ଆରେ ପୁର୍ତିନି ମାନାୟାର୍ ପାର୍ତି କିତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation