୧ ତିମତି 2 - New Testament in Pengo Parja Languageମଣ୍ଡ୍ଲିନି ହେବାକିନି ବିଦି 1 ୱିଜୁତାଙ୍ଗ୍ ମୁକ୍ୟ ବିଷୟ ୱେଚ୍ଚେଦେଙ୍ଗ୍ ଇଚା କିନାଙ୍ଗା ଯେ, ଆପେଙ୍ଗ୍ ଇନେସ୍ ଜେକନିକାର୍ ହୁଦାଙ୍ଗ୍ ଦରମ୍ ଆରେ ସାଦୁ ଆଜି ହାର୍ଦାଙ୍ଗ୍ ମାଞ୍ଜେଙ୍ଗ୍ ଆଡ୍ନାସ୍। 2 ହେଦାଙ୍ଗ୍ କାଜିଙ୍ଗ୍ ରାଜା ଆରେ ୱିଜୁ ଅପିସର୍ କାଜିଙ୍ଗ୍ ମାଦିଆଜି ଗୁୱାରି କିଜି ପାର୍ତାନା କିୟାଟ୍ ଆରେ ଈଶ୍ୱରତିଙ୍ଗ୍ ଦନ୍ଯବାଦ୍ ହିୟାଟ୍। 3 ଇଦାଙ୍ଗ୍ ମା ଉଦାର୍ କିଦ୍ନି ଈଶ୍ୱର କାଣ୍କୁକାଙ୍ଗ୍ ହାର୍ ଆରେ ୱାରିନି ବିଷୟ। 4 ଇନେସ୍କି ହେୱାନ୍ ୱିଜାକାରିଙ୍ଗ୍ ସତ୍ ବିଷୟ ପୁନେର୍ ଇଞ୍ଜି ଆରେ ରକ୍ଷା ପାୟାଆୟେର୍ ଇଞ୍ଜି ଇଚାକିନାନ୍। 5 ଇନେସ୍କି ଈଶ୍ୱର ରକାନ୍ ନେ ମାନାନ୍, ଈଶ୍ୱର ଆରେ ମାନାୟାର୍ ବିତ୍ରେ ରକାନ୍ ନେ ମାଦି ମାନ୍ଞ୍ଜି କାମାୟ୍ କିନାକାନ୍ ମାନାନ୍। ହେ ମାଦି ମାନି ମାନାୟ୍ ଆନାନା ଯୀଶୁ ଖ୍ରୀଷ୍ଟ। 6 ହେୱାନ୍ ୱିଜାକାରିଙ୍ଗ୍ ପାପ୍ ଆରେ ହାଃନି ଶାକ୍ତିତାଙ୍ଗ୍ ମୁକ୍ତିକିନି କାଜିଙ୍ଗ୍ ତା ଜିବୁନ୍ତିଙ୍ଗ୍ ଡାବୁଙ୍ଗ୍ ହିସାବ୍ରେ ହିତାନ୍। ହେୱାନ୍ ହାଃତିଲେ, ଈଶ୍ୱର ଟିକ୍ ସମୟ୍ତ ଚଚ୍ଚାନ୍ନା ଯେ ହେୱାନ୍ ୱିଜାକାରିଙ୍ଗ୍ ରକ୍ଷା କିଦେଙ୍ଗ୍ ଇଚା କିନାନା। 7 ଇଦାଙ୍ଗ୍ କାଜିଙ୍ଗ୍ ଈଶ୍ୱର ନାଙ୍ଗେଙ୍ଗ୍ ରକାନ୍ ଶୁଣାୟ୍ କିନାକାନ୍, ରକାନ୍ ବାଚିକିତି ଚେଲା, ସତ୍ ଆରେ ପାର୍ତିକିନି ବିଷୟରେ ବିନ୍ଜାତିନି ମାନାୟାରିଙ୍ଗ୍ ହିକାଇ କିନି କାଜିଙ୍ଗ୍ ର ମାଷ୍ଟେର୍ ଲେକେ ନାଙ୍ଗେଙ୍ଗ୍ ବାଚି କିତ୍ତାନ୍ନା। ଆନେଙ୍ଗ୍ ଇଦାଙ୍ଗ୍ ମିଚ୍ ଆକାୟ୍ ସତ୍ ୱେଚ୍ଚାନାଙ୍ଗା। 8 ଆନେଙ୍ଗ୍ ଇଚା କିନାଙ୍ଗା ଯେ, ରିସା, ଜୁକ୍ତି କିୱାଦାଙ୍ଗ୍ ହାର୍ଦି ଜିବୁନ୍ କାଟିକିନି ଆଣ୍ଡ୍ରା ହିମ୍ଣାଙ୍ଗ୍ ଈଶ୍ୱରତିଙ୍ଗ୍ ହେବା କିଦେଙ୍ଗ୍ ଇମେତାକେ ରବେ ଆତିହିଙ୍ଗ୍ ହେୱାର୍ କେଇ ଜପିକିଜି ପାର୍ତାନା କିୟେର୍। 9 ହେଲେକେ କଗ୍ଲେକ୍ ତା ତେମୁଲ୍ତିଙ୍ଗ୍ ଷ୍ଟାଇଲ୍ ଆରେ ହନା ରୁପା କି ବେସି ଦାମ୍ନି ହେନ୍ଦ୍ରା ଉସ୍ପି ରଞ୍ଜ୍ଞ୍ଜେଙ୍ଗ୍ ଦିୟାନ୍ ହିମେକ୍। ମାତର୍ ହାର୍ଦାଙ୍ଗ୍ ଆରେ ମାନାୟାର୍ ମାନି କିନିଲେକେ ହେନ୍ଦ୍ରାଙ୍ଗ୍ ଉସ୍ପେକ୍। 10 ଆରେ ଈଶ୍ୱରତିଙ୍ଗ୍ ହେବା କିନି କଗ୍ଲେକ୍ ଇଲେକେ ଆଜି ଜେକନିକାରିଙ୍ଗ୍ ହାର୍ଦି କାମାୟ୍ କିଜି ଜାର୍ତିଙ୍ଗ୍ ସୁନ୍ଦ୍ରି ଇଞ୍ଜି ଚଞ୍ଜିୟା ଆୟେକ୍। 11 ଆଣ୍ଡ୍ରା ହିମ୍ଣାଙ୍ଗ୍ ହିକ୍ଷା ହିନିହିଙ୍ଗ୍ କଗ୍ଲେକ୍ ଆଣ୍ଡ୍ରା ହିମ୍ଣାକାଙ୍ଗ୍ ଆଦିକାର୍ ମାନାତ୍ ଇଞ୍ଜି ଚିମ୍ରା ଆଜି ୱେନେକ୍। 12 କଗ୍ଲେକ୍ ଆଣ୍ଡ୍ରା ହିମ୍ଣାକାଙ୍ଗ୍ ତା ଆଦିକାର୍ତାକେ ଇଟେକ୍ ଇଞ୍ଜି ଆନେଙ୍ଗ୍ ଇଚା କିଉଙ୍ଗା। ଈଶ୍ୱରତିଙ୍ଗ୍ ପୁଜା କିଦେଙ୍ଗ୍ ରୁଣ୍ଡା ଆତିହିଙ୍ଗ୍ ହେୱେକ୍ ଚିମ୍ରା ଆଜି ମାନେକ୍। 13 ଇନେସ୍କି ଈଶ୍ୱର ଆଦମତିଙ୍ଗ୍ ରସ୍ତାନ୍ନା ତାପାଚେ ହବାଙ୍ଗ୍ ରସ୍ତାନ୍। 14 ଆଦମ ଟକାଇ ଆୱାତାନ୍ନା ମାତର୍ ହବା ନେ ରାଚ୍ତାଙ୍ଗ୍ ଟକାଇ ଆତାତ୍ନା। ଇ ଲେକେ ହବା ଈଶ୍ୱର ଆଦେସ୍ତିଙ୍ଗ୍ ମାନିକିୱାଦାଙ୍ଗ୍ ହେଦେଲ୍ ପାପି ଆତାତ୍ନା। 15 ମାତର୍ କଗ୍ଲେକ୍ ଯଦି ହାର୍ଦି ବୁଦିତାଙ୍ଗ୍ ପାର୍ତି, ଲାଡ୍ ଆରେ ଦରମ୍ କଗ୍ଲେ ଆଜି ମାଚିସ୍ ଈଶ୍ୱର ହେୱେକାଙ୍ଗ୍ ରକ୍ଷା କିନାନ୍, ଏଚେପାଦ୍ନା ହେୱେକ୍ ହିମ୍ଣାତିଙ୍ଗ୍ ଜନମ୍ କିନିକ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation