୧ ତିମତି 1 - New Testament in Pengo Parja Languageଜୱାର୍ 1 ଆନେଙ୍ଗ୍ ପାଉଲ ଇ ଚିଟି ଲେକିକିତାଙ୍ଗ୍ନା। ଆପେଙ୍ଗ୍ ଇମ୍ଣି ଉଦାର୍ କିଦ୍ନାକାନ୍ ତାକେ ଆହା କିନାପା, ହେ ଈଶ୍ୱର ଆଦିକାର୍ତାଙ୍ଗ୍ ଆନେଙ୍ଗ୍ ରକାଙ୍ଗ୍ ଯୀଶୁ ଖ୍ରୀଷ୍ଟନି ବାଚିକିତି ଚେଲା ଆତାଙ୍ଗ୍ନା। 2 ଆନେଙ୍ଗ୍ ଇ ଚିଟି ତିମତି ଲାଗାୟ୍ ଲେକିକିନାଙ୍ଗା। ଏନେଙ୍ଗ୍ ଖ୍ରୀଷ୍ଟତାକେ ପାର୍ତିକିନି କାଜିଙ୍ଗ୍ ଏନେଙ୍ଗ୍ ନା କାଜିଙ୍ଗ୍ ରକାଇ ହିମ୍ଣା ଲେକେ। ଆବା ଈଶ୍ୱର ଆରେ ମା ମାପୃ ଯୀଶୁ ଖ୍ରୀଷ୍ଟ ନିଙ୍ଗେଙ୍ଗ୍ ଆଶ୍ରିବାଦ୍, ଦୟା ଆରେ ଶାନ୍ତି ହିଦେନ୍। ବୁଲ୍ ହିକ୍ଷା ହିଦ୍ନି ମାଷ୍ଟେରାର୍ତାଙ୍ଗ୍ ଜାଗ୍ରତ୍ ଆଜି ମାନାଟ୍ 3 ଆନେଙ୍ଗ୍ ମାକଦନିଆ ଜିଲ୍ଲାତାକେ ହାନିହିଙ୍ଗ୍ ଇନେସ୍ ନିଙ୍ଗେଙ୍ଗ୍ ଏପିସ ସହର୍ତାକେ ମାଞ୍ଜେଙ୍ଗ୍ ୱେଚ୍ଚି ମାନ୍ଞ୍ଚାଙ୍ଗ୍, ଆରେରଗ ୱେଚ୍ଚାନାଙ୍ଗ୍ ଏନେଙ୍ଗ୍ ନଙ୍ଗୟ୍ ହେବେ ମାନା। ଆରେ ହେବେ ବୁଲ୍ ହିକ୍ଷାହିନି ମାଷ୍ଟେରାରିଙ୍ଗ୍ ବୁଲ୍ ହିକ୍ଷା ହିୱେଦେଙ୍ଗ୍ ଆଦେସ୍ ହିୟା। 4 କାତା ଆରେ ଇନାୱେଡ଼ାଙ୍ଗ୍ ୱିଜ୍ୱି ଆକଦାଦିନି ଗଷ୍ଟିନି କାତାତାକେ ଦିୟାନ୍ ହିୱେଦେଙ୍ଗ୍ ହେୱାରିଙ୍ଗ୍ ଆଦେସ୍ ହିୟା। ଇନେସ୍କି ଇ ଲେକେ କାତାତିଙ୍ଗ୍ ମାନାୟାର୍ ଜୁକ୍ତି କିବା ଆନାର୍, ଆରେ ଈଶ୍ୱର ଇଚାକିତି କାମାୟ୍ତିଙ୍ଗ୍ ହେୱାର୍ କିଦେଙ୍ଗ୍ ଆଡୁର୍। ମାତର୍ ପାର୍ତିକିନି ମାନାୟାର୍ ଇ କାମାୟ୍ କିଦେଙ୍ଗ୍ ଆଡ୍ନାର୍। 5 ଆନେଙ୍ଗ୍ ୱେଚ୍ଚିନି ଅର୍ତ ଇଦାଙ୍ଗ୍ ଯେ, ଏପେଙ୍ଗ୍ ମି ବିତ୍ରେ ଲାଡ୍ କିବା ଆନାଦେର୍। ଆରେ ଇ ଲାଡ୍ ହାର୍ଦି ମାନ୍, ହାର୍ଦି ଚିନ୍ତା ଆରେ ସତ୍ ପାର୍ତିତାଙ୍ଗ୍ ଆନି ଦର୍କାର୍। 6 ବୁଲ୍ ହିକ୍ଷାହିନି ମାଷ୍ଟେରାର୍ ଇ ୱିଜୁ ବିଷୟତିଙ୍ଗ୍ ପିସ୍ତି, ହେୱାର୍ ମୁଲ୍ୟ ହିଲ୍ୱି କାତାବାର୍ତା ଆଜି ମାନ୍ଗାନାର୍। 7 ହେୱାର୍ ପଣ୍ଡିତ୍ ଆଦେଙ୍ଗ୍ ଇଚାକିନାର୍। ମାତର୍ ହେୱାର୍ ଇନାକା ଜେକନିକାରିଙ୍ଗ୍ ହିକାଇ କିଦେଙ୍ଗ୍ ଇଚାକିନାର୍ ଆରେ ଜବର୍ଦସ୍ତିରେ ଟିକ୍ ଇଞ୍ଜି ୱେଚ୍ନାର୍ ହେଦାଙ୍ଗ୍ ନିଜେ ହେୱାରିଙ୍ଗ୍ ଜାଣା ଆକାୟ୍। 8 ମଶା ଲେକିକିତି ସାସ୍ତର୍ ଦରମ୍ ମାନାୟ୍ କାଜିଙ୍ଗ୍ ଆକାୟ୍, ମାତର୍ ଈଶ୍ୱର ନିୟମ୍ତିଙ୍ଗ୍ ମାନିକିୱି ମାନାୟ୍ କାଜିଙ୍ଗ୍। ଆରେ ବିରଦ୍ କିନାକାର୍ କାଜିଙ୍ଗ୍, ଈଶ୍ୱରତିଙ୍ଗ୍ ହେବା କିୱାକାର୍ କାଜିଙ୍ଗ୍ ଆରେ ପାପ୍ କାମାୟ୍ କିନାକାର୍ କାଜିଙ୍ଗ୍, ବାନ୍ଯା ଆରେ ଈଶ୍ୱରତିଙ୍ଗ୍ ସନ୍ମାନ୍ କିୱି ମାନାୟ୍ କାଜିଙ୍ଗ୍, ଆବାଆୟାରିଙ୍ଗ୍ ଆରେ ଜେକନିକାରିଙ୍ଗ୍ ଅହ୍ନାକାର୍ କାଜିଙ୍ଗ୍। 9 ଦାରି କାମାୟ୍ କିନି ମାନାୟାର୍ କାଜିଙ୍ଗ୍, ଗାଗାଡ଼୍ତିଙ୍ଗ୍ ହାର୍ଦାଙ୍ଗ୍ ବାଉରା ଆୱି ମାନାୟାର୍ କାଜିଙ୍ଗ୍। ମାନାୟ୍ ଚର୍, ମିଚ୍ ୱେଚ୍ନାକାର୍ କାଜିଙ୍ଗ୍ ଆରେ ମିଚ୍ତାଙ୍ଗ୍ ପାର୍ମାଣ୍ କିନାକାର୍ କାଜିଙ୍ଗ୍, ହାର୍ଦି ହିକ୍ଷା ବିରଦ୍ତାକେ କାମାୟ୍ କିନାକାର୍ କାଜିଙ୍ଗ୍ ଇଦାଙ୍ଗ୍ ହିୟାଆତାତ୍ନା। 10 ଇଦାଙ୍ଗ୍ ପୁନ୍ଞ୍ଜି ଯଦି ଇନେର୍ ମଶା ଲେକିକିତି ସାସ୍ତର୍ତିଙ୍ଗ୍ ଟିକ୍କିଜି ମାନିକିନାର୍, ଲାଗିଙ୍ଗ୍ ହେଦାଙ୍ଗ୍ ହାର୍ ଇଦାଙ୍ଗ୍ ଆପେଙ୍ଗ୍ ପୁଚାପ୍ନା। 11 ଇ ହିକ୍ଷା ଆଶ୍ରିବାଦ୍ ହିଦ୍ନି ଈଶ୍ୱରତାଙ୍ଗ୍ ଆରେ ଗୌରବନି ହାର୍ଦିକାବୁର୍ତାଙ୍ଗ୍ ଆନାତ୍। ହେ ହାର୍ଦିକାବୁର୍ ଜେକନିକାରିଙ୍ଗ୍ ୱେଚ୍ଚେଙ୍ଗ୍ ଈଶ୍ୱର ନାଙ୍ଗେଙ୍ଗ୍ ହିତ୍ତାନ୍ନା। ପାଉଲ ଖ୍ରୀଷ୍ଟଙ୍ଗ୍ ଦନ୍ଯବାଦ୍ ହିତି କାତା 12 ମା ମାପୃ ଯୀଶୁ ଖ୍ରୀଷ୍ଟଙ୍ଗ୍ ଆନେଙ୍ଗ୍ ଦନ୍ଯବାଦ୍ ହିନାଙ୍ଗା, ଇନେସ୍କି ହେୱାନ୍ ନାଙ୍ଗେଙ୍ଗ୍ ତା ହେବା କିଦେଙ୍ଗ୍ ଶାକ୍ତି ହିତ୍ତାନ୍ନା, ହେୱାନ୍ ନାଙ୍ଗେଙ୍ଗ୍ ବିସ୍ବାସ୍ କିଜି ତା ହେବା କାମାୟ୍ କିଦେଙ୍ଗ୍ ଦାୟିତ୍ପ ହିତ୍ତାନ୍ନା। 13 ଆନେଙ୍ଗ୍ ପାର୍ତିକିୱି ଆଗେ ଖ୍ରୀଷ୍ଟଙ୍ଗ୍ ନିନ୍ଦାକିଜି ମାଚାଙ୍ଗ୍, ଆରେ ପାର୍ତି କିନାକାରିଙ୍ଗ୍ ଦୁକ୍କଷ୍ଟ ହିଜି ମାଚାଙ୍ଗ୍ ଆରେ ହେୱାରିଙ୍ଗ୍ ବେସି ହରିଆଣ୍ କିଜି ମାଚାଙ୍ଗ୍। ମାତର୍ ଆନେଙ୍ଗ୍ ନଙ୍ଗୟ୍ ପାତେକ୍ ଖ୍ରୀଷ୍ଟଙ୍ଗ୍ ପୁନ୍ୱାଦାଙ୍ଗ୍ ମାଚାଙ୍ଗ୍ ଆରେ ଇନାକା ଆନେଙ୍ଗ୍ କିନାଙ୍ଗା ହେଦାଙ୍ଗ୍ ପୁନ୍ୱାଦାଙ୍ଗ୍ କିତି କାଜିଙ୍ଗ୍ ଖ୍ରୀଷ୍ଟ ନାଙ୍ଗେଙ୍ଗ୍ ଦୟା କିତ୍ତାନ୍ନା। 14 ମା ମାପୃ ନାଙ୍ଗେଙ୍ଗ୍ ବେସି ଦୟା କିତ୍ତାନ୍ନା, ଆନେଙ୍ଗ୍ ଯୀଶୁ ଖ୍ରୀଷ୍ଟତାକେ ମାହାଆଜି ମାନି କାଜିଙ୍ଗ୍ ହେୱାନ୍ ନାଙ୍ଗେଙ୍ଗ୍ ବିସ୍ବାସ୍ ଆରେ ଲାଡ୍ ହିତ୍ତାନ୍ନା। 15 ପାପି ମାନାୟାରିଙ୍ଗ୍ ଉଦାର୍ କିଦେଙ୍ଗ୍ ଯୀଶୁ ଖ୍ରୀଷ୍ଟ ପୁର୍ତିତାକେ ୱାଜିମାଚାନ୍, ଇ କାତା ପୁରାପୁରି ସତ୍ ଆରେ ପାର୍ତିକିନି ଦର୍କାର୍, ହେ ପାପି ମାନାୟାର୍ ବିତ୍ରେତାଙ୍ଗ୍ ଆନେଙ୍ଗ୍ ରକାଙ୍ଗ୍ ଗାଜା ପାପି। 16 ଜେକନିକାର୍ ଇନେସ୍ ଯୀଶୁ ଖ୍ରୀଷ୍ଟତାକେ ପାର୍ତି କିଜି ୱିଜ୍ୱି ଜିବୁନ୍ ପାୟାଆନାର୍, ହେଦାଙ୍ଗ୍ ହେୱାର୍ ଲାଗାୟ୍ ଚଚ୍ନି କାଜିଙ୍ଗ୍ ଈଶ୍ୱର କାସି ମାନ୍ଞ୍ଜି ସାସ୍ ଆସ୍ତି ଦୟା କିତ୍ତାନ୍ନା। 17 ଇମ୍ଣି ରାଜା ୱିଜ୍ୱି ଜିବୁନ୍ ପାତେକ୍ ସାସନ୍ କିନାନ୍, ହେୱାନ୍ ୱିଜୁଦିନ୍ ମାନ୍ଗାନାନ୍ ଆରେ ଇନେର୍ ପା ହେୱାନିଙ୍ଗ୍ ହୁଡ଼୍ଦେଙ୍ଗ୍ ଆଡୁର୍, ହେୱାନ୍ ନେ ରକାନ୍ ସତ୍ ଈଶ୍ୱର। ହେୱାନିଙ୍ଗ୍ ସନ୍ମାନ୍ ଆରେ ଗୌରବ ଆୟେତ୍। ଆମେନ୍। 18 ଏ ତିମତି ଏନେଙ୍ଗ୍ ରକାଇ ନା ହିମ୍ଣା ଲେକେ, ଆନେଙ୍ଗ୍ ନିଙ୍ଗେଙ୍ଗ୍ ଇ ଆଦେସ୍ ହିଦ୍ନାଙ୍ଗା ଯେ, ଭବିଷ୍ଯତବକ୍ତାର୍ ଇମ୍ଣି କାତା ଆଗେ ନିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାର୍, ହେ କାତାତିଙ୍ଗ୍ ଏତୁ କିୟା। ଆରେ ବୁଲ୍ ହିକ୍ଷାହିନି ମାଷ୍ଟେରାର୍ ତାକେ ହାର୍ ଆଜି ଜୁଜ୍ କିଦେଙ୍ଗ୍ ହେ କାତାତିଙ୍ଗ୍ ର କାଣ୍ଡା ଲେକେ ବାଉରା ଆ। 19 ଏନେଙ୍ଗ୍ ଖ୍ରୀଷ୍ଟତାକେ ପାର୍ତି କିଜି ମାନା, ଆରେ ଇନାକା ଟିକ୍ ହେଦାଙ୍ଗ୍ କିୟା। ଇନେସ୍କି କେତେକ୍ ମାନାୟାର୍ ଟିକ୍ କାମାୟ୍ ପୁନ୍ଞ୍ଜି କିୱି କାଜିଙ୍ଗ୍ ଜାଜ୍ ଇନେସ୍ ଡିଙ୍ଗ୍ତାତ୍ନା ହେଲେକେ ହେୱାର୍ ମାନ୍ ପା ଖ୍ରୀଷ୍ଟତାକେ ପାର୍ତି କିନାକା ବାଙ୍ଗା ଆତାତ୍ନା। 20 ହେୱାର୍ ବିତ୍ରେ ହୁମନାୟ ଆରେ ଆଲେକଜାଣ୍ଡ୍ରିଆ ମାନାୟାର୍ ମାଚାର୍। ଇୱାର୍ ଇନେସ୍ ଈଶ୍ୱରତିଙ୍ଗ୍ ନିନ୍ଦା କିୱେଦେଙ୍ଗ୍ ହିକାଆନାର୍। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାରିଙ୍ଗ୍ ମଣ୍ଡ୍ଲିତାଙ୍ଗ୍ ହପ୍ଚି ଶୟତାନ କେଇଦ ହିଜି ଦଣ୍ଡ୍ ହିତାଙ୍ଗ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation