୧ ଥେସଲନୀକିୟ 5 - New Testament in Pengo Parja Languageମାପୃ ଯୀଶୁ ଆରେରଗ ୱାନି ଦିନ୍ତି କାତା 1 ଏ ପାର୍ତିକିନି ଟଣ୍ଡାର୍କାଦେର୍, ମାପୃ ଯୀଶୁ ଆରେରଗ ପୁର୍ତିତାକେ ୱାନି ବିଷୟରେ ମିଙ୍ଗେଙ୍ଗ୍ ୱେଚ୍ଚିନି ଦର୍କାର୍ ଆକାୟ୍। 2 ଏଚେକାଡ଼୍ଦ ଆସେଙ୍ଗ୍ ଜାଗ୍ରତ୍ ଆଜି ମାନୁସ୍, ହେପାଦ୍ନା ର ଚରେନ୍ ମିକାଲିଙ୍ଗ୍ ୱାତିଲେକେ ମାପୃ ଯୀଶୁ ତିପ୍କୁ ପୁର୍ତିତାକେ ଆରେରଗ ୱାନାନ୍। 3 ଏଚେକାଡ଼୍ଦ ମାନାୟାର୍ ଆପେଙ୍ଗ୍ ଶାନ୍ତି ଆରେ ଇନା ଚିନ୍ତା ଆକାୟ୍ ଇଞ୍ଜି ୱେଚ୍ଚି ମାନାର୍। ଇନେସ୍ ର ପଟ ଆତି କଗ୍ଲେଙ୍ଗ୍ ତିପ୍କୁ ପଟତ ନନାତ୍, ହେଲେକେନେ ଈଶ୍ୱର ହେୱାରିଙ୍ଗ୍ ତିପ୍କୁ ବୁଡାୟ୍ କିନାତ୍, ଆରେ ଇନେର୍ ପା ହେୱାରିଙ୍ଗ୍ ରକ୍ଷା କିଦେଙ୍ଗ୍ ମାନ୍ଙ୍ଗୁର୍। 4 ମାତର୍ ଏ ପାର୍ତିକିନି ଟଣ୍ଡାର୍କାଦେର୍, ଏପେଙ୍ଗ୍ ଶୟତାନନି ମାନାୟ୍ କାଦେର୍ ଆକାୟ୍। ମାତର୍ ଏପେଙ୍ଗ୍ ଈଶ୍ୱରତାକେନି ମାନାୟ୍ କାଦେର୍, ଲାଗିଙ୍ଗ୍ ମାପୃ ଯୀଶୁ ଏଚେକାଡ଼୍ଦ ଚରେନ୍ଲେକେ ତିପ୍କୁ ପୁର୍ତିତାକେ ୱାନାନ୍, ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଚାନିଆ ଆମାଟ୍। 5 ଏପେଙ୍ଗ୍ ୱିଜାଦେର୍ ଅଜଡ଼୍ ଆରେ ୱେଡ଼ାନି ମାନାୟ୍ କାଦେର୍, ଆରେ ଏପେଙ୍ଗ୍ କାମାୟ୍ ୱେଡ଼ାଲିଙ୍ଗ୍ କିନାଦେରା, ମାତର୍ ଏପେଙ୍ଗ୍ ନାଣା କି ମାଜ୍ଗାନି ମାନାୟ୍ କାଦେର୍ ଆକାୟ୍। 6 ଲାଗିଙ୍ଗ୍ ଆପେଙ୍ଗ୍ ବିନ୍ଜାତିର୍ ମାନାୟାର୍ଲେକେ ହୁଞ୍ଜୁସ୍, ମାତର୍ ଜାଗ୍ରତ୍ ଆଜି ଖ୍ରୀଷ୍ଟ ଆରେରଗ ୱାନାନ୍ ଇଞ୍ଜି କାସି ମାନାସ୍। 7 ହେଦାଙ୍ଗ୍ କାଜିଙ୍ଗ୍ ଇମ୍ଣାକାର୍ ହୁଞ୍ଜ୍ନାର୍, ହେୱାର୍ ନାଣାଲିଙ୍ଗ୍ ହୁଞ୍ଜ୍ନାର୍, ଆରେ ଇମ୍ଣାକାର୍ କାଲିଙ୍ଗ୍ ଉଣାର୍ ହେୱାର୍ ମିକାଲିଙ୍ଗ୍ ନେ ଉଣାର୍। 8 ମାତର୍ ଆପେଙ୍ଗ୍ ଅଜଡ଼୍ନି ମାନାୟ୍ ଆଦେଙ୍ଗ୍ ଜାର୍ତିଙ୍ଗ୍ କଣ୍ଟ୍ରୁଲ୍ ଆଜି ମାନି ଦର୍କାର୍। ଇନେସ୍କି ର ସେନା ତା ଉଦାର୍ କାଜିଙ୍ଗ୍ ପିତାଡ଼୍ ଆଙ୍ଗି ରସ୍ତି ଜପି ଉସ୍ପାନାନ୍, ହେଲେକେ ଏପେଙ୍ଗ୍ ପାର୍ତି ଆରେ ଜାର୍-ଜାର୍ବିତ୍ରେ ଲାଡ୍କିନି ଦର୍କାର୍। ଆରେ ସେନା ଜାର୍ କାପ୍ଡ଼ାତିଙ୍ଗ୍ ରକ୍ଷା କିନି କାଜିଙ୍ଗ୍ ପିତାଡ଼୍ତାଙ୍ଗ୍ ରସ୍ତି ହେଲ୍ମେଟ୍ ଆହା ଇଡ଼୍ଜି ତୁଜ୍ନାନ୍, ହେଲେକେ ଈଶ୍ୱର ମାଙ୍ଗେଙ୍ଗ୍ ୱିଜୁ ଦିନ୍ତି ଦଣ୍ଡ୍ତାଙ୍ଗ୍ ରକ୍ଷା କିତ୍ତାନ୍ନା। 9 ଇନେସ୍କି ଈଶ୍ୱର ମାଙ୍ଗେଙ୍ଗ୍ ଦଣ୍ଡ୍ ହିଦ୍ଦେଙ୍ଗ୍ ବାଚି କିଦ୍ୱାତାନ୍ନା, ମାତର୍ ମା ମାପୃ ଯୀଶୁ ଖ୍ରୀଷ୍ଟ କାଜିଙ୍ଗ୍ ଉଦାର୍ ପାୟା ଆଦେଙ୍ଗ୍ ବାଚି କିତ୍ତାନ୍ନା 10 ହେୱାନ୍ ମା କାଜିଙ୍ଗ୍ ହାଃତାନ୍। ହେୱାନ୍ ଏଚେପାଦ୍ନା ଆରେରଗ ୱାତିସ୍, ଆସେଙ୍ଗ୍ ଜିବୁନ୍ ମାଚିସ୍ କି ହାଃଜି ମାଚିସ୍ ପା, ତା ଲାହାଙ୍ଗ୍ ୱିଜୁଦିନ୍ ଜିବୁନ୍ଆଜି ମାନାସ୍। 11 ଲାଗିଙ୍ଗ୍ ଏପେଙ୍ଗ୍ ଜାର୍-ଜାର୍ବିତ୍ରେ ସାସ୍ ହିଜି ମାନାଟ୍, ଆରେ ଈଶ୍ୱରତିଙ୍ଗ୍ ଆଦିକ୍ ପାର୍ତି କିଦେଙ୍ଗ୍ ଜାର୍-ଜାର୍ବିତ୍ରେ ସାଇଜ କିୟାଟ୍। ଇନେସ୍ ଏପେଙ୍ଗ୍ କିନାଦେରା। ପାଉଲତି ସେସ୍ ହିକ୍ଷା 12 ଏ ପାର୍ତିକିନି ଟଣ୍ଡାର୍କାଦେର୍, ଆପେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାପା, ଇମ୍ଣି ମାନାୟ୍ ମାପୃତି କାମାୟ୍ କିଦେଙ୍ଗ୍ ନେତା ଆତାନ୍ନା, ଆରେ ମିଙ୍ଗେଙ୍ଗ୍ ହାର୍ ହିକ୍ଷା ହିଦ୍ଦେଙ୍ଗ୍ କଷ୍ଟ କିନାନା, ହେୱାନିଙ୍ଗ୍ ସନ୍ମାନ୍ ହିୟାଟ୍। 13 ଆରେ ହେୱାର୍ କିତି କାମାୟ୍ କାଜିଙ୍ଗ୍ ଏପେଙ୍ଗ୍ ହେୱାରିଙ୍ଗ୍ ସନ୍ମାନ୍ କିୟାଟ୍, ଆରେ ବେସି ଲାଡ୍କିଜି ଜାର୍-ଜାର୍ବିତ୍ରେ ଶାନ୍ତିତାକେ ମାନାଟ୍। 14 ଏ ପାର୍ତିକିନି ଟଣ୍ଡାର୍କାଦେର୍, ଆପେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାପା, ଆଡ଼୍ସାୟ୍ ଲଗାଙ୍ଗ୍ ସାବ୍ଦାନ୍ ଆଦେଙ୍ଗ୍ ହିକ୍ଷା ହିୟାଟ୍। ସାସ୍ ହିଲାକାରିଙ୍ଗ୍ ସାସ୍ ହିୟାଟ୍ ଆରେ ଶାକ୍ତି ହିଲାକାରିଙ୍ଗ୍ ଶାକ୍ତି ହିୟାଟ୍, ଆରେ ୱିଜାର୍ ମାନାୟାର୍ତାଙ୍ଗ୍ ସମାନ୍ ମାନାଟ୍। 15 ଆନେଙ୍ଗ୍ ମିଙ୍ଗେଙ୍ଗ୍ ଜାଗ୍ରତ୍ ଆଦେଙ୍ଗ୍ ୱେଚ୍ଚାନାଙ୍ଗା, ଏପେଙ୍ଗ୍ ଅନ୍ୟାୟ୍ ବାଦୁଲ୍ରେ ଅନ୍ୟାୟ୍ କିମାଟ୍। ମାତର୍ ଏପେଙ୍ଗ୍ ୱିଜୁଦିନ୍ ଜାର୍-ଜାର୍ କାଜିଙ୍ଗ୍ ଆରେ ୱିଜାର୍ କାଜିଙ୍ଗ୍ ହାର୍ କାମାୟ୍ କିଦେଙ୍ଗ୍ ଉପାୟ୍ କିୟାଟ୍। 16 ଏପେଙ୍ଗ୍ ୱିଜୁଦିନ୍ ୱାରି କିୟାଟ୍, 17 ଆରେ ୱିଜୁଦିନ୍ ପାର୍ତାନା କିଜି ମାନାଟ୍, 18 ଏପେଙ୍ଗ୍ ଦୁଃକ୍ ୱାତିସ୍ କି ସୁକ୍ ୱାତିସ୍ ପା ୱିଜୁଦିନ୍ ଈଶ୍ୱରତିଙ୍ଗ୍ ଦନ୍ଯବାଦ୍କିଜି ମାନାଟ୍। ଈଶ୍ୱର ହେଦାଙ୍ଗ୍ ମିବେତାଙ୍ଗ୍ ଇଚା କିତାନ୍ନା, ଇନେସ୍କି ଏପେଙ୍ଗ୍ ଯୀଶୁ ଖ୍ରୀଷ୍ଟନି ମାନାୟ୍ କାଦେର୍। 19 ପବିତ୍ର ଆତ୍ମାନି କାମାୟ୍ତିଙ୍ଗ୍ ମୁନା କିମାଟ୍। 20 ଭବିଷ୍ଯତବକ୍ତାର୍ କାତାତିଙ୍ଗ୍ ବେକାର୍ ଇଞ୍ଜି ବାବିକିମାଟ୍। 21 ମାତର୍ ୱିଜୁ କାତାତିଙ୍ଗ୍ ପରିକ୍ଷା କିଜି ପୁନାଟ୍, ଇଦାଙ୍ଗ୍ ଈଶ୍ୱରତାଙ୍ଗ୍ ୱାତାତ୍ନା କି ଆକାୟ୍? ଆରେ ଇମ୍ଣାକା ହାର୍ଦାକା ହେଦାଙ୍ଗ୍ ଆସ୍ତି ମାନି କିୟାଟ୍। 22 ୱିଜୁ ପର୍କାର୍ କରାପ୍ କାମାୟ୍ତାଙ୍ଗ୍ ଦେହା ମାନାଟ୍। 23 ଶାନ୍ତି ହିଦ୍ନି ଈଶ୍ୱର ହେୱାନ୍ ନିଜେ ମିଙ୍ଗେଙ୍ଗ୍ ପୁରାପୁରି ବାବେ ପବିତ୍ର କିଦ୍ନାନ୍। ମି ଆତ୍ମା, ଜିବୁନ୍ ଆରେ ଗାଗାଡ଼୍ ଦସ୍ କିତାନ୍ନା ଇଞ୍ଜି ଇଞ୍ଜ୍ମେର୍, ମା ମାପୃ ଯୀଶୁ ଖ୍ରୀଷ୍ଟ ମା କାଜିଙ୍ଗ୍ ଆରେରଗ ପୁର୍ତିତାକେ ୱାନି ପାତେକ୍। 24 ଈଶ୍ୱର ମିଙ୍ଗେଙ୍ଗ୍ ପବିତ୍ର ଆଦେଙ୍ଗ୍ ବାଚି କିତ୍ତାନ୍ନା, ହେୱାନ୍ ମିଙ୍ଗେଙ୍ଗ୍ ପବିତ୍ର ଆଦେଙ୍ଗ୍ ସାଇଜ କିଦ୍ନାନ୍। 25 ଏ ପାର୍ତିକିନି ଟଣ୍ଡାର୍କାଦେର୍, ମା କାଜିଙ୍ଗ୍ ପାର୍ତାନା କିୟାଟ୍। 26 ମିହୁଦାଙ୍ଗ୍ ମାନି ପାର୍ତିକିନି ଟଣ୍ଡାରିଙ୍ଗ୍ ଲବାୟ୍ କିଜି ଜୱାର୍ କିୟାଟ୍। 27 ଆନେଙ୍ଗ୍ ମିଙ୍ଗେଙ୍ଗ୍ ମାପୃ ଯୀଶୁ ତର୍ଦାଙ୍ଗ୍ ଆଦେସ୍ ହିଦ୍ନାଙ୍ଗା, ଏପେଙ୍ଗ୍ ୱିଜାର୍ ପାର୍ତିକିନି ଟଣ୍ଡାର୍ତାକେ ଇ ଚିଟି ପଡ଼ି କିୟାଟ୍। 28 ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା କିଦେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation