୧ ଥେସଲନୀକିୟ 4 - New Testament in Pengo Parja Languageଈଶ୍ୱର ସାର୍ଦା ଆନିଲେକେ ଆସେଙ୍ଗ୍ କାମାୟ୍ କିନାସ୍ 1 ଏ ଟଣ୍ଡାର୍କାଦେର୍, ଆପେଙ୍ଗ୍ ମାପୃ ଯୀଶୁ ତର୍ଦାଙ୍ଗ୍ ଗୁୱାରି କିଦ୍ନାପା ଯେ, ଏପେଙ୍ଗ୍ ଈଶ୍ୱର ୱାରିୟା ଆନିଲେକେ କାମାୟ୍ କିଜି ଯିବୁନ୍ କାଟିକିୟାଟ୍। ଆଗେ ଇନେସ୍ ଆପେଙ୍ଗ୍ ୱେଚ୍ଚି ମାନ୍ଞ୍ଚାପ୍, ଆରେ ଏପେଙ୍ଗ୍ ହେଲେକେ କିନାଦେରା, ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ସାସ୍ ହିଦ୍ନାପା, ଲାଗିଙ୍ଗ୍ ଏପେଙ୍ଗ୍ ହେଲେକେ ଆଦିକ୍ କିନାଦେର୍। 2 ଆପେଙ୍ଗ୍ ମିଙ୍ଗେଙ୍ଗ୍ ଆଦେସ୍ ହିତ୍ତାକା ପୁଚାଦେର୍ନା, ମିଙ୍ଗେଙ୍ଗ୍ ଇ ଆଦେସ୍ ୱେଚ୍ଚେଦେଙ୍ଗ୍ ମାଙ୍ଗେଙ୍ଗ୍ ମାପୃ ଯୀଶୁ ୱେଚ୍ଚି ମାନ୍ଞ୍ଚାନ୍। 3 ଈଶ୍ୱରତିଙ୍ଗ୍ ଇଚା ଯେ, ଏପେଙ୍ଗ୍ ପବିତ୍ର ଆଡ, ଇ ଅର୍ତ ଏପେଙ୍ଗ୍ ଦାରି କାମାୟ୍ କିମାଟ୍। 4 ଆରେ ଏପେଙ୍ଗ୍ ୱିଜାଦେର୍ ଜାର୍-ଜାର୍ ଦାରି କାମାୟ୍ କିନି ଇଚାତାଙ୍ଗ୍ ଦେହା ମାନାଟ୍। ଇନେସ୍କି ଈଶ୍ୱରତିଙ୍ଗ୍ ପୁନ୍ୱିତି ବିନ୍ଜାତିନି ମାନାୟାର୍ ହେଲେକେ କାମାୟ୍ କିଦେଙ୍ଗ୍ ଇଚା କିନାର୍। 5 ୱିଜାକାଦେର୍ ନିଜେ-ନିଜେତିଙ୍ଗ୍ ପବିତ୍ର କିୟାଟ୍। ଲାଗିଙ୍ଗ୍ ମାନାୟାର୍ ମିଙ୍ଗେଙ୍ଗ୍ ସନ୍ମାନ୍ ହିଦ୍ନାର୍, ଇଲେକେ ହାର୍ କାମାୟ୍ କିଜି ମାନାଟ୍। 6 ଆରେ ଏପେଙ୍ଗ୍ ଜାର୍ ଟଣ୍ଡେନ୍ ଡକୃହିଙ୍ଗ୍ ଦାରି କାମାୟ୍ କିମାଟ୍, ଯଦି ଏଲେଙ୍ଗ୍ କିନାଦେର୍ ମାପୃ ମିଙ୍ଗେଙ୍ଗ୍ ଦଣ୍ଡ୍ ହିଦ୍ନାତ୍। ହେଦାଙ୍ଗ୍ ଆପେଙ୍ଗ୍ ଆଗେନେ ସାବ୍ଦାନ୍ ଆଜି ମାଞ୍ଜେଙ୍ଗ୍ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାପ୍। 7 ଈଶ୍ୱର ମାଙ୍ଗେଙ୍ଗ୍ ପାପ୍ କାମାୟ୍ କିଜି ଯିବୁନ୍ କାଡିକିଦେଙ୍ଗ୍ ବାଚି କିଦ୍ୱାତାନ୍ନା, ମାତର୍ ଦରମ୍ କାମାୟ୍ କିଜି ପବିତ୍ର ଆଜି ଯିବୁନ୍ କାଡିକିଦେଙ୍ଗ୍ ମାଙ୍ଗେଙ୍ଗ୍ ବାଚି କିତ୍ତାନ୍ନା। 8 ଲାଗିଙ୍ଗ୍ ଇମ୍ଣି ମାନାୟ୍, ଇ ହିକ୍ଷାତିଙ୍ଗ୍ ଆହୁନ୍, ହେୱାନ୍ ମାନାୟାର୍ ହିକ୍ଷାତିଙ୍ଗ୍ ଆହ୍ନାନା, ଲାଗିଙ୍ଗ୍ ହେୱାନ୍ ପବିତ୍ର ଆତ୍ମା ହିଦ୍ନି ଈଶ୍ୱରତିଙ୍ଗ୍ ଆହୁନ୍। 9 ଆନେଙ୍ଗ୍, ପାର୍ତିକିନି ଟଣ୍ଡାରିଙ୍ଗ୍ ଲାଡ୍କିନି ବିଷୟରେ ଲେକିକିନି ଦର୍କାର୍ ଆକାୟ୍, ଇନେସ୍କି ଏପେଙ୍ଗ୍ ଈଶ୍ୱରନି ଲକ୍, ଆରେ ଈଶ୍ୱର ମିଙ୍ଗେଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିନାକା ହିକାୟ୍ କିତ୍ତାନ୍ନା। 10 ଆରେ ମାକଦନିଆନି ସହର୍ନି ପାର୍ତିକିନି ୱିଜାର୍ ଟଣ୍ଡାରିଙ୍ଗ୍ ଲାଡ୍ କିନାଦେରା। ହେଦାଙ୍ଗ୍ କାଜିଙ୍ଗ୍ ଏ ଟଣ୍ଡାର୍କାଦେର୍ ଏପେଙ୍ଗ୍ ଇନେସ୍ ଜାର୍-ଜାର୍ବିତ୍ରେ ଲାଡ୍କିଜି ମାଚାଦେର୍, ହେଲେକେ ଏପେଙ୍ଗ୍ ହେୱାରିଙ୍ଗ୍ ଆଦିକ୍ତାଙ୍ଗ୍ ଆଦିକ୍ ଲାଡ୍ କିୟାଟ୍। 11 ଆପେଙ୍ଗ୍ ମିଙ୍ଗେଙ୍ଗ୍ ଆଗେ ଗୁୱାରି କିଜି ୱେଚ୍ଚି ମାନ୍ଞ୍ଚାପ୍ ଯେ, ଏପେଙ୍ଗ୍ ଜାର୍-ଜାର୍ବିତ୍ରେ ଗଣ୍ଡ୍ଗଲ୍ ଆମାଟ୍। ଆରେ ଶାନ୍ତିତାଙ୍ଗ୍ ମାନ୍ଞ୍ଜି ଜାର୍-ଜାର୍ କାମାୟ୍ କିୟାଟ୍, ଆରେ ଜାର୍ କାମାୟ୍ ଜାର୍ କେଇଦାଙ୍ଗ୍ କିନାକା ହାର୍ ଇଞ୍ଜି ବାବି କିୟାଟ୍। 12 ଇନେସ୍କି ବିନ୍ଜାତିନି ମାନାୟାରିଙ୍ଗ୍ ମିଙ୍ଗେଙ୍ଗ୍ ୱିଜୁଦିନ୍ ବ୍ଯବହାର୍ କିନାକା ହୁଡ଼୍ଜି ମିଙ୍ଗେଙ୍ଗ୍ ସନ୍ମାନ୍ ହିଦ୍ନାର୍, ଆରେ ମିଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ କାଜିଙ୍ଗ୍ ଜେକନିକାର୍ତାଙ୍ଗ୍ ସାଇଜ ପାୟା ଆଦେଙ୍ଗ୍ ଆହା କିଉଦେର୍। ମାପୃ ଯୀଶୁ ଆରେରଗ ପୁର୍ତିତାକେ ୱାନି କାତା 13 ଏ ଟଣ୍ଡାର୍କାଦେର୍, ଇ ବିଷୟତିଙ୍ଗ୍ ଏପେଙ୍ଗ୍ ପୁନ୍ଞ୍ଜି ମାନାଟ୍ ଯେ, ମା ପାର୍ତିକିନି ମାନାୟାର୍ ହାଃତି ପାଚେ ଆରେରଗ ଈଶ୍ୱର ହେୱାରିଙ୍ଗ୍ ଜିବୁନ୍ ହିନାତ୍, ଲାଗିଙ୍ଗ୍ ଏପେଙ୍ଗ୍ ଆହା ହିଲି ବିନ୍ଜାତିନି ମାନାୟାର୍ଲେକେ ଦୁଃକ୍ କିଉଦେର୍। 14 ଆସେଙ୍ଗ୍ ଯଦି, ମାପୃ ଯୀଶୁଙ୍ଗ୍ ଈଶ୍ୱର ହାଃତିତାଙ୍ଗ୍ ଆରେରଗ ଜିବୁନ୍ ହିତାନ୍ନା ଇଞ୍ଜି ପାର୍ତି କିନାସା। ଲାଗିଙ୍ଗ୍ ଏଚେପାଦ୍ନା ଯୀଶୁ ଆରେରଗ ପୁର୍ତିତାକେ ୱାନାନ୍, ହେପାଦ୍ନା ଯୀଶୁଙ୍ଗ୍ ପାର୍ତି କିଜି ହାଃତି ମାନାୟାରିଙ୍ଗ୍ ଈଶ୍ୱର ଆରେରଗ ଜିବୁନ୍ ହିନାନ୍। 15 ଆପେଙ୍ଗ୍ ମାପୃ ଯୀଶୁ ୱେଚ୍ଚିଲେକେ ମିଙ୍ଗେଙ୍ଗ୍ ୱେଚ୍ଚାନାପା ଯେ, ମାପୃ ଯୀଶୁ ପୁର୍ତିତାକେ ଆରେରଗ ୱାନି ପାତେକ୍ ଆସେଙ୍ଗ୍ ଏଚେଜାଣ୍ ଜିବୁନ୍ ମାନ୍ଗାନାସ୍। ଆସେଙ୍ଗ୍ ମାପୃ ଯୀଶୁଙ୍ଗ୍ ଆଗେ ମାହା ଆଦେଙ୍ଗ୍ ଆଡୁସ୍, ମାତର୍ ମାପୃ ଯୀଶୁଙ୍ଗ୍ ପାର୍ତି କିଜି ହାଃତି ମାନାୟାର୍ ଆରେରଗ ଜିବୁନ୍ଆଜି ଆଗେ ମାହାଆନାର୍। 16 ମାତର୍ ମାପୃ ଯୀଶୁ ନିଜେ ଆଦେସ୍ ହିଜି ସରଗ୍ତାଙ୍ଗ୍ ପୁର୍ତିତାକେ ୱାନିହିଙ୍ଗ୍, ମାନାୟାର୍ ଈଶ୍ୱରତି ମରି ବାଜା ଆରେ ଦୁତ୍ତି ର କାଟ୍ ୱେନାର୍, ହେପାଦ୍ନା ଖ୍ରୀଷ୍ଟଙ୍ଗ୍ ପାର୍ତି କିଜି ହାଃତାକାର୍ ଆରେରଗ ପାର୍ତୁମ୍ ଜିବୁନ୍ ଆନାର୍। 17 ତାପାଚେ ଆସେଙ୍ଗ୍ ଏଚେଜାଣ୍ ଜିବୁନ୍ ମାନ୍ଗାନାସ୍, ମାପୃ ଯୀଶୁଙ୍ଗ୍ ମାହା ଆଦେଙ୍ଗ୍ ଆସେଙ୍ଗ୍ ହେୱାର୍ ହୁଦାଙ୍ଗ୍ ବାଦାଡ଼ାତାଙ୍ଗ୍ ବାଦାଡ଼୍ଜପି ହାନାସ୍, ଆରେ ଆସେଙ୍ଗ୍ ମାପୃ ଯୀଶୁ ହୁଦାଙ୍ଗ୍ ମାହାଆଜି ୱିଜୁଦିନ୍ କାଜିଙ୍ଗ୍ ମାନାସ୍। 18 ଲାଗିଙ୍ଗ୍ ଇ ୱିଜୁ କାତା ୱେଚ୍ଚି ଜାର୍-ଜାର୍ବିତ୍ରେ ଏପେଙ୍ଗ୍ ସାସ୍ ଆଜି ମାନାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation