୧ ଥେସଲନୀକିୟ 3 - New Testament in Pengo Parja Languageପାଉଲ ତିମତିଙ୍ଗ୍ ପକ୍ତି କାତା 1 ପାଉଲ ଆରେ ସିଲା ଥେସଲନିକିୟ ସହର୍ନି ମାନାୟାରିଙ୍ଗ୍ ହୁଡ଼୍ୱାଦାଙ୍ଗ୍ ମାଞ୍ଜେଙ୍ଗ୍ ଆଡ୍ୱାତାର୍, ଆରେ ହେୱାର୍ ଏଥେନ୍ସ୍ ସହର୍ତାକେ ମାଚାର୍। 2 ମାତର୍ ଆନେଙ୍ଗ୍ ପାଉଲ ତିମତିତିଙ୍ଗ୍ ମିତାକେ ପକ୍ତାତାପ୍। ହେୱାନ୍ ମା ହୁଦାଙ୍ଗ୍ ମାହାଆଜି ଈଶ୍ୱର କାମାୟ୍ କିନାନା, ହେୱାନ୍ ମା ଟଣ୍ଡେନ୍ ଲେକେ ଯୀଶୁ ଖ୍ରୀଷ୍ଟତି ହାର୍ଦିକାବୁର୍ ଶୁଣାୟ୍ କିନାନା। ହେୱାନ୍ ମିଙ୍ଗେଙ୍ଗ୍ ଖ୍ରୀଷ୍ଟଙ୍ଗ୍ ବେସି ପାର୍ତି କିଦେଙ୍ଗ୍ ସାଇଜ କିଦ୍ନାନ୍, ଆରେ ତାଙ୍ଗେଙ୍ଗ୍ ପାର୍ତି କିଜି ମାଞ୍ଜେଙ୍ଗ୍ ହେୱାନ୍ ମିଙ୍ଗେଙ୍ଗ୍ ସାସ୍ ହିଦ୍ନାନ୍। 3 ଏପେଙ୍ଗ୍ ଦୁଃକ୍ କଷ୍ଟ ପାୟାଆତିସ୍ ପା ଖ୍ରୀଷ୍ଟଙ୍ଗ୍ ପିହ୍ମାଟ୍, ଇନେସ୍କି ଏପେଙ୍ଗ୍ ପୁଚାଦେର୍ନା ଯେ, ଆସେଙ୍ଗ୍ ଦୁଃକ୍ କଷ୍ଟ ପାୟାଆନି ଦର୍କାର୍, ହେଦାଙ୍ଗ୍ ଈଶ୍ୱର ଇଚା। 4 ଏଚେକାଡ଼୍ଦ ଆପେଙ୍ଗ୍ ମିହୁଦାଙ୍ଗ୍ ମାଚାପ୍, ହେପାଦ୍ନା ଆପେଙ୍ଗ୍ ମିଙ୍ଗେଙ୍ଗ୍ ଜାଗ୍ରତ୍ ଆଦେଙ୍ଗ୍ ୱେଚ୍ଚି ମାନ୍ଞ୍ଚାପ୍। ଆସେଙ୍ଗ୍ ଦୁଃକ୍ କଷ୍ଟ ପାୟା ଆଦେଙ୍ଗ୍ ଆନାତ୍, ଆରେ ଏପେଙ୍ଗ୍ ପୁଚାଦେର୍ନା ଯେ, ହେଲେକେ ହେଦାଙ୍ଗ୍ ଗଟାଆନାତା। 5 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍, ଏପେଙ୍ଗ୍ ଖ୍ରୀଷ୍ଟତାକେ ବେସି ପାର୍ତି କିନାଦେରା କି ଆକାୟ୍ ଇଞ୍ଜି ପୁଞ୍ଜେଙ୍ଗ୍ ତିମତିତିଙ୍ଗ୍ ମିତାକେ ପକ୍ତାତାଙ୍ଗ୍। ଇନେସ୍କି ଆନେଙ୍ଗ୍ ପାଣ୍ଡ୍ରାଆଜି ମାଚାଙ୍ଗ୍ ଯେ, ଶୟତାନ୍ ମାନାୟାରିଙ୍ଗ୍ ପରିକ୍ଷା କିନାତା, ହେଦାଙ୍ଗ୍ କାଜିଙ୍ଗ୍ ମିଙ୍ଗେଙ୍ଗ୍ ପରିକ୍ଷା କିଜି ମାଞ୍ଜ୍ନାତ୍, ଆରେ ମା କିତି କଷ୍ଟ କାମାୟ୍ ବେକାର୍ ଆନାତ୍। ତିମତି ପାଉଲତିଙ୍ଗ୍ ସାସ୍ ହିନି କାତା 6 ତିମତି ନଙ୍ଗୟ୍ ମିବେତାଙ୍ଗ୍ ମା ତାକେ ଲେଉଟା ଆଜି ୱାଜି ୱେଚ୍ଚାନ୍ ଯେ, ଆପେଙ୍ଗ୍ ଇନେସ୍ ହୁଡ଼୍ଦେଙ୍ଗ୍ ଇଚା କିଜି ମାଚାପ୍, ଏପେଙ୍ଗ୍ ହେଲେକେ ପାର୍ତି ଆରେ ଜାର୍-ଜାର୍ବିତ୍ରେ ଲାଡ୍ କିନାଦେରା। ଆପେଙ୍ଗ୍ ୱାତାକା ଏତ୍କିଜି ଏପେଙ୍ଗ୍ ମାଙ୍ଗେଙ୍ଗ୍ ହୁଡ଼୍ଦେଙ୍ଗ୍ ଇଚା କିନାଦେରା, ହେଲେକେ ଆପେଙ୍ଗ୍ ପା ମିଙ୍ଗେଙ୍ଗ୍ ହୁଡ଼୍ଦେଙ୍ଗ୍ ବେସି ଇଚା କିନାପା। 7 ହେଦାଙ୍ଗ୍ କାଜିଙ୍ଗ୍ ଏ ଟଣ୍ଡାର୍କାଦେର୍, ମାନାୟାର୍ ମାଙ୍ଗେଙ୍ଗ୍ ଦୁଃକ୍ କଷ୍ଟ ହିତ୍ତିସ୍ ପା, ଏପେଙ୍ଗ୍ ଖ୍ରୀଷ୍ଟଙ୍ଗ୍ ନଙ୍ଗୟ୍ ପାତେକ୍ ବେସି ପାର୍ତି କିନାଦେରା ଇଞ୍ଜି ତିମତି ମାଙ୍ଗେଙ୍ଗ୍ ୱେଚ୍ଚିତିଲେ। ଆପେଙ୍ଗ୍ ହେଦାଙ୍ଗ୍ ୱେନ୍ଞ୍ଜି ବେସି ୱାରିୟା ଆତାପ୍। 8 ଇଦାଙ୍ଗ୍ ପୁନି ଜିବୁନ୍ ପାୟା ଆତିଲେକେ ମାଙ୍ଗେଙ୍ଗ୍ ସାସ୍ ହିଦ୍ନାତା, ଲାଗିଙ୍ଗ୍ ଏପେଙ୍ଗ୍ ମାପୃତାକେ ୱିଜୁଦିନ୍ ପାର୍ତି କିଜି ମାନାଟ୍। 9 ଆପେଙ୍ଗ୍ ଈଶ୍ୱରତିଙ୍ଗ୍ ମି କାଜିଙ୍ଗ୍ ଇନେସ୍ କିଜି ଦନ୍ଯବାଦ୍ ହିନାପ୍, ହେଦାଙ୍ଗ୍ ଆପେଙ୍ଗ୍ ପୁନୁପା, ଇନେସ୍କି ଆପେଙ୍ଗ୍ ମି ପାର୍ତିକିନି ବିଷୟରେ ୱେନ୍ଞ୍ଜି ଈଶ୍ୱର ଆଗେ ଆପେଙ୍ଗ୍ ବେସି ୱାରିୟା ଆନାପା। 10 ଆପେଙ୍ଗ୍ ମି କାଜିଙ୍ଗ୍ ୱେଡ଼ା ନାଣା ପାର୍ତାନା କିନାପା ଯେ, ଈଶ୍ୱର ମିତାକେ ୱାଦେଙ୍ଗ୍ ମାଙ୍ଗେଙ୍ଗ୍ ସାଇଜ କିଦ୍ନାତ୍। ମିଙ୍ଗେଙ୍ଗ୍ ଦର୍କାର୍ଆନି ବିଷୟରେ ହିକ୍ଷା ହିଦ୍ନାପ୍, ଆରେ ଏପେଙ୍ଗ୍ ଖ୍ରୀଷ୍ଟତାକେ ପୁରା-ପୁରି ପାର୍ତି କିନାଦେର୍। 11 ଆପେଙ୍ଗ୍ ମିତାକେ ବେଗି ୱାଦେଙ୍ଗ୍ ମା ଆବା ଈଶ୍ୱର ଆରେ ମାପୃ ଯୀଶୁ ମାଙ୍ଗେଙ୍ଗ୍ ସାଇଜ କିଦେର୍। 12 ଆରେ ମିଙ୍ଗେଙ୍ଗ୍ ଆପେଙ୍ଗ୍ ଇନେସ୍ କିଜି ବେସି ଲାଡ୍ କିଦ୍ନାପା, ହେଲେକେ ଏପେଙ୍ଗ୍ ଜାର୍-ଜାର୍ବିତ୍ରେ ବେସି ଲାଡ୍ କିଦେଙ୍ଗ୍ ମାପୃ ମିଙ୍ଗେଙ୍ଗ୍ ଆଦିକ୍ ସାଇଜ କିଦେତ୍। 13 ଆପେଙ୍ଗ୍ ପାର୍ତାନା କିନାପା ଯେ, ମା ମାପୃ ଯୀଶୁ ଖ୍ରୀଷ୍ଟ ଆରେରଗ ତା ସାଦୁ ମାନାୟାର୍ ହୁଦାଙ୍ଗ୍ ୱାନାନ୍, ଆରେ ଆସେଙ୍ଗ୍ ଈଶ୍ୱର ମୁମ୍ଦ ନିଲ୍ତିହିଙ୍ଗ୍, ଖ୍ରୀଷ୍ଟ ମାଙ୍ଗେଙ୍ଗ୍ ସାସ୍, ପବିତ୍ର ଆରେ ଦସ୍ ହିଲି ମାନାୟ୍ କିଦ୍ନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation