୧ ଥେସଲନୀକିୟ 2 - New Testament in Pengo Parja Languageଥେସଲନିକିୟ ସହରତାକେ ପାଉଲ ହେବାକିତାନ୍ 1 ଏ ଟଣ୍ଡାର୍କାଦେର୍, ନିଜେ ପୁଚାଦେର୍ନା ଯେ, ଆପେଙ୍ଗ୍ ମି ଲାଗାୟ୍ ୱାନାକା ପାଙ୍ଗ୍ୱା ଆୱାତାତ୍ନା। 2 ମାତର୍ ଆପେଙ୍ଗ୍ ମିତାକେ ୱାନି ଆଗେ ଫିଲିପ ସହର୍ତାକେ ଦୁଃକ୍ ଆରେ କଷ୍ଟ ପାୟାଆଜି ମାଚିସ୍ ପା, ଈଶ୍ୱର ମାଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ସାସ୍ ହିତ୍ତାନ୍। ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ମିଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ସାସ୍ କିତାପ୍। 3 ଲାଗିଙ୍ଗ୍ ଏପେଙ୍ଗ୍ ପୁନାଦେରା ଯେ, ଆପେଙ୍ଗ୍ ମିଙ୍ଗେଙ୍ଗ୍ ଟକାୟ୍ କିଦେଙ୍ଗ୍, କି ମିଚ୍ ହିକ୍ଷା ଆରେ ପୁସ୍ରାଇ କିଦେଙ୍ଗ୍ ୱାୱାତାପ୍ନା। 4 ଈଶ୍ୱର ମାଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ଟିକ୍ ମାନାୟ୍ ଇଞ୍ଜି ବାଚି କିତ୍ତାନ୍ନା। ହେଲେକେ ଆପେଙ୍ଗ୍ ଶୁଣାୟ୍ କିନାପା। ଆପେଙ୍ଗ୍ ମାନାୟାରିଙ୍ଗ୍ ସାର୍ଦା କିନି କାଜିଙ୍ଗ୍ ହାର୍ଦିକାବୁର୍ ଶୁଣାୟ୍ କିଉପା, ମାତର୍ ମା ଈଶ୍ୱରତିଙ୍ଗ୍ ସାର୍ଦା କିନି କାଜିଙ୍ଗ୍ କିନାପା। ଇନେସ୍କି ହେୱାନ୍ ମା ଗରବ୍ନି ଇଚାତାଙ୍ଗ୍ ପରିକ୍ଷା କିଦ୍ନାନ୍। 5 ଏପେଙ୍ଗ୍ ପା ପୁଚାଦେର୍ନା ଯେ, ଆପେଙ୍ଗ୍ ମିଙ୍ଗେଙ୍ଗ୍ ସାର୍ଦା କିଦ୍ଦେଙ୍ଗ୍ ହାର୍ ଇଞ୍ଜି ୱେଚ୍ଚାୱାତାପ୍ନା। ଆରେ ଆପେଙ୍ଗ୍ ମିବେତାଙ୍ଗ୍ ଡାବୁଙ୍ଗ୍ ପାୟାଆନି ଆହା କାଜିଙ୍ଗ୍ ଜାର୍ତିଙ୍ଗ୍ ଚଞ୍ଜ୍ଜିୟା ଆୱାତାପ୍ନା, ହେଦାଙ୍ଗ୍ ଈଶ୍ୱର ସାକି ମାନାତ୍। 6 ଆପେଙ୍ଗ୍ ଖ୍ରୀଷ୍ଟଙ୍ଗ୍ ବାଚିକିତି ଚେଲା, ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ମିଙ୍ଗେଙ୍ଗ୍ ହାର୍ କିଜି ଦେକାଶୁଣା କିଦ୍ଦେଙ୍ଗ୍ ଦାବି କିତ୍ତାପ୍ମା। ମାତର୍ ଆପେଙ୍ଗ୍ ହେଲେକେ କିୱାତାପ୍ନା, ଆରେ ମିବେତାଙ୍ଗ୍ କି ଜେକନିକାର୍ତାଙ୍ଗ୍ ସନ୍ମାନ୍ ପାୟା ଆଦେଙ୍ଗ୍ ଇଚା କିୱାତାପ୍ନା। 7 ମାତର୍ ର ଆୟା ତା ମେହିଙ୍ଗ୍ ଜାତୁନ୍ କିନାତ୍, ତା ଲେକେ ଆପେଙ୍ଗ୍ ମିଙ୍ଗେଙ୍ଗ୍ ଜାତୁନ୍ କିତ୍ତାପ୍ନା, 8 ଆପେଙ୍ଗ୍ ମିଙ୍ଗେଙ୍ଗ୍ ଲାଡ୍ କିଦ୍ନାପା। ଲାଗିଙ୍ଗ୍ ଈଶ୍ୱରତି ହାର୍ଦିକାବୁର୍ ଜାଣି ୱେଚ୍ଚାୱାତାପ୍ନା, ମାତର୍ ଜାର୍ ଜିବୁନ୍ ପା ହିଦେଙ୍ଗ୍ ଇଚା କିନାପା। 9 ଏ ଟଣ୍ଡାର୍କାଦେର୍, ଆପେଙ୍ଗ୍ କିଜିମାଚି କଷ୍ଟ କାମାୟ୍ ୱିଜୁ ମିଙ୍ଗେଙ୍ଗ୍ ମାନ୍ତ ମାନାତ୍, ଆପେଙ୍ଗ୍ ମି ବିତ୍ରେ ଇନେରିଙ୍ଗ୍ ହରିଆଣ୍ କିଦ୍ୱେଦେଙ୍ଗ୍, ମାଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ କାଜିଙ୍ଗ୍ ୱେଡ଼ା ନାଣା କଷ୍ଟକିଜି ମାଚାପ୍। ଆରେ ଈଶ୍ୱରତି ହାର୍ଦିକାବୁର୍ ମିଙ୍ଗେଙ୍ଗ୍ ଶୁଣାୟ୍ କିତ୍ତାପ୍। 10 ହେଦାଙ୍ଗ୍ ଈଶ୍ୱର ଆରେ ଏପେଙ୍ଗ୍ ସାକି ମାନାଦେର୍, ଆପେଙ୍ଗ୍ ଈଶ୍ୱର ଇଚା ଆନୁସାରେ ପବିତ୍ର, ଦରମ୍ ଆରେ ୱିଜୁ ସତ୍ କାମାୟ୍ କିଜି ମାଚାପ୍। 11 ଏପେଙ୍ଗ୍ ପୁଚାଦେର୍ନା ଯେ, ର ଆବା ଇନେସ୍କି ତା ମେହିଙ୍ଗ୍ ବ୍ଯବହାର୍ କିନାନ୍, ହେଲେକେ ଆପେଙ୍ଗ୍ ମିଙ୍ଗେଙ୍ଗ୍ ହିକ୍ଷା ଆରେ ସାସ୍ ହିଜି ଗୁୱାରି କିଜି ମାନ୍ଞ୍ଚାପ୍। 12 ଆପେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାପା, ଆରେ ସାସ୍ ହିଦ୍ନାପା। ଇନେସ୍କି ଈଶ୍ୱର ମିଙ୍ଗେଙ୍ଗ୍ ତା ରାଜିତାକେ ଗୌରବ ମାନାୟ୍ ଆନି କାଜିଙ୍ଗ୍ ବାଚି କିତ୍ତାନ୍ନା, ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ହେୱାନ୍ ଇଚା କିତିଲେକେ ଯିବୁନ୍ କାଟିକିୟାଟ୍। 13 ଆରେ ହେଦାଙ୍ଗ୍ ଆପେଙ୍ଗ୍ ୱିଜୁଦିନ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାପା ଯେ, ଏଚେପାଦ୍ନା ଏପେଙ୍ଗ୍ ମା ହାର୍ଦିକାବୁର୍ତିଙ୍ଗ୍ ଆସ୍ତାଦେର୍। ହେପାଦ୍ନା ଏପେଙ୍ଗ୍ ମାନାୟାର୍ ୱେଚ୍ଚି କାତାତିଙ୍ଗ୍ ଆସ୍ତିଲେକେ ଆହ୍ୱାତାଦେର୍ନା। ମାତର୍ ଆପେଙ୍ଗ୍ ୱେଚ୍ଚି ହାର୍ଦିକାବୁର୍ତିଙ୍ଗ୍ ଈଶ୍ୱର ନିଜେ ୱେଚ୍ଚାନ୍ ଇଞ୍ଜି ଆସ୍ତାଦେର୍ ଆରେ ହେଦାଙ୍ଗ୍ ସତ୍। ଏପେଙ୍ଗ୍ ଯୀଶୁଙ୍ଗ୍ ପାର୍ତି କିତାଦେର୍, ଆରେ ଈଶ୍ୱର ହିତ୍ତି ହାର୍ଦିକାବୁର୍ ମି ବିତ୍ରେ କାମାୟ୍ କିନାତା। 14 ହେ ଟଣ୍ଡାର୍କାଦେର୍, ଯିହୁଦା ଜିଲ୍ଲାତାକେ ମାନି ଈଶ୍ୱର ମଣ୍ଡ୍ଲିନି ପାର୍ତିକିନି ମାନୟାର୍ ଯୀଶୁ ଖ୍ରୀଷ୍ଟତାକେ ପାର୍ତିକିନି କାଜିଙ୍ଗ୍। ଇନେସ୍ ହେୱାର୍ ତା ଜାର୍ ଯିହୁଦି ଜାତିନି ମାନାୟାର୍ତାଙ୍ଗ୍ ଦୁଃକ୍ କଷ୍ଟ ପାୟାଆଜି ମାଚାର୍, ହେଲେକେ ଏପେଙ୍ଗ୍ ପା ଜାର୍ ଜାତିନି ମାନାୟାର୍ତାଙ୍ଗ୍ ଦୁଃକ୍ କଷ୍ଟ ପାୟା ଆତାଦେର୍ନା। 15 ହେ ଯିହୁଦି ଜାତିନି ମାନାୟାର୍ ମାପୃ ଯୀଶୁଙ୍ଗ୍, ଆରେ ଭବିଷ୍ଯତବକ୍ତାରିଙ୍ଗ୍ ପା ମାର୍ନେ ଅସ୍ତି ମାଚାର୍, ନଙ୍ଗୟ୍ ହେୱାର୍ ମାଙ୍ଗେଙ୍ଗ୍ ପା ଦୁଃକ୍ କଷ୍ଟ ହିଜି ପେସ୍ଦାତାର୍। ହେୱାର୍ ଈଶ୍ୱରତିଙ୍ଗ୍ ରିସା କିତିଲେକେ କାମାୟ୍ କିତାର୍, ଆରେ ୱିଜାର୍ ମାନାୟାରିଙ୍ଗ୍ ବିରଦ୍ କିତାର୍। 16 ଇନେସ୍କି ବିନ୍ଜାତିନି ମାନାୟାର୍ ରକ୍ଷା ପାୟାଆମେର୍ ଇଞ୍ଜି ହାର୍ଦିକାବୁର୍ ଶୁଣାୟ୍ କିତିଲେ, ହେୱାର୍ ମାଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍ନାରା। ହେଲେକେ ହେୱାର୍ ପାପ୍ କିଜି ମାଚାର୍, ସେସ୍ ୱେଡ଼ାଙ୍ଗ୍ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିଦେଙ୍ଗ୍ କାତାନ୍ନା। ପାଉଲ ଥେସଲନିକିୟ ସହର୍ନି ପାର୍ତି କିନାକାରିଙ୍ଗ୍ ମାହା ଆଦେଙ୍ଗ୍ ଇଚା କିଜି ମାଚାନ୍ 17 ଏ ଟଣ୍ଡାର୍କାଦେର୍, ଆପେଙ୍ଗ୍ ମିବେତାଙ୍ଗ୍ ଦେହା ମାଚିସ୍ ପା ମିଙ୍ଗେଙ୍ଗ୍ ଆପେଙ୍ଗ୍ ଏତ୍କିଜି ମାଞ୍ଜ୍ନାପ୍, ଆରେ ମି ଲାଗାୟ୍ ଆରେରଗ ୱାଦେଙ୍ଗ୍ ଉପାୟ୍ କିନାଙ୍ଗା। ଇନେସ୍କି ଆପେଙ୍ଗ୍ ମିଙ୍ଗେଙ୍ଗ୍ ହୁଡ଼୍ଦେଙ୍ଗ୍ ଇଚା କିନାପା। 18 ହେଦାଙ୍ଗ୍ ଆପେଙ୍ଗ୍ ମି ଲାଗାୟ୍ ୱାଦେଙ୍ଗ୍ ମାନ୍ କିଜି ମାଚାପ୍, ବିଶେସ୍ କିଜି ଆନେଙ୍ଗ୍ ପାଉଲ ବାରମ୍-ବାରମ୍ ୱାଦେଙ୍ଗ୍ ଉପାୟ୍ କିଜି ମାଚାଙ୍ଗ୍, ମାତର୍ ଶୟତାନ୍ ମାଙ୍ଗେଙ୍ଗ୍ ଦୁଃକ୍ ହିତ୍ତାତ୍। 19 ଇନେସ୍କି ମା ଯୀଶୁ ଖ୍ରୀଷ୍ଟ ଏଚେକାଡ଼୍ଦ ପୁର୍ତିତାକେ ୱାନାନ୍ ତା ଆଗେ ଏପେଙ୍ଗ୍ ମା ଆହା, ସାର୍ଦା ଆରେ ମା ସନ୍ମାନ୍ନି ମୁକୁଟ୍ଲେକେ। 20 ଏପେଙ୍ଗ୍ ମା କାଜିଙ୍ଗ୍ ଗୌରବ ଆରେ ସନ୍ମାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation