୧ ପିତର 4 - New Testament in Pengo Parja Languageଈଶ୍ୱର କାଜିଙ୍ଗ୍ ଜିବୁନ୍ କାଟିକିନି ବିଷୟ 1 ଲାଗିଙ୍ଗ୍ ଖ୍ରୀଷ୍ଟ ଏଚେପାଦ୍ନା ପୁର୍ତିତାକେ ମାଚାନ୍ ହେୱାନ୍ ତା ଗାଗାଡ଼୍ତାକେ ଦୁଃକ୍ କଷ୍ଟ ପାୟାଆଜି ମାଚାନ୍। ହେଲେକେ ଏପେଙ୍ଗ୍ ପା ମି ମାନ୍ ପା ଖ୍ରୀଷ୍ଟ ମାନ୍ଲେକେ କିନି ଦର୍କାର୍ ଆରେ ଦୁଃକ୍ କଷ୍ଟ ପାୟାଆନି କାଜିଙ୍ଗ୍ ରେଡି ଆଜି ମାନି ଦର୍କାର୍। ଇନେସ୍କି ଯଦି ଏପେଙ୍ଗ୍ ଖ୍ରୀଷ୍ଟ କାଜିଙ୍ଗ୍ ଦୁଃକ୍ କଷ୍ଟ ପାୟା ଆଦେଙ୍ଗ୍ ଇଚା କିନାଦେରା, ଲାଗିଙ୍ଗ୍ ଏପେଙ୍ଗ୍ ପାପ୍ କିୱେଦେଙ୍ଗ୍ ଇଚା କିତାଦେର୍ନା। 2 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ମି ୱିଜୁ ଜିବୁନ୍ ପୁର୍ତିତାକେ କରାପ୍ କାମାୟ୍ କିଜି ଜିବୁନ୍ କାଟି କିଉତ୍, ମାତର୍ ଈଶ୍ୱର ଇଚାକିତି କାମାୟ୍ ଏପେଙ୍ଗ୍ କିନାଦେର୍। 3 ଏପେଙ୍ଗ୍ ଆଗେ ବିନ୍ଜାତିନି ମାନାୟାର୍ଲେକେ ୱାରି କିଜି ମାଚାଦେର୍। ହେୱାର୍ ୱାରି କାମାୟ୍ କିଜି ମାଚାର୍, ହେୱାରିଙ୍ଗ୍ ଦାରି କାମାୟ୍ କିନି ଇଚା ମାଚାତ୍, ହେୱାର୍ ବଜି କିଜି ମାଚାର୍, କାଲିଙ୍ଗ୍ ଉଣ୍ଜି ମାଚାର୍, ପଶୁଙ୍ଗ୍ଲେକେ ବ୍ୟବହାର୍ କିଜି ମାଚାର୍ ଆରେ ମୁର୍ତି ପୁଜା କିନାରା। ଇମ୍ଣାକା କି ଈଶ୍ୱର ଗିଣ୍ କିନାନା। 4 ହେଦାଙ୍ଗ୍ କାଜିଙ୍ଗ୍ ମି ଆଗେନି ସାଙ୍ଗର୍ ମିଙ୍ଗେଙ୍ଗ୍ ହୁଡ଼୍ଜି କାବା ଆନାରା। ଆରେ ମି ବିଷୟରେ କରାପ୍ କାତା ଇନାରା ଇନେସ୍କି ଏପେଙ୍ଗ୍ ତା ହୁଦାଙ୍ଗ୍ ମାହାଆଜି କରାପ୍ କାମାୟ୍ କିଉଦେରା। 5 ମାତର୍ ରଦିନ୍ ୱାନାତ୍ ହେୱାର୍ ୱିଜାକାର୍ ଈଶ୍ୱର ମୁମ୍ଦ ନିଲ୍ନାର୍ ଆରେ ଈଶ୍ୱର ହେୱାରିଙ୍ଗ୍ ବିଚାର୍ କିନାନ୍। ଈଶ୍ୱର ହେୱାରିଙ୍ଗ୍ ରୱା-ରୱାରିଙ୍ଗ୍ ୱେନ୍ବାନାନ୍ ଏପେଙ୍ଗ୍ ପୁର୍ତିତାକେ ମାଚିହିଙ୍ଗ୍ ଇନା-ଇନା କାମାୟ୍ କିଜି ମାଚାଦେର୍। ଈଶ୍ୱର ୱିଜୁ ହାଃତାକାରିଙ୍ଗ୍ ଆରେ ଜିବୁନ୍ ମାନି ମାନାୟାରିଙ୍ଗ୍ ବିଚାର୍ କିନାନ୍। 6 ଇନେସ୍ ମାନାୟାର୍ ଖ୍ରୀଷ୍ଟ ହାର୍ଦିକାବୁର୍ତିଙ୍ଗ୍ ୱେଚି ପାଚେ ପା ତା ଗାଗାଡ଼୍ ହାଃନାତା, ହେଲେକେ ହେୱାରିଙ୍ଗ୍ ପା ଈଶ୍ୱର ବିଚାର୍ କିଜି ମାଚାନ୍। ମାତର୍ ନଙ୍ଗୟ୍ ହେୱାର୍ ଆତ୍ମା ଈଶ୍ୱର ହୁଦାଙ୍ଗ୍ ୱିଜୁଦିନ୍ କାଜିଙ୍ଗ୍ ଜିବୁନ୍ ମାନ୍ଗାନାତ୍। 7 ଇ ପୁର୍ତି ବେଗି ସେସ୍ ଆନାତ୍ଦେ। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ମି ମାନ୍ତିଙ୍ଗ୍ କିଲେର୍ କିୟାଟ୍ ଆରେ ପାର୍ତାନା କିଜି ଜାର୍ତିଙ୍ଗ୍ କଣ୍ଟ୍ରୁଲ୍ କିୟାଟ୍। 8 ଆନେଙ୍ଗ୍ ମି କାଜିଙ୍ଗ୍ ର ମୁକ୍ୟ ବିଷୟ ୱେଚ୍ଚାନାଙ୍ଗା, ଏପେଙ୍ଗ୍ ଜାର୍-ଜାର୍ବିତ୍ରେ ସତ୍ ଲାଡ୍ କିବା ଆଡ। ଇନେସ୍କି ଯଦି ମାନାୟାରିଙ୍ଗ୍ ଲାଡ୍ କିନାଦେର୍, ଲାଗିଙ୍ଗ୍ ଏପେଙ୍ଗ୍ ହେୱାର୍ କିତି ୱିଜୁ ପାପ୍ତିଙ୍ଗ୍ ଏପେଙ୍ଗ୍ କେମା କିଦେଙ୍ଗ୍ ୱିଜୁନାଞ୍ଜିଙ୍ଗ୍ ରେଡି ଆଜି ମାନାଦେର୍। 9 ଯଦି ଇନେର୍ ମିଞ୍ଜ ମାଞ୍ଜେଙ୍ଗ୍ ଇଚା କିନାନା, ଲାଗିଙ୍ଗ୍ ଏପେଙ୍ଗ୍ ୱାରିତାଙ୍ଗ୍ ତାଙ୍ଗେଙ୍ଗ୍ ଇଞ୍ଜ ହିର୍ବାଟ୍ ଚିଞ୍ଜେଙ୍ଗ୍ କାଦି ହିୟାଟ୍ ଆରେ ମାଞ୍ଜେଙ୍ଗ୍ ବାହା ହିୟାଟ୍। 10 ୱିଜାର୍ ମାନାୟାରିଙ୍ଗ୍ ଈଶ୍ୱର ଦୟାକିଜି ରଞ୍ଜି-ରଞ୍ଜି ଦାନ୍ ହିତ୍ତାନ୍ନା, ଆରେ ଜେକନିକାରିଙ୍ଗ୍ ସାଇଜ କିଦେଙ୍ଗ୍ ହେ ଦାନ୍ତିଙ୍ଗ୍ ବ୍ୟବହାର୍ କିୟାଟ୍। ହେୱାର୍ ଈଶ୍ୱର ହାର୍ ଦାସ୍ ଆଜିମାଚି କାଜିଙ୍ଗ୍ ଈଶ୍ୱର ହିତ୍ତି ୱିଜୁ ଦାନ୍ତିଙ୍ଗ୍ ହାର୍ କିଜି ବ୍ୟବହାର୍ କିନି ଦର୍କାର୍। 11 ହେଦାଙ୍ଗ୍ ଇଲେକେ, ଯଦି ଈଶ୍ୱର ମିଙ୍ଗେଙ୍ଗ୍ ଶୁଣାୟ୍ କିନି ଦାନ୍ ହିତ୍ତାନ୍ନା, ଲାଗିଙ୍ଗ୍ ଏପେଙ୍ଗ୍ ଈଶ୍ୱର ହାର୍ଦିକାବୁର୍ତିଙ୍ଗ୍ ଶୁଣାୟ୍ କିନି ଦର୍କାର୍। ଯଦି ଈଶ୍ୱର ମିଙ୍ଗେଙ୍ଗ୍ ଜେକନିକାରିଙ୍ଗ୍ ସାଇଜ କିଦେଙ୍ଗ୍ ଦାନ୍ ହିତ୍ତାନ୍ନା, ଲାଗିଙ୍ଗ୍ ଏପେଙ୍ଗ୍ ଯୀଶୁ ଖ୍ରୀଷ୍ଟ କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ହିତ୍ତି ୱିଜୁ ଶାକ୍ତିତାଙ୍ଗ୍ ହେଦାଙ୍ଗ୍ କିୟାଟ୍। ଆରେ ଏପେଙ୍ଗ୍ ୱିଜୁ ଜିନିଷ୍ କିତିସ୍ ଖ୍ରୀଷ୍ଟ କାଜିଙ୍ଗ୍ ଈଶ୍ୱର ଗୌରବ ପାୟା ଆନାନ୍, ଇନେସ୍କି ୱିଜୁ ଗୌରବ ଆରେ ଶାକ୍ତି ଈଶ୍ୱରତି ଇମ୍ଣାକା କି ୱିଜୁଦିନ୍ କାଜିଙ୍ଗ୍ ମାନ୍ଗାନାତ୍। ଆମେନ୍। ଖ୍ରୀଷ୍ଟାନ୍ ମାନାୟ୍ ଆତି କାଜିଙ୍ଗ୍ ଦୁଃକ୍ କଷ୍ଟ ପାୟାଆନି କାତା 12 ଏ ସାଙ୍ଗ କାଦେର୍, ଏପେଙ୍ଗ୍ ଖ୍ରୀଷ୍ଟ ଲକ୍ ଆତି କାଜିଙ୍ଗ୍ ଇ ଦୁଃକ୍ କଷ୍ଟ ପାୟାଆନାଦେରା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଚାନିଆ ଆମାଟ୍, ମାତର୍ ଏପେଙ୍ଗ୍ ଈଶ୍ୱରତିଙ୍ଗ୍ ହାତ୍ପା ପାର୍ତି କିନାଦେରା କି ଆକାୟ୍ ଇଞ୍ଜି ଇ ୱିଜୁ ଗଟାଆନାତା, ଏପେଙ୍ଗ୍ ଇଲେକେ ବାବିକିମାଟ୍ ଯେ ଆହା କିୱିତି ବିଷୟ ୱିଜୁ ଗଟାଆନାତା। 13 ଏପେଙ୍ଗ୍ ୱାରି କିୟାଟ୍ ଯେ, ଖ୍ରୀଷ୍ଟ ଦୁଃକ୍ କଷ୍ଟ ପାୟା ଆତିଲେକେ ଏପେଙ୍ଗ୍ ପା ପାୟାଆନାଦେରା। ଇନେସ୍କି ଖ୍ରୀଷ୍ଟ ତା ଗୌରବ ୱିଜାକାରିଙ୍ଗ୍ ପୁନିକିଦେଙ୍ଗ୍ ଏଚେପାଦ୍ନା ଆରେରଗ ୱାନାନ୍, ଏପେଙ୍ଗ୍ ଆଦିକ୍ ୱାରିୟା ଆନାଦେର୍। 14 ଏପେଙ୍ଗ୍ ଖ୍ରୀଷ୍ଟାନ୍ ଆତି କାଜିଙ୍ଗ୍ ଯଦି ମାନାୟାର୍ ମିଙ୍ଗେଙ୍ଗ୍ ଇନସ୍ତା କିଦ୍ନାର୍ ଏପେଙ୍ଗ୍ ୱାରି କିୟାଟ୍, ଇନେସ୍କି ଗୌରବ ପାୟାଆନି ଈଶ୍ୱରତି ପବିତ୍ର ଆତ୍ମା ମି ବିତ୍ରେ ମାନାତା। 15 ଯଦି ମାନାୟାର୍ ମିଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍ନାର୍, ହେଦାଙ୍ଗ୍ ମାନାୟ୍ ଅସ୍ତି କାଜିଙ୍ଗ୍, ଚରି କିତି କାଜିଙ୍ଗ୍, ଗଣ୍ଡ୍ଗଲ୍ କିତି କାଜିଙ୍ଗ୍, କରାପ୍ ଜିନିଷ୍ କିତି କାଜିଙ୍ଗ୍, ମିଙ୍ଗେଙ୍ଗ୍ ଦଣ୍ଡ୍ ହିଦ୍ମେର୍। 16 ମାତର୍ ଖ୍ରୀଷ୍ଟାନ୍ ଆତି କାଜିଙ୍ଗ୍ ଦୁଃକ୍ କଷ୍ଟ ପାୟାଆନାକା ଲାଜ୍ ଆକାୟ୍, ଏପେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିୟାଟ୍ ଇନେସ୍କି ଈଶ୍ୱର ମିଙ୍ଗେଙ୍ଗ୍ ବାଚି କିତ୍ତାନ୍ନା। 17 ଇନେସ୍କି ଖ୍ରୀଷ୍ଟ ବିଚାର୍କିନି ଦିନ୍ ଲାଗେ ୱାତାତେ, ଆରେ ହେୱାନ୍ ଖ୍ରୀଷ୍ଟାନାରିଙ୍ଗ୍ ଆଗେ ବିଚାର୍ କିନାନ୍। ଲାଗିଙ୍ଗ୍ ଏପେଙ୍ଗ୍ ବାବି କିୟାଟ୍ ଈଶ୍ୱର ହାର୍ଦିକାବୁର୍ତିଙ୍ଗ୍ ପାର୍ତି କିୱାତାକାରିଙ୍ଗ୍ କେତେକ୍ ଦଣ୍ଡ୍ ହିଉନ୍। 18 ଇନେସ୍କି ଦର୍ମ୍ ସାସ୍ତର୍ତାକେ ଇଲେକେ ଲେକାଆତାତ୍ନା। ଦର୍ମ୍ ମାନାୟାର୍ ରକ୍ଷା ପାୟା ଆଦେଙ୍ଗ୍ ଏଚେକ୍ କଷ୍ଟ ଆନାତା, ଲାଗିଙ୍ଗ୍ ଅଦରମ୍ ମାନାୟାର୍ ଆରେ ପାପିର୍ କାଜିଙ୍ଗ୍ ଉଦାର୍ ପାୟା ଆଦେଙ୍ଗ୍ ବେସି କଷ୍ଟନି ଦିନ୍ ଆନାତ୍। 19 ଲାଗିଙ୍ଗ୍ ଇମ୍ଣି ମାନାୟାର୍ ଈଶ୍ୱର ଇଚା ଅନୁସାରେ ଦୁଃକ୍ କଷ୍ଟ ପାୟାଆନାରା, ଆରେ ଟିକ୍ କାମାୟ୍ କିଜି ତାବେ ଆହା କିତାର୍ନା। ଇନେର୍ ହେୱାରିଙ୍ଗ୍ ଉବ୍ଜାଇ କିତାନ୍ନା, ଇନେସ୍କି ହେୱାନ୍ ଇନାକା ୱେଚ୍ନାନ୍ ହେଦାଙ୍ଗ୍ ହେୱାନ୍ ପୁରା କିନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation