୧ ପିତର 3 - New Testament in Pengo Parja Language

କଗ୍‌ଲେ ଆରେ ଆଣ୍ଡ୍ରେନ୍ ଜାର୍-ଜାର୍‌ବିତ୍ରେ ସନ୍‌ମାନ୍ ହିବା ଆନି ଦର୍‌କାର୍

^1-2 ଏ କଗ୍‌ଲେ କାଦେର୍, ଏପେଙ୍ଗ୍ ଜାର୍-ଜାର୍ ଆଣ୍ଡ୍ରାଙ୍ଗ୍ କାତାତିଙ୍ଗ୍ ମାନିକିଜି ମାନାଟ୍, ଲାଗିଙ୍ଗ୍ ମିବେତାଙ୍ଗ୍ ଇନେର୍ ଡକ୍ରାହି ଯଦି ଈଶ୍ୱର ହାର୍ଦିକାବୁର୍‌ତିଙ୍ଗ୍ ପାର୍ତି କିନାକାଦିଙ୍ଗ୍ ମୁନା କିନାନା। ଆରେ ଏପେଙ୍ଗ୍ ଯଦି ଈଶ୍ୱରତିଙ୍ଗ୍ ପାର୍ତି କିଜି ସତ୍ ଜିବୁନ୍ କାଟିକିଜି ମାନାଦେର୍, ଲାଗିଙ୍ଗ୍ ଏପେଙ୍ଗ୍ ଈଶ୍ୱରତିଙ୍ଗ୍ ପାର୍ତି କିୟା ଇଞ୍ଜି ଜାର୍ ଆଣ୍ଡ୍ରେନିଙ୍ଗ୍ ୱେଚ୍‌ଚେଙ୍ଗ୍ ଦର୍‌କାର୍ ଆଉତ୍। ଇନେସ୍‌କି ଏପେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତି କିନାକା ଆରେ ମିଙ୍ଗେଙ୍ଗ୍ ହାର୍ ବ୍ୟବହାର୍ କିନାକା ହୁଡ଼୍‌ଜି ହେୱାର୍ ପା ଈଶ୍ୱର ହାର୍ଦିକାବୁର୍‌ତିଙ୍ଗ୍ ପାର୍ତିକିନାର୍।

³ ଏପେଙ୍ଗ୍ ଜାର୍‌ତିଙ୍ଗ୍ ଆଦିକ୍ ହଲ୍‌ନି କାଜିଙ୍ଗ୍, ବେସି ଦାମ୍‌ନି ହନାବାନା କି, ବେସି ଦାମ୍‌ନି ହେନ୍ଦ୍ରାପାଟା ଉସ୍‌ପାମାଟ୍ ଆରେ ମି ତେମୁଲ୍‌ତିଙ୍ଗ୍ ଆଦିକ୍ ଟାଇଲ୍ କିମାଟ୍।

⁴ ମାତର୍ ତା ବାଦୁଲ୍‌ରେ ମି ବ୍ୟବହାର୍‌ତିଙ୍ଗ୍ ହୋଲି କିୟାଟ୍, ହେ ହଲ୍‌ନାକା ଇନାୱେଡ଼ାଙ୍ଗ୍ ପା ନଷ୍ଟ ଆୱି ଦରମ୍ ଆରେ ଶାନ୍ତି ଆତ୍ମା ଆରେ ହେଦାଙ୍ଗ୍ ଈଶ୍ୱର କାଜିଙ୍ଗ୍ ବେସି ଦାମ୍‌ଦି ବିଷୟ।

⁵ ଇଲେକେ କିଜି ଆକଦାଦିର୍ ୱେଡ଼ାଙ୍ଗ୍ ପବିତ୍ର କଗ୍‍ଲେକ୍ ଇଲେକେ ଈଶ୍ୱରତିଙ୍ଗ୍ ପାର୍ତି କିଜି ଆହା କିଜି ମାଚାର୍, ଆରେ ଜାର୍ ଆଣ୍ଡ୍ରାଙ୍ଗ୍ କାତା ମାନିକିଜି ଜାର୍‌ତିଙ୍ଗ୍ ହଲି କିଜି ମାଚିକ୍।

⁶ ଇନେସ୍‌ଲେକେ ସାରା ତା ଡକ୍ରାହି ଅବ୍ରାହାମ କାତାତିଙ୍ଗ୍ ମାନିକିଜି ମାଚାତ୍, ଆରେ ତାଙ୍ଗେଙ୍ଗ୍ ମାଲିକ୍ ଇଞ୍ଜି ୱେଚ୍‌ଚି ମାଚାତ୍। ଆରେ ଏପେଙ୍ଗ୍ ଯଦି ଜେକନିକାର୍ କାଜିଙ୍ଗ୍ ସାଇଜ କିନାଦେର୍ ଆରେ ଇନେର୍ ପାଣ୍ଡ୍ରୁ କିଦ୍‌ଦେଙ୍ଗ୍ ଆଡ଼୍‌ଦୁର୍, ଲାଗିଙ୍ଗ୍ ଏପେଙ୍ଗ୍ ସାରା ଗାଡ଼୍‌ହିକ୍‌ଲେକେ ଆନାଦେର୍।

⁷ ଏ ଆଣ୍ଡ୍ରା କାଦେର୍, ଏପେଙ୍ଗ୍ ଜାର୍ କଗ୍‍ଲେକାଙ୍ଗ୍ ସନ୍‌ମାନ୍ ହିୟାଟ୍, ଆରେ ଜାର୍ ଡକ୍ରିକ୍ ହୁଦାଙ୍ଗ୍ ବୁଜାମାନା ଆଜି ହାମାନ୍ ଆଜି ମାନାଟ୍। ମି ଡକ୍ରୁଦି ମିବେତାଙ୍ଗ୍ ଦୁର୍‌ବଲ୍ ଆଜି ମାନ୍‌ଗାନାତ୍, ମାତର୍ ଈଶ୍ୱର ଦୟାକିଜି ହିତ୍‌ତି ପୁନି ଜିବୁନ୍‌ନି ଦାନ୍‌ତିଙ୍ଗ୍ ମି ଡକ୍ରୁଦି ପା ମିହୁଦାଙ୍ଗ୍ ହାମାନ୍ ଅଦିକାର୍ ପାୟାଆନାତ୍। ଲାଗିଙ୍ଗ୍ ଏପେଙ୍ଗ୍ ମି ଡକୃଦିକାଙ୍ଗ୍ ସନ୍‌ମାନ୍ ହୁଦାଙ୍ଗ୍ ବ୍ୟବହାର୍ କିୟାଟ୍ ଆରେ ଈଶ୍ୱର ମି ପାର୍ତାନାତିଙ୍ଗ୍ ୱେନାନ୍।

ୱିଜୁ ଖ୍ରୀଷ୍ଟାନ୍ ମାନାୟାର୍ ଦୁଃକ୍ କଷ୍ଟ ପାୟାଆନି କାତା

⁸ ସେସ୍ ୱେଡ଼ାଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍‌ଚାନାଙ୍ଗା ଯେ, ୱିଜାକାଦେର୍ ର ମାନ୍ କିନି ଦର୍‌କାର୍। ଏପେଙ୍ଗ୍ ଜାର୍-ଜାର୍ କାଜିଙ୍ଗ୍ କାନିକରମ୍‌ ଆନି ଦର୍‌କାର୍ ଆରେ ର କୁଟୁମ୍‌ନି ମାନାୟାର୍‌ଲେକେ ଜାର୍-ଜାର୍‌ବିତ୍ରେ ଲାଡ୍ କିୟାଟ୍, ଏପେଙ୍ଗ୍ ଜାର୍-ଜାର୍‌ବିତ୍ରେ ଦୟା କିୟାଟ୍ ଆରେ ଦରମ୍ ଆଡ।

⁹ ଯଦି ମି ବିରୁଦ୍‌ତାକେ ଇନେର୍ ମି ଜିନିଷ୍‌ତିଙ୍ଗ୍ ନଷ୍ଟ କିନାନ୍, ଲାଗିଙ୍ଗ୍ ଏପେଙ୍ଗ୍ ତା ଜିନିଷ୍‌ତିଙ୍ଗ୍ ଉଲ୍‌ଟା ନଷ୍ଟ କିମାଟ୍, ଆରେ ଇନେର୍ ଯଦି ମିଙ୍ଗେଙ୍ଗ୍ ଇନସ୍ତା କିଦ୍‌ନାନ୍ ଆରେ ଏପେଙ୍ଗ୍ ତାଙ୍ଗେଙ୍ଗ୍ ଉଲ୍‌ଟା ଇନସ୍ତା କିମାଟ୍। ମାତର୍ ଏପେଙ୍ଗ୍ ହେୱାରିଙ୍ଗ୍ ଆଶ୍ରିବାଦ୍ କିୟାଟ୍, ଇନେସ୍‌କି ଈଶ୍ୱର ମିଙ୍ଗେଙ୍ଗ୍ ବାଚି କିତ୍‌ତାନ୍‌ନା, ଯଦି ଏପେଙ୍ଗ୍ ହେଲେକେ କିନାଦେର୍ ଈଶ୍ୱର ମିଙ୍ଗେଙ୍ଗ୍ ଆଶ୍ରିବାଦ୍ କିଦ୍‌ନାନ୍।

¹⁰ ଇନେସ୍‌କି ସାସ୍ତର୍‌ତାକେ ଇଲେକେ ଲେକାଆତାତ୍‌ନା, “ଯଦି ଏପେଙ୍ଗ୍ ୱିଜୁନାଞ୍ଜିଙ୍ଗ୍‌ ୱାରି କିଦେଙ୍ଗ୍ ଇଚା କିନାଦେର୍ ଆରେ ୱିଜୁନାଞ୍ଜିଙ୍ଗ୍‌ ୱାରିନି ଦିନ୍ ହୁଡ଼୍‌ଦେଙ୍ଗ୍ ଇଚା କିନାଦେରା, ଲାଗିଙ୍ଗ୍ ଏପେଙ୍ଗ୍ କରାପ୍ ବେଣ୍ ଆରେ ମିଚ୍ କାତା ୱେଚ୍‌ମାଟ୍।

¹¹ ଏପେଙ୍ଗ୍ କରାପ୍ କାମାୟ୍ କିନାକା ବନ୍ଦ୍ କିୟାଟ୍ ଆରେ ହାର୍ କାମାୟ୍ କିୟାଟ୍। ଏପେଙ୍ଗ୍ ଶାନ୍ତିତାଙ୍ଗ୍ ମାଞ୍ଜେଙ୍ଗ୍ ଆରେ ଶାନ୍ତି କିଦେଙ୍ଗ୍ ଉପାୟ୍ କିୟାଟ୍।”

¹² ଟିକ୍ କାମାୟ୍ କିନାକାରିଙ୍ଗ୍ ମାପୃ ହୁଡ଼୍‌ନାତା, ଆରେ ହେୱାର୍ ପାର୍ତାନା ୱେଞ୍ଜେଙ୍ଗ୍ କାତାନ୍‌ନା। ମାତର୍ କରାପ୍ କାମାୟ୍ କିନାକାରିଙ୍ଗ୍ ଈଶ୍ୱର ବିରଦ୍ କିନାନ୍।

¹³ ଏପେଙ୍ଗ୍ ବେସି ଇଚାତାଙ୍ଗ୍ ହାର୍ କାମାୟ୍ କିତିସ୍ ଇନେର୍ ପା ମିଦି ଲସ୍ କିଦୁର୍।

¹⁴ ମାତର୍ ଏପେଙ୍ଗ୍ ଯଦି ହାର୍ କାମାୟ୍ କିନି କାଜିଙ୍ଗ୍ ଦୁଃକ୍ କଷ୍ଟ ପାୟାଆନାଦେରା, ଲାଗିଙ୍ଗ୍ ଏପେଙ୍ଗ୍ ଚିନ୍ତା କିମାଟ୍ କି, ବ୍ୟବହାର୍ କାଜିଙ୍ଗ୍ ପାଣ୍ଡ୍ରା ଆମାଟ୍, ହେଦାଙ୍ଗ୍ କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ପୁରଷ୍କାର୍ ହିଦ୍‌ନାନ୍।

¹⁵ ଏପେଙ୍ଗ୍ ଖ୍ରୀଷ୍ଟଙ୍ଗ୍ ମାପୃ ଇଞ୍ଜି ହେବା କିନି ଦର୍‌କାର୍। ଆରେ ଇନେର୍ ଯଦି ମିଙ୍ଗେଙ୍ଗ୍ ୱେନ୍‌ବା ଆଦ୍‌ନାର୍ ଏପେଙ୍ଗ୍ ଇନାକିଦେଙ୍ଗ୍ ଖ୍ରୀଷ୍ଟଙ୍ଗ୍ ଆହା କିନାଦେରା, ଲାଗିଙ୍ଗ୍ ଏପେଙ୍ଗ୍ ହେୱାରିଙ୍ଗ୍ ବୁଜାୟ୍ କିନି କାଜିଙ୍ଗ୍ ୱିଜୁନାଞ୍ଜିଙ୍ଗ୍‌ ରେଡି ମାନି ଦର୍‌କାର୍।

¹⁶ ଏପେଙ୍ଗ୍ ଦରମ୍‌ଆଜି ସନ୍‌ମାନ୍ ହୁଦାଙ୍ଗ୍ ହେ ବିଷୟତିଙ୍ଗ୍ ବୁଜାୟ୍ କିନି ଦର୍‌କାର୍, ଏପେଙ୍ଗ୍ ଜାର୍ ମାନ୍‌ତିଙ୍ଗ୍ କିଲେର୍ କିଜି ଇଟାଟ୍। ଲାଗିଙ୍ଗ୍ ମାନାୟାର୍ ଯଦି ମି ବିରୁଦ୍‌ତାକେ ଇଞ୍ଜ୍‌ନାର୍, ଆରେ ଏପେଙ୍ଗ୍ ହାର୍ ଜିବୁନ୍ କାଟି କିନାକା ହେୱାର୍ ହୁଡ଼୍‍ଦାନାର୍ ଆରେ ହେୱାର୍ ଲାଜ୍ ପାୟାଆନାର୍‌, ଇନେସ୍‌କି ଏପେଙ୍ଗ୍ ଖ୍ରୀଷ୍ଟ ଲକ୍ ଆତାଦେର୍‌ନା।

¹⁷ ଏପେଙ୍ଗ୍ ମନେ ଇଟାଟ୍ ଯେ, କରାପ୍ କାମାୟ୍ କିଜି ଦୁଃକ୍ କଷ୍ଟ ପାୟା ଆନିତାଙ୍ଗ୍ ହାର୍ କାମାୟ୍ କିଜି ଦୁଃକ୍ କଷ୍ଟ ପାୟାଆନାକା ହାର୍। ଯଦି ହେଦାଙ୍ଗ୍ ଈଶ୍ୱର ଇଚା କିନାନା।

¹⁸ ଆନେଙ୍ଗ୍ ଇଲେକେ ୱେଚ୍‌ଚାନାଙ୍ଗା, ଇନେସ୍‌କି ଖ୍ରୀଷ୍ଟ ପା ମା ୱିଜାକାର୍ ପାପ୍ କାଜିଙ୍ଗ୍ ଦୁଃକ୍ କଷ୍ଟ ପାୟାଆଜି ରଗ ହାଃଜି ମାଚାନ୍। ହେୱାନ୍ ରକାନ୍ ଦରମ୍ ମାନାୟ୍ ମାଚାନ୍, ମାଙ୍ଗେଙ୍ଗ୍ ଈଶ୍ୱର ଲକ୍ କିଦ୍‌ଦେଙ୍ଗ୍ ହେୱାନ୍ ମା ପାପ୍ କାଜିଙ୍ଗ୍ ହାଃଜି ମାଚାନ୍, ଲାଗିଙ୍ଗ୍ ଆସେଙ୍ଗ୍ ତା ହୁଦାଙ୍ଗ୍ ଜାର୍ ଲକ୍ ଆୟା ଆନାତ୍‌। ହେୱାର୍ ତାଙ୍ଗେଙ୍ଗ୍ ମାର୍ନେ ଅସ୍ତାର୍, ମାତର୍ ପବିତ୍ର ଆତ୍ମାନି ଶାକ୍ତିତାଙ୍ଗ୍ ଆରେରଗ ଜିବୁନ୍ ଆତାନ୍।

¹⁹ ଲାଗିଙ୍ଗ୍ ଖ୍ରୀଷ୍ଟ ଆତ୍ମା ହାଃତାକାର୍ ଆତ୍ମା ମାନି ବାହାକାଙ୍ଗ୍ ହାଲ୍‌ଜି ହେ ଆତ୍ମାକାଙ୍ଗ୍ ହାର୍ଦିକାବୁର୍ ଶୁଣାୟ୍ କିନାତ୍‌।

²⁰ ହେ ଆତ୍ମାକାଙ୍ଗ୍ ବେସି ଆଗେ ଈଶ୍ୱର କାତାତିଙ୍ଗ୍ ମାନିକିୱାଦାଙ୍ଗ୍ ମାଚିକ୍, ଏଚେପାଦ୍ନା ନୋହ ଡଙ୍ଗା ରସ୍ତି ମାଚାନ୍। ମାନାୟାର୍ ପାପ୍ କାମାୟ୍ ପିସ୍ତି ମାନ୍‌ବାଦ୍‌ଲାୟ୍ କିନାର୍ କି ଆକାୟ୍ ଇଞ୍ଜି ପୁଞ୍ଜେଙ୍ଗ୍ ଈଶ୍ୱର ସାସ୍ ଆଜି କାସି ମାଚାନ୍, ଏଚେପାଦ୍ନା ଈଶ୍ୱର ଇ ପୁର୍ତିତିଙ୍ଗ୍ ବନ୍ୟା କିଜି ବିନାସ୍ କିତାନ୍ ହେପାଦ୍ନା ଆପ୍‌କା ଆଟ୍ ଜାଣ୍ ନେ ରକ୍ଷା ପାୟାଆତାର୍।

²¹ ହେୱାର୍ ଆଗେ ଉଦାର୍ ପାୟାଆତାକା, ହେଦାଙ୍ଗ୍ ନଙ୍ଗୟ୍ ଇଲେକେ ଅର୍ତ ହିନାତା ଏଚେପାଦ୍ନା ଆସେଙ୍ଗ୍ ଡୁବନ୍ ଅନାସ୍‌ ଆସେଙ୍ଗ୍ ଉଦାର୍ ପାୟାଆନାସ୍‌। ଆସେଙ୍ଗ୍ ଇମ୍‌ଣି ଏଜୁକାଙ୍ଗ୍ ଡୁବନ୍ ଆନାସ୍ ହେଦାଙ୍ଗ୍ ଗାଗାଡ଼୍‌ନି ପାପ୍‌ତିଙ୍ଗ୍ ନୁଜୁତ୍, ମାତର୍ ଆସେଙ୍ଗ୍ ଈଶ୍ୱରତିଙ୍ଗ୍ କେମା ଏନ୍‌ତାପ୍‌ନା ଇଞ୍ଜି ହେଦାଙ୍ଗ୍ ର ଚିନ୍। ଲାଗିଙ୍ଗ୍ ମା ମାନ୍ କିଲେର୍ ଆନାତ୍ ଯେ ଆସେଙ୍ଗ୍ ଈଶ୍ୱର ହୁଦାଙ୍ଗ୍ ମାହାଆତାସ୍‌ନା, ଈଶ୍ୱର ମାଙ୍ଗେଙ୍ଗ୍ କେମା କିଦ୍‌ନାନ୍ ଇନେସ୍‌କି ଯୀଶୁ ଖ୍ରୀଷ୍ଟ ହାଃତିତାଙ୍ଗ୍ ଆରେରଗ ଜିବୁନ୍ ଆତାନ୍‌ନା,

²² ଆରେ ହେୱାନ୍ ସରଗ୍‌ଜପି ହାଚାନ୍‌ନା। ହେୱାନ୍ ନଙ୍ଗୟ୍ ସନ୍‌ମାନ୍ ପାୟାଆନି ବାହାତାକେ ଈଶ୍ୱର ତିନାବାଗାୟ୍ କୁଚ୍‌ଚାନ୍‌ନା, ଆରେ ହେୱାନ୍ ୱିଜୁ ଦୁତ୍‌କୁକାଙ୍ଗ୍, ଅଦିକାର୍ କି ଶାକ୍ତିମାନି ଆତ୍ମାକାଙ୍ଗ୍ ସାସନ୍ କିନାନା।