୧ ପିତର 2 - New Testament in Pengo Parja Languageଈଶ୍ୱର ଇଲ୍ କାଜିଙ୍ଗ୍ ଜିବୁନ୍ ମାନି କାଲ୍ 1 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ୱିଜୁ ପର୍କାର୍ କରାପ୍ କାମାୟ୍ କିନି କାଜିଙ୍ଗ୍ ମୁନା କିୟାଟ୍। ଏପେଙ୍ଗ୍ ଜେକନି ମାନାୟାରିଙ୍ଗ୍ ଟକାୟ୍ କିମାଟ୍, ଏପେଙ୍ଗ୍ ହାର୍ ଇଞ୍ଜି ଜାର୍ତିଙ୍ଗ୍ ବାଟ୍ପାଣ୍ ଆମାଟ୍, ଏପେଙ୍ଗ୍ ଜେକନି ମାନାୟାରିଙ୍ଗ୍ ଆକାର୍ ଆମାଟ୍ ଆରେ ମାନାୟାର୍ ବିରଦ୍ତାକେ କରାପ୍ କାତା ୱେଚ୍ମାଟ୍। 2 ଏପେଙ୍ଗ୍ ପୁନ୍-ପୁନ୍ ଜନମ୍ ଆତି କଗେହିମ୍ଣା ଲେକେ ଆଡ, ହେୱାନ୍ ଆପ୍କା ତେହି ମାଁୟ୍ ନେ ଉଣ୍ଡେଙ୍ଗ୍ ଇଚାକିନାନ୍। ହେଲେକେ ଏପେଙ୍ଗ୍ ପା ଈଶ୍ୱର କାତାତିଙ୍ଗ୍ ହିକାଆଦେଙ୍ଗ୍ ଇଚାକିନି ଦର୍କାର୍, ଆରେ ଏପେଙ୍ଗ୍ ଗାଜା କାଦେର୍ ଆନାଦେର୍। ଲାଗିଙ୍ଗ୍ ସେସ୍ ୱେଡ଼ାଙ୍ଗ୍ ଈଶ୍ୱର ମିଙ୍ଗେଙ୍ଗ୍ ପୁରାପୁରି ବାବ୍ରେ ଇ ପୁର୍ତିନି କରାପ୍ ଜିନିଷ୍ତାଙ୍ଗ୍ ଉଦାର୍ କିଦ୍ନାନ୍। 3 ଇନେସ୍କି ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା, ଏପେଙ୍ଗ୍ ନିଜେ ପୁଚାଦେର୍ନା ଯେ, ମାପୃ ବେସି ଦୟା କିଦ୍ନି ମାନାୟ୍। 4-5 ଏପେଙ୍ଗ୍ ମାପୃ ଯୀଶୁତାକେ ୱାତାଦେର୍ନା। ହେୱାନ୍ ରକାନ୍ ଇଲ୍ ରହ୍ନି ପାଉଣ୍ଡେସେନ୍ନି ମୁକ୍ୟ କାଲ୍ଲେକେ, ଆରେ ହେୱାନ୍ ଜିବୁନ୍ ମାନି କାଲ୍। ବେସିହେନି ମାନାୟାର୍ ତାଙ୍ଗେଙ୍ଗ୍ ମୁନା କିତାର୍, ମାତର୍ ଈଶ୍ୱର ତାଙ୍ଗେଙ୍ଗ୍ ବାଚିକିତାନ୍ ଆରେ ହେୱାନ୍ ବେସି ମୁକ୍ୟ ଇଞ୍ଜି ବାବିକିତାନ୍। ମାନାୟାର୍ ଇନେସ୍ କାଲ୍କୁ ହୁଦାଙ୍ଗ୍ ଇଲ୍ ରହ୍ନାର୍, ହେଲେକେ ଈଶ୍ୱର ମିଙ୍ଗେଙ୍ଗ୍ ର ଦଳ୍ କିଦ୍ନାନା ଆରେ ମି ବିତ୍ରେ ପବିତ୍ର ଆତ୍ମା ମାନ୍ଙ୍ଗାନାତ୍। ଇନେସ୍କି ଖ୍ରୀଷ୍ଟ ମା କାଜିଙ୍ଗ୍ ଇନାକା କିତାନ୍ନା ହେଦାଙ୍ଗ୍ କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ପୁଜାରିର୍ କାମାୟ୍ କିଦେଙ୍ଗ୍ ପୁଜାରିର୍ ଲେକେ କିତ୍ତାନ୍ନା, ହେୱାର୍ ଈଶ୍ୱରତିଙ୍ଗ୍ ୱାରି କିଦେଙ୍ଗ୍ କାମାୟ୍ କିନାର୍। 6 ଇଲେକେ ଦରମ୍ ସାସ୍ତର୍ତାକେ ଲେକାଆତାତ୍ନା, “ଆନେଙ୍ଗ୍ ଯିରୁଶାଲାମ ସହର୍ତାକେ ର କାଲ୍ତିଙ୍ଗ୍ ଇଡ଼୍ତାଙ୍ଗ୍ନା। ହେଦାଙ୍ଗ୍ ବେସି ସନ୍ମାନ୍ ପାୟାଆନି କାଜିଙ୍ଗ୍ ବାଚିକିତାଙ୍ଗ୍ନା ଆରେ ଏଚେଜାଣ୍ ତାଙ୍ଗେଙ୍ଗ୍ ପାର୍ତିକିନାର୍ ଆନେଙ୍ଗ୍ ହେ ୱିଜାରିଙ୍ଗ୍ ଲାଜ୍ ପାଇକିଦେଙ୍ଗ୍ ହିଉଙ୍ଗ୍।” 7 ଏପେଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ପାର୍ତିକିନି ମାନାୟ୍, ମି କାଜିଙ୍ଗ୍ ଇ କାଲ୍ ବେସି ମୁଲ୍ୟ ଆତାତ୍ନା। ମାତର୍ ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା ଇମ୍ଣି ମାନାୟାର୍ ଖ୍ରୀଷ୍ଟଙ୍ଗ୍ ପାର୍ତି କିଉରା, “ହେୱାର୍ ଇଲ୍ ରହ୍ନି ମାନାୟାର୍ ହେ କାଲ୍ଦିଙ୍ଗ୍ ପାଉଣ୍ଡେସେନ୍ କିନିହିଙ୍ଗ୍ ବ୍ୟବହାର୍ କିଦେଙ୍ଗ୍ ମୁନା କିତାର୍। ମାତର୍ ହେ କାଲ୍ ନଙ୍ଗୟ୍ ଇଲ୍ ରହ୍ନି ପାଉଣ୍ଡେସେନ୍ନି ୱିଜୁତାଙ୍ଗ୍ ମୁକ୍ୟ କାଲ୍ ଆତାତ୍ନା।” 8 ଆରେ ପା ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା, “ଇ କାଲ୍ କାଜିଙ୍ଗ୍ ମାନାୟାର୍ ଉଜ୍ଦି ମେଦ୍ନିତ ଗୁର୍ନାର୍। ଇଦାଙ୍ଗ୍ ନେ ହେ କାଲ୍ ଇମ୍ଣାକା ମାନାୟାରିଙ୍ଗ୍ ତାରେନ୍ ଗୁତ୍ନାତା।” ଇନେସ୍କି ହେୱାର୍ ଈଶ୍ୱର କାତାତିଙ୍ଗ୍ ପାର୍ତି କିୱାତାର୍ ହେଦାଙ୍ଗ୍ କାଜିଙ୍ଗ୍ ହେୱାର୍ ହେ କାଲ୍ଦ ଉଜ୍ଦି ଗୁର୍ତାର୍, ଆରେ ଇଲେକେ ଆଦେଙ୍ଗ୍ ଈଶ୍ୱର ନେ ଉପାୟ୍ କିଜି ମାଚାନ୍। 9 ମାତର୍ ଏପେଙ୍ଗ୍ ହେୱାର୍ ଲେକେ ଆକାୟ୍, ଈଶ୍ୱର ମିଙ୍ଗେଙ୍ଗ୍ ତା ଲକ୍ ଆଦେଙ୍ଗ୍ ବାଚି କିତ୍ତାନ୍ନା। ହେୱାନ୍ ମିଙ୍ଗେଙ୍ଗ୍ ରାଜା ଈଶ୍ୱର ହେବା କିଦେଙ୍ଗ୍ ପୁଜାରି କିତ୍ତାନା। ହେୱାନ୍ ମିଙ୍ଗେଙ୍ଗ୍ ଜାର୍ ଦନ୍ଲେକେ ତା ହେବା କିଦେଙ୍ଗ୍ ବାଚି କିତ୍ତାନା। ହେୱାନ୍ ମିଙ୍ଗେଙ୍ଗ୍ ମାଜ୍ଗା ଲେଗ୍ଦି ପାପ୍ତାଙ୍ଗ୍ ବିନେ କିତାନ୍ନା ଆରେ ଚାନିଆଆନି କାମାୟ୍ତିଙ୍ଗ୍ ଶୁଣାୟ୍ କିଦେଙ୍ଗ୍ ତା ଚାନିଆଆନି ଅଜଡ଼୍ତାକେ ତାହି ୱାତ୍ତାନ୍ନା। 10 ହସିୟ ଭବିଷ୍ୟତ୍ବକ୍ତା ମି ବିଷୟରେ ଇଲେକେ ୱେଚ୍ଚାନ୍ନା, “ଏପେଙ୍ଗ୍ ଆଗେ ଈଶ୍ୱର ଲକ୍ ଆୱାଦାଙ୍ଗ୍ ମାଚାଦେର୍, ମାତର୍ ନଙ୍ଗୟ୍ ଈଶ୍ୱର ମିଙ୍ଗେଙ୍ଗ୍ ତା ଲକ୍ କିତ୍ତାନ୍ନା। ଈଶ୍ୱର ଆଗେ ମିଙ୍ଗେଙ୍ଗ୍ ଦୟା କିଦ୍ୱାଦାଙ୍ଗ୍ ମାନ୍ଞ୍ଚାନ୍, ମାତର୍ ନଙ୍ଗୟ୍ ଈଶ୍ୱର ମିଙ୍ଗେଙ୍ଗ୍ ଦୟା କିତ୍ତାନ୍ନା।” ଅଦିକାର୍ ପାୟା ଆତାକାରିଙ୍ଗ୍ ସନ୍ମାନ୍ ହିନି ଦର୍କାର୍ 11 ଏ ଲାଡ୍ନି ସାଙ୍ଗ କାଦେର୍, ଏପେଙ୍ଗ୍ ବିନ୍ଦେସ୍ ଆରେ ପୁନ୍ୱିତି ମାନାୟ୍ ଲେକେ ଇ ପୁର୍ତିତାକେ ମାନାଦେରା। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାଙ୍ଗା ଯେ, ଏପେଙ୍ଗ୍ ୱିଜୁ ପର୍କାର୍ ପାପ୍ କାମାୟ୍ତାଙ୍ଗ୍ ଦେହା ମାନାଟ୍, ଇନେସ୍କି ହେଦାଙ୍ଗ୍ ମି ଜିବୁନ୍ ବିରୁଦ୍ତାକେ ଜୁଜ୍ କିଦ୍ନାତ୍। 12 ଈଶ୍ୱରତିଙ୍ଗ୍ ପୁନ୍ୱିତି ମାନାୟାର୍ ମି ଚାରିବେଣ୍ତାଙ୍ଗ୍ ମାନାର୍, ଆରେ ହେୱାର୍ ମିଙ୍ଗେଙ୍ଗ୍ ବୁଲ୍ କାମାୟ୍ କିନାରା ଇଞ୍ଜି ବିରଦ୍ କିଦେଙ୍ଗ୍ ଆଡ୍ନାର୍। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ହାର୍ ଜିବୁନ୍ କାଟିକିନି ଦର୍କାର୍, ଲାଗିଙ୍ଗ୍ ହେୱାର୍ ମି ହାର୍ କାମାୟ୍ ହୁଡ଼୍ଜି ଈଶ୍ୱରତିଙ୍ଗ୍ ଗୌରବ ହିନାର୍, ଏଚେପାଦ୍ନା ଯୀଶୁ ଖ୍ରୀଷ୍ଟ ପୁର୍ତିତାକେ ଆରେରଗ ବିଚାର୍ କିଦେଙ୍ଗ୍ ୱାନାନ୍। 13 ହେଦାଙ୍ଗ୍ କାଜିଙ୍ଗ୍ ୱିଜୁ ସାସନ୍ କିନି ମାନାୟାର୍ କାତା ମାନିକିନି ଦର୍କାର୍, ଇନେସ୍କି ହେଦାଙ୍ଗ୍ ମାପୃ ଇଚା। ଏପେଙ୍ଗ୍ ୱିଜାକାରିଙ୍ଗ୍ ସାସନ୍ କିଦ୍ନି ରାଜାର୍ କାତା ମାନିକିନି ଦର୍କାର୍। 14 ଏପେଙ୍ଗ୍ ଗବର୍ନର୍ କାତାତିଙ୍ଗ୍ ପା ମାନିକିନି ଦର୍କାର୍, ଇନେସ୍କି ରାଜା ଗବର୍ନର୍ରିଙ୍ଗ୍ ଆସ୍ତି ବୁଲ୍ କାମାୟ୍ କିନାକାରିଙ୍ଗ୍ ଦଣ୍ଡ୍ ହିନାନ୍, ଆରେ ହାର୍ କାମାୟ୍ କିନାକାରିଙ୍ଗ୍ ଜୟ୍-ଜୟ୍ କିନାନ୍। 15 ହେଦାଙ୍ଗ୍ କାଜିଙ୍ଗ୍ ଈଶ୍ୱର ଇଚା କିନାକାନ୍ ଯେ, ଏପେଙ୍ଗ୍ ହାର୍ କାମାୟ୍ କିୟାଟ୍। ଲାଗିଙ୍ଗ୍ ଈଶ୍ୱର ପୁନ୍ୱିତି ବକୁୱା ମାନାୟାର୍ ମିଙ୍ଗେଙ୍ଗ୍ ବିରଦ୍ କିତ୍ତିସ୍ ପା ମି ହାର୍ କାମାୟ୍ କାଜିଙ୍ଗ୍ ହେ ବିରଦ୍ତିଙ୍ଗ୍ ଏପେଙ୍ଗ୍ ବନ୍ଦ୍ କିଦେଙ୍ଗ୍ ଆଡ୍ନାଦେର୍। 16 ଏପେଙ୍ଗ୍ ନଙ୍ଗୟ୍ ଜାର୍ ଇଚାତାଙ୍ଗ୍ ୱିଜୁ ଜିନିଷ୍ କିଦେଙ୍ଗ୍ ଆଡ୍ନାଦେର୍, ଆରେ ଇନେର୍ ମିଙ୍ଗେଙ୍ଗ୍ ବନ୍ଦ୍ କିଦ୍ଦେଙ୍ଗ୍ ଆଡ଼୍ଦୁର୍, ଇନେସ୍କି ମା ମାପୃ ଯୀଶୁ ଖ୍ରୀଷ୍ଟ ୱିଜୁ ପର୍କାର୍ କିଦେଙ୍ଗ୍ ହିତ୍ତାନ୍ନା। ମାତର୍ ଟିକ୍ କାମାୟ୍ କିଜି ଈଶ୍ୱର ସତ୍ ଦାସ୍ ଇଞ୍ଜି ପୁନିକିନି ଦର୍କାର୍। ହେଦାଙ୍ଗ୍ କାଜିଙ୍ଗ୍ ମାପୃ ହିତ୍ତି ସ୍ୱାଦିନତିଙ୍ଗ୍ କରାପ୍ କାମାୟ୍ କିଦେଙ୍ଗ୍ ବ୍ୟବହାର୍ କିନାକା ହାର୍ ଆକାୟ୍। 17 ଏପେଙ୍ଗ୍ ୱିଜାରିଙ୍ଗ୍ ସନ୍ମାନ୍ ହିୟାଟ୍, ଏପେଙ୍ଗ୍ ଖ୍ରୀଷ୍ଟାନ୍ ଟଣ୍ଡେନ୍, ତଣ୍ଦେଲିକାଙ୍ଗ୍ ଲାଡ୍ କିୟାଟ୍, ଏପେଙ୍ଗ୍ ଈଶ୍ୱରତିଙ୍ଗ୍ ପାଣ୍ଡ୍ରାଆଡ, ଏପେଙ୍ଗ୍ ସାସନ୍ କିନି ମାନାୟାର୍ କାତା ମାନି କିୟାଟ୍। 18 ଏପେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତି କିଜି ମାନି ଏଚେଜାଣ୍ ଚାକର୍ ଆତାଦେର୍ନା, ଏପେଙ୍ଗ୍ ଜାର୍ ମାଲିକ୍ କାତାତିଙ୍ଗ୍ ମାନିକିଜି ସନ୍ମାନ୍ ହିନି ଦର୍କାର୍। ହାର୍ ମାଲିକ୍ ଆୟେନ୍ କି, କରାପ୍ ମାଲିକ୍ ଆୟେନ୍ ଏପେଙ୍ଗ୍ ୱିଜୁ ମାଲିକାରିଙ୍ଗ୍ ହେଲେକେ ସନ୍ମାନ୍ ହିନି ଦର୍କାର୍। 19 ଆସେଙ୍ଗ୍ ବୁଲ୍ କିୱାଦାଙ୍ଗ୍ ମାଚିସ୍ ପା ଯଦି ଦୁଃକ୍ କଷ୍ଟତିଙ୍ଗ୍ ସମ୍ବାଲି କିନାସ୍, ଇନେସ୍କି ଆସେଙ୍ଗ୍ ପୁଚାସ୍ନା ଯେ, ଈଶ୍ୱର ୱିଜୁ ପୁନାନା, ଲାଗିଙ୍ଗ୍ ଈଶ୍ୱର ମା ଇ କାମାୟ୍ କାଜିଙ୍ଗ୍ ୱାରିୟା ଆନାନ୍। 20 ମାତର୍ ଯଦି ମି ବୁଲ୍ କାମାୟ୍ କାଜିଙ୍ଗ୍ ମାଡ୍ ତିନାଦେର୍, ଆରେ ଦଣ୍ଡ୍ ପାୟାଆନାକା ସମ୍ବାଲି କିନାଦେରା, ଲାଗିଙ୍ଗ୍ ଏପେଙ୍ଗ୍ ଜୟ୍-ଜୟ୍ ପାୟାଆନି କାଜିଙ୍ଗ୍ ଦର୍କାର୍ ଆକାୟ୍। ମାତର୍ ଏପେଙ୍ଗ୍ ହାର୍ କାମାୟ୍ କିତି କାଜିଙ୍ଗ୍ ଦୁଃକ୍ କଷ୍ଟ ପାୟାଆନାଦେରା ଆରେ ସମ୍ବାଲି କିନାଦେରା ଲାଗିଙ୍ଗ୍ ଈଶ୍ୱର ମି କାଜିଙ୍ଗ୍ ୱାରିୟା ଆନାନ୍। 21 ଈଶ୍ୱର ମିଙ୍ଗେଙ୍ଗ୍ ଦୁଃକ୍ କଷ୍ଟ ପାୟାଆତିସ୍ ପା ହାର୍ କାମାୟ୍ କିଦେଙ୍ଗ୍ ତା କାଜିଙ୍ଗ୍ ବାଚି କିତ୍ତାନ୍ନା। ଇନେସ୍ ଖ୍ରୀଷ୍ଟ ମି କାଜିଙ୍ଗ୍ ଦୁଃକ୍ କଷ୍ଟ ପାୟାଆଜି ମାଚାନ୍, ଏପେଙ୍ଗ୍ ତାଙ୍ଗେଙ୍ଗ୍ ହୁଡ଼୍ଜି ହିକାଆଡ, ଲାଗିଙ୍ଗ୍ ଏପେଙ୍ଗ୍ ଖ୍ରୀଷ୍ଟ କିତିଲେକେ କିଦେଙ୍ଗ୍ ଆଡ୍ନାଦେର୍। 22 ହେୱାନ୍ ଇନାୱେଡ଼ାଙ୍ଗ୍ ପା ପାପ୍ କାମାୟ୍ କିୱାତାନ୍ନା କି, ଇନେରିଙ୍ଗ୍ ଟକାୟ୍ କିୱାତାନ୍ନା। 23 ଏଚେପାଦ୍ନା ମାନାୟାର୍ ଯୀଶୁଙ୍ଗ୍ ଇନସ୍ତା କିତାର୍, ହେୱାନ୍ ଉଲ୍ଟା ମାନାୟାରିଙ୍ଗ୍ ଇନସ୍ତା କିୱାତାନ୍ନା। ମାନାୟାର୍ ଏଚେପାଦ୍ନା ତାଙ୍ଗେଙ୍ଗ୍ ଦୁଃକ୍ କଷ୍ଟ ହିତାର୍, ହେୱାନ୍ ଉଲ୍ଟା ହେୱାରିଙ୍ଗ୍ ଦୁଃକ୍ କଷ୍ଟ ହିଦେଙ୍ଗ୍ ଉପାୟ୍ କିୱାତାନ୍ନା। ମାତର୍ ତା ବାଦୁଲ୍ରେ ହେୱାନ୍ ଈଶ୍ୱରତିଙ୍ଗ୍ ସାଇଜ କିଦେନ୍ ଇଞ୍ଜି ପାର୍ତି କିତାନ୍। ହେୱାନ୍ ପୁନ୍ଞ୍ଜି ମାଚାନ୍ ଯେ, ଈଶ୍ୱର ୱିଜାକାରିଙ୍ଗ୍ ନ୍ୟାୟ୍ ବିଚାର୍ କିନାନ୍। 24 ହେୱାନ୍ ନିଜେ ମା ପାପ୍ତିଙ୍ଗ୍ ତା ଗାଗାଡ଼୍ତାକେ ଅତାନ୍ ଆରେ କୃଶକାଟ୍ତାକେ ହାଃତାନ୍, ଲାଗିଙ୍ଗ୍ ଆସେଙ୍ଗ୍ ପାପ୍ କାଜିଙ୍ଗ୍ ହାଃତି ଲେକେ ଆୟା ଆନାତ୍ ଆରେ ଟିକ୍ କାମାୟ୍ କିନି କାଜିଙ୍ଗ୍ ଜିନାପା। ଆରେ ହେୱାନ୍ ତା ଗାଗାଡ଼୍ତାକେ ଗାଉଦାଉ ଆଜି ଦୁଃକ୍ କଷ୍ଟ ସମ୍ବାଲି କିତି କାଜିଙ୍ଗ୍ ଆସେଙ୍ଗ୍ ହାର୍ ଆତାସ୍। 25 ଦିନେକ୍ ଆସେଙ୍ଗ୍ ଗଡ଼ିୟା ହିଲ୍ୱି ମେଣ୍ଢାଙ୍ଗ୍ ଲେକେ ଏନେ ତେନେ ଆଜି ମାଚାସ୍, ମାତର୍ ନଙ୍ଗୟ୍ ମା ଜିବୁନ୍ତିଙ୍ଗ୍ ଜାତୁନ୍ ଅନି ଗଡ଼ିୟା ଆରେ ବିଶପ୍ ଯୀଶୁ ଖ୍ରୀଷ୍ଟତାକେ ଲେଉଟା ଆଜି ୱାତାସ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation