୧ ପିତର 1 - New Testament in Pengo Parja Languageପିତର ଜୱାର୍ କିତାନ୍ 1 ଇ ଚିଟି ଆନେଙ୍ଗ୍ ଯୀଶୁ ଖ୍ରୀଷ୍ଟ ଚେଲାହି ପିତର ଲେକିକିତାଙ୍ଗ୍ନା। ଆନେଙ୍ଗ୍ ଇ ଚିଟି ଈଶ୍ୱର ବାଚିକିତି ଚେଲାହିର୍ କାଜିଙ୍ଗ୍ ଲେକିକିତାଙ୍ଗ୍ନା, ଇମ୍ଣି ମାନାୟାର୍ ଜେକନି ଦେସ୍ତାକେ ମାନିଲେକେ ପନ୍ତ, ଗାଲାତିୟ, କାପାଦକିଆ, ଏସିଆ ଆରେ ବେଥୁନିଆ ଇ ୱିଜୁ ଦେସ୍ତାକେ ମାନାରା। 2 ଆବା ଈଶ୍ୱର ମିଙ୍ଗେଙ୍ଗ୍ ପୁନ୍ଞ୍ଜି ମାନ୍ଞ୍ଚାନ୍ ଆରେ ବେସି ଆଗେତାଙ୍ଗ୍ ବାଚି କିତ୍ତାନ୍ନା, ଆରେ ତା ପବିତ୍ର ଆତ୍ମା ମିଙ୍ଗେଙ୍ଗ୍ ପବିତ୍ର କିତ୍ତାତ୍ନା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ତା ଆଦେସ୍ତିଙ୍ଗ୍ ମାନି କିତାଦେର୍, ଆରେ ହେୱାନ୍ ମିଙ୍ଗେଙ୍ଗ୍ ଯୀଶୁ ଖ୍ରୀଷ୍ଟ ନେତେର୍ତାଙ୍ଗ୍ ନୁଜ୍ଦାନ୍ନା। ଈଶ୍ୱର ମିଙ୍ଗେଙ୍ଗ୍ ବେସି ଆରେ ବେସି ଦୟା ଆରେ ଶାନ୍ତି ହିଦେନ୍। ୱିଜ୍ୱି ଜିବୁନ୍ ପାୟାଆନି ଆହା 3 ମା ମାପୃ ଯୀଶୁ ଖ୍ରୀଷ୍ଟ ଆବା ଈଶ୍ୱରତିଙ୍ଗ୍ ଜୟ୍-ଜୟ୍ ଆୟେତ୍, ଈଶ୍ୱର ମାଙ୍ଗେଙ୍ଗ୍ ବେସି ଦୟାକିଜି ମାନ୍ଞ୍ଚି କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ପୁନି ଜିବୁନ୍ ହିତ୍ତାନ୍। ଇନେସ୍କି ଈଶ୍ୱର ଯୀଶୁ ଖ୍ରୀଷ୍ଟଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିଜି ନିକ୍ଚି ମାଚାନ୍, ଆରେ ହେୱାନ୍ ମାଙ୍ଗେଙ୍ଗ୍ ସାହାସ୍ ହୁଦାଙ୍ଗ୍ ଜିନି କାଜିଙ୍ଗ୍ ସାଇଜ କିତ୍ତାନ୍ନା। ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ହେୱାନ୍ କିଜିମାଚି ପାର୍ମାଣ୍ତିଙ୍ଗ୍ ପାୟାଆନି କାଜିଙ୍ଗ୍ ଆପେଙ୍ଗ୍ ଆହା କିନାପା। 4 ଈଶ୍ୱର ମା କାଜିଙ୍ଗ୍ ଇଡ଼୍ଜି ମାଚି ହାର୍ଦି ଜିନିଷ୍ତିଙ୍ଗ୍ ପାୟାଆନି କାଜିଙ୍ଗ୍ ଆପେଙ୍ଗ୍ କାନାପା, ଆରେ ଇନେର୍ ପା ଇନାୱେଡ଼ାଙ୍ଗ୍ ପା ହେ ଜିନିଷ୍ତିଙ୍ଗ୍ ନଷ୍ଟ କିଦେଙ୍ଗ୍ ଆଡୁର୍। ହେୱିଜୁ ଜିନିଷ୍ ପାନାକା ଆଉତ୍ କି ପ୍ରାଲ୍ ତିନୁତ୍, ଆରେ ହେଦାଙ୍ଗ୍ତିଙ୍ଗ୍ ଇନାକା ପା କରାପ୍ କିଉତ୍। ଇମ୍ଣାକା ଈଶ୍ୱର ମାଙ୍ଗେଙ୍ଗ୍ ହିଦ୍ନି କାଜିଙ୍ଗ୍ ସରଗ୍ତାକେ ଇଡ଼୍ତାନ୍ନା। 5 ଏପେଙ୍ଗ୍ ଯୀଶୁଙ୍ଗ୍ ପାର୍ତି କିଜିମାଚି କାଜିଙ୍ଗ୍ ଈଶ୍ୱର ତା ଶାକ୍ତିତାଙ୍ଗ୍ ମିଙ୍ଗେଙ୍ଗ୍ ରକ୍ଷା କିଦ୍ନାନା। ଯୀଶୁ ଖ୍ରୀଷ୍ଟ ଆରେରଗ ୱାନି ସେସ୍ଦିନ୍ ପାତେକ୍ ହେୱାନ୍ ମିଙ୍ଗେଙ୍ଗ୍ ଉଦାର୍ କିଜି ମାଞ୍ଜ୍ନାନ୍। ଲାଗିଙ୍ଗ୍ ଏପେଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍ ଯେ ଈଶ୍ୱର ମିଙ୍ଗେଙ୍ଗ୍ ପାପ୍ ଆରେ ହାଃନିତାଙ୍ଗ୍ ପୁରାପୁରି ଉଦାର୍ କିତ୍ତାନ୍ନା। 6 ଏପେଙ୍ଗ୍ ଯଦି ଅଲପ୍ଦିନ୍ କାଜିଙ୍ଗ୍ ବିନ୍-ବିନ୍ ଦୁକ୍କଷ୍ଟ ପାୟାଆଜି ଦୁକ୍ ଆତିସ୍ପା, ଇ ୱିଜୁ ଜିନିଷ୍ କାଜିଙ୍ଗ୍ ୱାରିୟାଆନି ଦର୍କାର୍। 7 ଇ ୱିଜୁ ଦୁକ୍କଷ୍ଟ ପୁନି କିଦ୍ନାତ୍ ଯେ, ଏପେଙ୍ଗ୍ ଈଶ୍ୱରତିଙ୍ଗ୍ ହାତ୍ପା ପାର୍ତି କିନାଦେରା। ଏପେଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ପାର୍ତି କିନାକା ହନାତାଙ୍ଗ୍ ପା ବେସି ଦାମ୍। ଇନେସ୍କି ହନାତିଙ୍ଗ୍ ନାଣିତାକେ କାଡିକିଜି ପରିକ୍ଷା କିନାର୍ ଆରେ ନୁଜ୍ନାର୍, ହେଲେକେ ଦୁକ୍କଷ୍ଟ ୱାତିସ୍ ପା ଏପେଙ୍ଗ୍ ଯଦି ଯୀଶୁଙ୍ଗ୍ ପାର୍ତି କିଜି ମାନ୍ଗାନାଦେର୍। ଲାଗିଙ୍ଗ୍ ଯୀଶୁ ଖ୍ରୀଷ୍ଟ ଆରେରଗ ୱାନି ଦିନ୍ତ ଏପେଙ୍ଗ୍ ଗୌରବ, ସନ୍ମାନ୍ ଆରେ ଜୟ୍-ଜୟ୍ ପାୟାଆନାଦେର୍। 8 ଏପେଙ୍ଗ୍ ଯୀଶୁଙ୍ଗ୍ ଇନାୱେଡ଼ାଙ୍ଗ୍ ପା ହୁଡ଼୍ୱାତାଦେର୍ନା, ମାତର୍ ନଙ୍ଗୟ୍ ପାତେକ୍ ହେୱାନିଙ୍ଗ୍ ଲାଡ୍ କିନାଦେରା। ଏପେଙ୍ଗ୍ ନଙ୍ଗୟ୍ ଯୀଶୁଙ୍ଗ୍ ହୁଡ଼୍ୱାତାଦେର୍ନା ମାତର୍ ଏପେଙ୍ଗ୍ ଯୀଶୁଙ୍ଗ୍ ପାର୍ତି କିନାଦେରା। ଲାଗିଙ୍ଗ୍ ଏପେଙ୍ଗ୍ ବେସି ୱାରିୟା ଆନାଦେରା ହେଦାଙ୍ଗ୍ କାତା ୱେଚ୍ଚି ବୁଜାୟ୍ କିୟି ଆଉତ୍। 9 ଏପେଙ୍ଗ୍ ୱାରିୟା ଆନାଦେରା, ଇନେସ୍କି ଈଶ୍ୱର ମିଙ୍ଗେଙ୍ଗ୍ ହାଃନି ଦଣ୍ଡ୍ତାଙ୍ଗ୍ ଉଦାର୍ କିଦ୍ନାନା। ଇଦାଙ୍ଗ୍ ନେ ଯୀଶୁ ଖ୍ରୀଷ୍ଟତାକେ ପାର୍ତିକିନି ପୁରଷ୍କାର୍। 10 ଇ ଉଦାର୍ ପାୟାଆନି ବିଷୟରେ ଭବିଷ୍ଯତବକ୍ତାର୍ ବେସି ପୁଞ୍ଜେଙ୍ଗ୍ ଇଚାକିଜି ମାଚାର୍। ଏପେଙ୍ଗ୍ ଉଦାର୍ ପାୟାଆନି ଯଗ୍ୟ ହିଲ୍ୱିତିସ୍ ପା ଈଶ୍ୱର ମିଙ୍ଗେଙ୍ଗ୍ ଇନେସ୍ ଦୟାକିଜି ଉଦାର୍ କିଦ୍ନାନ୍, ହେ ବିଷୟରେ ହେୱାର୍ ୱେଚ୍ଚି ମାଚାର୍। ହେୱାର୍ ଜାଗ୍ରତ୍ ଆଜି ହେ ବିଷୟତିଙ୍ଗ୍ ପୁଞ୍ଜେଙ୍ଗ୍ ବେସି ଉପାୟ୍ କିଜି ମାଚାର୍, 11 ଆରେ ହେୱାର୍ ବିତ୍ରେ ଖ୍ରୀଷ୍ଟତି ଆତ୍ମା ମାନ୍ଞ୍ଜି ହେୱାରିଙ୍ଗ୍ ୱେଚ୍ଚି ମାଚାତ୍। ଖ୍ରୀଷ୍ଟ ଇନେସ୍ ଦୁକ୍କଷ୍ଟ ଆରେ ସନ୍ମାନ୍ ପାୟା ଆନାନ୍, ଲାଗିଙ୍ଗ୍ ହେୱାର୍ ଖ୍ରୀଷ୍ଟ ଇନେର୍ ଆନାର୍ ଆରେ ଇନାୱେଡ଼ାଙ୍ଗ୍ ଇ ଗଟ୍ନା ଗଟାଆନାତ୍ ଇଞ୍ଜି ପୁଞ୍ଜେଙ୍ଗ୍ ଉପାୟ୍ କିତାର୍। 12 ମାତର୍ ଈଶ୍ୱର ଇ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାରିଙ୍ଗ୍ ୱେଚ୍ଚାନ୍, ଇ ହାର୍ଦିକାବୁର୍ ମି କାଜିଙ୍ଗ୍ ଆକାୟ୍ ମାତର୍ ମାନାୟାର୍ କାଜିଙ୍ଗ୍। ଆରେ ହେ ହାର୍ଦିକାବୁର୍ ଯୀଶୁ ଖ୍ରୀଷ୍ଟ ବିଷୟ ଇମ୍ଣାକା ଏପେଙ୍ଗ୍ ନଙ୍ଗୟ୍ ୱେଚାଦେର୍ନା। ଈଶ୍ୱର ତା ପବିତ୍ର ଆତ୍ମା ସରଗ୍ତାଙ୍ଗ୍ ମିଙ୍ଗେଙ୍ଗ୍ ହାର୍ଦିକାବୁର୍ ୱେଚ୍ନି ମାନାୟାରିଙ୍ଗ୍ ସାଇଜ କିଦେଙ୍ଗ୍ ପକ୍ତାତାନ୍ନା। ହେଦାଙ୍ଗ୍ ୱିଜୁ ଚାନିଆଆନି ବିଷୟ ଯେ, ଇୱିଜୁ ଗଟାଆନି ବିଷୟ ସରଗ୍ନି ଦୁତ୍କୁ ପା ହୁଡ଼୍ନିକା। 13 ହେଦାଙ୍ଗ୍ କାଜିଙ୍ଗ୍ ମାନାୟାର୍ କାମାୟ୍ କିନିହିଙ୍ଗ୍ ମେଙ୍ଗାକାଙ୍ଗ୍ ତୁୱାଲ୍ ଗାଚିଆ ଆନିଲେକେ ମି ମାନ୍ତିଙ୍ଗ୍ କିଲେର୍ ଆରେ ଜାର୍ତିଙ୍ଗ୍ କଣ୍ଟ୍ରୁଲ୍ କିୟାଟ୍। ଆରେ ଯୀଶୁ ଖ୍ରୀଷ୍ଟ ଆରେରଗ ୱାନି ଦିନ୍ତ ଦୟାକିଜି ହିଦ୍ନି ଉଦାର୍ତିଙ୍ଗ୍ ପାୟାଆନି କାଜିଙ୍ଗ୍ ଆହା କିଜି ମାନାଟ୍। 14 ହାର୍ଦି ହିମ୍ଣାଙ୍ଗ୍ ଜାର୍ ଆବା କାତା ମାନି କିତିଲେକେ ଏପେଙ୍ଗ୍ ଈଶ୍ୱର କାତାତିଙ୍ଗ୍ ମାନି କିୟାଟ୍, ଇନେସ୍କି ଏପେଙ୍ଗ୍ ଈଶ୍ୱର ହିମ୍ଣା କାଦେର୍। ଏପେଙ୍ଗ୍ ଈଶ୍ୱର ସତ୍ତିଙ୍ଗ୍ ପୁନ୍ୱି ଆଗେ ଇମ୍ଣି କରାପ୍ କାମାୟ୍ କିଦେଙ୍ଗ୍ ଇଚା କିଜି ମାଚାଦେର୍ ହେଦାଙ୍ଗ୍ ଆରେରଗ କିମାଟ୍। 15 ମାତର୍ ଏପେଙ୍ଗ୍ ଇନକା କିତିସ୍ ପା କରାପ୍ କାମାୟ୍ତାଙ୍ଗ୍ ଦେହା ଆଜି ମାନାଟ୍, ଇନେସ୍କି ଇମ୍ଣି ଈଶ୍ୱର ମିଙ୍ଗେଙ୍ଗ୍ ତା ହିମ୍ଣା ଆନି କାଜିଙ୍ଗ୍ ବାଚିକିତ୍ତାନ୍ ହେୱାନ୍ ପବିତ୍ର। 16 ଇନେସ୍କି ଦରମ୍ ସାସ୍ତର୍ତାକେ ଲେକାଆତାତ୍ନା, ଆନେଙ୍ଗ୍ ଇନେସ୍ ପବିତ୍ର, ହେଲେକେ ଏପେଙ୍ଗ୍ ପା ପବିତ୍ର ଆଡ। 17 ଈଶ୍ୱର ୱିଜାକାର୍ କିତି କାମାୟ୍ତିଙ୍ଗ୍ ପୁନାନା, ଆରେ ହେୱାନ୍ ୱିଜାରିଙ୍ଗ୍ ହାମାନ୍ ବିଚାର୍ କିନାନ୍। ଏପେଙ୍ଗ୍ ଏଚେପାଦ୍ନା ଈଶ୍ୱରତିଙ୍ଗ୍ ଆବା ଇଞ୍ଜି ପାର୍ତାନା କିନାଦେରା, ହେପାଦ୍ନା ଏପେଙ୍ଗ୍ ଇ ପୁର୍ତିତାକେ ବିନ୍ ଦେସ୍ତାକେ ମାନିଲେକେ ଈଶ୍ୱରତିଙ୍ଗ୍ ପାଣ୍ଡ୍ରାଆଜି ଜିବୁନ୍ କାଟିକିନି ଦର୍କାର୍। 18 ଏପେଙ୍ଗ୍ ପୁଚାଦେର୍ନା ଯେ, ଆଗେ ଏପେଙ୍ଗ୍ ବେକାର୍ ଜିବୁନ୍ କାଟିକିଜି ମାଚାଦେର୍, ହେଦାଙ୍ଗ୍ ମି ଆକଦାଦିର୍ତାଙ୍ଗ୍ ହିକା ଆଜି ମାଚାଦେର୍। ମାତର୍ ଈଶ୍ୱର ମିଙ୍ଗେଙ୍ଗ୍ ବେକାର୍ ଜିବୁନ୍ତାଙ୍ଗ୍ ମୁକ୍ତି କିଜି ମାନ୍ଞ୍ଚାନ୍। ହେୱାନ୍ ମିଙ୍ଗେଙ୍ଗ୍ ଉଦାର୍ କିଦ୍ନି କାଜିଙ୍ଗ୍ ନଷ୍ଟ ଆନି ହନା କି, ରୁପା ବ୍ୟବହାର୍ କିୱାଦାଙ୍ଗ୍ ମାଚାନ୍। 19 ମାତର୍ ଯୀଶୁ ଖ୍ରୀଷ୍ଟତି ବେସି ଦାମ୍କିୟା ନେତେର୍ କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ଉଦାର୍ କିତ୍ତାନ୍ନା, ହେୱାନ୍ ଦସ୍ ହିଲି ମେଣ୍ଢାଲେକେ ବଲିପୁଜା ଆତାନ୍। 20 ପୁର୍ତି ଉବ୍ଜା ଆୱି ଆଗେ ଈଶ୍ୱର ଯୀଶୁ ଖ୍ରୀଷ୍ଟଙ୍ଗ୍ ମାନାୟାରିଙ୍ଗ୍ ଉଦାର୍ କିନି କାଜିଙ୍ଗ୍ ବାଚିକିଜି ମାଚାନ୍। ମାତର୍ ଇ ପୁର୍ତି ସେସ୍ଆନି ନାଞ୍ଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ସାଇଜ କିଦ୍ଦେଙ୍ଗ୍ ୱାତାନ୍। 21 ଖ୍ରୀଷ୍ଟ ମିଙ୍ଗେଙ୍ଗ୍ ଇନାକା କିତି କାଜିଙ୍ଗ୍ ଏପେଙ୍ଗ୍ ନଙ୍ଗୟ୍ ଈଶ୍ୱରତିଙ୍ଗ୍ ପାର୍ତିକିନାରା, ଆରେ ଈଶ୍ୱର ଖ୍ରୀଷ୍ଟଙ୍ଗ୍ ହାଃତିତାଙ୍ଗ୍ ଆରେରଗ ନିକ୍ତି କାଜିଙ୍ଗ୍ ଆପେଙ୍ଗ୍ ତାଙ୍ଗେଙ୍ଗ୍ ପାର୍ତି ଆରେ ଆହା କିଜି ତାଙ୍ଗେଙ୍ଗ୍ ଗୌରବ କିନାପା। 22 ଇନେସ୍କି ଏପେଙ୍ଗ୍ ସତ୍ତିଙ୍ଗ୍ ମାନିକିତି କାଜିଙ୍ଗ୍ ହେୱାନ୍ ମିଙ୍ଗେଙ୍ଗ୍ ପାପ୍ତିଙ୍ଗ୍ ନୁସ୍ଦାତାନ୍ନା, ଲାଗିଙ୍ଗ୍ ଏପେଙ୍ଗ୍ ନଙ୍ଗୟ୍ ମି ପାର୍ତିନି ଟଣ୍ଡାରିଙ୍ଗ୍ ଟକାୟ୍ କିୱାଦାଙ୍ଗ୍ ହାତ୍ପା ଲାଡ୍କିନି ଦର୍କାର୍। ଏପେଙ୍ଗ୍ ଜାର୍-ଜାର୍ବିତ୍ରେ ଗରବ୍ତାଙ୍ଗ୍ ଲାଡ୍କିଜି ମାନାଟ୍। 23 ଏପେଙ୍ଗ୍ ଜାର୍-ଜାର୍ବିତ୍ରେ ଲାଡ୍କିଜି ମାନି ଦର୍କାର୍ ଇନେସ୍କି ଈଶ୍ୱର ମିଙ୍ଗେଙ୍ଗ୍ ପୁନି ଜିବୁନ୍ ହିତ୍ତାନ୍ନା। ଇ ପୁନି ଜିବୁନ୍ ଏପେଙ୍ଗ୍ ନଷ୍ଟ ଆନି ମାଞ୍ଜିତାଙ୍ଗ୍ ପାୟା ଆୱାତାଦେର୍ନା ମାତର୍ ୱିଜୁଦିନ୍ ମାନି ମାଞ୍ଜିତାଙ୍ଗ୍ ପାୟା ଆତାଦେର୍ନା, ଇନେସ୍କି ହେଦାଙ୍ଗ୍ ୱିଜୁଦିନ୍ ଜିବୁନ୍ ମାନି ଈଶ୍ୱର କାତାତାଙ୍ଗ୍ ୱାନାତା। 24 ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା, “ମାନାୟାର୍ କାଚ୍ରା ଲେକେ ଆରେ ହେୱାର୍ ସୁନ୍ଦର ଜମିନି ପୁଇଲେକେ। ହେ କାଚ୍ରା ୱାଜ୍ଜି ହାନାତ୍ ଆରେ ହେ ପୁଇ ୱିଜୁ ହାଡ଼୍ନାତ୍, 25 ମାତର୍ ମାପୃ କାତା ୱିଜୁଦିନ୍ ମାନ୍ଗାନାତ୍।” ଆରେ ହେ କାତା ଯୀଶୁ ଖ୍ରୀଷ୍ଟତି ହାର୍ଦିକାବୁର୍ ଶୁଣାୟ୍ କିତାକା ଏପେଙ୍ଗ୍ ୱେଚାଦେର୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation