୧ ଯୋହନ 5 - New Testament in Pengo Parja Languageଈଶ୍ୱର ମେହିଙ୍ଗ୍ ପାର୍ତିକିୟାଟ୍ 1 ଇମ୍ଣି ମାନାୟ୍ ଯୀଶୁଙ୍ଗ୍ ଖ୍ରୀଷ୍ଟ ଇଞ୍ଜି ପାର୍ତିକିନାନ୍। ହେୱାନ୍ ଈଶ୍ୱର ମେହି। ଆରେ ଇମ୍ଣି ମାନାୟ୍ ତା ଆବାଙ୍ଗ୍ ଲାଡ୍ କିନାନ୍। ଲାଗିଙ୍ଗ୍ ତା ମେହିରିଙ୍ଗ୍ ପା ଆସେଙ୍ଗ୍ ଲାଡ୍ କିନାସ୍। 2 ଆସେଙ୍ଗ୍ ଯଦି ଈଶ୍ୱରତିଙ୍ଗ୍ ଲାଡ୍ କିନାସା, ଆରେ ତା ଆଦେସ୍ତିଙ୍ଗ୍ ମାନି କିନାସା। ଲାଗିଙ୍ଗ୍ ଆସେଙ୍ଗ୍ ପୁଞ୍ଜେଙ୍ଗ୍ ଆଡ୍ନାସ୍ ଯେ, ଆସେଙ୍ଗ୍ ଈଶ୍ୱର ମେହିରିଙ୍ଗ୍ ପା ଲାଡ୍ କିନାସା। 3 ଈଶ୍ୱରତିଙ୍ଗ୍ ଲାଡ୍କିନି ଅର୍ତ, ତା ଆଦେସ୍ତିଙ୍ଗ୍ ମାନିକିନାକା, ଆରେ ତା ଆଦେସ୍ ୱିଜୁ କଷ୍ଟ ଆକାୟ୍। 4 ଏଚେଜାଣ୍ ଈଶ୍ୱର ମେହିର୍ ଆତାର୍ନା। ହେୱାର୍ ଇ ପୁର୍ତିନି କରାପ୍ କାମାୟ୍ତାଙ୍ଗ୍ ଜିତାଆନାର୍, ଇନେସ୍କି ହେୱାରିଙ୍ଗ୍ ଖ୍ରୀଷ୍ଟ ଜିତାୟ୍ କିନାକାନ୍ ଇଞ୍ଜି ପାର୍ତିକିନାରା। 5 ଇମ୍ଣି ମାନାୟ୍ ଯୀଶୁଙ୍ଗ୍ ଈଶ୍ୱର ମେହି ଇଞ୍ଜି ପାର୍ତିକିନାନ୍। ହେୱାନ୍ ଇ ପୁର୍ତିନି କରାପ୍ କାମାୟ୍ତାଙ୍ଗ୍ ଜିତା ଆତାନ୍ନା। ଈଶ୍ୱର ମେହି ବିଷୟରେ ୱେଚ୍ନାକା 6 ହେ ଈଶ୍ୱର ମେହି ଯୀଶୁ ଖ୍ରୀଷ୍ଟ ପୁର୍ତିତାକେ ୱାତାନ୍, ପାଚେ ଯୋହନ ଯୀଶୁଙ୍ଗ୍ ଏଜୁକାଙ୍ଗ୍ ଡୁବନ୍ ହିତାନ୍। ଆରେ ହେୱାନ୍ କୃଶକାଟ୍ତାକେ ହାଃଜି ତା ନେତେର୍ ବଡ଼ାୟ୍ କିତାନ୍। 7-8 ଆରେ ଯୀଶୁ ପୁର୍ତିତାକେ ୱାତାକା ତିନ୍ଗଟା ଚିନ୍ ସାକି ହିନିକା, ପବିତ୍ର ଆତ୍ମା, ଏଜୁକାଙ୍ଗ୍ ଡୁବନ୍ ଅନାକା ଆରେ କୃଶକାଟ୍ତାକେ ତା ନେତେର୍ ବଡ଼ାଆଜି ହାଃତାକା, ଆରେ ଇ ତିନ୍ଗଟା ବିଷୟରେ ସାକି ହିନାକା ସତ୍। 9 ଆସେଙ୍ଗ୍ ଯଦି ପୁର୍ତିନି ମାନାୟାର୍ ସାକି ସତ୍ ଇଞ୍ଜି ମାନି କିନାସା, ଲାଗିଙ୍ଗ୍ ଈଶ୍ୱର ସାକି ମାନାୟାର୍ ସାକିତାଙ୍ଗ୍ ଗାଜା। ଆରେ ଈଶ୍ୱର ତା ମେହି ଯୀଶୁ ବିଷୟରେ ସାକି ହିନାନା। 10 ଇମ୍ଣି ମାନାୟ୍ ଈଶ୍ୱର ମେହି ଯୀଶୁତାକେ ପାର୍ତିକିନାନ୍। ଈଶ୍ୱର ହେୱାନିଙ୍ଗ୍ ଇନାକା ଚଚ୍ଚାନ୍ନା ହେ କାତାତିଙ୍ଗ୍ ସତ୍ ଇଞ୍ଜି ମାନି କିନାନ୍। ଇମ୍ଣି ମାନାୟ୍ ଈଶ୍ୱର ୱେଚ୍ଚି କାତାନି ସାକିତିଙ୍ଗ୍ ପାର୍ତି କିଉନ୍। ହେୱାନ୍ ଈଶ୍ୱରତିଙ୍ଗ୍ ମିଚ୍ୱା ଇଞ୍ଜି ୱେଚ୍ନାନ୍, ଇନେସ୍କି ଈଶ୍ୱର ତା ମେହି ବିଷୟରେ ଇମ୍ଣି ସାକି ହିତାନ୍ନା, ହେ କାତାତିଙ୍ଗ୍ ହେୱାର୍ ପାର୍ତି କିଉରା। 11 ଈଶ୍ୱର ଇ ଲେକେ ସାକି ହିତାନ୍ନା ଯେ, ଈଶ୍ୱର ମାଙ୍ଗେଙ୍ଗ୍ ୱିଜ୍ୱି ଜିବୁନ୍ ହିତ୍ତାନ୍ନା, ଆରେ ଇ ଜିବୁନ୍ ତା ମେହିତାକେ ମାନାତ୍। 12 ଇମ୍ଣି ମାନାୟ୍ ତା ମେହି ଯୀଶୁଙ୍ଗ୍ ପାୟାଆତାନ୍ନା, ହେୱାନ୍ ୱିଜ୍ୱି ଜିବୁନ୍ ପାୟାଆତାନ୍ନା। ଇମ୍ଣି ମାନାୟ୍ ଈଶ୍ୱର ମେହିଙ୍ଗ୍ ପାୟା ଆଉନେ, ହେୱାନ୍ ୱିଜ୍ୱି ଜିବୁନ୍ ପା ପାୟାଆୱାତାନ୍ନା। ଯୀଶୁଙ୍ଗ୍ ପାର୍ତି କିନାକାର୍ ୱିଜ୍ୱି ଜିବୁନ୍ ପାୟାଆନାର୍ 13 ଇମ୍ଣି ମାନାୟାର୍ ଈଶ୍ୱର ମେହିଙ୍ଗ୍ ପାର୍ତି କିନାରା, ହେୱାର୍ କାଜିଙ୍ଗ୍ ଇ ଚିଟି ଲେକିକିନାଙ୍ଗା, ଇନେସ୍କି ଏପେଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍, ଈଶ୍ୱର ମିଙ୍ଗେଙ୍ଗ୍ ୱିଜ୍ୱି ଜିବୁନ୍ ହିତ୍ତାନ୍ନା। 14 ହେୱାନ୍ ମା ପାର୍ତାନା ୱେନାନ୍ ଇଞ୍ଜି ଆପେଙ୍ଗ୍ ପୁଚାପ୍ନା, ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ଇନାକା ପା ତା ଇଚା ଅନୁସାରେ ଏନ୍ନାସ୍, ହେଦାଙ୍ଗ୍ ହେୱାନ୍ ହିଦ୍ନାନ୍। 15 ଆପେଙ୍ଗ୍ ପୁଚାପ୍ନା ଯେ, ଈଶ୍ୱରତିଙ୍ଗ୍ ଆସେଙ୍ଗ୍ ଇନାକା ଏନ୍ନାସ୍ ହେଦାଙ୍ଗ୍ ହେୱାନ୍ ହିଦ୍ନାନ୍, ଲାଗିଙ୍ଗ୍ ଇଦାଙ୍ଗ୍ ପା ପୁଚାପ୍ନା ଯେ, ଆପେଙ୍ଗ୍ ଇନାକା ହେୱାନିଙ୍ଗ୍ ଏନ୍ତାପ୍ନା ହେଦାଙ୍ଗ୍ ପାୟାଆତାପ୍ନା। 16 ଯଦି ଏପେଙ୍ଗ୍ ମି ପାର୍ତିକିନି ଟଣ୍ଡେନିଙ୍ଗ୍ ହାଃନି ଦଣ୍ଡ୍ ପାୟାଆୱିଲେଗ୍ଦି ପାପ୍ କାମାୟ୍ କିନାକା ହୁଡ଼୍ନାଦେର୍, ଲାଗିଙ୍ଗ୍ ଏପେଙ୍ଗ୍ ତା କାଜିଙ୍ଗ୍ ପାର୍ତାନା କିୟାଟ୍। ଈଶ୍ୱର ତା ଜିବୁନ୍ତିଙ୍ଗ୍ ରକ୍ଷା କିନାନ୍। ଯଦି ଇନେର୍ ହାଃନି ଦଣ୍ଡ୍ ପାୟା ଆତିଲେକେ ପାପ୍ କାମାୟ୍ କିଜି ମାନ୍ଗାନାନ୍, ମାତର୍ ହେୱାନ୍ ହାଃନି ଦଣ୍ଡ୍ ପାୟା ଆତିଲେକେ ପାପ୍ କାମାୟ୍ କିନି ମାନାୟାର୍ କାଜିଙ୍ଗ୍ ଏପେଙ୍ଗ୍ ପାର୍ତାନା କିୟାଟ୍ ଇଞ୍ଜି ୱେଚ୍ଚୁଙ୍ଗା। 17 ୱିଜୁ କରାପ୍ କାମାୟ୍ କିନାକା ଆନାତା ପାପ୍। ମାତର୍ ଇଲେକେ କେତେକ୍ ପାପ୍ କାମାୟ୍ ମାନାତ୍ ଯେ, ହାଃନି ଦଣ୍ଡ୍ ପାୟା ଆଉର୍। 18 ଇମ୍ଣାକାନ୍ ଈଶ୍ୱର ମେହି ଆତାନ୍ନା ହେୱାନ୍ ଇନାୱେଡ଼ାଙ୍ଗ୍ ପା ପାପ୍ କାମାୟ୍ କିଜି ମାନୁନ୍। ଇନେସ୍କି ହେୱାନ୍ ଈଶ୍ୱର ମେହି ଆତି କାଜିଙ୍ଗ୍ ଈଶ୍ୱର ହେୱାନିଙ୍ଗ୍ ରକ୍ଷା କିନାନ୍। ଆରେ ଶୟତାନ୍ ହେୱାନିଙ୍ଗ୍ ଡୁବେଦେଙ୍ଗ୍ ଆଡୁତ୍ ହେଦାଙ୍ଗ୍ ଆପେଙ୍ଗ୍ ପୁଚାପ୍ନା। 19 ଆପେଙ୍ଗ୍ ପୁଚାପ୍ନା ଯେ, ଆପେଙ୍ଗ୍ ଈଶ୍ୱର ମେହିକାପ୍, ମାତର୍ ଶୟତାନ୍ ଇ ପୁର୍ତିନି ମାନାୟାରିଙ୍ଗ୍ ତା ଅଦିନ୍ରେ ଇଡ଼୍ତାତ୍ନା। 20 ଆସେଙ୍ଗ୍ ପୁଚାସ୍ନା ଯେ, ଈଶ୍ୱର ତା ମେହିଙ୍ଗ୍ ପୁର୍ତିତାକେ ପକ୍ତାତାନ୍ନା। ଆରେ ହେୱାନ୍ ମାଙ୍ଗେଙ୍ଗ୍ ସତ୍ ଈଶ୍ୱରତିଙ୍ଗ୍ ପୁଞ୍ଜେଙ୍ଗ୍ ସାଇଜ କିତ୍ତାନ୍ନା। ନଙ୍ଗୟ୍ ଆପେଙ୍ଗ୍ ଈଶ୍ୱର ଆରେ ତା ମେହି ଯୀଶୁ ଖ୍ରୀଷ୍ଟତାକେ ମାହାଆଜି ମାନାପ୍। ହେୱାନ୍ନେ ରକାନ୍ ସତ୍ ଈଶ୍ୱର, ଆରେ ହେୱାନ୍ନେ ୱିଜ୍ୱି ଜିବୁନ୍। 21 ଏ କାଡ଼୍ଦେର୍, ମି ଗରବ୍ ବିତ୍ରେ ଈଶ୍ୱରତିଙ୍ଗ୍ ପିସ୍ତି, ଆରେ ମୁର୍ତି ପୁଜା କିନିତାଙ୍ଗ୍ ଦେହା ମାନାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation