୧ ଯୋହନ 4 - New Testament in Pengo Parja Languageୱିଜାକାରିଙ୍ଗ୍ ପାର୍ତି କିମାଟ୍ 1 ଏ ନା ଲାଡ୍ନି ସାଙ୍ଗକାଦେର୍, ୱିଜାର୍ ମାନାୟ୍ ଆନେଙ୍ଗ୍ ପବିତ୍ର ଆତ୍ମାତାଙ୍ଗ୍ ପାୟାଆତାଙ୍ଗ୍ନା ଇଞ୍ଜି ୱେଚ୍ଚିନି ମାନାୟାର୍ କାତାତିଙ୍ଗ୍ ପାର୍ତି କିମାଟ୍। ମାତର୍ ହେୱାର୍ ଈଶ୍ୱରତାଙ୍ଗ୍ ପବିତ୍ର ଆତ୍ମା ପାୟାଆତାର୍ କି ଆକାୟ୍ ଏପେଙ୍ଗ୍ ପରିକ୍ଷା କିଜି ହୁଡ଼ାଟ୍। ଇନେସ୍କି ଇ ପୁର୍ତିତାକେ ମିଚ୍ୱା ଭବିଷ୍ଯତବକ୍ତାର୍ ମାନାର୍। 2 ଇଲେକେ କିୟାଟ୍, ଲାଗିଙ୍ଗ୍ ହେୱାନ୍ ଈଶ୍ୱର ଆତ୍ମା ପାୟାଆତାନ୍ନା କି ଆକାୟ୍ ଏପେଙ୍ଗ୍ ପୁନାଦେର୍। ଯୀଶୁ ଖ୍ରୀଷ୍ଟ ମାନାୟ୍ ରୁପ୍ ଆସ୍ତି ପୁର୍ତିତାକେ ୱାଜିମାଚାନ୍ ଇଞ୍ଜି ଇମ୍ଣି ଭବିଷ୍ଯତବକ୍ତା ୱେଚ୍ନାନ୍, ଲାଗିଙ୍ଗ୍ ହେୱାନ୍ ଈଶ୍ୱରତାଙ୍ଗ୍ ପବିତ୍ର ଆତ୍ମା ପାୟାଆତାନ୍ନା। 3 ଆରେ ଇମ୍ଣି ଭବିଷ୍ଯତବକ୍ତା ଯୀଶୁ ଖ୍ରୀଷ୍ଟ ମାନାୟ୍ ରୁପ୍ ଆସ୍ତି ପୁର୍ତିତାକେ ୱାତାନ୍ନା ଇଞ୍ଜି ୱେଚୁନ୍। ହେୱାନ୍ ଈଶ୍ୱରତାଙ୍ଗ୍ ପବିତ୍ର ଆତ୍ମା ପାୟାଆୱାତାନ୍ନା, ମାତର୍ ତାବେ ଖ୍ରୀଷ୍ଟଙ୍ଗ୍ ବିରଦ୍ କିନି ମାନାୟାର୍ ଆତ୍ମାଲେକେ ମାନାତ୍। ହେୱାନ୍ ପୁର୍ତିତାକେ ୱାତାନେ ଇଞ୍ଜି ଏପେଙ୍ଗ୍ ୱେଚାଦେର୍ନା, ଆରେ ହେୱାନ୍ ନଙ୍ଗୟ୍ ପୁର୍ତିତାକେ ମାନାନ୍। 4 ଏ କାଡ଼୍ଦେର୍, ଏପେଙ୍ଗ୍ ଈଶ୍ୱର ମାନାୟ୍ କାଦେର୍, ଆରେ ଏପେଙ୍ଗ୍ ହେୱାର୍ ଈଶ୍ୱରତାଙ୍ଗ୍ ୱେନ୍ୱାଦାଙ୍ଗ୍ ମିଚ୍ ୱେଚ୍ନି ମାନାୟାର୍ କାତାତିଙ୍ଗ୍ ପାର୍ତି କିୱାତାଦେର୍ନା। ଇନେସ୍କି ମି ବିତ୍ରେ ପବିତ୍ର ଆତ୍ମା ମାନାତ୍, ଆରେ ହେ ପବିତ୍ର ଆତ୍ମା ନେ ପୁର୍ତିନି ଶୟତାନନି ଆତ୍ମାତାଙ୍ଗ୍ ପା ଗାଜା। 5 ହେୱାର୍ ଈଶ୍ୱର ବେଣ୍ତିଙ୍ଗ୍ ୱେନ୍ୱାଦାଙ୍ଗ୍ ମିଚ୍ ୱେଚ୍ନି ମାନାୟାର୍ ପୁର୍ତିତାଙ୍ଗ୍ ୱାତାର୍ନା, ଆରେ ହେୱାର୍ ପୁର୍ତିନି ମାନାୟାର୍ତାକେ ହିକ୍ଷା ହିନାର୍। ହେ ହିକ୍ଷାତିଙ୍ଗ୍ ପୁର୍ତିନି ବିନ୍ଜାତିନି ମାନାୟାର୍ ୱେନାରା। 6 ମାତର୍ ଆପେଙ୍ଗ୍ ଈଶ୍ୱରନି ଲକ୍। ହେଦାଙ୍ଗ୍ କାଜିଙ୍ଗ୍ ଇମ୍ଣି ମାନାୟ୍ ଈଶ୍ୱରତିଙ୍ଗ୍ ପୁଚାନ୍ନା ହେୱାନ୍ ମା ହିକ୍ଷାତିଙ୍ଗ୍ ୱେନାନ୍। ଆରେ ଇମ୍ଣି ମାନାୟ୍ ଈଶ୍ୱରତିଙ୍ଗ୍ ପୁନ୍ୱାତାନ୍ନା ହେୱାନ୍ ମା ସତ୍ ହିକ୍ଷାତିଙ୍ଗ୍ ୱେନୁନ୍। ହେଲେକେ ଇନେର୍ତାକେ ପବିତ୍ର ଆତ୍ମା ମାନାତ୍ ଆରେ ଇନେର୍ତାକେ ମିଚ୍ ଆତ୍ମା ମାନାତ୍ ହେଦାଙ୍ଗ୍ ଚିନ୍ କିୟାଆନାତ୍। ଈଶ୍ୱର ୱିଜାରିଙ୍ଗ୍ ଲାଡ୍ କିନାନ୍ 7 ଏ ନା ଲାଡ୍ନି ସାଙ୍ଗ କାଦେର୍, ଆସେଙ୍ଗ୍ ପା ଜାର୍-ଜାର୍ବିତ୍ରେ ଲାଡ୍କିନି ଦର୍କାର୍, ଇନେସ୍କି ଈଶ୍ୱରତାଙ୍ଗ୍ ହେ ଲାଡ୍ ୱାନାତ୍। ଆରେ ଇମ୍ଣି ମାନାୟ୍ ଜାର୍-ଜାର୍ବିତ୍ରେ ଲାଡ୍ କିନାନା, ହେୱାନ୍ ଈଶ୍ୱର ମେହିଙ୍ଗ୍ ଆରେ ଈଶ୍ୱରତିଙ୍ଗ୍ ପୁଚାନ୍ନା। 8 ଇମ୍ଣି ମାନାୟ୍ ଜାର୍-ଜାର୍ବିତ୍ରେ ଲାଡ୍ କିଉନ୍, ହେୱାନ୍ ଈଶ୍ୱରତିଙ୍ଗ୍ ପୁନ୍ୱାତାନ୍ନା, ଇନେସ୍କି ଈଶ୍ୱରନେ ଲାଡ୍। 9 ଈଶ୍ୱର ମାଙ୍ଗେଙ୍ଗ୍ ଇଲେକେ ଲାଡ୍ କିଦ୍ନାନା, ହେଦାଙ୍ଗ୍ କାଜିଙ୍ଗ୍ ହେୱାନ୍ ତା ରକାନ୍ ଇଞ୍ଜି ମେହିଙ୍ଗ୍ ପୁର୍ତିତାକେ ପକ୍ତାତାନ୍। ଇନେସ୍କି ହେୱାନ୍ ମାଙ୍ଗେଙ୍ଗ୍ ୱିଜ୍ୱି ଜିବୁନ୍ ହିଦ୍ନାନ୍। 10 ଆସେଙ୍ଗ୍ ଈଶ୍ୱରତିଙ୍ଗ୍ ଲାଡ୍ କିନାସା, ହେଦାଙ୍ଗ୍ ଆକାୟ୍, ମାତର୍ ହେୱାନ୍ ମାଙ୍ଗେଙ୍ଗ୍ ଲାଡ୍ କିତ୍ତାନ୍। ଆରେ ତା ମେହିଙ୍ଗ୍ ମା ପାପ୍ନି ଦଣ୍ଡ୍ତିଙ୍ଗ୍ ପିଣ୍ଜି ଅନି କାଜିଙ୍ଗ୍ କୃଶକାଟ୍ତାକେ ହାଃଦେଙ୍ଗ୍ ପକ୍ତାତାନ୍, ଏଲେଙ୍ଗ୍ କିଜି ହେୱାନ୍ ତା ଲାଡ୍ତିଙ୍ଗ୍ ଚଚ୍ଚାତାନ୍। 11 ଏ ନା ଲାଡ୍ନି ସାଙ୍ଗ କାଦେର୍, ଈଶ୍ୱର ମାଙ୍ଗେଙ୍ଗ୍ ଇଲେକେ ଲାଡ୍ କିତ୍ତାନ୍। ଲାଗିଙ୍ଗ୍ ଆସେଙ୍ଗ୍ ପା ଜାର୍-ଜାର୍ବିତ୍ରେ ଲାଡ୍କିନି ଦର୍କାର୍। 12 ଈଶ୍ୱରତିଙ୍ଗ୍ ଇନାୱେଡ଼ାଙ୍ଗ୍ ପା ଇନେର୍ ହୁଡ଼୍ୱାତାର୍ନା। ମାତର୍ ଯଦି ଆସେଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିନାସ୍, ଲାଗିଙ୍ଗ୍ ଈଶ୍ୱର ମା ଲାହାଙ୍ଗ୍ ମାନାନ୍, ଆରେ ତା ଲାଡ୍ ମା ବିତ୍ରେ ପୁରା ଆତାତ୍ନା। 13 ଆସେଙ୍ଗ୍ ପୁଚାସ୍ନା ଯେ, ଈଶ୍ୱର ମା ଲାହାଙ୍ଗ୍ ମାନାନ୍, ଆରେ ଆସେଙ୍ଗ୍ ତା ଲାହାଙ୍ଗ୍ ମାନାସ୍, ଇନେସ୍କି ହେୱାନ୍ ମା ତାକେ ମାଞ୍ଜେଙ୍ଗ୍ ତା ପବିତ୍ର ଆତ୍ମା ହିତ୍ତାନ୍ନା। 14 ଆବା ଈଶ୍ୱର ତା ମେହି ଯୀଶୁଙ୍ଗ୍ ପୁର୍ତିନି ମାନାୟାରିଙ୍ଗ୍ ଉଦାର୍ କିଦ୍ଦେଙ୍ଗ୍ ପକ୍ତାତାନ୍ନା। ଇଦାଙ୍ଗ୍ ଆପେଙ୍ଗ୍ ଜାର୍ କାଣ୍କୁତାଙ୍ଗ୍ ହୁଡ଼ତାପ୍ନା, ଆରେ ତା ବିଷୟରେ ମିଙ୍ଗେଙ୍ଗ୍ ୱେଚ୍ଚାନାପା। 15 ଇମ୍ଣି ମାନାୟ୍ ଯୀଶୁଙ୍ଗ୍ ଈଶ୍ୱର ମେହି ଇଞ୍ଜି ୱେଚ୍ନାନ୍, ଈଶ୍ୱର ତାବେ ମାନାନ୍। ଆରେ ହେୱାନ୍ ଈଶ୍ୱରତାକେ ମାନାନ୍। 16 ଆପେଙ୍ଗ୍ ପୁଚାପ୍ନା, ଈଶ୍ୱର ମାଙ୍ଗେଙ୍ଗ୍ ବେସି ଲାଡ୍ କିଦ୍ନାନା, ଆରେ ଆପେଙ୍ଗ୍ ତାଙ୍ଗେଙ୍ଗ୍ ଆହା କିନାପା। ଇନେର୍ ଲାଡ୍ କିନାନା, ହେୱାନ୍ ଈଶ୍ୱର ଲାହାଙ୍ଗ୍ ମାନ୍ଙ୍ଗାନାନ୍ ଆରେ ଈଶ୍ୱର ତା ଲାହାଙ୍ଗ୍ ମାନ୍ଙ୍ଗାନାନ୍। ଇନେସ୍କି ଈଶ୍ୱରନେ ଲାଡ୍। 17 ଲାଗିଙ୍ଗ୍ ବିଚାର୍ କିନିହିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ଦଣ୍ଡ୍ ହିଦୁନ୍, ଇନେସ୍କି ହେୱାନ୍ ଇନେସ୍ କିଜି ମାନାୟାରିଙ୍ଗ୍ ଲାଡ୍ କିନାନା, ଇଲେକେ ଆସେଙ୍ଗ୍ ପା ପୁର୍ତିନି ମାନାୟାରିଙ୍ଗ୍ ଲାଡ୍ କିନାସା, ଇନେସ୍କି ତା ଲାଡ୍ ମାବେ ମାନାତ୍। 18 ଲାଡ୍ କିନିତାକେ ପାଣ୍ଡ୍ରୁ ହିଲ୍ଗୁତ୍, ଇନେସ୍କି ସତ୍ ଲାଡ୍ନେ ପାଣ୍ଡ୍ରୁତିଙ୍ଗ୍ ଦେହା କିନାତ୍, ଯଦି ହେୱାର୍ ଈଶ୍ୱର ମାଙ୍ଗେଙ୍ଗ୍ ଦଣ୍ଡ୍ ହିଦ୍ନାନା ଇଞ୍ଜି ପାଣ୍ଡ୍ରା ଆନାର୍। ହେୱାର୍ତାକେ ଈଶ୍ୱରତି ଲାଡ୍ ମା ତାକେ ପୁରା ଆଉତେ। 19 ଈଶ୍ୱର ପାର୍ତୁମ୍ ମାଙ୍ଗେଙ୍ଗ୍ ଲାଡ୍ କିତ୍ତାନ୍, ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିନାପା। 20 ଇମ୍ଣି ମାନାୟ୍ ଈଶ୍ୱରତିଙ୍ଗ୍ ଲାଡ୍ କିନାଙ୍ଗା ଇଞ୍ଜି ୱେଚ୍ନାନ୍, ଆରେ ତା ଟଣ୍ଡାହିଙ୍ଗ୍ ଗିଣ୍ କିନାନ୍, ହେୱାନ୍ ମିଚ୍ୱା। ଯଦି ହେୱାନ୍ ତା ଟଣ୍ଡାହିଙ୍ଗ୍ ହୁଡ଼୍ଜି ପା ଲାଡ୍ କିଉନା। ଲାଗିଙ୍ଗ୍ ହୁଡ଼୍ଦେଙ୍ଗ୍ ଆଡ୍ୱି ଈଶ୍ୱରତିଙ୍ଗ୍ ଇନେସ୍ କିଜି ଲାଡ୍ କିନାନ୍। 21 ଆରେ ଈଶ୍ୱର ନିଜେ ଇ ଆଦେସ୍ ହିତ୍ତାନ୍ନା, ଇନେର୍ ଈଶ୍ୱରତିଙ୍ଗ୍ ଲାଡ୍ କିନାନା ହେୱାନ୍ ତା ଟଣ୍ଡାହିଙ୍ଗ୍ ପା ଲାଡ୍ କିନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation