୧ ଯୋହନ 3 - New Testament in Pengo Parja Language1 ମା ଆବା ଈଶ୍ୱର ମାଙ୍ଗେଙ୍ଗ୍ ବେସି ଲାଡ୍ କିଦ୍ନାନ୍ ଯେ, ଆସେଙ୍ଗ୍ ମେହିକାସ୍ ଆଦେଙ୍ଗ୍ ଆଡ୍ନାସ୍, ଆରେ ଆସେଙ୍ଗ୍ ହାତ୍ପା ତା ମେହିକାସ୍। ହେଦାଙ୍ଗ୍ କାଜିଙ୍ଗ୍ ଇ ପୁର୍ତିନି ମାନାୟାର୍ ମାଙ୍ଗେଙ୍ଗ୍ ଚିନ୍ କିଦୁର୍, ଇନେସ୍କି ହେୱାର୍ ଈଶ୍ୱରତିଙ୍ଗ୍ ପା ଚିନ୍ କିୱାଦାଙ୍ଗ୍ ମାଚାର୍। 2 ଏ ନା ଲାଡ୍ନି ସାଙ୍ଗ କାଦେର୍, ନଙ୍ଗୟ୍ ଆସେଙ୍ଗ୍ ଈଶ୍ୱର ମେହିକାସ୍ ଆତାସ୍ନା। ଏଚେପାଦ୍ନା ଯୀଶୁ ଖ୍ରୀଷ୍ଟ ଆରେରଗ ପୁର୍ତିତାକେ ୱାନାନ୍, ହେପାଦ୍ନା ଆସେଙ୍ଗ୍ ଇନେସ୍ ଚଞ୍ଜିଆ ଆନାତ୍ ହେଦାଙ୍ଗ୍ ପୁନ୍ୱାତାସ୍ନା। ମାତର୍ ଇଦାଙ୍ଗ୍ ଆସେଙ୍ଗ୍ ପୁଚାସ୍ନା, ହେୱାନ୍ ଏଚେପାଦ୍ନା ଆରେରଗ ୱାନାନ୍ ଆସେଙ୍ଗ୍ ତା ଲେକେ ଆନାସ୍, ଇନେସ୍କି ହେୱାନ୍ ଇନେସ୍ଲେକେ ସତ୍ ହେଲେକେ ତାଙ୍ଗେଙ୍ଗ୍ ହୁଡ଼୍ୟା ଆନାତ୍। 3 ଆରେ ଇମ୍ଣି ମାନାୟ୍ ଖ୍ରୀଷ୍ଟଙ୍ଗ୍ ପାର୍ତି କିଜି ଆହା କିନାନା। ଲାଗିଙ୍ଗ୍ ଈଶ୍ୱର ଇନେସ୍କି ପବିତ୍ର ମାନାନ୍, ହେଲେକେ ହେୱାନ୍ ପା ଜାର୍ତିଙ୍ଗ୍ ପବିତ୍ର କିୟେନ୍। 4 ଇମ୍ଣି ମାନାୟ୍ ପାପ୍ କାମାୟ୍ କିଜି ମାନାନ୍, ହେୱାନ୍ ଈଶ୍ୱର ନିୟମ୍ତିଙ୍ଗ୍ ମାନି କିଦେଙ୍ଗ୍ ଇଚା କିଉନା, ଆରେ ଈଶ୍ୱର ନିୟମ୍ତିଙ୍ଗ୍ ମାନିକିୱାକା ନେ ପାପ୍। 5 ଆରେ ଏପେଙ୍ଗ୍ ପୁନାଟ୍ ଯେ, ଯୀଶୁ ମା ପାପ୍ ୱିଜୁ ପିଣ୍ଜି ଅଦେଙ୍ଗ୍ ପୁର୍ତିତାକେ ୱାତାନ୍, ଆରେ ତାବେ ଇନା ପାପ୍ ହିଲେତ୍। 6 ଇମ୍ଣି ମାନାୟ୍ ଖ୍ରୀଷ୍ଟତାକେ ମାନାନ୍, ହେୱାନ୍ ପାପ୍ କିଉନ୍। ମାତର୍ ଇମ୍ଣି ମାନାୟ୍ ପାପ୍ କିଜି ମାନାନ୍, ହେୱାନ୍ ତାଙ୍ଗେଙ୍ଗ୍ ପୁନୁନେ କି ବୁଜାଆୱାତାନ୍ନା। 7 ଏ କାଡ଼୍ଦେର୍, ଜାଗ୍ରତ୍ ଆଜି ମାନାଟ୍, ଇନେର୍ ମିଙ୍ଗେଙ୍ଗ୍ ଟକାୟ୍ କିଦ୍ମେର୍। ଖ୍ରୀଷ୍ଟ ଇନେସ୍ ଦରମ୍, ହେଲେକେ ନେ ଇମ୍ଣି ମାନାୟ୍ ଦରମ୍ କାମାୟ୍ କିନାନ୍, ହେୱାନ୍ ପା ତାଲେକେ ଦରମ୍ ଆନାନ୍। 8 ଇନେର୍ ପାପ୍ କାମାୟ୍ କିଜି ମାନାନ୍, ହେୱାନ୍ ଶୟତାନ ମେହି, ଇନେସ୍କି ଶୟତାନ ଆରମ୍ତାଙ୍ଗ୍ ପାପ୍ କାମାୟ୍ କିତାତ୍ନା। ମାତର୍ ଶୟତାନ କିତି କାମାୟ୍ତିଙ୍ଗ୍ ସେସ୍ କିଦେଙ୍ଗ୍ ଈଶ୍ୱର ମେହି ଯୀଶୁ ଖ୍ରୀଷ୍ଟ ପୁର୍ତିତାକେ ୱାତାନ୍। 9 ଇମ୍ଣି ମାନାୟାର୍ ଈଶ୍ୱର ମେହିର୍, ହେୱାର୍ ପାପ୍ କିଉର୍, ଇନେସ୍କି ଈଶ୍ୱର ତା ଜିବୁନ୍ ହେୱାରିଙ୍ଗ୍ ହିତାନ୍ନା। ଲାଗିଙ୍ଗ୍ ହେୱାର୍ ପାପ୍ କିଜି ମାନୁର୍, ଇନେସ୍କି ହେୱାର୍ ଈଶ୍ୱରତାଙ୍ଗ୍ ୱାତାର୍ନା। 10 ଇମ୍ଣି ମାନାୟ୍ ଦରମ୍ କାମାୟ୍ କିଉନ୍, ଆରେ ତା ଟଣ୍ଡାହିରିଙ୍ଗ୍ ଲାଡ୍ କିଉନ୍। ହେୱାନ୍ ଈଶ୍ୱର ଲକ୍ ଆକାୟ୍। ଇବେତାଙ୍ଗ୍ ଆସେଙ୍ଗ୍ ପୁଞ୍ଜେଙ୍ଗ୍ ଆଡ୍ନାସ୍ ଯେ, ଇନେର୍ ଈଶ୍ୱର ମେହି, ଆରେ ଇନେର୍ ଶୟତାନ ମେହି। ଜାର୍ ଜାର୍ବିତ୍ରେ ଲାଡ୍ କିୟାଟ୍ 11 ଆସେଙ୍ଗ୍ ଆଗେତାଙ୍ଗ୍ ଇ କାତା ୱେଚାସ୍ନା। ଆସେଙ୍ଗ୍ ଜାର୍-ଜାର୍ବିତ୍ରେ ଲାଡ୍କିନି ଦର୍କାର୍। 12 ଆସେଙ୍ଗ୍ ଆଦମ ମେହି କୟିନ ଲେକେ ଆଉସ୍, ହେୱାନ୍ ଶୟତାନନି ଲକ୍ ମାଚାନ୍, ଆରେ ତା ଟଣ୍ଡାହିଙ୍ଗ୍ ମାର୍ନେ ଅସ୍ତାନ୍। ଇନେସ୍କି ତା ଟଣ୍ଡାହି ଦରମ୍ କାମାୟ୍ କିଜି ମାଚାନ୍। ମାତର୍ କୟିନ କରାପ୍ କାମାୟ୍ କିଜି ମାଚାନ୍, ହେଦାଙ୍ଗ୍ କାଜିଙ୍ଗ୍ ହେୱାନ୍ ତା ଟଣ୍ଡାହିଙ୍ଗ୍ ମାର୍ନେ ଅସ୍ତାନ୍। 13 ଏ ଟଣ୍ଡାର୍କାଦେର୍, ପୁର୍ତିନି ମାନାୟାର୍ ମିଙ୍ଗେଙ୍ଗ୍ ଗିଣ୍ କିଦ୍ନାର୍, ଲାଗିଙ୍ଗ୍ ଏପେଙ୍ଗ୍ ଚାନିଆ ଆମାଟ୍। 14 ଆପେଙ୍ଗ୍ ପୁଚାପ୍ନା ଯେ, ଆପେଙ୍ଗ୍ ହାଃତି ମାନାୟ୍ ଲେକେ ଆକାୟ୍, ମାତର୍ ଆପେଙ୍ଗ୍ ୱିଜ୍ୱି ଜିବୁନ୍ ପାୟା ଆତାକାପ୍, ଇନେସ୍କି ଆପେଙ୍ଗ୍ ମା ଟଣ୍ଡାରିଙ୍ଗ୍ ଲାଡ୍ କିନାପା। ମାତର୍ ଇମ୍ଣି ମାନାୟ୍ ଜାର୍ ଟଣ୍ଡେନିଙ୍ଗ୍ ଲାଡ୍ କିଉନ୍ ହେୱାନ୍ ହାଃତି ମାନାୟ୍ ଲେକେ। 15 ଇମ୍ଣି ମାନାୟ୍ ଜାର୍ ଟଣ୍ଡେନିଙ୍ଗ୍ ଗିଣ୍ କିନାନ୍, ହେୱାନ୍ ମାନାୟ୍ ମାରୁ। ଏପେଙ୍ଗ୍ ପୁଚାଦେର୍ନା ଯେ, ମାନାୟ୍ ଅସ୍ତାକାର୍ ୱିଜ୍ୱି ଜିବୁନ୍ ପାୟା ଆଉର୍। 16 ଖ୍ରୀଷ୍ଟ ମା କାଜିଙ୍ଗ୍ ତା ଯିବୁନ୍ ହିତିଲେ ଆସେଙ୍ଗ୍ ଲାଡ୍ କିନାକା ପୁଚାସ୍। ଆରେ ଜାର୍ ଟଣ୍ଡାର୍ କାଜିଙ୍ଗ୍ ପା ଜାର୍ ଜିବୁନ୍ ପା ହିନି ଦର୍କାର୍। 17 ମାତର୍ ର ହାଉକାର୍ ମାନାୟ୍ ପାର୍ତିକିନି ଟଣ୍ଡାହିଙ୍ଗ୍ ଗରିବ୍ ଆଜି ମାନାକା ହୁଡ଼୍ଜି ପା ସାଇଜ କିଉନ୍, ଲାଗିଙ୍ଗ୍ ତାବେ ଈଶ୍ୱରତି ଲାଡ୍ ହିଲୁତ୍। 18 ଏ କାଡ଼୍ଦେର୍, ଏପେଙ୍ଗ୍ ବେଣ୍-ବେଣ୍ତାଙ୍ଗ୍ ଲାଡ୍ କିମାଟ୍, ମାତର୍ ହେୱାରିଙ୍ଗ୍ ସାଇଜ କିଜି, ହାତ୍ପା ଲାଡ୍କିନି ଦର୍କାର୍। 19 ଇଲେକେ ଆସେଙ୍ଗ୍ ଜେକନିକାରିଙ୍ଗ୍ ଲାଡ୍ କିନାସ୍, ଲାଗିଙ୍ଗ୍ ଆସେଙ୍ଗ୍ ଈଶ୍ୱର ମେହିକାସ୍ ଇଞ୍ଜି ପୁନାସ୍, 20 ଆରେ ମା ମାନ୍ ଏଚେପାଦ୍ନା ପାପ୍ କିତାୟ୍ନା ଇଞ୍ଜି ଦସ୍ କିଦ୍ନାତ୍। ହେପାଦ୍ନା ଆସେଙ୍ଗ୍ ଈଶ୍ୱରତାକେ ପାର୍ତାନା କିନି ଦର୍କାର୍। ଲାଗିଙ୍ଗ୍ ହେୱାନ୍ ମା ମାନ୍ତିଙ୍ଗ୍ ତିର୍ କିଦ୍ନାନ୍। ଇନେସ୍କି ଈଶ୍ୱର ମା ଗରବ୍ତାଙ୍ଗ୍ ଗାଜାକାନ୍, ଆରେ ହେୱାନ୍ ୱିଜୁ ପୁନାନା। 21 ଏ ନା ଲାଡ୍ନି ସାଙ୍ଗ କାଦେର୍, ଏଚେକାଡ଼୍ଦ ମା ମାନ୍ ପାପ୍ କିତାୟ୍ନା ଇଞ୍ଜି ଦସ୍ ହିଦୁତ୍। ଲାଗିଙ୍ଗ୍ ଆସେଙ୍ଗ୍ ସାସ୍ ଆଜି ଈଶ୍ୱରତାକେ ୱାଦେଙ୍ଗ୍ ଆଡ୍ନାସ୍। 22 ଆରେ ଆସେଙ୍ଗ୍ ଇନା-ଇନାକା ଈଶ୍ୱରତିଙ୍ଗ୍ ଏନ୍ନାସ୍ ହେଦାଙ୍ଗ୍ ମାଙ୍ଗେଙ୍ଗ୍ ହିଦ୍ନାନ୍, ଇନେସ୍କି ତା ଆଦେସ୍ତିଙ୍ଗ୍ ମାନିକିଜି ହେୱାନ୍ ୱାରିୟା ଆନିଲେକେ ଆପେଙ୍ଗ୍ କାମାୟ୍ କିନାପା। 23 ଈଶ୍ୱର ମାଙ୍ଗେଙ୍ଗ୍ ଇ ଆଦେସ୍ ହିତ୍ତାନ୍ନା ଯେ, ତା ମେହି ଯୀଶୁ ଖ୍ରୀଷ୍ଟଙ୍ଗ୍ ପାର୍ତିକିନି ଦର୍କାର୍, ଆରେ ହେୱାନ୍ ହିତ୍ତି ଆଦେସ୍ ଅନୁସାରେ ଜାର୍-ଜାର୍ବିତ୍ରେ ଲାଡ୍ କିୟାଆନାତ୍। 24 ଇମ୍ଣି ମାନାୟ୍ ଈଶ୍ୱର ଆଦେସ୍ତିଙ୍ଗ୍ ମାନି କିନାନ୍। ହେୱାନ୍ ଈଶ୍ୱର ହୁଦାଙ୍ଗ୍ ମାହାଆଜି ମାନାନ୍, ଆରେ ଈଶ୍ୱର ତା ହୁଦାଙ୍ଗ୍ ମାହାଆଜି ମାନାନ୍। ଇନେସ୍କି ପବିତ୍ର ଆତ୍ମା ମା ବିତ୍ରେ ମାନାତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation