୧ ଯୋହନ 2 - New Testament in Pengo Parja Languageଯୀଶୁ ଈଶ୍ୱର ଆଗେ ମାପଣ୍ଡାଙ୍ଗ୍ ଆଜି ୱେଚ୍ନାକାନ୍ 1 ଏ କାଡ଼୍ଦେର୍, ଏପେଙ୍ଗ୍ ଇନେସ୍କି ପାପ୍ କିଉଦେର୍, ଇଦାଙ୍ଗ୍ ଆନେଙ୍ଗ୍ ମି କାଜିଙ୍ଗ୍ ଲେକିକିନାଙ୍ଗା। ମାତର୍ ଏପେଙ୍ଗ୍ ଯଦି ପାପ୍ କିନାଦେର୍, ଆବା ଈଶ୍ୱର ଆଗେ ମାପଣ୍ଡାଙ୍ଗ୍ ଆଜି ୱେଚ୍ନାକାନ୍ ର ମାନାୟ୍ ମାନାନ୍, ହେୱାନ୍ ଦରମ୍ ଯୀଶୁ ଖ୍ରୀଷ୍ଟ। 2 ଖ୍ରୀଷ୍ଟ ମା ପାପ୍ନି ଦଣ୍ଡ୍ତିଙ୍ଗ୍ ପିଣ୍ଜି ଅନି କାଜିଙ୍ଗ୍ ହାଃତାନ୍। ହେୱାନ୍ ମା ପାପ୍ ନେ ଅୱାତାନ୍ନା, ମାତର୍ ପୁର୍ତିନି ୱିଜାର୍ ମାନାୟାର୍ ପାପ୍ତିଙ୍ଗ୍ ଅତାନ୍। 3 ଯଦି ଆସେଙ୍ଗ୍ ତା ଆଦେସ୍ତିଙ୍ଗ୍ ମାନି କିନାସ୍, ଲାଗିଙ୍ଗ୍ ଆସେଙ୍ଗ୍ ନିଜେତିଙ୍ଗ୍ ପୁଞ୍ଜେଙ୍ଗ୍ ଆଡ୍ନାସ୍ ଯେ, ଆପେଙ୍ଗ୍ ହେୱାନ୍ତାକେ ହାର୍ ରୱାଣ୍ ଇଡ଼୍ତାସ୍ନା। 4 ଇମ୍ଣି ମାନାୟ୍ ତା ଆଜ୍ଞା ମାନିକିୱାଦାଙ୍ଗ୍ ତାଙ୍ଗେଙ୍ଗ୍ ପୁଚାଙ୍ଗ୍ନା ଇଞ୍ଜି ୱେଚ୍ନାନ୍, ହେୱାନ୍ ମିଚ୍ୱା, ଆରେ ହେୱାନ୍ ସତ୍ ଯିବୁନ୍ କାଟି କିଉନା। 5 ମାତର୍ ଇମ୍ଣି ମାନାୟ୍ ଈଶ୍ୱର ଆଜ୍ଞାତିଙ୍ଗ୍ ମାନି କିନାନ୍, ହେୱାନ୍ ହାତ୍ପା ତାଙ୍ଗେଙ୍ଗ୍ ଲାଡ୍ କିନାନା। ଲାଗିଙ୍ଗ୍ ପୁଞ୍ଜେଙ୍ଗ୍ ଆଡ୍ନାସ୍ ଯେ, ଆସେଙ୍ଗ୍ ତାବେ ମାନାସ୍। 6 ଇମ୍ଣି ମାନାୟ୍ ଈଶ୍ୱର ହୁଦାଙ୍ଗ୍ ମାନାଙ୍ଗ୍ ଇଞ୍ଜି ୱେଚ୍ନାନା, ହେୱାନ୍ ଯୀଶୁ ଖ୍ରୀଷ୍ଟ ଲେକେ ଯିବୁନ୍ କାଟିକିନି ଦର୍କାର୍। ପୁନି ଆଦେସ୍ 7 ଏ ଲାଡ୍ନି ସାଙ୍ଗ କାଦେର୍, ଆନେଙ୍ଗ୍ ମି କାଜିଙ୍ଗ୍ ପୁନି ଆଦେସ୍ ଲେକିକିୱାତାଙ୍ଗ୍ନା, ମାତର୍ ପାନି ଆଦେସ୍ ଇମ୍ଣାକା କି ଆଗେତାଙ୍ଗ୍ ଏପେଙ୍ଗ୍ ପାୟା ଆତାଦେର୍ନା। ଏଚେପାଦ୍ନା ଏପେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତି କିଜି ମାଚାଦେର୍, ହେପାଦ୍ନା ଏପେଙ୍ଗ୍ ଇଲେକେ ଆଦେସ୍ ପାୟାଆଜି ମାଚାଦେର୍, “ଏପେଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିୟାଟ୍।” 8 ଆତିସ୍ପା ଆନେଙ୍ଗ୍ ପୁନି ଆଦେସ୍ ମିତାକେ ଲେକିକିନାଙ୍ଗା, ଇଦାଙ୍ଗ୍ ଖ୍ରୀଷ୍ଟତାକେ ଆରେ ମିତାକେ ସତ୍ ଇଞ୍ଜି ପୁନ୍ୟା ଆନାତା। ଇନେସ୍କି ମାଜ୍ଗାଲେକେ କରାପ୍ କାମାୟ୍ତିଙ୍ଗ୍ ଗୁଚାୟ୍ କିତାନ୍ନା, ଆରେ ଅଜଡ଼୍ଲେକେ ଈଶ୍ୱରତି ସତ୍ତିଙ୍ଗ୍ ମାନାୟାର୍ ହୁଡ଼୍ନାରା। 9 ଯଦି ଇମ୍ଣି ମାନାୟ୍ ୱେଚ୍ନାନ୍, “ଆନେଙ୍ଗ୍ ଅଜଡ଼୍ତାକେ ମାନାଙ୍ଗ୍,” ମାତର୍ ଯଦି ହେୱାନ୍ ପାର୍ତିକିନି ଟଣ୍ଡେନିଙ୍ଗ୍ ଗିଣ୍ କିନାନ୍। ହେୱାନ୍ ନଙ୍ଗୟ୍ ପାତେକ୍ ମାଜ୍ଗାତାକେ ମାନାନ୍। 10 ଇମ୍ଣି ମାନାୟ୍ ଜାର୍ ଟଣ୍ଡେନିଙ୍ଗ୍ ଲାଡ୍ କିନାନ୍, ହେୱାନ୍ ଅଜଡ଼୍ତାକେ ମାନାନ୍, ହେଦାଙ୍ଗ୍ କାଜିଙ୍ଗ୍ ଜେକନିକାରିଙ୍ଗ୍ ପାପ୍ କିୟିକିଦେଙ୍ଗ୍ ହେୱାନ୍ତାକେ ଇନାକା ପା ହିଲେତ୍। 11 ମାତର୍ ଇମ୍ଣି ମାନାୟ୍ ଜାର୍ ଟଣ୍ଡେନିଙ୍ଗ୍ ଗିଣ୍ କିନାନ୍। ହେୱାନ୍ ମାଜ୍ଗାତାକେ ମାନିଲେକେ ପାପ୍ କାମାୟ୍ କିନାନା, ଆରେ ପାପ୍ କାମାୟ୍ନି ମାଜ୍ଗାତାକେ ମାନ୍ଞ୍ଜି ଜାଙ୍ଗ୍ତାନ୍ନା, ମାଜ୍ଗା ମାଚିଲେଙ୍ଗ୍ ହେୱାନ୍ ଇନାକାପା ହୁଡ଼୍ଦେଙ୍ଗ୍ ଆଡୁନା। 12 ଏ କାଡ଼୍ଦେର୍, ଆନେଙ୍ଗ୍ ମି କାଜିଙ୍ଗ୍ ଲେକିକିନାଙ୍ଗା ଯେ, ଯୀଶୁ ଖ୍ରୀଷ୍ଟ କାଜିଙ୍ଗ୍ ମି ପାପ୍ କେମା ଆତାତ୍ନା। 13 ଏ ଆବାର୍କାଦେର୍, ଆନେଙ୍ଗ୍ ମି କାଜିଙ୍ଗ୍ ଲେକିକିନାଙ୍ଗା ଯେ, ଖ୍ରୀଷ୍ଟ ଆଗେତାଙ୍ଗ୍ ମାନାନ୍, ଆରେ ଏପେଙ୍ଗ୍ ହେୱାନିଙ୍ଗ୍ ପୁଚାଦେର୍ନା। ଏ ଦାଙ୍ଗ୍ଣା ହିମ୍ଣା କାଦେର୍ ଆନେଙ୍ଗ୍ ମି କାଜିଙ୍ଗ୍ ଲେକିକିନାଙ୍ଗା ଯେ, ଆବା ଈଶ୍ୱର ଶୟତାନ୍ତିଙ୍ଗ୍ ଆରାୟ୍ କିଦେଙ୍ଗ୍ ମିଙ୍ଗେଙ୍ଗ୍ ଶାକ୍ତି ହିତ୍ତାନ୍ନା। 14 ଏ କାଡ଼୍ଦେର୍, ଆନେଙ୍ଗ୍ ମି କାଜିଙ୍ଗ୍ ଲେକିକିନାଙ୍ଗା ଯେ, ଏପେଙ୍ଗ୍ ଆବା ଈଶ୍ୱରତିଙ୍ଗ୍ ପୁଚାଦେର୍ନା। ଏ ନା ଆବା କାଦେର୍, ଆନେଙ୍ଗ୍ ମି କାଜିଙ୍ଗ୍ ଲେକିକିନାଙ୍ଗା। ଏପେଙ୍ଗ୍ ପୁଚାଦେର୍ନା ଯେ, ହେୱାନ୍ ଆଗେତାଙ୍ଗ୍ ମାନାନ୍। ଏ ଦାଙ୍ଗ୍ଣା ହିମ୍ଣା କାଦେର୍, ଆନେଙ୍ଗ୍ ମି କାଜିଙ୍ଗ୍ ଲେକିକିନାଙ୍ଗା ଯେ, ଏପେଙ୍ଗ୍ ବାଡ଼୍କାସ୍, ଆରେ ଈଶ୍ୱର କାତା ମି ଗରବ୍ତାକେ ମାନାତ୍, ଆରେ ଈଶ୍ୱର ଶୟତାନ୍ତିଙ୍ଗ୍ ଆରାୟ୍ କିଦେଙ୍ଗ୍ ମିଙ୍ଗେଙ୍ଗ୍ ଶାକ୍ତି ହିତ୍ତାନ୍ନା। ପୁର୍ତିନି ଇମ୍ଣି ବିଷୟ୍ତିଙ୍ଗ୍ ପା ଲାଡ୍ କିମାଟ୍ 15 ପୁର୍ତିତିଙ୍ଗ୍ ଆରେ ପୁର୍ତିନି କରାପ୍ ବିଷୟତିଙ୍ଗ୍ ଲାଡ୍ କିମାଟ୍। ଇମ୍ଣି ମାନାୟ୍ ପୁର୍ତିତିଙ୍ଗ୍ ଲାଡ୍ କିନାନ୍, ଲାଗିଙ୍ଗ୍ ତାତାକେ ଆବା ଈଶ୍ୱରତି ଲାଡ୍ ହିଲୁତ୍। 16 ଇନେସ୍କି ମାନାୟାର୍ ଜାର୍ ଇଚାତାଙ୍ଗ୍ କିନି ପାପ୍ କାମାୟ୍, ଆରେ ଲକାର୍ ଜିନିସ୍ତିଙ୍ଗ୍ ଲବ୍ ଆନି ବୁଦି ଆରେ ବାଟ୍ପାଣ୍ ଆନି ବୁଦି ଇ ୱିଜୁ ଜଗତ୍ନି ବିଷୟ। ଇ ୱିଜୁ ବିଷୟ ଆବା ଈଶ୍ୱରତାଙ୍ଗ୍ ୱାୱାତାତ୍ନା ମାତର୍ ଇ କରାପ୍ ଜଗତ୍ତାଙ୍ଗ୍ ୱାତାତ୍ନା। 17 ପୁର୍ତି ଆରେ ଜଗତ୍ନି ଜିନିଷ୍ ପାୟାଆନି ଆହା ଅଲପ୍ଦିନ୍ କାଜିଙ୍ଗ୍। ମାତର୍ ଇମ୍ଣି ମାନାୟ୍ ଆବା ଈଶ୍ୱର କାତାତିଙ୍ଗ୍ ମାନି କିନାନ୍, ହେୱାନ୍ ୱିଜୁଦିନ୍ ଜିଜି ମାନାନ୍। ଖ୍ରୀଷ୍ଟଙ୍ଗ୍ ବିରଦ୍ କିନି ମାନାୟାର୍ତାଙ୍ଗ୍ ଜାଗ୍ରତ୍ ଆନି କାତା 18 ଏ କାଡ଼୍ଦେର୍, ପୁର୍ତିନି ସେସ୍ ଜୁଗ୍ ଲାଗେ ୱାତାତେ। ଆପେଙ୍ଗ୍ ମିଙ୍ଗେଙ୍ଗ୍ ଆଗେ ୱେଚ୍ଚି ମାଞ୍ଚାପ୍, ପୁର୍ତି ସେସ୍ ଆନିହିଙ୍ଗ୍ ଖ୍ରୀଷ୍ଟଙ୍ଗ୍ ବିରଦ୍ କିନି ମାନାୟାର୍ ୱାନାରା, ଆରେ ନଙ୍ଗୟ୍ ଖ୍ରୀଷ୍ଟଙ୍ଗ୍ ବିରଦ୍ କିଦେଙ୍ଗ୍ ବେସିହେନି ମାନାୟାର୍ ହତ୍ତାରେ। ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ପୁଚାପେ ଯେ, ପୁର୍ତି ସେସ୍ ଆନିଦିନ୍ ୱାତାତେ। 19 ହେୱାର୍ ମା ମଣ୍ଡ୍ଲିତାଙ୍ଗ୍ ହୋସି ହାଚାର୍, ଇନେସ୍କି ହେୱାର୍ ମା ମଣ୍ଡ୍ଲିନିକାର୍ ଆୱାଦାଙ୍ଗ୍ ମାଚାର୍, ଯଦି ହେୱାର୍ ମା ମଣ୍ଡ୍ଲିନିକାର୍ ଆତାର୍ମା, ଲାଗିଙ୍ଗ୍ ହେୱାର୍ ମା ହୁଦାଙ୍ଗ୍ ମାଚାର୍ମା। ମାତର୍ ଏଚେପାଦ୍ନା ମା ମଣ୍ଡ୍ଲିତିଙ୍ଗ୍ ପିସ୍ତି ହାଚାର୍, ହେପାଦ୍ନା ଆପେଙ୍ଗ୍ ପୁଚାପ୍ ଯେ, ହେୱାର୍ ମା ମଣ୍ଡ୍ଲିନିକାର୍ ଆକାୟ୍। 20 ମାତର୍ ଏପେଙ୍ଗ୍ ହେୱାର୍ ଲେକେ ଆକାୟ୍। ଇନେସ୍କି ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ପବିତ୍ର ଆତ୍ମା ହିତ୍ତାନ୍ନା, ଆରେ ଏପେଙ୍ଗ୍ ସତ୍ତିଙ୍ଗ୍ ପୁଚାଦେର୍ନା। 21 ଲାଗିଙ୍ଗ୍ ଏପେଙ୍ଗ୍ ସତ୍ ପୁନୁରେ ଇଞ୍ଜି ଆନେଙ୍ଗ୍ ଲେକିକିଉଙ୍ଗା। ମାତର୍ ସତ୍ ଆରେ ମିଚ୍ ପୁନାଟ୍ ଇଞ୍ଜି ଲେକିକିନାଙ୍ଗା। 22 ଇମ୍ଣି ମାନାୟ୍ ଯୀଶୁ ନେ ଖ୍ରୀଷ୍ଟ ଇଞ୍ଜି ୱେଚୁନ୍, ହେୱାନ୍ ନେ ବେସି ମିଚ୍ୱା। ହେଲେଗ୍ଦି ମାନାୟ୍ ନେ ଖ୍ରୀଷ୍ଟଙ୍ଗ୍ ବିରଦ୍ କିନାର୍, ଇନେସ୍କି ହେୱାର୍ ଆବା ଈଶ୍ୱରତିଙ୍ଗ୍ ଆରେ ତା ମେହି ଯୀଶୁଙ୍ଗ୍ ଆହୁର୍। 23 ଇନେର୍ ଈଶ୍ୱର ମେହିଙ୍ଗ୍ ପୁନୁଙ୍ଗ୍ ଇଞ୍ଜି ୱେଚ୍ନାନ୍, ହେୱାନ୍ ଆବା ଈଶ୍ୱରତିଙ୍ଗ୍ ଗାଟା ଆୱାତାନ୍ନା, ମାତର୍ ଇନେର୍ ଈଶ୍ୱର ମେହିଙ୍ଗ୍ ପୁଚାଙ୍ଗ୍ ଇଞ୍ଜି ୱେଚ୍ନାନ୍, ହେୱାନ୍ ଆବା ଈଶ୍ୱରତିଙ୍ଗ୍ ପା ପାୟାଆତାନ୍ନା। 24 ଏପେଙ୍ଗ୍ ଏଚେପାଦ୍ନା ଯୀଶୁ ଖ୍ରୀଷ୍ଟଙ୍ଗ୍ ପାର୍ତି କିତାଦେର୍, ହେପାଦ୍ନା ଏପେଙ୍ଗ୍ ସତ୍ ହାର୍ଦିକାବୁର୍ତିଙ୍ଗ୍ ୱେନ୍ଞ୍ଜି ମାଚାଦେର୍। ଆରେ ଯଦି ଏପେଙ୍ଗ୍ ନଙ୍ଗୟ୍ ପାତେକ୍ ପାର୍ତି କିନାଦେରା, ଲାଗିଙ୍ଗ୍ ଏପେଙ୍ଗ୍ ଆବା ଈଶ୍ୱର ଆରେ ତା ମେହି ଯୀଶୁ ହୁଦାଙ୍ଗ୍ ମାହାଆଜି ମାନାଦେରା। 25 ଆରେ ଈଶ୍ୱର ମାଙ୍ଗେଙ୍ଗ୍ ହିତ୍ତି ପାର୍ମାଣ୍ ନେ ୱିଜ୍ୱି ଜିବୁନ୍। 26 ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ମିଚ୍ ହିକ୍ଷାହିଜି ଟକାୟ୍ କିଦ୍ଦେଙ୍ଗ୍ ଉପାୟ୍ କିନି ମାନାୟାର୍ତାଙ୍ଗ୍ ଏପେଙ୍ଗ୍ ଜାଗ୍ରତ୍ ଆଜି ମାନାଟ୍। 27 ମାତର୍ ଖ୍ରୀଷ୍ଟ ମିଙ୍ଗେଙ୍ଗ୍ ପବିତ୍ର ଆତ୍ମା ହିତ୍ତାନ୍ନା, ଆରେ ହେୱାନ୍ ମି ବିତ୍ରେ ମାନାନା। ଲାଗିଙ୍ଗ୍ ମିଙ୍ଗେଙ୍ଗ୍ ଇନେର୍ ପା ସତ୍ ହିକାୟ୍ କିଦ୍ଦେଙ୍ଗ୍ ଦର୍କାର୍ ଆକାୟ୍। ଇନେସ୍କି ହେ ପବିତ୍ର ଆତ୍ମା ସତ୍ ହିକାୟ୍ କିଦ୍ନାତ୍, ଆରେ ୱିଜୁ ବିଷୟତିଙ୍ଗ୍ ହିକାୟ୍ କିଦ୍ନାତ୍। ଲାଗିଙ୍ଗ୍ ହେୱାନ୍ ହିକାୟ୍ କିତ୍ତିଲେକେ ଯିବୁନ୍ କାଟିକିଜି ଖ୍ରୀଷ୍ଟତାକେ ମାନାଟ୍। ଈଶ୍ୱର ମେହି 28 ଏ କାଡ଼୍ଦେର୍, ଖ୍ରୀଷ୍ଟତାକେ ମାହାଆଜି ମାନାଟ୍। ଲାଗିଙ୍ଗ୍ ଏଚେପାଦ୍ନା ହେୱାନ୍ ପୁର୍ତିତାକେ ଆରେରଗ ୱାନାନ୍, ହେପାଦ୍ନା ଆସେଙ୍ଗ୍ ତା ଆଗେ ଲାଜା ଆୱାଦାଙ୍ଗ୍ ଶାସ୍ ହୁଦାଙ୍ଗ୍ ମାହା ଆନାସ୍। 29 ଆପେଙ୍ଗ୍ ପୁଚାପ୍ନା ଈଶ୍ୱର ୱିଜୁଦିନ୍ ଟିକ୍, ଆରେ ଆପେଙ୍ଗ୍ ଇଦାଙ୍ଗ୍ ପା ପୁଚାପ୍ନା ଯେ, ଇମ୍ଣି ମାନାୟ୍ ଟିକ୍ କାମାୟ୍ କିନାନ୍, ହେୱାନ୍ ଈଶ୍ୱର ମେହି। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation