୧ କରନ୍ତିୟ 9 - New Testament in Pengo Parja Languageବାଚିକିତି ଚେଲାର୍ ଅଦିକାର୍ ପାୟାଆତି ବିଷୟ 1 ଏପେଙ୍ଗ୍ ପୁଚାଦେର୍ନା ଆନେଙ୍ଗ୍ ମା ମାପୃ ଯୀଶୁଙ୍ଗ୍ ନା ଜାର୍ କାଣ୍କୁକାଙ୍ଗ୍ ହୁଡ଼୍ତାଙ୍ଗ୍ନା, ଆରେ ଆନେଙ୍ଗ୍ ତା ବାଚିକିତି ଚେଲା ଆତାଙ୍ଗ୍ନା, ହେୱାନ୍ ନାଙ୍ଗେଙ୍ଗ୍ ନା ଇଚା ଅନୁସାରେ ଇନାକା ପା କିଦେଙ୍ଗ୍ ହିତ୍ତାନ୍ନା। ଆରେ ଏପେଙ୍ଗ୍ ମାପୃ ଯୀଶୁଙ୍ଗ୍ ପାର୍ତି କିତାକାନେ ଆନେଙ୍ଗ୍ କାମାୟ୍ କିତି ପାଡ଼୍ଲେକେ ମିଙ୍ଗେଙ୍ଗ୍ ହିତ୍ତାନ୍। 2 ଯଦି ଜେକନିକାର୍ ନାଙ୍ଗେଙ୍ଗ୍ ମାପୃ ଯୀଶୁ ବାଚି କିତ୍ତି ଚେଲାଇଞ୍ଜି ଆସ୍ତିୱିତିସ୍ ପା, ଏପେଙ୍ଗ୍ ନାଙ୍ଗେଙ୍ଗ୍ ଆସ୍ତାତାଦେର୍। ଇନେସ୍କି ଆନେଙ୍ଗ୍ ନେ ମିଙ୍ଗେଙ୍ଗ୍ ପାର୍ତୁମ୍ ହାର୍ଦିକାବୁର୍ ଶୁଣାୟ୍ କିଜି ମାନ୍ଞ୍ଚାଙ୍ଗ୍। ଏପେଙ୍ଗ୍ ମାପୃ ଯୀଶୁଙ୍ଗ୍ ପାର୍ତି କିଜି ମାନି କାଜିଙ୍ଗ୍ ଆନେଙ୍ଗ୍ ତା ବାଚିକିତି ଚେଲା ଆତାଙ୍ଗ୍ନା ଇଞ୍ଜି ଚଞ୍ଜିଆ ଆନାତା। 3 ଆନେଙ୍ଗ୍ ବାଚିକିତି ଚେଲା ଅଦିକାର୍ ପାୟାଆତାଙ୍ଗ୍ନା ଇଞ୍ଜି ଇନେର୍ ପ୍ରଶ୍ନ ୱେନ୍ବାଆତ୍ତିସ୍ ଆନେଙ୍ଗ୍ ଇଲେକେ ୱେଚ୍ନାଙ୍ଗ୍। 4 ଆନେଙ୍ଗ୍ ଆରେ ନା ହୁଦାଙ୍ଗ୍ ମାନି ବର୍ଣ୍ଣବା, ଆପେଙ୍ଗ୍ ମିଞ୍ଜ ମାନ୍ଞ୍ଜି କାଦି ପିଦି ଚିଞ୍ଜେଙ୍ଗ୍ ଅଦିକାର୍ ମାନାତ୍। 5 ଆପେଙ୍ଗ୍ ଖ୍ରୀଷ୍ଟାନ୍ କଗ୍ଲେକାଙ୍ଗ୍ ବିବାଆଜି ମାପୃ ଯୀଶୁ ବିଷୟରେ ଶୁଣାୟ୍ କିଜି ବୁଲା ଆନାକା ମା ଅଦିକାର୍ ମାନାତ୍। ଇନେସ୍ଲେକେ ମାପୃ ଯୀଶୁ ଟଣ୍ଡାହିର୍, କେପା ଆରେ ଜେକନି ବାଚିକିତି ଚେଲାର୍ ବିବାଆଜି ତା ଡକୃହିକ୍ ହୁଦାଙ୍ଗ୍ ମାପୃ ଯୀଶୁ ବିଷୟରେ ଶୁଣାୟ୍ କିଜି ବୁଲା ଆନାରା। 6 ଏପେଙ୍ଗ୍ ଜେକନି ଚେଲାରିଙ୍ଗ୍ ସାଇଜ କିତିଲେକେ ବର୍ଣ୍ଣବା ଆରେ ଆନେଙ୍ଗ୍ ମି ସାଇଜ ପାୟାଆନି ଅଦିକାର୍ ମାନାତ୍। 7 ର ସେନା ତା କାଜିଙ୍ଗ୍ ହେୱାନ୍ କର୍ଚ କିଉନ୍, ଇମ୍ଣି ମାନାୟ୍ ଅଙ୍ଗୁର୍ ବାଡ଼୍ କିଜି ମାନାନ୍ ହେୱାନ୍ ହେ ବାଡ଼୍ଦି ପାଡ଼୍ ପାୟା ଆଦେଙ୍ଗ୍ ଆହା କିଜି ମାନାନ୍। ଆରେ ହେଲେକେ କଡିଙ୍ଗ୍ ପହା କିନାକାନ୍ ତା ପାଲ୍ ଉଣାଙ୍ଗ୍ ଇଞ୍ଜି ଆହା କିଜି ମାନାନ୍। 8 ଆନେଙ୍ଗ୍ ମାନାୟ୍ ୱେଚ୍ଚିଲେକେ ୱେଚ୍ଚୁଙ୍ଗା, ମାତର୍ ମୋଶା ଲେକିକିତି ନିୟମ୍ନି ସାସ୍ତର୍ତାକେ ପା ଲେକାଆତାତ୍ନା। 9 ଇନେସ୍କି ମୋଶା ଲେକିକିତି ଦରମ୍ ସାସ୍ତର୍ନି ନିୟମ୍ତାକେ ପା ଇଲେକେ ଲେକାଆତାତ୍ନା, “କଟେର୍ତାକେ କୁଲିଙ୍ଗ୍ ତଗିକିନିହିଙ୍ଗ୍ ବାଡ଼୍ଦୁକାଙ୍ଗ୍ ୱେଇଦ କତ୍ରା ଗାଚ୍ମାଟ୍।” ଈଶ୍ୱର ବାଡ଼୍ଦୁଙ୍ଗ୍ ବିଷୟରେ ନେ ଚିନ୍ତା କିଉନା, 10 ମାତର୍ ମା କାଜିଙ୍ଗ୍ ପା ୱେଚ୍ଚାନାନା। ହେଲେକେ ଇମ୍ଣି ମାନାୟ୍ ଡ଼ୁନାନ୍ କି ତଗିକିନାନ୍ ହେୱାନ୍ ତା ବାଗ୍ ପାୟା ଆଦେଙ୍ଗ୍ ଆହା କିଜି କାମାୟ୍ କିନାନ୍, ହେଲେକେ ଈଶ୍ୱରତି କାମାୟ୍ ମାନାୟାର୍ ପା ମି ତାକେତାଙ୍ଗ୍ ସାଇଜ ପାୟାଆନି ଅଦିକାର୍ ମାନାତ୍। 11 ମାର୍କୁ ରୁଜ୍ନି ମାନାୟାର୍ଲେକେ ଈଶ୍ୱରତି ହାର୍ଦିକାବୁର୍ ଆପେଙ୍ଗ୍ ମିଙ୍ଗେଙ୍ଗ୍ ଶୁଣାୟ୍ କିଜି ମାନ୍ଚାପ୍, ହେଦାଙ୍ଗ୍ କାଜିଙ୍ଗ୍ ମାଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ତିଙ୍ଗ୍ ପାୟା ଆଦେଙ୍ଗ୍ ଏପେଙ୍ଗ୍ ସାଇଜ କିଦ୍ନି ଦର୍କାର୍। 12 ଯଦି ମିଙ୍ଗେଙ୍ଗ୍ ଜେକନି ଚେଲାର୍ ଶୁଣାୟ୍ କିତ୍ତି କାଜିଙ୍ଗ୍ ଏପେଙ୍ଗ୍ ହେୱାରିଙ୍ଗ୍ ସାଇଜ କିତାଦେର୍ନା, ଲାଗିଙ୍ଗ୍ ଆନେଙ୍ଗ୍ ଆରେ ବର୍ଣ୍ଣବା ହେୱାର୍ତାଙ୍ଗ୍ ଆଦିକ୍ ସାଇଜ ପାୟା ଆଦେଙ୍ଗ୍ ଅଦିକାର୍ ମାନାତ୍। ମାତର୍ ଏପେଙ୍ଗ୍ ମାଙ୍ଗେଙ୍ଗ୍ ସାଇଜ କିଦାଟ୍ ଇଞ୍ଜି ଜବର୍ଦସ୍ତି କିଦ୍ୱାତାପ୍ନା, ଆରେ ଯୀଶୁ ଖ୍ରୀଷ୍ଟନି ହାର୍ଦିକାବୁର୍ତିଙ୍ଗ୍ ପାର୍ତି କିନାକା କଷ୍ଟଆମେତ୍ ଇଞ୍ଜି ଆପେଙ୍ଗ୍ ଜାର୍ ଇଚାତାଙ୍ଗ୍ ୱିଜୁ ବିଷୟତିଙ୍ଗ୍ ସମ୍ବାଲି କିନାପା। 13 ଇମ୍ଣାକାର୍ ମନ୍ଦିର୍ତାକେ କାମାୟ୍ କିନାର୍ ହେୱାର୍ ମନ୍ଦିର୍ନି କାଦି ତିନାକା ଏପେଙ୍ଗ୍ ପୁନୁଦେରା କି? ଆରେ ଇମ୍ଣାକାର୍ ବେଦିତାକେ ବଲିପୁଜା କିନାର୍ ହେୱାର୍ ହେଦାଙ୍ଗ୍ତିଙ୍ଗ୍ ବାଗ୍ କିନାର୍। 14 ହେଲେକେ ମାପୃ ଯୀଶୁ ଆଦେସ୍ ହିତ୍ତାନ୍ ଯେ, ଇମ୍ଣାକାର୍ ହାର୍ଦିକାବୁର୍ତିଙ୍ଗ୍ ଶୁଣାୟ୍ କିନାର୍, ହେୱାରିଙ୍ଗ୍ ଦର୍କାର୍ଆନି ଜିନିଷ୍ତିଙ୍ଗ୍ ହାର୍ଦିକାବୁର୍ ୱେଚାକାର୍ ସାଇଜ କିନି ଦର୍କାର୍। 15 ମାତର୍ ଆନେଙ୍ଗ୍ ହେ ଅଦିକାର୍ ପାୟାଆଜି ମାଚିସ୍ ପା ବ୍ଯବାହାର୍ କିୱାତାଙ୍ଗ୍ନା। ଆନେଙ୍ଗ୍ ଇ ୱିଜୁ ବିଷୟ ନାଙ୍ଗେଙ୍ଗ୍ ସାଇଜ କିଦାଟ୍ ଇଞ୍ଜି ଲେକିକିଉଙ୍ଗା, ଯଦି ମିବେତାଙ୍ଗ୍ ସାଇଜ ପାୟାଆନାଙ୍ଗ୍ ଲାଗିଙ୍ଗ୍ ହେଦାଙ୍ଗ୍ ନା କାଜିଙ୍ଗ୍ ହାଃନାକା ହାର୍। ଇନେର୍ ପା ନାଙ୍ଗେଙ୍ଗ୍ ବାଟ୍ପାଣ୍ ଆନାକା ବନ୍ଦ୍ କିଦ୍ଦେଙ୍ଗ୍ ଆଡ଼୍ଦୁର୍, ଇନେସ୍କି ଆନେଙ୍ଗ୍ ନିଜେ ଜାତୁନ୍ ଅନାଙ୍ଗା। 16 ଯଦି ଆନେଙ୍ଗ୍ ହାର୍ଦିକାବୁର୍ ଶୁଣାୟ୍ କିନାଙ୍ଗା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ବାଟ୍ପାଣ୍ ଆନି ଦର୍କାର୍ ଆକାୟ୍। ଇନେସ୍କି ଈଶ୍ୱର ନାଙ୍ଗେଙ୍ଗ୍ ହେଦାଙ୍ଗ୍ କିଦେଙ୍ଗ୍ ଆଦେସ୍ ହିତ୍ତାନ୍ନା ଆରେ ଯଦି ଆନେଙ୍ଗ୍ ହାର୍ଦିକାବୁର୍ ଶୁଣାୟ୍ କିଉଙ୍ଗ୍, ଲାଗିଙ୍ଗ୍ ହେୱାନ୍ ନାଙ୍ଗେଙ୍ଗ୍ ଦଣ୍ଡ୍ ହିଦ୍ନାନ୍। 17 ଯଦି ଆନେଙ୍ଗ୍ ନା ଜାର୍ ଇଚାତାଙ୍ଗ୍ ଈଶ୍ୱରତି ହାର୍ଦିକାବୁର୍ ଶୁଣାୟ୍ କିନାଙ୍ଗା, ଲାଗିଙ୍ଗ୍ ଆନେଙ୍ଗ୍ ପୁରଷ୍କାର୍ ପାୟାଆନି ଅଦିକାର୍ ମାନାତ୍। ମାତର୍ ଯଦି ଈଶ୍ୱର ନାଙ୍ଗେଙ୍ଗ୍ ବାଚି କିତ୍ତାନ୍ନା ଆରେ କିଦେଙ୍ଗ୍ ଆଡ୍ନାନ୍ ଇଞ୍ଜି ନାଙ୍ଗେଙ୍ଗ୍ ପାର୍ତି କିନାନା, ଲାଗିଙ୍ଗ୍ ଆନେଙ୍ଗ୍ କିଦେଙ୍ଗ୍ ଆନାତ୍। 18 ଲାଗିଙ୍ଗ୍ ନା ପୁରଷ୍କାର୍ ଇଲେକେ ଯେ, ଆନେଙ୍ଗ୍ ମାନାୟାରିଙ୍ଗ୍ ବିନା ମୁଲ୍ୟରେ ହାର୍ଦିକାବୁର୍ ଶୁଣାୟ୍ କିନାକା ନେ ନା ପୁରଷ୍କାର୍। ହେଦାଙ୍ଗ୍ ନାଙ୍ଗେଙ୍ଗ୍ ୱାରି କିଦ୍ନାତା, ନାଙ୍ଗେଙ୍ଗ୍ ହେୱାର୍ତାଙ୍ଗ୍ ସାଇଜ ପାୟାଆନି ଆଦିକାର୍ ମାଚିସ୍ ପା, ଆନେଙ୍ଗ୍ ସାଇଜ କିଦାଟ୍ ଇଞ୍ଜି ହେୱାରିଙ୍ଗ୍ ୱେଚୁଙ୍ଗା। 19 ନାଙ୍ଗେଙ୍ଗ୍ ହେୱାର୍ ଡାବୁଙ୍ଗ୍ ହିଦ୍ନାରା ଇଞ୍ଜି ଆନେଙ୍ଗ୍ ଇନେର୍ ତାରେନ୍ ଦାସ୍ କାମାୟ୍ କିଉଙ୍ଗା, ମାତର୍ ଯୀଶୁ ଖ୍ରୀଷ୍ଟତାକେ ୱିଜାକାରିଙ୍ଗ୍ ତାସି ୱାଦେଙ୍ଗ୍ ଆନେଙ୍ଗ୍ ୱିଜାକାର୍ ଦାସ୍ ଆତାଙ୍ଗ୍ନା। 20 ଏଚେପାଦ୍ନା ଆନେଙ୍ଗ୍ ଯିହୁଦି ମାନାୟାର୍ ହୁଦାଙ୍ଗ୍ ମାଚାଙ୍ଗ୍ ହେୱାରିଙ୍ଗ୍ ଖ୍ରୀଷ୍ଟତାକେ ତାସି ୱାଦେଙ୍ଗ୍ ଯିହୁଦି ମାନାୟ୍ ଲେକେ ଜିବୁନ୍ କାଟିକିଜି ମାଚାଙ୍ଗ୍। ଆନେଙ୍ଗ୍ ଏଚେପାଦ୍ନା ହେ ଦରମ୍ ସାସ୍ତର୍ନି ନିୟମ୍ତିଙ୍ଗ୍ ମାନିକିନି ଯିହୁଦିର୍ ହୁଦାଙ୍ଗ୍ ମାଚାଙ୍ଗ୍, ଆନେଙ୍ଗ୍ ପା ହେ ଦରମ୍ ସାସ୍ତର୍ତିଙ୍ଗ୍ ମାନିକିଜି ମାଚାଙ୍ଗ୍। ହେ ଦରମ୍ ସାସ୍ତର୍ତିଙ୍ଗ୍ ମାନିକିନି ମାନାୟାର୍ ଖ୍ରୀଷ୍ଟତାକେ ତାସିୱାନି କାଜିଙ୍ଗ୍ ଆନେଙ୍ଗ୍ ଇଲେକେ କିତାଙ୍ଗ୍, ଆରେ ନାଙ୍ଗେଙ୍ଗ୍ ଦରମ୍ ସାସ୍ତର୍ ମାନିକିନାକା ଦର୍କାର୍ ହିଲାତାତ୍। 21 ହେଲେକେ ଆନେଙ୍ଗ୍ ଏଚେପାଦ୍ନା ବିନ୍ଜାତିନି ମାନାୟାର୍ତାକେ କାମାୟ୍ କିଜି ମାଚାଙ୍ଗ୍, ଆନେଙ୍ଗ୍ ହେୱାରିଙ୍ଗ୍ ଖ୍ରୀଷ୍ଟତାକେ ତାସିୱାନାଙ୍ଗ୍ ଦରମ୍ ସାସ୍ତରତିଙ୍ଗ୍ ମାନିକିୱି ବିନ୍ଜାତିର୍ ମାନାୟ୍ ଲେକେ ଜିବୁନ୍ କାଟିକିଜି ମାଚାଙ୍ଗ୍। ଆନେଙ୍ଗ୍ ଈଶ୍ୱର ନିୟମ୍ତିଙ୍ଗ୍ ମାନିକିଜି ଜିବୁନ୍ କାଟିକିଜି ମାନାଙ୍ଗ୍, ଇନେସ୍କି ଆନେଙ୍ଗ୍ ଖ୍ରୀଷ୍ଟନି ନିୟମ୍ ତାରେନ୍ ମାନାଙ୍ଗ୍। 22 ଆନେଙ୍ଗ୍ ଏଚେପାଦ୍ନା ଅଲପ୍ ପାର୍ତି କିନାକାର୍ ହୁଦାଙ୍ଗ୍ ମାଚାଙ୍ଗ୍, ହେୱାର୍ ଇନେସ୍ ଖ୍ରୀଷ୍ଟଙ୍ଗ୍ ଆଦିକ୍ ପାର୍ତି କିଜି ଉଦାର୍ ପାୟା ଆଦେଙ୍ଗ୍ ଆଡ୍ନାର୍ ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାର୍ ଲେକେ ବ୍ୟବହାର୍ କିଜି ମାଚାଙ୍ଗ୍। ଆନେଙ୍ଗ୍ ଇନେସ୍ ୱିଜାକାରିଙ୍ଗ୍ ଖ୍ରୀଷ୍ଟତାକେ ତାସି ୱାଦେଙ୍ଗ୍ ଆଡ୍ନାଙ୍ଗ୍ ଇଦାଙ୍ଗ୍ କାଜିଙ୍ଗ୍ ହେୱାର୍ ଲେକେ ଜିବୁନ୍ କାଟିକିଜି ମାଚାଙ୍ଗ୍। 23 ଆନେଙ୍ଗ୍ ହାର୍ଦିକାବୁର୍ ଶୁଣାୟ୍ କିନି କାଜିଙ୍ଗ୍ ଆରେ ଆଶ୍ରିବାଦ୍ ପାୟାଆନି କାଜିଙ୍ଗ୍ ଇ ୱିଜୁ କାମାୟ୍ କିନାଙ୍ଗା। ମାପୃ କାଜିଙ୍ଗ୍ ହନାଟ୍ 24 କେତେକ୍ ମାନାୟାର୍ ହନ୍ନି କେଲ୍ତାକେ ହନ୍ନାର୍, ମାତର୍ ରକାନ୍ ନେ ପୁରଷ୍କାର୍ ପାୟା ଆନାନ୍। ଏପେଙ୍ଗ୍ ପା ହେ ଲେକେ ଈଶ୍ୱରତାକେ ପୁରଷ୍କାର୍ ଜିତାଆନି କାଜିଙ୍ଗ୍ ହନାଟ୍। 25 ଇମ୍ଣି ମାନାୟ୍ ହନ୍ନି କେଲ୍ତାକେ ମାହା ଆଦେଙ୍ଗ୍ ଇଚା କିନାର୍ ହେୱାର୍ ଜାର୍ତିଙ୍ଗ୍ କଣ୍ଟ୍ରୁଲ୍ କିନାକା ହିକାଆନି ଦର୍କାର୍। ହେୱାର୍ ବେସିଦିନ୍ ମାନ୍ୱି ପୁରଷ୍କାର୍ କାଜିଙ୍ଗ୍ ହନ୍ନାର୍, ମାତର୍ ଆପେଙ୍ଗ୍ ୱିଜୁଦିନ୍ ମାନି ପୁରଷ୍କାର୍ କାଜିଙ୍ଗ୍ ହନ୍ନାପା। 26 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେ ହାନ୍ଦିତାକେ ଇକେଦେଙ୍ଗ୍ ହନ୍ନାଙ୍ଗା, ଇନେସ୍ଲେକେ ର ବକ୍ସର୍ ୱାରା ବାହାତାକେ ଇଡ଼ୁନ୍, ହେଲେକେ ନା ଖ୍ରୀଷ୍ଟାନ୍ ଜିବୁନ୍ ପା ଖ୍ରୀଷ୍ଟ କଣ୍ଟ୍ରୁଲ୍ କିଦ୍ନାନା। 27 ଆନେଙ୍ଗ୍ କରାପ୍ ଇଚାତାଙ୍ଗ୍ ମାନି କିୱେଦେଙ୍ଗ୍ ଜାର୍ ଗାଗାଡ଼୍ତିଙ୍ଗ୍ କଣ୍ଟ୍ରୁଲ୍ କିନାଙ୍ଗା, ଆୱିତିସ୍ ମାନାୟାରିଙ୍ଗ୍ ହାର୍ଦିକାବୁର୍ ଶୁଣାୟ୍ କିନାକା ବେକାର୍ ଆନାତ୍ ଆରେ ନାଙ୍ଗେଙ୍ଗ୍ ପୁରଷ୍କାର୍ ଗାଟାଆଦୁତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation