୧ କରନ୍ତିୟ 8 - New Testament in Pengo Parja Languageମୁର୍ତିକାଙ୍ଗ୍ ହିତି କାଦି ବିଷୟରେ ପାଉଲ ୱେଚ୍ଚାନ୍ 1 ଆନେଙ୍ଗ୍ ନଙ୍ଗୟ୍ ମିଙ୍ଗେଙ୍ଗ୍ ମୁର୍ତିତିଙ୍ଗ୍ ହିଜି ପୁଜାକିନି କାଦି ବିଷୟରେ ୱେଚ୍ଚାନାଙ୍ଗା, ଏପେଙ୍ଗ୍ କେତ୍ଜାଣ୍ ଇଞ୍ଜ୍ନାଦେରା ଯେ ମାଙ୍ଗେଙ୍ଗ୍ ୱିଜୁ ଜିନିଷ୍ନି ଜ୍ଞାନ୍ ମାନାତ୍, ଆରେ ଆପେଙ୍ଗ୍ ହେଦାଙ୍ଗ୍ ପୁଚାପ୍ନା। ଜ୍ଞାନ୍ ପୁନ୍ଞ୍ଜି ମାଚିସ୍ ମାଙ୍ଗେଙ୍ଗ୍ ବାଟ୍ପାଣ୍ କିଦ୍ନାତ୍, ମାତର୍ ଜାର୍-ଜାର୍ବିତ୍ରେ ଲାଡ୍ କିତିସ୍ ନେ ମଣ୍ଡ୍ଲିନି ୱିଜାର୍ ମାନାୟାରିଙ୍ଗ୍ ବିନ୍-ବିନ୍ ସାଇଜ କିୟାଆନାତ୍। 2 ଯଦି ଏପେଙ୍ଗ୍ ଇନାଦେର୍ ଆନେଙ୍ଗ୍ ଇ ବିଷୟରେ ହାର୍ କିଜି ପୁଚାଙ୍ଗ୍ନା, ଲାଗିଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା ଯେ, ଏପେଙ୍ଗ୍ ହେ ବିଷୟରେ ହାର୍ କିଜି ପୁନ୍ୱାତାଦେର୍ନା। 3 ମାତର୍ ଇମ୍ଣି ମାନାୟ୍ ଈଶ୍ୱରତିଙ୍ଗ୍ ଲାଡ୍ କିନାନା, ହେୱାନ୍ ଈଶ୍ୱର ମାନାୟ୍ ଇଞ୍ଜି ପୁଚାନ୍ନା। 4 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ମୁର୍ତିକାଙ୍ଗ୍ ପୁଜାକିତି କାଦି ତିନି ବିଷୟରେ ପୁନି କିଦ୍ଦେଙ୍ଗ୍ ଇଚା କିଦ୍ନାଙ୍ଗା। ଆପେଙ୍ଗ୍ ପୁଚାପ୍ନା ଯେ, ଚିକ୍ଲାତାଙ୍ଗ୍ ରସ୍ତି ମୁର୍ତିଙ୍ଗ୍ ୱିଜୁ ସତ୍ ଈଶ୍ୱର ଆକାୟ୍ ଆରେ ହେୱିକିୟାଙ୍ଗ୍ ଜିବୁନ୍ ହିଲୁତ୍ ମାତର୍ ରଞ୍ଜାଙ୍ଗ୍ ନେ ସତ୍ ଈଶ୍ୱର ମାନାତ୍। 5 ସରଗ୍ ଆରେ ପୁର୍ତିତାକେ ବେସି ଜିନିଷ୍ତିଙ୍ଗ୍ ମାନାୟାର୍ ଇନେରିଙ୍ଗ୍ ଈଶ୍ୱର ଆରେ ମାପୃ ଇଞ୍ଜି ଇନାରା। 6 ମାତର୍ ଆପେଙ୍ଗ୍ ପୁଚାପ୍ନା ରକାନ୍ ନେ ଈଶ୍ୱର ମାନାନ୍, ହେୱାନ୍ ଆନାନା ଆବା ଈଶ୍ୱର, ଇନେର୍ ୱିଜୁ ଜିନିଷ୍ ଉବ୍ଜାଇ କିତାନ୍ନା। ଆରେ ଆସେଙ୍ଗ୍ ତା କାଜିଙ୍ଗ୍ ଜିବୁନ୍ ଆତାସ୍ନା। ଆରେ ରକାନ୍ ନେ ମାପୃ ମାନାନ୍, ହେୱାନ୍ ଯୀଶୁ ଖ୍ରୀଷ୍ଟ ତା କାଜିଙ୍ଗ୍ ଈଶ୍ୱର ୱିଜୁ ଜିନିଷ୍ ରସ୍ତାନ୍ନା ଆରେ ତା କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ଜିବୁନ୍ ହିତ୍ତାନ୍ନା। 7 ମାତର୍ କେତେକ୍ ପାର୍ତିକିନି ଟଣ୍ଡାର୍ ଇ ବିଷୟତିଙ୍ଗ୍ ପୁନ୍ୱାତାର୍ନା ଯେ, ମୁର୍ତିକାଙ୍ଗ୍ ଶାକ୍ତି ହିଲ୍ଗୁତ୍ ଇନେସ୍କି ହେୱାର୍ ଆଗେତାଙ୍ଗ୍ ମୁର୍ତିକାଙ୍ଗ୍ ପୁଜାକିନି ଅବ୍ୟାସ୍ ମାନାତ୍। ଲାଗିଙ୍ଗ୍ ଏଚେପାଦ୍ନା ହେୱାର୍ ମୁର୍ତିତିଙ୍ଗ୍ ହିତି କାଦିତିଙ୍ଗ୍ ତିନାର୍, ହେୱାର୍ ନିଜେ ବୁଲ୍ରେ ବାବିକିନାର୍ ଯେ ଆପେଙ୍ଗ୍ ନଙ୍ଗୟ୍ ପାତେକ୍ ମୁର୍ତି ପୁଜା କିନାପା ଆରେ ପାପ୍ କିତାପ୍ ଇଞ୍ଜି ତା ମାନ୍ତ ଆଦିକ୍ ଚିନ୍ତା କିନାର୍। 8 ମାତର୍ ଆସେଙ୍ଗ୍ ଚିଚି କାଦି କାଜିଙ୍ଗ୍ ଈଶ୍ୱରତାକେ ଜାର୍ ଲକ୍ ଆୟାଆଉତ୍, କି ହେ କାଦି ତିନ୍ୱିତିସ୍ ଈଶ୍ୱରତିଙ୍ଗ୍ ଅଲପ୍ ୱାରି କିୟାଆଉତ୍, ଆରେ ହେ କାଦି ଚିଚି କାଜିଙ୍ଗ୍ ଈଶ୍ୱର ଆଗେ ହାର୍ଦି ଲକ୍ ଆୟାଆଉତ୍। 9 ମାତର୍ ଏପେଙ୍ଗ୍ ସାବ୍ଦାନ୍ ଆଜି ମାନାଟ୍ ଯେ, ଇମ୍ଣାକାର୍ ଅଲପ୍ ପାର୍ତିକିନାରା ହେୱାର୍ ଆଗେ ମୁର୍ତିକାଙ୍ଗ୍ ହିତି କାଦିତିଙ୍ଗ୍ ତିନ୍ମାଟ୍ ନଇଲେ ହେୱାର୍ ମାପୃଙ୍ଗ୍ ପାର୍ତି କିନାକା ବନ୍ଦ୍ କିନାର୍। 10 ଏପେଙ୍ଗ୍ ପୁଚାଦେର୍ନା ଯେ, ଇ ମୁର୍ତିଙ୍ଗ୍ ସତ୍ ଈଶ୍ୱର ଆକାୟ୍, ଲାଗିଙ୍ଗ୍ ଏପେଙ୍ଗ୍ ମୁର୍ତିତିଙ୍ଗ୍ ପୁଜାକିତି କାଦି ପା ଚିଞ୍ଜେଙ୍ଗ୍ ଆଡ୍ନାଦେର୍। ମାତର୍ ଇମ୍ଣି ଟଣ୍ଡେନିଙ୍ଗ୍ ଅଲପ୍ ପାର୍ତି ମାନାତ୍, ଆରେ ହେୱାନ୍ ଏପେଙ୍ଗ୍ ହେ କାଦିତିଙ୍ଗ୍ ତିନାକା ହୁଡ଼୍ଦାନାନ୍। ଲାଗିଙ୍ଗ୍ ହେୱାନ୍ ମୁର୍ତିକାଙ୍ଗ୍ ହିତି କାଦି ତିନାକା ବୁଲ୍ ଇଞ୍ଜି ବାବିକିତିସ୍ ପା ଚିଞ୍ଜେଙ୍ଗ୍ ସାସ୍ କିନାନ୍। 11 ହେଦାଙ୍ଗ୍ କାଜିଙ୍ଗ୍ ମି ବେସି ବୁଦି ମାନି କାଜିଙ୍ଗ୍, ଅଲପ୍ ପାର୍ତିକିନି ମାନାୟ୍ ଖ୍ରୀଷ୍ଟଙ୍ଗ୍ ପାର୍ତି କିନାକା ବନ୍ଦ୍ କିନାନ୍। 12 ଯଦି ମା ପାର୍ତିନି ଟଣ୍ଡେନ୍ ଆସେଙ୍ଗ୍ କିଜିମାଚି କାମାୟ୍ତିଙ୍ଗ୍ ବୁଲ୍ ଇଞ୍ଜି ବାବିକିନାନା, ଲାଗିଙ୍ଗ୍ ଆପେଙ୍ଗ୍ ତା ବିରଦ୍ତାକେ ଆରେ ଖ୍ରୀଷ୍ଟ ବିରଦ୍ତାକେ ପାପ୍ କିତାପ୍ନା। 13 ହେଦାଙ୍ଗ୍ କାଜିଙ୍ଗ୍, ଯଦି ମୁର୍ତିତିଙ୍ଗ୍ ହିତି କାଦି ଚିଚି କାଜିଙ୍ଗ୍ ଜେକନି ପାର୍ତିକିନି ଟଣ୍ଡେନ୍ ପାର୍ତି କିନାକା ଅଲପ୍ ଆନାତା, ଲାଗିଙ୍ଗ୍ ଆନେଙ୍ଗ୍ ଜେକନି ପାର୍ତିକିନି ଟଣ୍ଡେନ୍ ପାର୍ତିତିଙ୍ଗ୍ ଅଲପ୍ କିଦେଙ୍ଗ୍ ଆନେଙ୍ଗ୍ ହେଲେକେ ମୁର୍ତିକାଙ୍ଗ୍ ହିତି କାଦି ତିନୁଙ୍ଗ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation