୧ କରନ୍ତିୟ 7 - New Testament in Pengo Parja Languageପାଉଲ ବିବାଆନି ବିଷୟରେ ହିକାୟ୍ କିତାନ୍ 1 ଏପେଙ୍ଗ୍ ଇମ୍ଣି ୱିଜୁ ବିଷୟ ନାଙ୍ଗେଙ୍ଗ୍ ଲେକିକିତ୍ତାଦେର୍ନା, ଇଦାଙ୍ଗ୍ ଇଲେକେ ଯେ, ଆଁ ଆସେଙ୍ଗ୍ ବିବା ଆୱାକା ହାର୍। 2 ମାତର୍ ମାନାୟାର୍ ସହଜ୍ତାଙ୍ଗ୍ ଦାରି କାମାୟ୍ କିନାର୍, ହେଦାଙ୍ଗ୍ କାଜିଙ୍ଗ୍ ୱିଜାର୍ ଆଣ୍ଡ୍ରାଙ୍ଗ୍ ବିବାଆଜି ତା ଡକୃହିକ୍ ହୁଦାଙ୍ଗ୍ ମାନି ଦର୍କାର୍, ଆରେ ହେଲେକେ ୱିଜୁ କଗ୍ଲେକ୍ ତା ଡକ୍ରାହିର୍ ହୁଦାଙ୍ଗ୍ ବିବାଆଜି ମାନି ଦର୍କାର୍। 3 ୱିଜାର୍ ଆଣ୍ଡ୍ରାଙ୍ଗ୍ ତା ଡକୃହିକ୍ ହୁଦାଙ୍ଗ୍ ହୁଞ୍ଜା ମାଗା ଆନି ଦର୍କାର୍, ହେଲେକେ ତା ଜାର୍-ଜାର୍ ଆଣ୍ଡ୍ରାଙ୍ଗ୍ ହୁଦାଙ୍ଗ୍ ହୁଞ୍ଜା ମାଗା ଆନି ଦର୍କାର୍। 4 ରଞ୍ଜେଲ୍ ଡକୃହି ତା ଜାର୍ ଗାଗାଡ଼୍ ଜପି ଅଦିକାର୍ ହିଲୁତ୍, ମାତର୍ ତା ଡକ୍ରାହିଙ୍ଗ୍ ଅଦିକାର୍ ମାନାତ୍, ହେଲେକେ ର ଆଣ୍ଡ୍ରେନ୍ ଜାର୍ ଗାଗାଡ଼୍ ଜପି ଅଦିକାର୍ ହିଲୁତ୍, ମାତର୍ ତା ଡକୃହିଙ୍ଗ୍ ଆଦିକାର୍ ମାନାତ୍। 5 ଏପେଙ୍ଗ୍ ହୁଞ୍ଜା ମାଗା ଆୱେଦେଙ୍ଗ୍ ଜାର୍-ଜାର୍ବିତ୍ରେ ଅଲ୍ଗା ମାନ୍ମାଟ୍, ମାତର୍ ଯଦି ଏପେଙ୍ଗ୍ ବେସି ପାର୍ତାନା କିନି କାଜିଙ୍ଗ୍ ଅଲ୍ଗା ମାନାଦେରା, ଲାଗିଙ୍ଗ୍ ଜାର୍-ଜାର୍ବିତ୍ରେ ରାଜି ଆଜି ଅଲ୍ଗା ମାନାଟ୍। ଶୟତାନ ମିଙ୍ଗେଙ୍ଗ୍ ପରିକ୍ଷା କିଦେଙ୍ଗ୍ ଆଡ଼୍ଦାନାନ୍, ଇନେସ୍କି ଏପେଙ୍ଗ୍ ଜାର୍ତିଙ୍ଗ୍ କଣ୍ଟ୍ରୁଲ୍ କିଦେଙ୍ଗ୍ ଆଡୁଦେରା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଆରେରଗ ହୁଞ୍ଜା ମାଗା ଆଡ। 6 ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ଉପାୟ୍ ୱେଚ୍ଚାନାଙ୍ଗା। ତା ଅର୍ତ ଇଦାଙ୍ଗ୍ ଆକାୟ୍ ଯେ, ଇଲେକେ କିନାକା ନେ ନିୟମ୍। 7 ଆନେଙ୍ଗ୍ ଇଚା କିନାଙ୍ଗା ଯେ, ନା ଲେକେ ବିବା ଆୱାଦାଙ୍ଗ୍ ମାନାଟ୍। ମାତର୍ ୱିଜୁଲକ୍ ହାମାନ୍ ଆକାୟ୍। ଈଶ୍ୱର କେତ୍ଜାଣ୍ତିଙ୍ଗ୍ ବିବାଆନି ଦାନ୍ ହିତାନ୍ନା, ଆରେ ବାକି ଲଗାଙ୍ଗ୍ ବିବା ଆୱି ଦାନ୍ ହିତାନ୍ନା। 8 ନଙ୍ଗୟ୍ ଆନେଙ୍ଗ୍ ବିବା ଆୱାତାକାରିଙ୍ଗ୍ ଆରେ ରାଣ୍ଡି କଗ୍ଲେକାଙ୍ଗ୍ ୱେଚ୍ନାଙ୍ଗା ଏପେଙ୍ଗ୍ ବିବା ଆୱାଦାଙ୍ଗ୍ ନା ଲେକେ ଆଜି ମାନାକା ହାର୍। 9 ମାତର୍ ଯଦି ହେୱାର୍ ଜାର୍ତିଙ୍ଗ୍ କଣ୍ଟ୍ରୁଲ୍ କିଜି ମାଞ୍ଜେଙ୍ଗ୍ ଆଡ୍ୱିତିସ୍ ହେୱାର୍ ବିବା ଆୟେର୍। ହେଦାଙ୍ଗ୍ ବିବା ଆୱାଦାଙ୍ଗ୍ ହୁଞ୍ଜା ମାଗା ଆନି କାଜିଙ୍ଗ୍ ଇଚା କିନାନା, ଲାଗିଙ୍ଗ୍ ହେୱାନ୍ ବିବା ଆନାକା ହାର୍। 10 ନଙ୍ଗୟ୍ ଆନେଙ୍ଗ୍ ବିବାଆତି ମାନାୟାର୍ କାଜିଙ୍ଗ୍ ର ଆଦେସ୍ ହିନାଙ୍ଗା ଯେ, ହେ ଆଦେସ୍ ମାପୃତାଙ୍ଗ୍ ୱାତାତ୍ନା ମାତର୍ ନା ଆଦେସ୍। ର କଗ୍ଲେ ତା ଡକ୍ରାହି ହୁଦାଙ୍ଗ୍ ପିସ୍ପା ଆମେର୍। 11 ମାତର୍ ହେଦେଲ୍ ଯଦି ତା ଡକ୍ରାହିଙ୍ଗ୍ ପିହ୍ନାତ୍, ଲାଗିଙ୍ଗ୍ ହେଦେଲ୍ ଆରେ ବିବା ଆମେତ୍ ନଇଲେ ହେଦେଲ୍ ତା ଡକ୍ରାହିତାକେ ଲେଉଟା ଆଜି ହାଲେତ୍। ଇଲେକେ ଆଣ୍ଡ୍ରେନ୍ ପା ତା ଡକୃହିଙ୍ଗ୍ ପିହ୍ମେନ୍। 12 ନଙ୍ଗୟ୍ ଆନେଙ୍ଗ୍ ଅଲ୍ଗା ପାର୍ତିକିନି ମାନାୟାରିଙ୍ଗ୍ ୱେଚ୍ନାଙ୍ଗା, ଇଦାଙ୍ଗ୍ ମାପୃ ଯୀଶୁ ୱେଚୁନା। ଯଦି ରୱାନ୍ ପାର୍ତିକିନାକାନ୍, ଖ୍ରୀଷ୍ଟଙ୍ଗ୍ ପାର୍ତିକିୱି କଗ୍ଲେଙ୍ଗ୍ ବିବା ଆତାନ୍ନା, ଆରେ ହେ କଗ୍ଲେ ଯଦି ତା ହୁଦାଙ୍ଗ୍ ମାଞ୍ଜେଙ୍ଗ୍ ଇଚା କିନାତା, ଲାଗିଙ୍ଗ୍ ତା ଡକ୍ରାହି ତାଙ୍ଗେଙ୍ଗ୍ ପିହ୍ମେନ୍। 13 ହେଲେକେ ଯଦି ର ଖ୍ରୀଷ୍ଟାନ୍ କଗ୍ଲେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତିକିୱି ଆଣ୍ଡ୍ରେନ୍ ଅନାନ୍, ଆରେ ହେ ଆଣ୍ଡ୍ରେନ୍ ତା ହୁଦାଙ୍ଗ୍ ମାଞ୍ଜେଙ୍ଗ୍ ଇଚା କିନାନା, ଲାଗିଙ୍ଗ୍ ହେ କଗ୍ଲେ ତା ଡକ୍ରାହିଙ୍ଗ୍ ପିହ୍ମେତ୍। 14 ଯଦି ଖ୍ରୀଷ୍ଟାନ୍ ଆୱିତି ଆଣ୍ଡ୍ରେନିଙ୍ଗ୍ ଖ୍ରୀଷ୍ଟାନ୍ କଗ୍ଲେ ମାନାତ୍। ଲାଗିଙ୍ଗ୍ ନି ଆଣ୍ଡ୍ରେନ୍ ମାପୃ ଯୀଶୁନି ମାନାୟ୍ ଆନାନ୍, ଇନେସ୍କି ଏନେଙ୍ଗ୍ ଖ୍ରୀଷ୍ଟାନ୍ କଗ୍ଲେ ଆଜିମାଚି କାଜିଙ୍ଗ୍। ହେଲେକେ ଯଦି ଖ୍ରୀଷ୍ଟାନ୍ ଆଣ୍ଡ୍ରେନିଙ୍ଗ୍ ଖ୍ରୀଷ୍ଟାନ୍ ଆୱିତି କଗ୍ଲେ ମାନାତ୍, ହେ କଗ୍ଲେ ମାପୃ ଯୀଶୁନି ମାନାୟ୍ ଆନାତ୍, ଇନେସ୍କି ଏନେଙ୍ଗ୍ ଖ୍ରୀଷ୍ଟାନ୍। ଯଦି ହାତ୍ପା ଖ୍ରୀଷ୍ଟାନ୍ ଆୱିତି ଆଣ୍ଡ୍ରେନ୍ କି କଗ୍ଲେ ଈଶ୍ୱରନି ମାନାୟ୍ ଆୱାଦାଙ୍ଗ୍ ମାନ୍ଙ୍ଗାନାର୍, ଲାଗିଙ୍ଗ୍ ମି ହିମ୍ଣାୱାକ୍ଡ଼ା ପା ଈଶ୍ୱର ମାନାୟାର୍ ଆଉର୍। ମାତର୍ ନଙ୍ଗୟ୍ ମି ହିମ୍ଣାୱାକ୍ଡ଼ା ପା ଈଶ୍ୱର ମାନାୟାର୍ ଆତାର୍ନା। 15 ମାତର୍ ଯଦି ଖ୍ରୀଷ୍ଟାନ୍ ଆୱିତି ଆଣ୍ଡ୍ରେନ୍ କି କଗ୍ଲେ ପିସ୍ପା ଆଦେଙ୍ଗ୍ ଇଚା କିନାରା ହେୱାର୍ ପିସ୍ପା ଆଦେଙ୍ଗ୍ ଆଡ୍ନାର୍। ହେପାଦ୍ନା ଖ୍ରୀଷ୍ଟାନ୍ କଗ୍ଲେ କି ଆଣ୍ଡ୍ରେନ୍ ହେୱାର୍ ହୁଦାଙ୍ଗ୍ ମାଞ୍ଜେଙ୍ଗ୍ ଦର୍କାର୍ ଆକାୟ୍, ଇନେସ୍କି ଈଶ୍ୱର ମାଙ୍ଗେଙ୍ଗ୍ ଶାନ୍ତିତାଙ୍ଗ୍ ମାନେର୍ ଇଞ୍ଜି ଇଚା କିନାନା। 16 ଏ ଖ୍ରୀଷ୍ଟାନ୍ କଗ୍ଲେ କାଦେର୍, ମି କାଜିଙ୍ଗ୍ ମି ଆଣ୍ଡ୍ରାଙ୍ଗ୍ ଉଦାର୍ କିଦେଙ୍ଗ୍ ଆଡ୍ନାର୍, ଆରେ ଏ ଖ୍ରୀଷ୍ଟାନ୍ ଆଣ୍ଡ୍ରାଙ୍ଗ୍ କାଦେର୍ ମି କାଜିଙ୍ଗ୍ ମି ଡକ୍ରିକ୍ ଖ୍ରୀଷ୍ଟାନ୍ ଆଦେଙ୍ଗ୍ ଆଡ୍ନିକ୍। ଈଶ୍ୱର ହିତ୍ତି ଦାନ୍ଲେକେ ଜିବୁନ୍ କାଟିକିୟାଟ୍ 17 ମାପୃ ମିଙ୍ଗେଙ୍ଗ୍ ଇମ୍ଣି ଅବସ୍ତାତାକେ ଇଡ଼୍ଜି ମାନ୍ଞ୍ଚିସ୍ ପା ଏପେଙ୍ଗ୍ ହେ ଅବସ୍ତାତାକେ ମାନାଟ୍। ଈଶ୍ୱର ମିଙ୍ଗେଙ୍ଗ୍ ଆଗେ ଇମ୍ଣି ଅବସ୍ତାତାକେ ହିର୍ବି ମାନ୍ଞ୍ଚାନ୍ ହେ ଅବସ୍ତାତାଙ୍ଗ୍ ଜିବୁନ୍ କାଟିକିଜି ମାନାଟ୍। ଆନେଙ୍ଗ୍ ଇ ନିୟମ୍ୱିଜୁ ମଣ୍ଡ୍ଲିକାଙ୍ଗ୍ ଆୟେତ୍ ଇଞ୍ଜି ଇଚା କିନାଙ୍ଗା। 18 ଯଦି ର ଯିହୁଦି ମାନାୟ୍ ମାପୃ ଯୀଶୁଙ୍ଗ୍ ପାର୍ତି କିନାନା, ଲାଗିଙ୍ଗ୍ ହେୱାନ୍ ଆନେଙ୍ଗ୍ ଯିହୁଦିନି ମାନାୟ୍ ଆକାୟ୍ ଇଞ୍ଜି ୱେଚ୍ମେନ୍। ହେଲେକେ ଯଦି ର ବିନ୍ଜାତିନି ମାନାୟ୍ ମାପୃ ଯୀଶୁଙ୍ଗ୍ ପାର୍ତିକିନାନ୍, ହେୱାନ୍ ଯିହୁଦି ମାନାୟ୍ ଆନି କାଜିଙ୍ଗ୍ ହେୱାନ୍ ସୁନତ ଆମେନ୍। 19 ଇନେସ୍କି ଯଦି ର ମାନାୟ୍ କାଜିଙ୍ଗ୍ ସୁନତ ଆନାକା କି ଆୱାକା ହେଦାଙ୍ଗ୍ ମୁକ୍ଯ ବିଷୟ ଆକାୟ୍, ମାତର୍ ଈଶ୍ୱର ଆଦେସ୍ତିଙ୍ଗ୍ ମାନିକିନାକା ନେ ମୁକ୍ଯ ବିଷୟ। 20 ଈଶ୍ୱର ମିଙ୍ଗେଙ୍ଗ୍ ବାଚିକିତ୍ତିହିଙ୍ଗ୍, ଇନେସ୍ ମାଚାଦେର୍ ହେଲେକେ ଏପେଙ୍ଗ୍ ମାନାଟ୍। 21 ଏନେଙ୍ଗ୍ ଯଦି ଚାକର୍ ଆତାଇନା ଆରେ ଈଶ୍ୱର ନିଙ୍ଗେଙ୍ଗ୍ ବାଚିକିତ୍ତାନ୍, ଲାଗିଙ୍ଗ୍ ହେ ବିଷୟ କାଜିଙ୍ଗ୍ ଏନେଙ୍ଗ୍ ଦୁଃକ୍ କିମା। ମାତର୍ ଯଦି ମି ମାଲିକ୍ ଚାକର୍ କାମାୟ୍ତାଙ୍ଗ୍ ହାଲା ଇଞ୍ଜି ପିସ୍ତି ହିଦ୍ନାନ୍ ଲାଗିଙ୍ଗ୍ ଏନେଙ୍ଗ୍ ହାଲା। 22 ଯଦି ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଚାକର୍ ଆଜି ମାଚିହିଙ୍ଗ୍ ବାଚି କିତ୍ତାନ୍ନା, ଲାଗିଙ୍ଗ୍ ହେୱାନ୍ ପାପ୍ନି ଶାକ୍ତିତାଙ୍ଗ୍ ମିଙ୍ଗେଙ୍ଗ୍ ମୁକ୍ତି କିତ୍ତାନ୍ନା। ଆରେ ଯଦି ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଚାକର୍ ଆୱିହିଙ୍ଗ୍ ବାଚି କିତ୍ତାନ୍ନା, ଲାଗିଙ୍ଗ୍ ହେୱାନ୍ ମିଙ୍ଗେଙ୍ଗ୍ ତା ଚାକର୍ କିତ୍ତାନ୍ନା। 23 ଖ୍ରୀଷ୍ଟ ମି କାଜିଙ୍ଗ୍ କୃଶକାଟ୍ତାକେ ହାଃଜି ବେସି ଦାମ୍ ହିଜି ମିଙ୍ଗେଙ୍ଗ୍ କଡ଼୍ଦାତାନ୍ନା। ଏପେଙ୍ଗ୍ ଇ ଜଗତ୍ନି ମାନାୟାର୍ କାଜିଙ୍ଗ୍ ଚାକର୍ ଆମାଟ୍। 24 ଲାଗିଙ୍ଗ୍ ଏ ଲାଡ୍ନି ଟଣ୍ଡାର୍କାଦେର୍, ଏପେଙ୍ଗ୍ ଖ୍ରୀଷ୍ଟାନ୍ ଆତିହିଙ୍ଗ୍ ଆଗେ ଇନେସ୍ ମାଚାଦେର୍ ହେଲେକେ ମାନାଟ୍, ଆରେ ଈଶ୍ୱର ହୁଦାଙ୍ଗ୍ ମାହାଆଜି ମାନାଟ୍। ୱାଟା ଗାଡ଼୍ଚେକାଙ୍ଗ୍ ଆରେ ରାଣ୍ଡିକାଙ୍ଗ୍ ପାଉଲ ବିବା ଆୱି ବିଷୟରେ ୱେଚ୍ଚାନ୍ 25 ନଙ୍ଗୟ୍ ୱାଟା ଗାଡ଼୍ଚେକ୍ କାଜିଙ୍ଗ୍ ଆନେଙ୍ଗ୍ ୱେଚ୍ନାଙ୍ଗା। ହେ ଆଜ୍ଞା ଆନେଙ୍ଗ୍ ମାପୃ ଯୀଶୁତାଙ୍ଗ୍ ହେୱେକ୍ କାଜିଙ୍ଗ୍ ପାୟା ଆୱାତାଙ୍ଗ୍ନା, ମାତର୍ ମାପୃ ଯୀଶୁ ନାଙ୍ଗେଙ୍ଗ୍ ଦୟାକିଜି ମାନ୍ଚି କାଜିଙ୍ଗ୍ ହେୱାନ୍ ନାଙ୍ଗେଙ୍ଗ୍ ବୁଦି ହିତ୍ତାନ୍, ହେ ବୁଦିତିଙ୍ଗ୍ ପାର୍ତି କିୟାଆନାତ୍ ଆରେ ଆନେଙ୍ଗ୍ ହେଦାଙ୍ଗ୍ ମିଙ୍ଗେଙ୍ଗ୍ ହିଦ୍ନାଙ୍ଗା। 26 ଆନେଙ୍ଗ୍ ବାବିକିନାଙ୍ଗା ଯେ, ଏପେଙ୍ଗ୍ ବିବା ଆୱାଦାଙ୍ଗ୍ ୱାଟା ମାନାକା ହାର୍, ଇନେସ୍କି ନଙ୍ଗୟ୍ନି ଦିନ୍ ପାର୍ତି କିନାକାର୍ କାଜିଙ୍ଗ୍ ୱିଜୁ ନିପଣ୍ ସମସ୍ଯା ଆନାତା। 27 ଯଦି ଏପେଙ୍ଗ୍ ବିବା ଆତାଦେର୍ନା, ଲାଗିଙ୍ଗ୍ ତା ହୁଦାଙ୍ଗ୍ ପିସ୍ପା ଆମାଟ୍। ଯଦି ଏପେଙ୍ଗ୍ ବିବା ଆୱାତାଦେର୍ନା, ଲାଗିଙ୍ଗ୍ ଏପେଙ୍ଗ୍ ଆରେ ବିବା ଆମାଟ୍। 28 ମାତର୍ ଯଦି ଏପେଙ୍ଗ୍ ବିବା ଆନାଦେର୍, ହେଦାଙ୍ଗ୍ ପାପ୍ ଆକାୟ୍, ଆରେ ହେଲେକେ ଯଦି ର ୱାଟା ଗାଡ଼୍ଚେ ବିବା ଆନାତ୍, ହେଦାଙ୍ଗ୍ ପା ପାପ୍ ଆକାୟ୍। ମାତର୍ ବିବାଆତି ମାନାୟାର୍ ଇ ଜଗତ୍ତାକେ ତା ଜିବୁନ୍ତ ଦୁଃକ୍ କଷ୍ଟ ପାୟାଆନାର୍। ଆରେ ଏପେଙ୍ଗ୍ ହେ ଦୁଃକ୍କଷ୍ଟତାଙ୍ଗ୍ ଦେହା ମାନାଟ୍ ଇଞ୍ଜି ଆନେଙ୍ଗ୍ ଇଚା କିନାଙ୍ଗା। 29 ଏ ଟଣ୍ଡାର୍କାଦେର୍, ମା କାଜିଙ୍ଗ୍ ପୁର୍ତିତାକେ ବେସିଦିନ୍ ହିଲେତ୍। ହେଦାଙ୍ଗ୍ କାଜିଙ୍ଗ୍ ଡକ୍ରି ମାନାତ୍ କି ଆକାୟ୍ ଇଞ୍ଜି ଚିନ୍ତା କିମାଟ୍। ମାତର୍ ମାପୃ ଯୀଶୁଙ୍ଗ୍ ହେବା କିଦେଙ୍ଗ୍ ଚିନ୍ତା କିୟାଟ୍। 30 ଯଦି ଏପେଙ୍ଗ୍ ଆଡ଼୍ବି ମାଚିସ୍ କି ୱାରି ମାଚିସ୍ କି ଜାର୍ କାଜିଙ୍ଗ୍ ଇନା ଜିନିଷ୍ କଡ଼୍ଜି ମାଚିସ୍, ଇଦାଙ୍ଗ୍ କାଜିଙ୍ଗ୍ ଚିନ୍ତା କିମାଟ୍। ଇନେସ୍କି ଇ ୱିଜୁ ବିଷୟ ଈଶ୍ୱରତିଙ୍ଗ୍ ହେବା କିଦେଙ୍ଗ୍ ବାଣାୟ୍ କିଦ୍ନାତ୍। 31 ମା କାଜିଙ୍ଗ୍ ଇ ପୁର୍ତିନି ୱିଜୁ ଜିନିଷ୍ ବେସି ମୁକ୍ୟ ଆକାୟ୍, ଇନାକା ୱିଜୁ ମା ତାକେ ମାନାତ୍ ଇନେସ୍କି ଇ ପୁର୍ତିନି ୱିଜୁ ଜିନିଷ୍ ବେସିଦିନ୍ ମାନୁତ୍। 32 ଆନେଙ୍ଗ୍ ଇଚା କିନାଙ୍ଗା ଯେ, ଏପେଙ୍ଗ୍ ୱିଜୁଦିନ୍ କିନି କାମାୟ୍ନି ବିଷୟରେ ଚିନ୍ତା କିନି ଦର୍କାର୍ ଆକାୟ୍। ରୱାନ୍ ବିବା ଆୱିତି ମାନାୟ୍ ମାପୃ କାମାୟ୍ କିଜି ଜିବୁନ୍ କାଟି କିଦେଙ୍ଗ୍ ଆଡ୍ନାନ୍ ଆରେ ମାପୃଙ୍ଗ୍ ୱାରି କିନିଲେକେ କାମାୟ୍ କିଦେଙ୍ଗ୍ ଚିନ୍ତା କିନାନ୍। 33 ମାତର୍ ରୱାନ୍ ବିବାଆତି ମାନାୟ୍ ଇ ପୁର୍ତିନି କାମାୟ୍ କିନି ବିଷୟରେ ଚିନ୍ତା କିଦେଙ୍ଗ୍ ଆନାତ୍ ଆରେ ତା ଡକୃହିଙ୍ଗ୍ ୱାରି କିଦେଙ୍ଗ୍ ଉପାୟ୍ କିନାନ୍। 34 ଆରେ ତା ମାନ୍ତିଙ୍ଗ୍ ରିପଣ୍ଡାଙ୍ଗ୍ କିଜି ମାନାନ୍। ହେଲେକେ ର କଗ୍ଲେ ଯଦି ବିବା ଆୱାତାତ୍ନା ଆରେ ବିବା ଆଉତ୍, ଲାଗିଙ୍ଗ୍ ହେଦେଲ୍ ମାପୃଙ୍ଗ୍ ଆଦିକ୍ ହେବା କିଦେଙ୍ଗ୍ ଆଡ୍ନାତ୍, ହେଦେଲ୍ ଜାର୍ ଗାଗାଡ଼୍ ଆରେ ଆତ୍ମାତିଙ୍ଗ୍ ପବିତ୍ର କିନାତ୍। ମାତର୍ ଇମ୍ଣି କଗ୍ଲେ ବିବା ଆତାତ୍ନା, ଇ ପୁର୍ତିନି ୱିଜୁ ବିଷୟ ଆରେ ୱିଜୁ ଦିନ୍ତି କାମାୟ୍ କିଦେଙ୍ଗ୍ ଆନାତ୍ ଆରେ ପା ହେଦେଲ୍ ତା ଡକ୍ରାହିଙ୍ଗ୍ ୱାରି କିଦେଙ୍ଗ୍ ଉପାୟ୍ କିନାତ୍। 35 ଆନେଙ୍ଗ୍ ମିଙ୍ଗେଙ୍ଗ୍ ହେଲେକେ କିୱେଦେଙ୍ଗ୍ ଆଦେସ୍ ହିଦୁଙ୍ଗା, ମାତର୍ ମି ଲାବ୍ କାଜିଙ୍ଗ୍ ୱେଚ୍ଚାନାଙ୍ଗା। ଇଦାଙ୍ଗ୍ ରଞ୍ଜି ବେସି ହାର୍ ଉପାୟ୍ ଯେ ଆସେଙ୍ଗ୍ ମା ମାପୃଙ୍ଗ୍ ହେବା ହାର୍କିଜି କିନି କାଜିଙ୍ଗ୍ ସାଇଜ କିଦ୍ନାତ୍। 36 ମି ବିତ୍ରେତାଙ୍ଗ୍ ଇନେର୍ ଯଦି ତା ଗାଡ଼୍ହିଙ୍ଗ୍ ବିବା କିଜି ହିଉନେ, ଆରେ ହେୱାନ୍ ଟିକ୍ କିଉନା ଇଞ୍ଜି ବାବିକିନାନା, ଲାଗିଙ୍ଗ୍ ହେୱାନ୍ ଟିକ୍ ବାବିକିନି ବିଷୟତିଙ୍ଗ୍ କିନି ଦର୍କାର୍ ଯଦି ହେଦେଲ୍ ବିବା ଆଦେଙ୍ଗ୍ ମାନ୍ କିନାତା, ହେଦେଲ୍ ପାପ୍ କିଉତା। ହେୱାନ୍ ତା ଗାଡ଼୍ହିଙ୍ଗ୍ ବିବା କିଦେଙ୍ଗ୍ ଆଣ୍ଡ୍ରେନ୍ ଦାହ୍ନି ଦର୍କାର୍। 37 ମାତର୍ ଯଦି ଇ ଗାଡ଼୍ଚେ ବିବା ଆୱେଦେଙ୍ଗ୍ ତା ମାନ୍ତ ଇଚା କିତାତ୍ନା ଆରେ ଯଦି ହେଲେକେ କିଦେଙ୍ଗ୍ ତାଙ୍ଗେଙ୍ଗ୍ ଇନେର୍ ଯବର୍ ଦସ୍ତ୍ କିୱାତାର୍ନା, ଲାଗିଙ୍ଗ୍ ହେଦେଲ୍ ଇନାକା ତା ମାନ୍ତ ବାବିକିଜି ମାନାତ୍ ହେଦେଲ୍ ହେଦାଙ୍ଗ୍ କିଦେଙ୍ଗ୍ ଅଦିକାର୍ ମାନାତ୍। ଆରେ ଯଦି ହେଦେଲ୍ ନିଜେ ବିବା ଆୱାଦାଙ୍ଗ୍ ମାଞ୍ଜେଙ୍ଗ୍ ଇଚା କିତାତ୍ନା, ଈଶ୍ୱର ଆଗେ ହେଦେଲ୍ ହାର୍ କାମାୟ୍ କିନାତା। 38 ଲାଗିଙ୍ଗ୍ ଇମ୍ଣି ମାନାୟ୍ ବିବା ଆଦେଙ୍ଗ୍ ଇଚା କିନାନା, ହେୱାନ୍ ହାର୍ କାମାୟ୍ କିନାନା, ଆରେ ଇମ୍ଣି ମାନାୟ୍ ବିବା ଆୱେଦେଙ୍ଗ୍ ଇଚା କିନାନା ହେୱାନ୍ ଆଦିକ୍ ହାର୍ କିନାନା। 39 ଯଦି ର କଗ୍ଲେ ବିବା ଆତାତ୍ନା, ହେଦେଲ୍ ତା ଡକ୍ରାହି ଜିବୁନ୍ ମାନି ପାତେକ୍ ତା ହୁଦାଙ୍ଗ୍ ମାଞ୍ଜେଙ୍ଗ୍ ଆନାତ୍। ଆରେ ଯଦି ତା ଡକ୍ରାହି ହାଃନାନ୍, ଲାଗିଙ୍ଗ୍ ହେଦେଲ୍ ମାନ୍ କିତାକାନିଙ୍ଗ୍ ଆରେ ର ଆଣ୍ଡ୍ରେନିଙ୍ଗ୍ ବିବା ଆଦେଙ୍ଗ୍ ଆଡ୍ନାତ୍, ଯଦି ହେ ଆଣ୍ଡ୍ରେନ୍ ଖ୍ରୀଷ୍ଟାନ୍ ଆତାନ୍ନା। 40 ମାତର୍ ହେ କଗ୍ଲେ କାଜିଙ୍ଗ୍ ଆନେଙ୍ଗ୍ ଇଚା କିନାଙ୍ଗା ଯେ, ହେଦେଲ୍ ବିବା ଆୱାଦାଙ୍ଗ୍ ୱାଟା ମାନାକା ବେସି ହାର୍, ଆରେ ଆନେଙ୍ଗ୍ ବାବିକିନାଙ୍ଗା ଯେ ଆନେଙ୍ଗ୍ ଇ ଉପାୟ୍ ଈଶ୍ୱରତି ପବିତ୍ର ଆତ୍ମାତାଙ୍ଗ୍ ୱେଚ୍ନାଙ୍ଗା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation