୧ କରନ୍ତିୟ 6 - New Testament in Pengo Parja Languageଟଣ୍ଡାହିର୍ ବିରଦ୍ତାକେ ମାକଦମା 1 ଯଦି ଏପେଙ୍ଗ୍ ମି ପାର୍ତିନି ଟଣ୍ଡାର୍ ବିରୁଦ୍ତାକେ ଇନା ବେଣ୍ ମାନାତ୍ ଆରେ ମିହୁଦାଙ୍ଗ୍ ରାଜି ରାମା ଆୱାତାଦେର୍ନା, ଏପେଙ୍ଗ୍ ବିନ୍ଜାତିନି ମାନାୟାରିଙ୍ଗ୍ ବିଚାର୍କିନି ଆଗେ ବିଚାର୍କିନି କାଜିଙ୍ଗ୍ ହାଲ୍ମାଟ୍। ମାତର୍ ଈଶ୍ୱରନି ଦରମ୍ ମାନାୟାର୍ ଲାଗେ ହାଲାଟ୍, ହେୱାନ୍ ମିଙ୍ଗେଙ୍ଗ୍ ଟିକ୍ ବିଚାର୍ କିଦ୍ନାନ୍। 2 ଏପେଙ୍ଗ୍ ଟିକ୍ ବାବ୍ରେ ପୁଚାଦେର୍ନା ଯେ, ରଦିନ୍ ୱାନାତ୍ ଈଶ୍ୱରତାକେନି ଦରମ୍ ମାନାୟାର୍ ଇ ପୁର୍ତିନି ମାନାୟାରିଙ୍ଗ୍ ବିଚାର୍ କିନାର୍। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍ ଇମ୍ଣି ମାନାୟ୍ ଟିକ୍ ଆରେ ଏପେଙ୍ଗ୍ ହେୱାର୍ ବିତ୍ରେ ରାଜି ରାମା କିଦେଙ୍ଗ୍ ଆଡ୍ନାଦେର୍। 3 ଏପେଙ୍ଗ୍ ପୁଚାଦେର୍ନା ଯେ, ରଦିନ୍ ୱାନାତ୍ ଏପେଙ୍ଗ୍ ଶୟତାନନି ଦୁତ୍କୁକାଙ୍ଗ୍ ବିଚାର୍ କିନାଦେର୍। ଲାଗିଙ୍ଗ୍ ଏପେଙ୍ଗ୍ ୱିଜୁ ଦିନ୍ତି ଗଣ୍ଡ୍ଗଲ୍ତିଙ୍ଗ୍ ପା ରାଜି ରାମା କିଦେଙ୍ଗ୍ ଆଡ୍ନାଦେର୍। 4 ଯଦି ହେ ଲେଗ୍ଦି ବିଷୟ ମି ମଣ୍ଡ୍ଲି ବିତ୍ରେ ଗଟାଆନାତ୍, ଲାଗିଙ୍ଗ୍ ଏପେଙ୍ଗ୍ ହେୱାରିଙ୍ଗ୍ ବିନ୍ଜାତିର୍ ବିଚାର୍କିନି ମାନାୟାର୍ତାକେ ରାଜି ରାମା କିଦେଙ୍ଗ୍ ହାଲ୍ମାଟ୍। 5 ଆନେଙ୍ଗ୍ ମିଙ୍ଗେଙ୍ଗ୍ ଲାଜ୍ କିଦ୍ନି କାଜିଙ୍ଗ୍ ୱେଚ୍ଚାନାଙ୍ଗ୍, ପାକା ମି ବିତ୍ରେ ବୁଦି ମାନି ମାନାୟ୍ ମାନ୍ଗାନାନ୍ ହେୱାନ୍ ଇ ରିୟାର୍ ପାର୍ତିକିନି ଟଣ୍ଡାର୍ ବିତ୍ରେ ଇଲେକେ ବିଷୟତିଙ୍ଗ୍ ସମାଦାନ୍ କିଦେଙ୍ଗ୍ ଆଡ୍ନାନ୍। 6 ମାତର୍ ମି ବିତ୍ରେତାଙ୍ଗ୍ କେତ୍ଜାଣ୍ ମାନାର୍ ଯେ, ହେୱାର୍ ଜାର୍ ପାର୍ତିନି ଟଣ୍ଡାର୍ ବିରଦ୍ତାକେ ବିଚାର୍କିନି ବାହାତାକେ ବିଚାର୍ କିଦେଙ୍ଗ୍ ଅନାଦେରା, ଆରେ ବିନ୍ଜାତିର୍ ବିଚାର୍କିନି ମାନାୟ୍ ତାଙ୍ଗେଙ୍ଗ୍ ବିଚାର୍ କିନାନା। 7 ଏଚେପାଦ୍ନା ମି ବିତ୍ରେତାଙ୍ଗ୍ ଇନେର୍ ଯଦି ମି ପାର୍ତିନି ଟଣ୍ଡେନିଙ୍ଗ୍ ବିଚାର୍ କିଦେଙ୍ଗ୍, ବିଚାର୍କିନି ବାହାତାକେ ଅନାନା, ଲାଗିଙ୍ଗ୍ ଏପେଙ୍ଗ୍ ଜାର୍-ଜାର୍ବିତ୍ରେ ଖ୍ରୀଷ୍ଟାନ୍ ଲକ୍ ମାଚିଲେକେ, ଜିବୁନ୍ କାଟି କିଦେଙ୍ଗ୍ ଆଡୁଦେରା। 8 ମାତର୍ ଏପେଙ୍ଗ୍ ନେ ହେ ମାନାୟ୍ କାଦେର୍, ଯେ ତା ଜାର୍ ଖ୍ରୀଷ୍ଟାନ୍ ଟଣ୍ଡେନ୍ ବିରୁଦ୍ ପା ଅନ୍ୟାୟ୍ ଆରେ ତାଙ୍ଗେଙ୍ଗ୍ ଟକାୟ୍ କିନାଦେରା। 9 ଏପେଙ୍ଗ୍ ତ ପୁଚାଦେର୍ନା ଇମ୍ଣି ମାନାୟ୍ କରାପ୍ କାମାୟ୍ କିନାନ୍, ହେୱାନ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡୁନ୍। ଏପେଙ୍ଗ୍ ଜାର୍ତିଙ୍ଗ୍ ଟକାୟ୍ କିୟାଆମାଟ୍। ଇନେସ୍କି ଇମ୍ଣି ମାନାୟାର୍ ହୁଞ୍ଜା ମାଗା ଆନି ପାପ୍, ମୁର୍ତି ପୁଜା, ଦାରି କାମାୟ୍, ଆଣ୍ଡ୍ରାଙ୍ଗ୍ ଦାରି କାମାୟ୍, 10 ଆଣ୍ଡ୍ରାଙ୍ଗ୍-ଆଣ୍ଡ୍ରାଙ୍ଗ୍ ବିତ୍ରେ ଦାରି କାମାୟ୍, ଚରି କିନାର୍, ଲକାର୍ ଦନ୍ତିଙ୍ଗ୍ ଲବ୍ ଆନାର୍, କାଲିଙ୍ଗ୍ ଉଣାର୍, ମାନାୟାରିଙ୍ଗ୍ ନିନ୍ଦା କିନାର୍, ଲକାର୍ ଦନ୍ତିଙ୍ଗ୍ ଟକାୟ୍ କିଜି ଅନାର୍, ଇଲେଗ୍ଦି ମାନାୟାର୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡୁର୍। 11 ମି ବିତ୍ରେ କେତ୍ଜାଣ୍ ମାଚାର୍ ଯେ, ହେୱାର୍ ଇଲେକେ କାମାୟ୍ କିଜି ମାଚାର୍। ମାତର୍ ଈଶ୍ୱର ନଙ୍ଗୟ୍ ମି ପାପ୍ତିଙ୍ଗ୍ ନୁସ୍ଦାତାନ୍ନା, ଆରେ ଏପେଙ୍ଗ୍ ହେବେତାଙ୍ଗ୍ ବିନେ ଆତାଦେର୍ନା। ଏପେଙ୍ଗ୍ ଈଶ୍ୱର ଆଗେ ଟିକ୍ ଲକ୍ ଆତାଦେର୍ନା, ଇନେସ୍କି ମା ଈଶ୍ୱର ମେହି ମାପୃ ଯୀଶୁ ଖ୍ରୀଷ୍ଟ ଆରେ ପବିତ୍ର ଆତ୍ମା ଇନାକା ମି କାଜିଙ୍ଗ୍ କିତିକ୍ନା। ଦାରି କାମାୟ୍ କିୱି ବିଷୟ 12 କେତ୍ଜାଣ୍ ମାନାୟାର୍ ଇନାର୍, “ଆନେଙ୍ଗ୍ ୱିଜୁ କିଦେଙ୍ଗ୍ ଆଡ୍ନାଙ୍ଗ୍ ଆରେ ନାଙ୍ଗେଙ୍ଗ୍ ଇନେର୍ ପା ମୁନା କିଦ୍ଦେଙ୍ଗ୍ ଆଡ଼୍ଦୁର୍,” ହେଦାଙ୍ଗ୍ ସତ୍, ମାତର୍ ଆନେଙ୍ଗ୍ କିନାଙ୍ଗା ଯେ, “ମି କାଜିଙ୍ଗ୍ କେତେକ୍ ଜିନିଷ୍ ହାର୍ ଆକାୟ୍।” ନାଙ୍ଗେଙ୍ଗ୍ ୱିଜୁ ଜିନିଷ୍ କିଦେଙ୍ଗ୍ ଅନୁମତି ଗାଟା ଆତ୍ତାତ୍ନା, ମାତର୍ ଆନେଙ୍ଗ୍ ହେ ଜିନିଷ୍ନି ଚାକର୍ ଆନାକା ଟିକ୍ ଆକାୟ୍। 13 ଏପେଙ୍ଗ୍ ଇଞ୍ଜେଙ୍ଗ୍ ଆଡ୍ନାଦେର୍, କାଦି ଗାଗାଡ଼୍ କାଜିଙ୍ଗ୍ ଆରେ ଗାଗାଡ଼୍ କାଦି କାଜିଙ୍ଗ୍ ରହ୍ୟା ଆତାତ୍ନା, ହେଦାଙ୍ଗ୍ ସତ୍, ମାତର୍ ହେ ରିଣ୍ଡାଙ୍ଗ୍ ଜିନିଷ୍ତିଙ୍ଗ୍ ଈଶ୍ୱର ରଦିନ୍ ବିନାସ୍ କିନାନ୍। ତା ଅର୍ତ ଇଦାଙ୍ଗ୍ ଆକାୟ୍ ଯେ, ଏପେଙ୍ଗ୍ ମି ଗାଗାଡ଼୍ତିଙ୍ଗ୍ ଦାରି କାମାୟ୍ କିଦେଙ୍ଗ୍ ବ୍ୟବହାର୍ କିୟାଟ୍, ଇନେସ୍କି ଇ ଗାଗାଡ଼୍ ମାପୃତି ଆରେ ମାପୃଙ୍ଗ୍ ହେବା କିଦେଙ୍ଗ୍ ବ୍ୟବହାର୍ କିନି ଦର୍କାର୍। 14 ଈଶ୍ୱର ତା ଶାକ୍ତି ହୁଦାଙ୍ଗ୍ ମା ଗାଗାଡ଼୍ତିଙ୍ଗ୍ ହାଃତିତାଙ୍ଗ୍ ଆରେରଗ ନିକ୍ତାନାନ୍, ଇନେସ୍ ମା ମାପୃ ଯୀଶୁ ଖ୍ରୀଷ୍ଟଙ୍ଗ୍ ହାଃତିତାଙ୍ଗ୍ ଆରେରଗ ନିକ୍ତାନ୍। 15 ଏପେଙ୍ଗ୍ ହାର୍ କିଜି ପୁଚାଦେର୍ନା ଯେ, ମି ଗାଗାଡ଼୍ ଖ୍ରୀଷ୍ଟ ଗାଗାଡ଼୍ତାକେ ମାହାଆତାତ୍ନା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଦାରି କାମାୟ୍ କିନି କାଜିଙ୍ଗ୍ ମି ଗାଗାଡ଼୍ତିଙ୍ଗ୍ ବ୍ୟବହାର୍ କିନାକା ଟିକ୍ ଆକାୟ୍, ଇମ୍ଣାକା କି ଖ୍ରୀଷ୍ଟତି ଗାଗାଡ଼୍। 16 ଏପେଙ୍ଗ୍ ହାର୍ କିଜି ପୁଚାଦେର୍ନା ଯେ, ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା, “ରିୟାର୍ ର ଗାଗାଡ଼୍ ଆନାର୍,” ଲାଗିଙ୍ଗ୍ ଇମ୍ଣି ମାନାୟ୍ ଯଦି ଦାରି କାମାୟ୍ କିନାନ୍। ହେୱାନ୍ ଦାରି କାମାୟ୍ କଗ୍ଲେ ହୁଦାଙ୍ଗ୍ ଏକ୍ ଆନାନ୍। 17 ମାତର୍ ଇମ୍ଣି ମାନାୟ୍ ମାପୃ ହୁଦାଙ୍ଗ୍ ଏକ୍ ଆତାନ୍ନା ହେୱାନ୍ ତା ଆତ୍ମା ହୁଦାଙ୍ଗ୍ ଏକ୍ ଆତାନ୍ନା। 18 ଏପେଙ୍ଗ୍ ଦାରି କାମାୟ୍ତାଙ୍ଗ୍ ଦେହା ମାନାଟ୍, ଇମ୍ଣାକାନ୍ ୱିଜୁ ପାପ୍ କାମାୟ୍ କିନାନ୍ ହେୱାନ୍ ତା ଗାଗାଡ଼୍ ବାର୍ତ କିନାନ୍, ମାତର୍ ଦାରି କାମାୟ୍ କିନାକାନ୍ ତା ଜାର୍ ଗାଗାଡ଼୍ନି ବିରଦ୍ତାକେ ପାପ୍ କିନାନ୍। 19 ଏପେଙ୍ଗ୍ ହାର୍ କିଜି ପୁଚାଦେର୍ନା ଯେ, ମି ଗାଗାଡ଼୍ ପବିତ୍ର ଆତ୍ମାନି ମନ୍ଦିର୍ ଆରେ ହେୱାନ୍ ମି ବିତ୍ରେ ମାନାନା। ଇନେରିଙ୍ଗ୍ ଈଶ୍ୱର ମି ବିତ୍ରେ ମାଞ୍ଜେଙ୍ଗ୍ ହିତ୍ତାନ୍ନା। ଇନେସ୍କି ଏପେଙ୍ଗ୍ ଈଶ୍ୱରନି ଲକ୍ ଆତାଦେର୍ନା, 20 ହେୱାନ୍ ମିଙ୍ଗେଙ୍ଗ୍ ବେସି ଦାମ୍ ହିଜି କଡ଼୍ଦାତାନ୍ନା। ଲାଗିଙ୍ଗ୍ ଏପେଙ୍ଗ୍ ମି ଗାଗାଡ଼୍ତାଙ୍ଗ୍ ଈଶ୍ୱରତିଙ୍ଗ୍ ଗୌରବ ହିନି ଦର୍କାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation