୧ କରନ୍ତିୟ 5 - New Testament in Pengo Parja Languageପାଉଲ ଦାରି କାମାୟ୍ କିନି ମଣ୍ଡ୍ଲିନି ପାର୍ତି କିନାକାରିଙ୍ଗ୍ ଦମ୍କାଇକିଜି ୱେଚ୍ଚି କାତା 1 ଆନେଙ୍ଗ୍ ମି ବିଷୟରେ ମାନାୟାର୍ତାଙ୍ଗ୍ ୱେଚାଙ୍ଗ୍ ଯେ, ମି ବିତ୍ରେତାଙ୍ଗ୍ କେତ୍ଜାଣ୍ ମାନାର୍ ଦାରି କାମାୟ୍ କିନାରା, ଇଲେକେ କରାପ୍ କାମାୟ୍ ବିନ୍ଜାତିନି ମାନାୟାର୍ ପା କିଉର୍। ଆନେଙ୍ଗ୍ ୱେଚାଙ୍ଗ୍ ମି ମଣ୍ଡ୍ଲିତାକେ ଇଲେକେ ର ମାନାୟ୍ ମାନାନ୍ ଯେ, ହେୱାନ୍ ତା ଅଚୁତେହି ହୁଦାଙ୍ଗ୍ ଦାରି କାମାୟ୍ କିନାନା। 2 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ହେ ବିଷୟରେ ଦୁଃକ୍ ଆଜି ଆଡ଼୍ବିନି ଦର୍କାର୍ ମାଚାତ୍, ଆରେ ଇମ୍ଣି ମାନାୟ୍ ହେଲେକେ କାମାୟ୍ କିଜି ମାଚାନ୍ ହେୱାନିଙ୍ଗ୍ ମଣ୍ଡ୍ଲିତାଙ୍ଗ୍ ହପ୍ନି ଦର୍କାର୍ ମାଚାତ୍। ମାତର୍ ଏପେଙ୍ଗ୍ ହେଲେକେ କିୱାଦାଙ୍ଗ୍ ବାଟ୍ପାଣ୍ ଆନାଦେରା। 3 ଆନେଙ୍ଗ୍ ମି ଲାଗେ ହିଲିତିସ୍ ପା, ନା ମାନ୍ ମିତାକେ ମାନାତ୍। ଆରେ ଆନେଙ୍ଗ୍ ହେ ବାହାତାକେ ମାଚିଲେକେ ଇମ୍ଣି ମାନାୟ୍ ହେ କାମାୟ୍ କିତାନ୍ନା ତା କାଜିଙ୍ଗ୍ ଆନେଙ୍ଗ୍ ବିଚାର୍ କିତାଙ୍ଗ୍ମା। 4 ନଙ୍ଗୟ୍ ଏପେଙ୍ଗ୍ ଇଲେକେ କିନି ଦର୍କାର୍। ଏଚେପାଦ୍ନା ଏପେଙ୍ଗ୍ ପାର୍ତି କିନାକାଦେର୍ ରବେ ରୁଣ୍ଡା ଆନାଦେର୍, ମା ମାପୃ ଯୀଶୁ ଖ୍ରୀଷ୍ଟ ହାତ୍ପା ମିଙ୍ଗେଙ୍ଗ୍ ଅଦିକାର୍ ହିତ୍ତାନ୍ନା ଇଞ୍ଜି ପୁନି ଦର୍କାର୍। ଆରେ ହେଦାଙ୍ଗ୍ ନା ମାନ୍ତ ହେ ବାହାତାକେ ମାଚିଲେକେ ଆନାତ୍। ଆରେ ମା ମାପୃ ଯୀଶୁ ଖ୍ରୀଷ୍ଟନି ଶାକ୍ତିତାଙ୍ଗ୍, 5 ଇଲେକେ ମାନାୟ୍ତିଙ୍ଗ୍ ଏପେଙ୍ଗ୍ ମଣ୍ଡ୍ଲିତାଙ୍ଗ୍ ହପାଟ୍। ଆରେ ଶୟତାନ ତାଙ୍ଗେଙ୍ଗ୍ କଣ୍ଟ୍ରୁଲ୍ କିନି କାଜିଙ୍ଗ୍ ପିସ୍ତି ହିୟାଟ୍। ଲାଗିଙ୍ଗ୍ ହେୱାନ୍ ତା ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିନାନ୍, ଆରେ ମାପୃ ଯୀଶୁ ଆରେରଗ ପୁର୍ତିତାକେ ୱାନିହିଙ୍ଗ୍ ହେୱାନ୍ ରକ୍ଷା ପାୟା ଆନାନ୍। 6 ଲାଗିଙ୍ଗ୍ ଏପେଙ୍ଗ୍ ଇଲେକେ ବାଟ୍ପାଣ୍ ଆନାକା ହାର୍ ଆକାୟ୍। ଏପେଙ୍ଗ୍ ପୁଚାଦେର୍ନା ଯେ, ଇଚୁକ୍ ସଡ଼ାକାର୍ ୱିଜୁ ମଇଦାତିଙ୍ଗ୍ ପୁଲାଇ କିନାତ୍, ହେଲେକେ ଯଦି ର ମାନାୟ୍ ପାପ୍ କାମାୟ୍ କିଜି ମାନାନ୍ ଆରେ ଏପେଙ୍ଗ୍ ତାଙ୍ଗେଙ୍ଗ୍ ମୁନା କିଉଦେର୍ ଲାଗିଙ୍ଗ୍ ୱିଜାର୍ ମାନାୟ୍ ତା ଲେକେ ପାପ୍ କାମାୟ୍ କିଦେଙ୍ଗ୍ ହିକାଆନାର୍। 7 ଇନେସ୍ଲେକେ ଯିହୁଦା ଜାତିନି ମାନାୟ୍ ନିସ୍ତାର୍ ପାର୍ବୁ ମାନିକିନି ଆଗେ ତା ଇଞ୍ଜାଙ୍ଗ୍ ସଡ଼ାକାର୍ତିଙ୍ଗ୍ ହପ୍ତାନାର୍, ହେଲେକେ ଏପେଙ୍ଗ୍ ପା ହେ କରାପ୍ ମାନାୟ୍ତିଙ୍ଗ୍ ମି ଦଳ୍ତାଙ୍ଗ୍ ହପାଟ୍। ଲାଗିଙ୍ଗ୍ ଏପେଙ୍ଗ୍ ସଡ଼ାକାର୍ ମାହାଆୱିତି ରୁଟିଲେକେ ଆନାଦେର୍, ଆରେ ମିଙ୍ଗେଙ୍ଗ୍ ଈଶ୍ୱର ଉବ୍ଜାଇ କିତ୍ତି କାଜିଙ୍ଗ୍ ଏପେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତିକିନି ଦଳ୍ ଆନାଦେର୍ ଆରେ ମି ଦଳ୍ତାଙ୍ଗ୍ ଇନେର୍ ପା ପାପ୍ କାମାୟ୍ କିଦେଙ୍ଗ୍ ଇଚା କିଉର୍। ଇନେସ୍କି ନିସ୍ତାର୍ ପାର୍ବୁନି ମେଣ୍ଢାଲେକେ ଖ୍ରୀଷ୍ଟ ମା କାଜିଙ୍ଗ୍ ବଲିପୁଜା ଆତାନ୍ନା। 8 ଲାଗିଙ୍ଗ୍ ଏପେଙ୍ଗ୍ ଈଶ୍ୱର ତା ମାନାୟାର୍ଲେକେ ଆଜି ପବିତ୍ର ଆରେ ସତ୍ ଜିବୁନ୍ କାଟିକିନି ଦର୍କାର୍। ଇନେସ୍ଲେକେ ଯିହୁଦା ଜାତିନି ମାନାୟାର୍ ନିସ୍ତାର୍ ପାର୍ବୁ ମାନି କିନିହିଙ୍ଗ୍ ଇଞ୍ଜାକା ୱିଜୁ ସଡ଼ାକାର୍ ବାର୍ତ ତୁହିହିନାର୍, ଆରେ ସଡ଼ାକାର୍ ମାହାଆୱିତି ରୁଟି ହେୱାର୍ ତିନ୍ଞ୍ଜି ମାଚାର୍। ହେଲେକେ ଏପେଙ୍ଗ୍ ପାର୍ତିକିୱି ଆଗେ ଇମ୍ଣି ୱିଜୁ କରାପ୍ କାମାୟ୍ କିଜି ମାଚାଦେର୍ ହେଦାଙ୍ଗ୍ ବନ୍ଦ୍ କିନି ଦର୍କାର୍। 9 ଆନେଙ୍ଗ୍ ମିଙ୍ଗେଙ୍ଗ୍ ଦାରି କାମାୟ୍ କିନି ମାନାୟାର୍ ହୁଦାଙ୍ଗ୍ ମାହା ଆୱେଦେଙ୍ଗ୍, ଆନେଙ୍ଗ୍ ପାର୍ତୁମ୍ ଲେକିକିତି ଚିଟିତାକେ ପା ଲେକିକିଜି ମାଚାଙ୍ଗ୍। 10 ଇ ପୁର୍ତିନି ଦାରି କାମାୟ୍ କିନି ମାନାୟାର୍ କି ଦନ୍ ସମ୍ପତି ଲବ୍ ଆନାକାର୍ କି ଲକାର୍ ଜିନିଷ୍ତିଙ୍ଗ୍ ଚରିକିନାକାର୍ ଆରେ ମୁର୍ତି ପୁଜା କିନାକାରିଙ୍ଗ୍ ମାହା ଆମାଟ୍ ଇଞ୍ଜି ୱେଚ୍ୱାଦାଙ୍ଗ୍ ମାନ୍ଞ୍ଚାଙ୍ଗ୍। ଯଦି ଏପେଙ୍ଗ୍ ହେଲେକେ କିନାଦେର୍ ଲାଗିଙ୍ଗ୍ ଏପେଙ୍ଗ୍ ପୁର୍ତିତିଙ୍ଗ୍ ପିସ୍ତେଙ୍ଗ୍ ଆନାତ୍। 11 ମାତର୍ ଆନେଙ୍ଗ୍ ଲେକିକିତାକା ଇଲେକେ ଯେ, ଯଦି ଇମ୍ଣି ମାନାୟ୍ ଖ୍ରୀଷ୍ଟଙ୍ଗ୍ ପାର୍ତି କିଜି ଦାରି କାମାୟ୍ କିନାନ୍, ଦନ୍ ସମ୍ଫତିତିଙ୍ଗ୍ ଲବ୍ ଆନାନ୍, ମୁର୍ତି ପୁଜା କିନାନ୍, ଲକାଙ୍ଗ୍ ନିନ୍ଦା କିନାନ୍, କାଲିଙ୍ଗ୍ ଉଣାନ୍ ଆରେ ଲକାର୍ ଦନ୍ତିଙ୍ଗ୍ ଚର୍ କିନାନ୍, ଇଲେକେ ମାନାୟ୍ ହୁଦାଙ୍ଗ୍ ମାହା ଆମାଟ୍ କି ତା ହୁଦାଙ୍ଗ୍ ମାହାଆଜି ତିନ୍ମାଟ୍। 12 ଆନେଙ୍ଗ୍ ପାର୍ତିକିୱି ମାନାୟାରିଙ୍ଗ୍ ବିଚାର୍ କିଦେଙ୍ଗ୍ ଇନା ଅଦିକାର୍ ହିଲେତ୍। ମାତର୍ ଏପେଙ୍ଗ୍ ମି ମଣ୍ଡ୍ଲିନି ମାନାୟାରିଙ୍ଗ୍ ବିଚାର୍ କିଦେଙ୍ଗ୍ ଅଦିକାର୍ ମାନାତ୍। 13 ମାତର୍ ଈଶ୍ୱର ଖ୍ରୀଷ୍ଟଙ୍ଗ୍ ପାର୍ତିକିୱି ମାନାୟାରିଙ୍ଗ୍ ବିଚାର୍ କିନାନ୍, ଇନେସ୍ଲେକେ ଦରମ୍ ସାସ୍ତର୍ ୱେଚ୍ଚାତାନ୍ନା ଯେ, ହେଲେକେ କରାପ୍ କାମାୟ୍ କିନି ମାନାୟ୍ତିଙ୍ଗ୍ ମି ମଣ୍ଡ୍ଲିତାଙ୍ଗ୍ ହପାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation