୧ କରନ୍ତିୟ 4 - New Testament in Pengo Parja Languageପାଉଲତିଙ୍ଗ୍ ଖ୍ରୀଷ୍ଟନି ଦାସ୍ ଇଞ୍ଜି କରନ୍ତିୟ ମଣ୍ଡ୍ଲିନି ପାର୍ତିକିନି ମାନାୟାର୍ ସନ୍ମାନ୍ ହିନି ଦର୍କାର୍ 1 ଲାଗିଙ୍ଗ୍ ଏପେଙ୍ଗ୍ ନାଙ୍ଗେଙ୍ଗ୍ ଆରେ ଆପୋଲତିଙ୍ଗ୍ ଖ୍ରୀଷ୍ଟନି ଦାସ୍ ଇଞ୍ଜି ବାବିକିନି ଦର୍କାର୍, ଇନେସ୍କି ଈଶ୍ୱର ମାଙ୍ଗେଙ୍ଗ୍ ହାର୍ଦିକାବୁର୍ ଡ଼ୁକ୍ତି ସତ୍ ବିଷୟତିଙ୍ଗ୍ ବୁଜାୟ୍ କିନି କାମାୟ୍ ହିତ୍ତାନ୍ନା। 2 ଲାଗିଙ୍ଗ୍ ଇମ୍ଣି ମାନାୟ୍ତିଙ୍ଗ୍ ତା ମାଲିକ୍ କାମାୟ୍ ହିତାନ୍ନା, ହେୱାନ୍ ଦରମ୍ଆଜି ତା ଆଦେସ୍ ଅନୁସାରେ କାମାୟ୍ କିନି ଦର୍କାର୍। 3 ମାତର୍ ଏପେଙ୍ଗ୍, ଅଦିକାର୍ ପାୟା ଆତାକାର୍ ନାଙ୍ଗେଙ୍ଗ୍ ବିଚାର୍ କିତ୍ତିସ୍ ପା ଇନା ପାଣ୍ଡ୍ରୁ ଆକାୟ୍, ଇନେସ୍କି ଆନେଙ୍ଗ୍ ଜାର୍ କାଜିଙ୍ଗ୍ ଜାର୍ ପା ବିଚାର୍ କିଉଙ୍ଗା। 4 ଆନେଙ୍ଗ୍ ପୁଚାଙ୍ଗ୍ନା ଯେ, ଇନା ବୁଲ୍ କିୱାତାଙ୍ଗ୍ନା, ମାତର୍ ଆନେଙ୍ଗ୍ ହେଦାଙ୍ଗ୍ ୱେଚ୍ଚିସ୍ ଟିକ୍ ଆଉତ୍। ହେଦାଙ୍ଗ୍ ମାପୃ ନାଙ୍ଗେଙ୍ଗ୍ ପରିକ୍ଷା କିଜି ବିଚାର୍ କିଦ୍ନାନ୍। 5 ହେଦାଙ୍ଗ୍ କାଜିଙ୍ଗ୍ ମାପୃ ଆରେରଗ ପୁର୍ତିତାକେ ୱାୱି ପାତେକ୍ ମାନାୟାରିଙ୍ଗ୍ ଏପେଙ୍ଗ୍ ବିଚାର୍ କିମାଟ୍, ଏଚେପାଦ୍ନା ମାପୃ ୱାନାନ୍ ହେୱାନ୍ ମାନାୟାର୍ ମାନ୍ତି କାତାତିଙ୍ଗ୍ ୱେଚ୍ନାନ୍, ଇମ୍ଣାକା ଇନେର୍ ପା ପୁନୁର୍। ହେୱାନ୍ ମାନାୟାର୍ ଗରବ୍ ବିତ୍ରେନି ଇଚାତାଙ୍ଗ୍ ପୁନିକିନାନ୍। ହେପାଦ୍ନା ଈଶ୍ୱର ୱିଜୁ ମାନାୟାରିଙ୍ଗ୍ ହେୱାର୍ ଅଦିକାର୍ ଅନୁସାରେ ସନ୍ମାନ୍ ହିନାନ୍। 6 ଏ ଟଣ୍ଡାର୍କାଦେର୍, ଆପୋଲ ଆରେ ଆନେଙ୍ଗ୍ ଜାର୍ତିଙ୍ଗ୍ ଚଚ୍ଚି, ହେ ଅର୍ତତିଙ୍ଗ୍ ବୁଜା ଆଦେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଦରମ୍ ସାସ୍ତର୍ତାକେ ଇନାକା ଲେକାଆତାତ୍ନା ତା ହାନ୍ଦିନି ବାର୍ତ ହାଲ୍ମାଟ୍। ଯଦି ଏପେଙ୍ଗ୍ ରକାନିଙ୍ଗ୍ ସନ୍ମାନ୍ ହିନାଦେରା ଆରେ ରକାନିଙ୍ଗ୍ ଇନସ୍ତା କିନାଦେର୍ ଲାଗିଙ୍ଗ୍ ଏପେଙ୍ଗ୍ ହେଦାଙ୍ଗ୍ ଟିକ୍ କିଉଦେରା। 7 ଇନେର୍ ପା ମିଙ୍ଗେଙ୍ଗ୍ ଗାଜାକାର୍ କିଦ୍ୱାତାର୍ନା। ଈଶ୍ୱର ମିଙ୍ଗେଙ୍ଗ୍ ୱିଜୁ ଜିନିଷ୍ ହିତ୍ତାନ୍ନା। ଲାଗିଙ୍ଗ୍ ଏପେଙ୍ଗ୍ ବାଟ୍ପାଣ୍ ଆନି ଅଦିକାର୍ ହିଲେତ୍, ଇନେସ୍କି ଇନାକା ୱିଜୁ ପାୟା ଆତାଦେର୍ନା ହେ ୱିଜୁ ଈଶ୍ୱର ମିଙ୍ଗେଙ୍ଗ୍ ହିତ୍ତାନ୍ନା। 8 ଆନେଙ୍ଗ୍ ପୁଞ୍ଜେଙ୍ଗ୍ ଆଡ୍ନାଙ୍ଗା ଯେ, ଆପେଙ୍ଗ୍ ୱିଜୁ ପର୍କାର୍ ଆତ୍ମାନି ଦାନ୍ ପାୟାଆତାପ୍ନା ଇଞ୍ଜି ଏପେଙ୍ଗ୍ ବାବିକିନାଦେରା। ପବିତ୍ର ଆତ୍ମା ଇମ୍ଣି ଦାନ୍ ମାନାୟାରିଙ୍ଗ୍ ହିନାତା ହେ ଦାନ୍ତିଙ୍ଗ୍ ନେ ପାୟାଆତାପ୍ନା ଇଞ୍ଜି ବାବିକିନାଦେରା, ଆରେ ଏପେଙ୍ଗ୍ ରାଜାଆଜି ସାସନ୍ କିନାକା ଆରମ୍ କିତାପ୍ନା ଇଞ୍ଜି ବାବିକିନାଦେରା। ଆନେଙ୍ଗ୍ ୱାରିୟା ଆତାଙ୍ଗ୍ମା ଯଦି ଏପେଙ୍ଗ୍ ରାଜାଆଜି ସାସନ୍ କିତାଦେର୍ମା ଆରେ ପା ଆପେଙ୍ଗ୍ ପା ମିହୁଦାଙ୍ଗ୍ ମାହାଆଜି ସାସନ୍ କିତାସ୍ମା। 9 ଇନେସ୍କି ଆନେଙ୍ଗ୍ ବାବିକିନାଙ୍ଗା ଯେ, ଆସେଙ୍ଗ୍ ସନ୍ମାନ୍ ପାୟାଆୱି କାଜିଙ୍ଗ୍ ଈଶ୍ୱର ଖ୍ରୀଷ୍ଟତି ବାଚିକିତି ଚେଲା କିଜି ୱିଜୁ ମାନାୟାର୍ତାଙ୍ଗ୍ ପାଚେ କିତ୍ତାନ୍ନା। ଦାସ୍ ମାଚି ମାନାୟାରିଙ୍ଗ୍ ଇନେସ୍ ୱିଜୁ ମାନାୟାର୍ ଆଗେ ମାର୍ନେ ଅସ୍ତାନାନ୍ ଆରେ ୱିଜୁ ମାନାୟାର୍ ହେଦାଙ୍ଗ୍ତିଙ୍ଗ୍ ହୁଡ଼୍ନାର୍ ଆସେଙ୍ଗ୍ ହେଲେକେ ଆତାସ୍ନା। ମା କାଜିଙ୍ଗ୍ ଇନାକା ଗଟାଆନାତ୍ ଇଞ୍ଜି ୱିଜୁ ମାନାୟାର୍ ଆରେ ଦୁତ୍କୁ ପା ହୁଡ଼୍ନିକା। 10 ମାନାୟାର୍ ମାଙ୍ଗେଙ୍ଗ୍ ବକୁୱା ଇଞ୍ଜି ବାବିକିନାରା, ଇନେସ୍କି ଆପେଙ୍ଗ୍ ଖ୍ରୀଷ୍ଟ ବିଷୟରେ ଶୁଣାୟ୍ କିନାପା, ମାତର୍ ଏପେଙ୍ଗ୍ ବୁଲ୍ରେ ବୁଦି ମାନି ଖ୍ରିଷ୍ଟାନ୍ ଇଞ୍ଜି ବାବିକିନାଦେରା। ବେସିହେନି ମାନାୟାର୍ ମାଙ୍ଗେଙ୍ଗ୍ ଅଦିକାର୍ ପାୟା ଆୱାତାକାର୍ ଇଞ୍ଜି ବାବିକିନାରା, ମାତର୍ ଏପେଙ୍ଗ୍ ଈଶ୍ୱରତାଙ୍ଗ୍ ଶାକ୍ତି ପାୟାଆତାପ୍ନା ଇଞ୍ଜି ବାଟ୍ପାଣ୍ ଆନାଦେରା। ମାନାୟାର୍ ମାଙ୍ଗେଙ୍ଗ୍ ସନ୍ମାନ୍ ହିଦୁରା, ମାତର୍ ହେୱାର୍ ମିଙ୍ଗେଙ୍ଗ୍ ସନ୍ମାନ୍ ହିଦ୍ନାରା। 11 ଆପେଙ୍ଗ୍ ନଙ୍ଗୟ୍ ପାତେକ୍ ନାସ୍କି, ଏସ୍କି ମାନାପା ଆରେ ମାଙ୍ଗେଙ୍ଗ୍ ଉସ୍ପେଦେଙ୍ଗ୍ ଜବର୍ ହେନ୍ଦ୍ରାପାଟା ହିଲେକ୍। ଆପେଙ୍ଗ୍ ମାନାୟାର୍ କେଇଦ ମାଟ୍ ତିନାପା, ଆରେ ମାଙ୍ଗେଙ୍ଗ୍ ମାଞ୍ଜେଙ୍ଗ୍ ଜାର୍ ଇଲ୍ ପା ହିଲୁତ୍। 12 ଆପେଙ୍ଗ୍ ଜିଦେଙ୍ଗ୍ ଜାର୍ତିଙ୍ଗ୍ ଜାର୍ କଷ୍ଟକିଜି ଆର୍ଜାଆନାପା। ମାଙ୍ଗେଙ୍ଗ୍ ମାନାୟାର୍ ଅବିଶାପ୍ ହିତ୍ତିସ୍ ପା ଆପେଙ୍ଗ୍ ହେୱାରିଙ୍ଗ୍ ଆଶ୍ରିବାଦ୍ କିନାପା, ଆରେ ମାନାୟାର୍ ମାଙ୍ଗେଙ୍ଗ୍ ଦୁଃକ୍ କଷ୍ଟ ହିତ୍ତିସ୍ ପା ଆପେଙ୍ଗ୍ ସମ୍ବାଲି କିନାପା। 13 ଇନେର୍ ପା ମାଙ୍ଗେଙ୍ଗ୍ କରାପ୍ କାତା ଇନ୍ଞ୍ଚିସ୍ ପା ଆପେଙ୍ଗ୍ ହେୱାରିଙ୍ଗ୍ ଦରମ୍ଆଜି ଉତର୍ ହିନାପା, ଆରେ ମାନାୟାର୍ ନଙ୍ଗୟ୍ ପାତେକ୍ ପୁର୍ତିନି ମାନାୟାର୍ ମାଙ୍ଗେଙ୍ଗ୍ ସନ୍ମାନ୍ ହିଦୁରା, ହେୱାର୍ ମାଙ୍ଗେଙ୍ଗ୍ କାଚ୍ରାଗାଦିଲେକେ ବେକାର୍ ଇଞ୍ଜି ବାବିକିନାରା। 14 ଆନେଙ୍ଗ୍ ମିଙ୍ଗେଙ୍ଗ୍ ଲାଜ୍ କିଦ୍ନି କାଜିଙ୍ଗ୍ ଇ ୱିଜୁ ବିଷୟ ଲେକିକିଉଙ୍ଗା। ମାତର୍ ଏପେଙ୍ଗ୍ ନା ମାଜିର୍ଲେକେ, ଆରେ ଆନେଙ୍ଗ୍ ମିଙ୍ଗେଙ୍ଗ୍ ଲାଡ୍ କିଦ୍ନାଙ୍ଗା ହେଦାଙ୍ଗ୍ କାଜିଙ୍ଗ୍ ମିଙ୍ଗେଙ୍ଗ୍ ହିକାୟ୍ କିଦ୍ନି କାଜିଙ୍ଗ୍ ଇ ୱିଜୁ ବିଷୟ ଆନେଙ୍ଗ୍ ଲେକିକିନାଙ୍ଗା। 15 ଯଦି ମିଙ୍ଗେଙ୍ଗ୍ ଦସ୍ ହାଜାର୍ ମାନାୟ୍ ହିକ୍ଷା ହିଦ୍ଦେଙ୍ଗ୍ ମାଚିସ୍ ପା। ଆନେଙ୍ଗ୍ ନେ ମି ଆବାଲେକେ ଇନେସ୍କି ଆନେଙ୍ଗ୍ ନେ ମିଙ୍ଗେଙ୍ଗ୍ ପାର୍ତୁମ୍ ହାର୍ଦିକାବୁର୍ ଶୁଣାୟ୍ କିଜି ମାନ୍ଞ୍ଚାଙ୍ଗ୍, ଆରେ ଏପେଙ୍ଗ୍ ଖ୍ରୀଷ୍ଟ ଯୀଶୁଙ୍ଗ୍ ପାର୍ତି କିତାଦେର୍। 16 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଯେ, ଆନେଙ୍ଗ୍ ଇନେସ୍ କିନାଙ୍ଗା ହେଲେକେ ଏପେଙ୍ଗ୍ ପା କିୟାଟ୍। 17 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମି ଲାଗେ ତିମତିଙ୍ଗ୍ ପକ୍ତାନାଙ୍ଗା। ହେୱାନ୍ ନା ମାଜି ଲେକେ ତାଙ୍ଗେଙ୍ଗ୍ ଆନେଙ୍ଗ୍ ଲାଡ୍ କିନାଙ୍ଗା, ଆରେ ମାପୃ ତାଙ୍ଗେଙ୍ଗ୍ ଇନାକା ୱେଚ୍ନାତ୍ ହେଦାଙ୍ଗ୍ ହେୱାନ୍ କିନାନା। ଆନେଙ୍ଗ୍ ୱିଜୁ ମଣ୍ଡ୍ଲିତାକେ ଇନାକା ଯୀଶୁ ଖ୍ରୀଷ୍ଟ ବିଷୟରେ ହିକାୟ୍ କିନାଙ୍ଗା, ହେଦାଙ୍ଗ୍ ହେୱାନ୍ ମିଙ୍ଗେଙ୍ଗ୍ ମନେ ପକାୟ୍ କିଜି ହିଦ୍ନାନ୍। 18 ଆନେଙ୍ଗ୍ ପୁଚାଙ୍ଗ୍ନା ମି ବିତ୍ରେତାଙ୍ଗ୍ କେତେକ୍ ମାନାୟାର୍ ବାବିକିନାରା। ଆନେଙ୍ଗ୍ ଆରେ ମିଙ୍ଗେଙ୍ଗ୍ ହୁଡ଼୍ଗା ୱାଦେଙ୍ଗ୍ ୱାଉଙ୍ଗ୍, ଇନେସ୍କି ହେୱାର୍ ଗରବ୍ ଆତାର୍ନା। 19 ମାତର୍ ଯଦି ମାପୃ ଇଚାକିନାନ୍। ଆନେଙ୍ଗ୍ ମିଙ୍ଗେଙ୍ଗ୍ ହୁଡ଼୍ଗା ୱାଦେଙ୍ଗ୍ ବେଗି ୱାନାଙ୍ଗ୍, ଆରେ ଇମ୍ଣି ମାନାୟାର୍ ଗରବ୍ ଆଜି ଗାଜା-ଗାଜା କାତା ଇନାରା। ହେୱାର୍ତାକେ ହାତ୍ପା ଈଶ୍ୱର ଶାକ୍ତି ମାନାତ୍ କି ଆକାୟ୍ ଆନେଙ୍ଗ୍ ପୁନାଙ୍ଗ୍। 20 ଇନେସ୍କି ଈଶ୍ୱର ସାସନ୍ କିନି ରାଜି ତାକେଣ୍ତାଙ୍ଗ୍ ଆକାୟ୍, ମାତର୍ ମାନାୟାର୍ କାମାୟ୍ ଶାକ୍ତିତାଙ୍ଗ୍ ଚଞ୍ଜ୍ନାତା। 21 ଏପେଙ୍ଗ୍ ଯଦି ନଙ୍ଗୟ୍ ପାତେକ୍ ହେଲେକେ କରାପ୍ କାମାୟ୍ କିନାଦେରା, ଲାଗିଙ୍ଗ୍ ଆନେଙ୍ଗ୍ ବାରମ୍-ବାରମ୍ କେତ୍ତାନାଙ୍ଗ୍। ମାତର୍ ଏପେଙ୍ଗ୍ ଯଦି ହେଲେକେ କରାପ୍ କାମାୟ୍ କିନାକା ବନ୍ଦ୍ କିତାଦେର୍ନା, ଲାଗିଙ୍ଗ୍ ଆନେଙ୍ଗ୍ ଦରମ୍ଆଜି ମିଙ୍ଗେଙ୍ଗ୍ ଲାଡ୍ କିଦ୍ନାଙ୍ଗ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation