୧ କରନ୍ତିୟ 3 - New Testament in Pengo Parja Languageପାଉଲ ଆରେ ଆପଲ ଖ୍ରୀଷ୍ଟନି ଦାସ୍ 1 ଏ ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ପବିତ୍ର ଆତ୍ମା ମାଚି ମାନାୟାରିଙ୍ଗ୍ ହିକ୍ଷା ହିତିଲେକେ ହିକ୍ଷା ହିୱାଦାଙ୍ଗ୍ ମାନ୍ଚାଙ୍ଗ୍। ମାତର୍ ଇ ପୁର୍ତିନି ମାନାୟାରିଙ୍ଗ୍ ହିକ୍ଷାହିଜି ମାଚିଲେକେ ହିକ୍ଷାହିଜି ମାନ୍ଚାଙ୍ଗ୍, ଆରେ ଖ୍ରୀଷ୍ଟତାକେ ପାର୍ତିକିନି ହିରୁ ହିମ୍ଣାକାଙ୍ଗ୍ ୱେଚ୍ଚିଲେକେ ମିଙ୍ଗେଙ୍ଗ୍ ହିକାୟ୍ କିଦ୍ନାଙ୍ଗା। 2 ହେପାଦ୍ନା ଆନେଙ୍ଗ୍ ମିଙ୍ଗେଙ୍ଗ୍ କଗେହିମ୍ଣାକାଙ୍ଗ୍ ପାଲ୍ ହିତିଲେକେ ଈଶ୍ୱର ସହଜ୍ ହିକ୍ଷାତିଙ୍ଗ୍ ୱେଚ୍ଚି ମାନ୍ଞ୍ଚାଙ୍ଗ୍। ଆନେଙ୍ଗ୍ ମିଙ୍ଗେଙ୍ଗ୍ ଈଶ୍ୱରତି ବୁଜାଆୱି ହିକ୍ଷାତିଙ୍ଗ୍ ୱେଚ୍ଚାୱାଦାଙ୍ଗ୍ ମାନ୍ଞ୍ଚାଙ୍ଗ୍ ହେଦାଙ୍ଗ୍ ଗାଜାକାର୍ ଚିଚି କାଦିଲେକେ, ଇନେସ୍କି ଏପେଙ୍ଗ୍ ହେଦାଙ୍ଗ୍ ଆସ୍ତେଙ୍ଗ୍ ଜାଗ୍ରତ୍ ଆୱାଦାଙ୍ଗ୍ ମାଚାଦେର୍, ଆରେ ନଙ୍ଗୟ୍ ପା ଜାଗ୍ରତ୍ ଆୱାତାଦେର୍ନା। 3 ଏପେଙ୍ଗ୍ ନଙ୍ଗୟ୍ ପାତେକ୍ ପୁର୍ତିନି ମାନାୟାର୍ ବ୍ଯବହାର୍ କିନିଲେକେ ବ୍ଯବହାର୍ କିନାଦେରା। ଏପେଙ୍ଗ୍ ଜାର୍-ଜାର୍ବିତ୍ରେ ଆକାର୍ ଆଜି ଗଣ୍ଡ୍ଗଲ୍ ଆନାଦେରା, ହେଦାଙ୍ଗ୍ କାଜିଙ୍ଗ୍ ପୁନ୍ୟା ଆନାତା ଯେ, ଏପେଙ୍ଗ୍ ଜାର୍ ଇଚା ଅନୁସାରେ ଜିବୁନ୍ କାଟି କିନାଦେରା, ଆରେ ମାପୃ ଯୀଶୁ ଖ୍ରୀଷ୍ଟଙ୍ଗ୍ ପୁନ୍ୱିତି ମାନାୟାର୍ଲେକେ ବ୍ଯବହାର୍ କିନାଦେରା। 4 ଏପେଙ୍ଗ୍ ଇଲେକେ ୱେଚ୍ନାଦେରା, ଆନେଙ୍ଗ୍ ପାଉଲ ଚେଲା, ଆରେ କେତେକ୍ ମାନାୟାର୍ ଇନାରା ଆନେଙ୍ଗ୍ ଆପୋଲ ଚେଲା, ହେଲେକେ ବିନ୍ଜାତିନି ମାନାୟାର୍ କିତିଲେକେ ଏପେଙ୍ଗ୍ ପା କିନାଦେରା। 5 ପାଉଲ ଆରେ ଆପୋଲ ଈଶ୍ୱରନି ଦାସ୍। ମା କାଜିଙ୍ଗ୍ ଏପେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତି କିତାଦେର୍। ମାପୃ ମାଙ୍ଗେଙ୍ଗ୍ ଅଲ୍ଗା-ଅଲ୍ଗା କାମାୟ୍ ହିତ୍ତାନ୍ନା। 6 ଆନେଙ୍ଗ୍ ମିଙ୍ଗେଙ୍ଗ୍ ର ମାନାୟ୍ ଜମିତାକେ ମାଞ୍ଜି ରୁସ୍ତିଲେକେ ଈଶ୍ୱରତି ହାର୍ଦିକାବୁର୍ ପାର୍ତୁମ୍ ୱେଚ୍ଚି ମାନ୍ଞ୍ଚାଙ୍ଗ୍, ଆରେ ପାଚେ ର ମାନାୟ୍ ମାର୍ତିଙ୍ଗ୍ ଏଜୁଙ୍ଗ୍ ହିତିଲେକେ ଆପୋଲ ମିଙ୍ଗେଙ୍ଗ୍ ଈଶ୍ୱର ବିଷୟରେ ଆଦିକ୍ ହିକାୟ୍ କିତ୍ତାନ୍। ମାତର୍ ଈଶ୍ୱର ମିଙ୍ଗେଙ୍ଗ୍ ଆଦିକ୍ ପାର୍ତି କିଦେଙ୍ଗ୍ ସାଇଜ କିତ୍ତାନ୍ନା। ଇନେସ୍ଲେକେ ହେୱାନ୍ ମାର୍କୁକାଙ୍ଗ୍ ଗାଜାୟ୍ କିନାନା 7 ହେଦାଙ୍ଗ୍ କାଜିଙ୍ଗ୍ ଇମ୍ଣି ମାନାୟ୍ ମାର୍ ରୁସ୍ତାନ୍, ଆରେ ଇମ୍ଣି ମାନାୟ୍ ହେ ମାର୍ତିଙ୍ଗ୍ ଏଜୁଙ୍ଗ୍ ହିନାନା ହେୱାର୍ ମୁକ୍ଯ ଆକାୟ୍। ମାତର୍ ହେ ମାର୍ତିଙ୍ଗ୍ ଗାଜାୟ୍ କିନି ଈଶ୍ୱରନେ ମୁକ୍ଯ। 8 ଇମ୍ଣି ମାନାୟ୍ ମାର୍ ରୁସ୍ତାନ୍ନା ଆରେ ଇମ୍ଣି ମାନାୟ୍ ମାର୍ତିଙ୍ଗ୍ ଏଜୁଙ୍ଗ୍ ହିନାନା ହେୱାର୍ ର ଲେଗ୍ଦି କାମାୟ୍ କିନାରା। ହେଲେକେ ଆନେଙ୍ଗ୍ ମିଙ୍ଗେଙ୍ଗ୍ ହାର୍ଦିକାବୁର୍ ୱେଚ୍ଚାତାଙ୍ଗ୍ ଆରେ ଈଶ୍ୱର କାତାତିଙ୍ଗ୍ ହିକାୟ୍ କିତ୍ତାଙ୍ଗ୍, ଆରେ ଆପୋଲ ପା ମିଙ୍ଗେଙ୍ଗ୍ ହିକ୍ଷା ହିତ୍ତାନ୍। ମାତର୍ ଆପେଙ୍ଗ୍ ରିୟାପ୍ ର ଲେଗ୍ଦି କାମାୟ୍ କିନାପା, ଆରେ ଆପେଙ୍ଗ୍ କଷ୍ଟ କିତି ଅନୁସାରେ ଈଶ୍ୱର ମାଙ୍ଗେଙ୍ଗ୍ ବିନ୍-ବିନ୍ ପୁରଷ୍କାର୍ ହିଦ୍ନାନ୍। 9 ଏପେଙ୍ଗ୍ ଈଶ୍ୱରତି ଜମି ଲେକେ, ଆରେ ଈଶ୍ୱରତି ରହ୍ନି ଇଲ୍ ଲେକେ, ମାତର୍ ଆପେଙ୍ଗ୍ ହେବେ ଈଶ୍ୱର କାଜିଙ୍ଗ୍ କାମାୟ୍ କିନାପା। 10 ଈଶ୍ୱର ନାଙ୍ଗେଙ୍ଗ୍ ହିଜି ମାନ୍ଞ୍ଚି କାମାୟ୍ ବୁଦି ହୁଦାଙ୍ଗ୍ କିତାଙ୍ଗ୍ନା। ଆନେଙ୍ଗ୍ ମି ସହର୍ତାକେ ହାର୍ଦିକାବୁର୍ ଶୁଣାୟ୍ କିତାଙ୍ଗ୍, ଆରେ ଆନେଙ୍ଗ୍ ମିଙ୍ଗେଙ୍ଗ୍ ପାର୍ତୁମ୍ ଯୀଶୁ ଖ୍ରୀଷ୍ଟଙ୍ଗ୍ ପାର୍ତି କିଦେଙ୍ଗ୍ ସାଇଜ କିଜି ମାନ୍ଞ୍ଚାଙ୍ଗ୍। ତାପାଚେ ଖ୍ରୀଷ୍ଟତି କାମାୟ୍ କିନି ମାନାୟାର୍ ମିତାକେ ୱାଜି ଆପେଙ୍ଗ୍ ଆରମ୍ କିତି କାମାୟ୍ତିଙ୍ଗ୍ କିନାରା। ମାତର୍ ଇମ୍ଣି ମାନାୟାର୍ ଈଶ୍ୱରତି ସତ୍ ହିକ୍ଷା ହିନାରା ହେୱାର୍ ଜାଗ୍ରତ୍ ଆଜି ହିକାୟ୍ କିନି ଦର୍କାର୍। 11 ଇନେର୍ ପା ମିଙ୍ଗେଙ୍ଗ୍ ଉଦାର୍ ପାୟା ଆଦେଙ୍ଗ୍ ପୁନି ହିକ୍ଷା ହିକାୟ୍ କିଦ୍ମେର୍, ଇନେସ୍କି ଆନେଙ୍ଗ୍ ଇମ୍ଣି ହିକ୍ଷା ମିଙ୍ଗେଙ୍ଗ୍ ହିତ୍ତାଙ୍ଗ୍ନା, ହେଦାଙ୍ଗ୍ନେ ଉଦାର୍ ପାୟାଆନି ଉପାୟ୍। ଈଶ୍ୱର ମାଙ୍ଗେଙ୍ଗ୍ ଯୀଶୁ ଖ୍ରୀଷ୍ଟ କାଜିଙ୍ଗ୍ ଉଦାର୍ କିଦ୍ନାନ୍। 12 ଯଦି ଖ୍ରୀଷ୍ଟତି କାମାୟ୍ କିନି ମାନାୟାର୍ ଈଶ୍ୱର ହିତି ସତ୍ ହିକ୍ଷାତିଙ୍ଗ୍ ହିକାୟ୍ କିନାରା। ଲାଗିଙ୍ଗ୍ ହେୱାର୍ ହନା, ରୁପା ଆରେ ଦାମ୍ନି କାଲ୍କୁ ବ୍ଯବହାର୍ କିଜି ପାଉଣ୍ଡେସେନ୍ ଜପି ଇଲ୍ ଗାଚ୍ନି ମାନାୟ୍ ଲେକେ। ମାତର୍ ଇମ୍ଣି ମାନାୟାର୍ ମିଚ୍ ହିକ୍ଷା ହିନାରା ହେୱାର୍ ମାର୍କୁ, ପିରି ଆରେ ଗାନ୍ଦ୍ରିବୁଟା ହୁଦାଙ୍ଗ୍ ଇଲ୍ ରହ୍ନି ମାନାୟ୍ ଲେକେ। 13 ଏଚେପାଦ୍ନା ମାପୃ ଯୀଶୁ ଖ୍ରୀଷ୍ଟ ଆରେରଗ ପୁର୍ତିତାକେ ୱାନାନ୍, ୱିଜୁ ମାନାୟାର୍ କାମାୟ୍ତିଙ୍ଗ୍ ଖ୍ରୀଷ୍ଟ ନାଣିତାକେ ପରିକ୍ଷା କିନାନ୍। ହେ ନାଣିତାକେ ହେୱାର୍ ଟିକ୍ ବାବ୍ରେ କାମାୟ୍ କିତାର୍ନା କି ଆକାୟ୍ ଇଞ୍ଜି ପୁନ୍ୟା କିନାତ୍। 14 ଯଦି ହେୱାନ୍ ଇଲ୍ ରହ୍ନି ମାନାୟ୍ ପାଉଣ୍ଡେସେନ୍ ଜପି ଇଲ୍ ରସ୍ତାନ୍ନା, ଲାଗିଙ୍ଗ୍ ତା ଇଲ୍ ନାଣିତାକେ କାଡୁତ୍। ଆରେ ଈଶ୍ୱର ତାଙ୍ଗେଙ୍ଗ୍ ପୁରଷ୍କାର୍ ହିନାନ୍। 15 ମାତର୍ ଯଦି ଖ୍ରୀଷ୍ଟ ହେ ଇଲ୍ ରସ୍ତି ମାନାୟ୍ତିଙ୍ଗ୍ ୱେଚ୍ନାନ୍ ଏନେଙ୍ଗ୍ ହାର୍ କାମାୟ୍ କିୱାତାୟ୍ନା, ଖ୍ରୀଷ୍ଟ ହେୱାନିଙ୍ଗ୍ ପୁରଷ୍କାର୍ ହିଉନ୍, ମାତର୍ ହେୱାନ୍ ଈଶ୍ୱର ହିତି ୱିଜ୍ୱି ଜିବୁନ୍ତିଙ୍ଗ୍ ଆରାୟ୍ କିଉନ୍। ମାତର୍ ହେୱାନ୍ ର ମାନାୟ୍ ନାଣିତାଙ୍ଗ୍ ରକ୍ଷା ପାୟା ଆତିଲେକେ ପାୟା ଆଉନ୍। 16 ଏପେଙ୍ଗ୍ ପୁଚାଦେର୍ନା ଯେ, ଏପେଙ୍ଗ୍ ଈଶ୍ୱର ମାନି ମନ୍ଦିର୍, ଆରେ ପବିତ୍ର ଆତ୍ମା ମି ବିତ୍ରେ ମାନାତା। 17 ଇମ୍ଣି ମାନାୟ୍ ଈଶ୍ୱର ମନ୍ଦିର୍ତିଙ୍ଗ୍ କରାପ୍ କିନାନା ଈଶ୍ୱର ହେୱାନିଙ୍ଗ୍ ବିନାସ୍ କିନାନ୍। ଇନେସ୍କି ଏପେଙ୍ଗ୍ ଖ୍ରୀଷ୍ଟାନ୍ କାଦେର୍ ନେ ଈଶ୍ୱରତି ପବିତ୍ର ମନ୍ଦିର୍। 18 ଏପେଙ୍ଗ୍ ନିଜେ ଟକାୟ୍ କିୟାଆମାଟ୍। ଯଦି ମି ବିତ୍ରେତାଙ୍ଗ୍ ରକାନ୍ ପୁର୍ତିନି ମାନାୟାର୍ ମୁମ୍ଦ ଜ୍ଞାନି ଇଞ୍ଜି ବାବିକିନାନା, ହେୱାନ୍ ଜାର୍ତିଙ୍ଗ୍ ପୁର୍ତିନି ମାନାୟାର୍ ମୁମ୍ଦ ବକୁୱା ଆୟେନ୍, ଲାଗିଙ୍ଗ୍ ଏପେଙ୍ଗ୍ ଈଶ୍ୱର ମୁମ୍ଦ ବୁଦି କାଟାକାଦେର୍ ଆନାଦେର୍। 19 ଇନେସ୍କି ଇ ପୁର୍ତିନି ବୁଦି ୱିଜୁ ଈଶ୍ୱର ମୁମ୍ଦ ବକ୍ୱା ଲେକେ। ଇନେସ୍ଲେକେ ଦରମ୍ ସାସ୍ତର୍ତାକେ ଲେକା ମାନାତ୍, “କେତେକ୍ ମାନାୟ୍ ନିଜେ ବାବିକିନାର୍ ଯେ, ହେୱାରିଙ୍ଗ୍ ବୁଦି ମାନାତ୍, ମାତର୍ ଈଶ୍ୱର ହେୱାର୍ ଜାର୍ ଚାଲାକି ଉପାୟ୍ତିଙ୍ଗ୍ ବେକାର୍ କିନାତ୍ ଆରେ ଆରାୟ୍ କିନାତ୍।” 20 ଆରେ ପା ଦରମ୍ ସାସ୍ତର୍ତାକେ ଲେକାଆତାତ୍ନା, “ଈଶ୍ୱର ବୁଦି ମାନି ମାନାୟାର୍ ଚିନ୍ତାତିଙ୍ଗ୍ ପୁଚାନ୍ନା, ହେ ୱିଜୁ ବେକାର୍।” 21 ଲାଗିଙ୍ଗ୍ ଏପେଙ୍ଗ୍ ଆନେଙ୍ଗ୍ ହାର୍ଦି ଖ୍ରୀଷ୍ଟାନ୍ ନେତାନି ଚେଲା ଆତାଙ୍ଗ୍ନା ଇଞ୍ଜି ଗାର୍ବି ଆମାଟ୍, ଇନେସ୍କି ହେ ୱିଜୁ ବିଷୟ ଈଶ୍ୱର ମି ହାର୍ କାଜିଙ୍ଗ୍ ହିତ୍ତାନ୍ନା। 22 ହେଦାଙ୍ଗ୍ କାଜିଙ୍ଗ୍ ପାଉଲ ଆୟେନ୍ କି, ଆପୋଲ ଆୟେନ୍ କି, କେପା ଆୟେନ୍ କି, ୱିଜୁ ପୁର୍ତି ଆୟେତ୍ କି, ଜିବୁନ୍ ଆୟେତ୍ କି ମାରାଣ୍। ନଙ୍ଗୟ୍ ଆୟେତ୍ କି ପାଚେ ଆୟେତ୍, ଇ ୱିଜୁ ମିଦାଙ୍ଗ୍, 23 ଆରେ ଏପେଙ୍ଗ୍ ଖ୍ରୀଷ୍ଟର୍ ଲକ୍ ଆରେ ଖ୍ରୀଷ୍ଟ ଈଶ୍ୱର ଲକ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation