୧ କରନ୍ତିୟ 2 - New Testament in Pengo Parja Languageପାଉଲ ବୁଦି ବିଷୟରେ ଶୁଣାୟ୍ କିତାନ୍ 1 ହେ ଲାଡ୍ନି ପାର୍ତିକିନି ଟଣ୍ଡାର୍କାଦେର୍, ଆନେଙ୍ଗ୍ ମିତାକେ ଏଚେକାଡ଼୍ଦ ୱାଜି ମାଚାଙ୍ଗ୍, ହେପାଦ୍ନା ଆନେଙ୍ଗ୍ ଈଶ୍ୱରତି ହାର୍ଦିକାବୁର୍ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାଙ୍ଗ୍। ମାତର୍ ଆନେଙ୍ଗ୍ ଜାର୍ତିଙ୍ଗ୍ ବେସି ବୁଦିକାଟାକାଙ୍ଗ୍ ଇଞ୍ଜି ଚଚିୟାଆଦେଙ୍ଗ୍ ବାଟ୍ପାଣ୍ ଆଜି ଗାଜା-ଗାଜା କାତା ୱେଚ୍ଚାୱାଦାଙ୍ଗ୍ ମାନ୍ଞ୍ଚାଙ୍ଗ୍। 2 ଇନେସ୍କି ଆନେଙ୍ଗ୍ ଯୀଶୁ ଖ୍ରୀଷ୍ଟ ଆରେ ତା କୃଶକାଟ୍ତାକେ ହାଃତି ବିଷୟତିଙ୍ଗ୍ ନେ ମାନ୍ଦ୍ଯାନ୍ କିଜି ମାଚାଙ୍ଗ୍। 3 ଆନେଙ୍ଗ୍ ଏଚେକାଡ଼୍ଦ ମିହୁଦାଙ୍ଗ୍ ମାଚାଙ୍ଗ୍। ଆନେଙ୍ଗ୍ ଖ୍ରୀଷ୍ଟ ବିଷୟତିଙ୍ଗ୍ ୱେଚ୍ଚେଙ୍ଗ୍ ଆଡ୍ନାଙ୍ଗ୍ କି ଆକାୟ୍ ଇଞ୍ଜି ପାଣ୍ଡ୍ରାଆଜି ମାଚାଙ୍ଗ୍, ଆରେ ଆନେଙ୍ଗ୍ ପାଣ୍ଡ୍ରୁତିଙ୍ଗ୍ ତ୍ରିଗ୍ଜି ମାଚାଙ୍ଗ୍। 4 ଆନେଙ୍ଗ୍ ମିଙ୍ଗେଙ୍ଗ୍ ଏଚେପାଦ୍ନା ଖ୍ରୀଷ୍ଟତି ହାର୍ଦିକାବୁର୍ ଶୁଣାୟ୍ କିଜି ମାନ୍ଞ୍ଚାଙ୍ଗ୍, ଆନେଙ୍ଗ୍ ଜେକନିକାର୍ ଲେକେ ମାନାୟାର୍ ବୁଦିନି ହିକ୍ଷା ଆରେ ଚାଲାକି ହୁଦାଙ୍ଗ୍ କାତା ୱେଚ୍ୱାଦାଙ୍ଗ୍ ମାଚାଙ୍ଗ୍। ମାତର୍ ପବିତ୍ର ଆତ୍ମା ମି ବିତ୍ରେ ମାନ୍ଞ୍ଜି ଶାକ୍ତିତାଙ୍ଗ୍ ପୁନି କିତ୍ତାତ୍ ଯେ, ଆନେଙ୍ଗ୍ ୱେଚ୍ଚି ହାର୍ଦିକାବୁର୍ ସତ୍। 5 ଆନେଙ୍ଗ୍ ହେଲେକେ ଶୁଣାୟ୍ କିଜି ମାଚାଙ୍ଗ୍ ଆରେ ହିକ୍ଷାହିଜି ମାଚାଙ୍ଗ୍, ଇନେସ୍କି ଏପେଙ୍ଗ୍ ଇନେସ୍ ମାନାୟାର୍ ବୁଦିତିଙ୍ଗ୍ ପାର୍ତି କିଉଦେର୍, ମାତର୍ ଈଶ୍ୱର ଶାକ୍ତିତିଙ୍ଗ୍ ପାର୍ତି କିନାଦେର୍। ଈଶ୍ୱରତି ଜ୍ଞାନ୍ 6 ଆନେଙ୍ଗ୍ ଏଚେପାଦ୍ନା ଆଦିକ୍ ପାର୍ତିକିନି ଟଣ୍ଡାର୍ତାକେ ମାନାଙ୍ଗା, ହେପାଦ୍ନା ଆନେଙ୍ଗ୍ ହେୱାରିଙ୍ଗ୍ ବୁଦିନି କାତା ୱିଜୁ ୱେଚ୍ନାଙ୍ଗା। ହେୱାରିଙ୍ଗ୍ ଆନେଙ୍ଗ୍ ଇ ପୁର୍ତିନି ମାନାୟାର୍ ବୁଦିନି କାତାଲେକେ ୱେଚୁଙ୍ଗା, ଆରେ ଇ ପୁର୍ତିନି ସାସନ୍ କିନି ମାନାୟାର୍ଲେକେ ହିକ୍ଷା ହିଉଙ୍ଗା, ଇନେସ୍କି ହେୱାର୍ ହିକ୍ଷା ଆରେ ବୁଦି ଦିନେକ୍ ବେକାର୍ ଆନାତ୍। 7 ମାତର୍ ଆପେଙ୍ଗ୍ ଇମ୍ଣି ବୁଦିନି ବିଷୟରେ ୱେଚ୍ଚାନାପା ହେ ଈଶ୍ୱର ବୁଦିତିଙ୍ଗ୍ ଡ଼ୁକ୍ଚି ମାଚାନ୍। ଆରେ ଇନେର୍ ପା ପୁନ୍ୱାଦାଙ୍ଗ୍ ମାଚାର୍। ପୁର୍ତିତିଙ୍ଗ୍ ଉବ୍ଜାଇ କିୱି ଆଗେ ଈଶ୍ୱର ତା ବୁଦି ହୁଦାଙ୍ଗ୍ ମାଙ୍ଗେଙ୍ଗ୍ ଗୌରବ ହିଦ୍ନି କାଜିଙ୍ଗ୍ ଇଚା କିଜି ମାଚାନ୍। 8 ମାତର୍ ଇ ପୁର୍ତିତିଙ୍ଗ୍ ସାସନ୍ କିନି ମାନାୟାର୍ ହେ ବୁଦିନି ଉପାୟ୍ତିଙ୍ଗ୍ ପୁଞ୍ଜେଙ୍ଗ୍ ଆଡ୍ୱାତାର୍, ଯଦି ହେୱାର୍ ପୁଚାର୍ମା ଲାଗିଙ୍ଗ୍ ମା ଗୌରବନି ମାପୃଙ୍ଗ୍ କୃଶକାଟ୍ତାକେ ଅହ୍ୱାତାର୍ମା। 9 ଇନେସ୍କି ଦରମ୍ ସାସ୍ତର୍ତାକେ ଲେକା ମାନାତ୍, “ଇନେର୍ ପା ହୁଡ଼୍ୱାତାର୍ନା, ଇନେର୍ ପା ପୁନ୍ୱାତାର୍ନା ଆରେ ଇନେର୍ ପୁନ୍ୱାତାର୍ନା। ହେଦାଙ୍ଗ୍ ଈଶ୍ୱର ତାଙ୍ଗେଙ୍ଗ୍ ଲାଡ୍କିନି ମାନାୟାର୍ କାଜିଙ୍ଗ୍ ରସ୍ତି ମାଚାନ୍।” 10 ମାତର୍ ଆପେଙ୍ଗ୍ ଇ ୱିଜୁ ବିଷୟ ପୁଞ୍ଜେଙ୍ଗ୍ ଆଡ୍ନାପା, ଇନେସ୍କି ଈଶ୍ୱର ମାଙ୍ଗେଙ୍ଗ୍ ତା ଆତ୍ମା ସାଇଜତାଙ୍ଗ୍ ପୁନି କିଦ୍ନାନା। ପବିତ୍ର ଆତ୍ମା ୱିଜୁ ଜିନିଷ୍ତିଙ୍ଗ୍ ଦାହ୍ନାତା ଆରେ ଈଶ୍ୱରତି ଡ଼ୁକ୍ତି ବିଷୟତିଙ୍ଗ୍ ପା ମାଙ୍ଗେଙ୍ଗ୍ ଚଚ୍ଚାନାତା। 11 ହେୱାନିଙ୍ଗ୍ ପିସ୍ତି ଇନେର୍ ତା ମାନ୍ତି କାତାତିଙ୍ଗ୍ ପୁଞ୍ଜେଙ୍ଗ୍ ଆଡୁର୍। ହେଲେକେ ପବିତ୍ର ଆତ୍ମାତିଙ୍ଗ୍ ପିସ୍ତି ଇନେର୍ ପା ଈଶ୍ୱର ଚିନ୍ତାତିଙ୍ଗ୍ ପୁଞ୍ଜେଙ୍ଗ୍ ଆଡୁର୍। 12 ଲାଗିଙ୍ଗ୍ ଆପେଙ୍ଗ୍ ଇ ପୁର୍ତିନି ମାନାୟାର୍ ବାବିକିନି ଲେକେ କି ବୁଜାଆନିଲେକେ ବୁଜାଆଉପା। ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ପୁଞ୍ଜେଙ୍ଗ୍ ଆଡ୍ନାପା ଯେ, ଈଶ୍ୱର ତା ପବିତ୍ର ଆତ୍ମା ମାଙ୍ଗେଙ୍ଗ୍ ଦୟାକିଜି ଚାନିଆଆନି ବିଷୟ ବୁଜା ଆଦେଙ୍ଗ୍ ଉପ୍କା ହିତ୍ତାନ୍ନା। 13 ଆରେ ଆପେଙ୍ଗ୍ ଇ ୱିଜୁ ବିଷୟ ଜେକନିକାରିଙ୍ଗ୍ ୱେଚ୍ନାପା, ଆପେଙ୍ଗ୍ ଇ ୱିଜୁ ବିଷୟ ୱେଚ୍ନି କାଜିଙ୍ଗ୍ ପୁର୍ତିନି ମାନାୟାର୍ ବୁଦିତାଙ୍ଗ୍ ୱେଚ୍ଚି କାତାଲେକେ ୱେଚ୍ଚୁପା। ମାତର୍ ମାଙ୍ଗେଙ୍ଗ୍ ପବିତ୍ର ଆତ୍ମା ଇମ୍ଣି କାତା ୱେଚ୍ଚେଙ୍ଗ୍ ହିତ୍ତାନ୍ନା, ଆରେ ଆପେଙ୍ଗ୍ ହେ ଆତ୍ମା ସାଇଜତାଙ୍ଗ୍ ସତ୍ ବିଷୟତିଙ୍ଗ୍ ବୁଜାୟ୍ କିନାପା। 14 ମାତର୍ ବିନ୍ଜାତିନି ମାନାୟାର୍ ଇ ସତ୍ ବିଷୟତିଙ୍ଗ୍ ଈଶ୍ୱର ଆତ୍ମାତାଙ୍ଗ୍ ବୁଜା ଆଦେଙ୍ଗ୍ ଆଡୁର୍। ହେଦାଙ୍ଗ୍ ହେୱାର୍ କାଜିଙ୍ଗ୍ ବେକାର୍ ଆନାତ୍, ଇନେସ୍କି ଇମ୍ଣି ମାନାୟ୍ତିଙ୍ଗ୍ ପବିତ୍ର ଆତ୍ମା ମାନାତ୍ ହେୱାନ୍ନେ ଈଶ୍ୱର ବିଷୟରେ ବୁଜା ଆଦେଙ୍ଗ୍ ପବିତ୍ର ଆତ୍ମା ସାଇଜ କିନାତ୍। 15 ଇମ୍ଣି ମାନାୟାର୍ ପବିତ୍ର ଆତ୍ମା ପାୟାଆତାର୍ନା। ହେୱାର୍ ନେ ପବିତ୍ର ଆତ୍ମାନି ହିକ୍ଷାତିଙ୍ଗ୍ ବୁଜା ଆଦେଙ୍ଗ୍ ଆଡ୍ନାର୍। ମାତର୍ ଇମ୍ଣି ମାନାୟାର୍ ପବିତ୍ର ଆତ୍ମା ପାୟାଆୱାତାର୍ନା ହେୱାର୍ ପବିତ୍ର ଆତ୍ମା ପାୟା ଆତାକାର୍ କାତାତିଙ୍ଗ୍ ପା ବୁଜା ଆଦେଙ୍ଗ୍ ଆଡୁର୍। 16 ଇଦାଙ୍ଗ୍ ସତ୍, ଇନେସ୍କି ସାସ୍ତର୍ତାକେ ଇଲେକେ ଲେକା ମାନାତ୍, ଇନେର୍ ପା ଈଶ୍ୱର ମାନ୍ତିଙ୍ଗ୍ ପୁଞ୍ଜେଙ୍ଗ୍ ଆଡୁର୍ ଆରେ ତାଙ୍ଗେଙ୍ଗ୍ ଇନେର୍ ପା ହିକାୟ୍ କିଦେଙ୍ଗ୍ ଆଡୁର୍। ମାତର୍ ଆପେଙ୍ଗ୍ ପାର୍ତି କିନାକାସ୍ ଖ୍ରୀଷ୍ଟ ମାନ୍ତିଙ୍ଗ୍ ବୁଜା ଆଦେଙ୍ଗ୍ ଆଡ୍ନାସ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation