୧ କରନ୍ତିୟ 16 - New Testament in Pengo Parja Languageପାଉଲ ଯିରୁଶାଲୋମନି ମାନାୟାରିଙ୍ଗ୍ କରନ୍ତିୟ ମଣ୍ଡ୍ଲିତାଙ୍ଗ୍ ୱେଚ୍ଚି ବିଷୟ 1 ଯିରୁଶାଲୋମନି ଈଶ୍ୱର ମାନାୟାର୍ କାଜିଙ୍ଗ୍ ଏପେଙ୍ଗ୍ ରୁଣ୍ଡାୟ୍ କିତି ବିଷୟରେ ଇମ୍ଣି ପ୍ରଶ୍ନ କିଜି ମାଚାଦେର୍, ହେ ବିଷୟରେ ଆନେଙ୍ଗ୍ ନଙ୍ଗୟ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗ୍। ଏପେଙ୍ଗ୍ ଗାଲାତିୟ ମଣ୍ଡ୍ଲିନି ମାନାୟାର୍ କିତିଲେକେ କିୟାଟ୍, ଇନେସ୍ ଆନେଙ୍ଗ୍ ହେୱାରିଙ୍ଗ୍ କିଦେଙ୍ଗ୍ ୱେଚ୍ଚି ମାଚାଙ୍ଗ୍। 2 ଏପେଙ୍ଗ୍ ଆନେଙ୍ଗ୍ ୱାତିସ୍ନେ ରମାଟ୍ ଡାବୁଙ୍ଗ୍ ରୁଣ୍ଡାୟ୍ କିଦେଙ୍ଗ୍ କାସି ମାନ୍ମାଟ୍, ମାତର୍ ଏପେଙ୍ଗ୍ ଇଲେକେ କିୟାଟ୍ ଯେ ୱିଜୁ ରଇବାର୍ ଚଅଦିନ୍ ଆର୍ଜା ଆତି ୱିଜୁଡାବୁଙ୍ଗ୍ କର୍ଚ କିୱାଦାଙ୍ଗ୍ କେତେକ୍ ଡାବୁଙ୍ଗ୍ ଇଟାଟ୍। 3 ଆନେଙ୍ଗ୍ ଏଚେପାଦ୍ନା ୱାନାଙ୍ଗ୍, ଯିରୁଶାଲାମନି ପାର୍ତିକିନି ଟଣ୍ଡାର୍ କାଜିଙ୍ଗ୍ ଏପେଙ୍ଗ୍ ବାଚିକିତି ମାନାୟାର୍ ବିଷୟରେ ଚିଟିତାକେ ଲେକିକିଜି ପକ୍ନାଙ୍ଗ୍। ଆରେ ହେୱାର୍ ଏପେଙ୍ଗ୍ ରୁଣ୍ଡାୟ୍ କିତି ଡାବୁକାଙ୍ଗ୍ ଯିରୁଶାଲାମ୍ନି ପାର୍ତିକିନି ଟଣ୍ଡାରିଙ୍ଗ୍ ଅସିହିନାର୍। 4 ଆରେ, ଏପେଙ୍ଗ୍ ଯଦି ଇଚା କିନାଦେର୍ ଆନେଙ୍ଗ୍ ପା ହାନାକା ହାର୍, ଲାଗିଙ୍ଗ୍ ଆନେଙ୍ଗ୍ ହେୱାର୍ ହୁଦାଙ୍ଗ୍ ମାହାଆଜି ହାନାଙ୍ଗ୍। ପାଉଲ ସେସ୍ ହିକ୍ଷା 5 ଯଦି ମାପୃ ଇଚା ଆନାତ୍, ଲାଗିଙ୍ଗ୍ ଆନେଙ୍ଗ୍ ମାକଦନିଆ ସହର୍ତ ହାଲ୍ଜି ୱାତି ପାଚେ ଆନେଙ୍ଗ୍ ମିଙ୍ଗେଙ୍ଗ୍ ମାହା ଆଦ୍ଦେଙ୍ଗ୍ ୱାନାଙ୍ଗ୍। ଇନେସ୍କି ଆନେଙ୍ଗ୍ ମାକିଦନିଆ ସହର୍ ହିଜି ହାଞ୍ଜେଙ୍ଗ୍ ଉପାୟ୍ କିନାଙ୍ଗା। 6 ଇଲେକେ ଯଦି ଆନାତ୍, ଲାଗିଙ୍ଗ୍ ପିନିମାସ୍ ୱିଜ୍ନି ପାତେକ୍ ଆନେଙ୍ଗ୍ ମିହୁଦାଙ୍ଗ୍ ମାନ୍ଗାନାଙ୍ଗ୍। ଲାଗିଙ୍ଗ୍ ଆନେଙ୍ଗ୍ ଇମେନିପଣ୍ ହାଚିସ୍ ପା ନାଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ କାଜିଙ୍ଗ୍ ଏପେଙ୍ଗ୍ ସାଇଜ କିଦ୍ଦେଙ୍ଗ୍ ଆଡ୍ନାଦେର୍। 7 ନଙ୍ଗୟ୍ ଆନେଙ୍ଗ୍ ଅଲପ୍ଦିନ୍ ମିହୁଦାଙ୍ଗ୍ ବେଟା ଆଜି ଲେଉଟା ଆଜି ହାଞ୍ଜେଙ୍ଗ୍ ୱାଉଙ୍ଗା, ମାତର୍ ଆନେଙ୍ଗ୍ କେତ୍ଦିନ୍ ମିହୁଦାଙ୍ଗ୍ ୱାଜି ମାଞ୍ଜେଙ୍ଗ୍ ଆହା କିନାଙ୍ଗା, ଯଦି ମାପୃ ଯୀଶୁ ନାଙ୍ଗେଙ୍ଗ୍ ଅଦିକାର୍ ହିଦ୍ନାତ୍। 8 ମାତର୍ ନଙ୍ଗୟ୍ ଆନେଙ୍ଗ୍ ପେଣ୍ଟିକଷ୍ଟ ପାର୍ବୁ ୱିଜ୍ନି ପାତେକ୍ ଏପିସ ସହର୍ତାକେ ମାନାଙ୍ଗ୍। 9 ଇବେ ନାଙ୍ଗେଙ୍ଗ୍ ବେସିହେନି ମାନାୟାର୍ ବିରଦ୍ କିତ୍ତିସ୍ ପା ଇବେ ମାନି ଦର୍କାର୍, ଇନେସ୍କି ଇବେ ଈଶ୍ୱର କାତା ୱେନାକାର୍ ବେସିହେନି ମାନାର୍ ଆରେ ଆନେଙ୍ଗ୍ ଇବେ ମାନାକା ହେୱାର୍ କାଜିଙ୍ଗ୍ ବେସି ଲାବ୍ ଆନାତ୍। 10 ଏଚେପାଦ୍ନା ତିମତି ମିତାକେ ୱାନାନ୍, ତାଙ୍ଗେଙ୍ଗ୍ ସନ୍ମାନ୍ ହୁଦାଙ୍ଗ୍ ବ୍ୟବହାର୍ କିୟାଟ୍ ଇନେସ୍କି ହେୱାନ୍ ନା ଲେକେ ମାପୃ ହେବା କିନାନା। 11 ୱିଜାକାର୍ ତାଙ୍ଗେଙ୍ଗ୍ ଆହେର୍, ଆରେ ହେୱାନ୍ ନାବେ ଲେଉଟା ଆଜି ୱାନିହିଙ୍ଗ୍ ତାଙ୍ଗେଙ୍ଗ୍ ଦର୍କାର୍ଆନି ଜିନିଷ୍ ହିଜି ହାର୍ଦାଙ୍ଗ୍ ପକ୍ତାଟ୍। ଆନେଙ୍ଗ୍ ଆହା କିନାଙ୍ଗା ଯେ ହେୱାନ୍ ଜେକନି ପାର୍ତିକିନି ଟଣ୍ଡାର୍ ହୁଦାଙ୍ଗ୍ ୱାନାନ୍। 12 ନଙ୍ଗୟ୍ ଆନେଙ୍ଗ୍ ମା ପାର୍ତିକିନି ଟଣ୍ଡେନ୍ ଆପୋଲ ବିଷୟରେ ମିଙ୍ଗେଙ୍ଗ୍ ୱେଚ୍ଚାନାଙ୍ଗ୍, ତାଙ୍ଗେଙ୍ଗ୍ ଆନେଙ୍ଗ୍ ଜେକନି ପାର୍ତିକିନି ଟଣ୍ଡାର୍ ହୁଦାଙ୍ଗ୍ ମାହାଆଜି ମିଙ୍ଗେଙ୍ଗ୍ ବେଟା ଆଦେଙ୍ଗ୍ ଇଚା କିଜି ମାଚାଙ୍ଗ୍, ମାତର୍ ହେୱାନ୍ ନଙ୍ଗୟ୍ ମି ଲାଗେ ୱାଦେଙ୍ଗ୍ ଇଚା କିଉନା। ଏଚେପାଦ୍ନା ତାଙ୍ଗେଙ୍ଗ୍ ସୁଯଗ୍ ଗାଟାଆନାତ୍ ହେପାଦ୍ନା ହେୱାନ୍ ମିଙ୍ଗେଙ୍ଗ୍ ବେଟା ଆଦେଙ୍ଗ୍ ୱାନାନ୍। ପାଉଲତି ସେସ୍ ହିକ୍ଷା 13 ଏପେଙ୍ଗ୍ ହୁଞ୍ଜ୍କାର୍ ଲେକେ ଆମାଟ୍, ମାତର୍ ଆଦିକ୍ତାଙ୍ଗ୍ ଆଦିକ୍ ପାର୍ତି କିଜି ମାନାଟ୍। ଏପେଙ୍ଗ୍ ସାସ୍ ମାନାକାଦେର୍ ଆଡ ଆରେ ଆଦିକ୍ତାଙ୍ଗ୍ ଆଦିକ୍ ପାର୍ତିକିୟାଟ୍। 14 ଆରେ ଏପେଙ୍ଗ୍ ଇନାକା କିନାଦେର୍ ହେଦାଙ୍ଗ୍ ଲାଡ୍ ହୁଦାଙ୍ଗ୍ କିୟାଟ୍। 15 ଏ ଟଣ୍ଡାର୍କାଦେର୍, ଏପେଙ୍ଗ୍ ପୁଚାଦେର୍ନା ଯେ, ଆକାୟା ସହର୍ନି ସ୍ତିପାନ ଆରେ ତା କୁଟୁମ୍ନି ପାର୍ତୁମ୍ ପାର୍ତି କିତାର୍ ଆରେ ହେୱାର୍ ଈଶ୍ୱର ମାନାୟାରିଙ୍ଗ୍ ହେବା କିଦେଙ୍ଗ୍ ଜିବୁନ୍ କାଟିକିନାରା। 16 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାଙ୍ଗା ଯେ, ହେୱାର୍ କିତିଲେକେ ଆରେ ହେୱାର୍ ହୁଦାଙ୍ଗ୍ ମାହାଆଜି ହେବା କିନି ମାନାୟାର୍ କିନିଲେକେ ଏପେଙ୍ଗ୍ କିୟାଟ୍। 17 ଆନେଙ୍ଗ୍ ବେସି ୱାରିୟା ଆନାଙ୍ଗା ଯେ, ସ୍ତିପାନ, ଫର୍ତୁନାତ ଆରେ ଆକାୟିକ ଇବେ ୱାତାର୍ନା ଆରେ ହେୱାର୍ ମି ବାଦୁଲ୍ରେ ହେୱାର୍ ନାଙ୍ଗେଙ୍ଗ୍ ସାଇଜ କିତ୍ତାର୍, ଇନେସ୍ ଏପେଙ୍ଗ୍ ଇବେ ହିଲୁଦେର୍। 18 ହେୱାର୍ ନାଙ୍ଗେଙ୍ଗ୍ ବେସି ସାସ୍ କିତ୍ତାର୍ ଇନେସ୍ ମିଙ୍ଗେଙ୍ଗ୍ ସାସ୍ ହିଜି ମାନ୍ଞ୍ଚାର୍, ଲାଗିଙ୍ଗ୍ ହେଲେକେ ହାର୍ଦାଙ୍ଗ୍ ହେବା କିନାକାରିଙ୍ଗ୍ ଦନ୍ଯବାଦ୍ ହିନି ଦର୍କାର୍। ପାଉଲ ସେସ୍ ୱେଡ଼ାଙ୍ଗ୍ ଜୱାର୍ କିତାନ୍ 19 ଏସିଆ ଦେସ୍ନି ମଣ୍ଡ୍ଲିନି ପାର୍ତିକିନି ଟଣ୍ଡାର୍ ମିଙ୍ଗେଙ୍ଗ୍ ଜୱାର୍ କିଦ୍ନାରା, ଆର୍କିଲା ଆରେ ତା ଡକୃହି ପ୍ରିସ୍କିଲା ଆରେ ତାଞ୍ଜ ରୁଣ୍ଡା ଆନି ୱିଜାକାର୍ ଜୱାର୍ କିନାରା। 20 ଏ ଟଣ୍ଡାର୍କାଦେର୍ ହେୱାର୍ ମିଙ୍ଗେଙ୍ଗ୍ ଜୱାର୍ କିତ୍ତାର୍ନା, ଲାଗିଙ୍ଗ୍ ଏପେଙ୍ଗ୍ ଜାର୍-ଜାର୍ବିତ୍ରେ ଜୱାର୍ କିୟାଟ୍। 21 ଆନେଙ୍ଗ୍ ପାଉଲ ଇ ଚିଟି ଜାର୍ କେଇଦାଙ୍ଗ୍ ଲେକିକିଜି ଜୱାର୍ କିଦ୍ନାଙ୍ଗା। 22 ମି ବିତ୍ରେତାଙ୍ଗ୍ ଇନେର୍ ଯଦି ମାପୃଙ୍ଗ୍ ଲାଡ୍ କିଉନ୍, ମା ମାପୃ ଯୀଶୁ ଖ୍ରୀଷ୍ଟ ଆରେରଗ ପୁର୍ତିତାକେ ୱାତିସ୍ ହେୱାନ୍ ମିଙ୍ଗେଙ୍ଗ୍ ୱିଜୁ ଦିନ୍ତି ଦଣ୍ଡ୍ ହିଦ୍ନାନ୍। 23 ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା କିଦେନ୍। 24 ମା ଯୀଶୁ ଖ୍ରୀଷ୍ଟ ହୁଦାଙ୍ଗ୍ ମାହାଆତି ୱିଜାକାରିଙ୍ଗ୍ ନା ଗରବ୍ ହୁଦାଙ୍ଗ୍ ଲାଡ୍ କିଦ୍ନାଙ୍ଗା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation