୧ କରନ୍ତିୟ 15 - New Testament in Pengo Parja Languageଖ୍ରୀଷ୍ଟ ହାଃଜି ଆରେରଗ ଜିବୁନ୍ ଆନାକା 1 ଏ ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ଇମ୍ଣି ହାର୍ଦିକାବୁର୍ ଆଗେ ଶୁଣାୟ୍ କିଜି ମାନ୍ଞ୍ଚାଙ୍ଗ୍ ହେ ବିଷୟରେ ମିଙ୍ଗେଙ୍ଗ୍ ମନେ ପକାୟ୍ କିଦେଙ୍ଗ୍ ଇଚା କିନାଙ୍ଗା। ଏପେଙ୍ଗ୍ ହେ ହାର୍ଦିକାବୁର୍ତିଙ୍ଗ୍ ଆସ୍ତି ମାଚାଦେର୍, ଆରେ ନଙ୍ଗୟ୍ ପାତେକ୍ ହେ ହାର୍ଦିକାବୁର୍ତିଙ୍ଗ୍ ପାର୍ତି କିଜି ମାନାଟ୍। 2 ଇମ୍ଣି ହାର୍ଦିକାବୁର୍ ଆନେଙ୍ଗ୍ ମିଙ୍ଗେଙ୍ଗ୍ ଶୁଣାୟ୍ କିଜି ମାନ୍ଞ୍ଚାଙ୍ଗ୍, ହେ ହାର୍ଦିକାବୁର୍ କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ରକ୍ଷା କିଦ୍ନାନ୍। ଯଦି ଏପେଙ୍ଗ୍ ହାର୍ଦିକାବୁର୍ତିଙ୍ଗ୍ ପାର୍ତି କିନାକା ବନ୍ଦ୍ କିନାଦେର୍ ଲାଗିଙ୍ଗ୍ ମି ପାର୍ତି ବେକାର୍ ଆନାତ୍। 3 ଆନେଙ୍ଗ୍ ୱିଜୁତାଙ୍ଗ୍ ମୁକ୍ୟ ହାର୍ଦିକାବୁର୍ ମିଙ୍ଗେଙ୍ଗ୍ ୱେଚ୍ଚି ମାନ୍ଞ୍ଚାଙ୍ଗ୍ ହେଦାଙ୍ଗ୍ ଆନେଙ୍ଗ୍ ମାପୃ ଯୀଶୁତାଙ୍ଗ୍ ପାୟାଆତାଙ୍ଗ୍ନା। ହେ ହାର୍ଦିକାବୁର୍ ଇଲେକେ ଯେ, ଖ୍ରୀଷ୍ଟ ମା ପାପ୍ କାଜିଙ୍ଗ୍ ହାଃତାନ୍ ଇନେସ୍ ଦରମ୍ ସାସ୍ତର୍ତାକେ ଲେକାଆତାତ୍ନା। 4 ତାଙ୍ଗେଙ୍ଗ୍ ମୁଚ୍ଚାର୍, ଆରେ ଈଶ୍ୱର ହେୱାନିଙ୍ଗ୍ ହାଃତିତାଙ୍ଗ୍ ତିନ୍ଦିନ୍ତାଙ୍ଗ୍ ନିକ୍ତାନ୍। ଇନେସ୍ ଦରମ୍ ସାସ୍ତର୍ ଲେକାଆତାତ୍ନା। 5 ତାପାଚେ ଯୀଶୁ କେପା ଆରେ ତା ବାଚିକିତି ବାରଜାଣ୍ ଚେଲାହିରିଙ୍ଗ୍ ଚଞ୍ଜିଆତାନ୍। 6 ତାପାଚେ ହେୱାନ୍ ରମାଟ୍ ପାଞ୍ଚ୍ଶଜାଣ୍ ଚେଲାହିରିଙ୍ଗ୍ ଚଞ୍ଜିଆଆଜି ମାଚାନ୍, ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ହାଃତାର୍ନା ଆରେ କେତ୍ଜାଣ୍ ନଙ୍ଗୟ୍ ପାତେକ୍ ଜିବୁନ୍ ମାନାର୍। 7 ଆରେ ଯାକୁବ ଆରେ ତା ୱିଜାର୍ ବାଚିକିତି ଚେଲାହିରିଙ୍ଗ୍ ପାଚେ ଚଞ୍ଜିଆଆଜି ମାଚାନ୍। 8 ଆନେଙ୍ଗ୍ ହେୱାନିଙ୍ଗ୍ ହୁଡ଼୍ଦେଙ୍ଗ୍ ଯଗ୍ୟ ହିଲିତିସ୍ ପା ୱିଜାକାର୍ ପାଚେ ହେୱାନ୍ ନାଙ୍ଗେଙ୍ଗ୍ ଚଞ୍ଜିଆଆଜି ମାନ୍ଞ୍ଚାନ୍। 9 ଇ ୱିଜୁ ବିଷୟ ଆନେଙ୍ଗ୍ ୱେଚ୍ଚାନାଙ୍ଗା, ଇନେସ୍କି ଆନେଙ୍ଗ୍ ୱିଜାର୍ ବାଚିକିତି ଚେଲାର୍ତାଙ୍ଗ୍ ହିରୁକାଙ୍ଗ୍ ମାଚାଙ୍ଗ୍। ଆନେଙ୍ଗ୍ ଈଶ୍ୱର ମଣ୍ଡ୍ଲିତିଙ୍ଗ୍ ଦୁଃକ୍ କଷ୍ଟ ହିଜି ମାଚାଙ୍ଗ୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ତା ଚେଲା ଆନି ଯଗ୍ୟ ହିଲେତ୍। 10 ମାତର୍ ତା ଦୟା କାଜିଙ୍ଗ୍ ଆନେଙ୍ଗ୍ ନଙ୍ଗୟ୍ ବାଚିକିତି ଚେଲା ଆତାଙ୍ଗ୍ନା, ହେୱାନ୍ ନାଙ୍ଗେଙ୍ଗ୍ ଦୟା କିତ୍ତି କାଜିଙ୍ଗ୍ ୱିଜାର୍ ଚେଲାର୍ ଈଶ୍ୱରତି କାମାୟ୍ କିତିତାଙ୍ଗ୍ ଆନେଙ୍ଗ୍ ବେସି ଈଶ୍ୱର କାମାୟ୍ କିନାଙ୍ଗା। ଆଁ ହେଦାଙ୍ଗ୍ ଆନେଙ୍ଗ୍ ଆକାୟ୍, ମାତର୍ ନାଙ୍ଗେଙ୍ଗ୍ ଦୟା କିତ୍ତି କାଜିଙ୍ଗ୍ ହେୱାନ୍ ନାଙ୍ଗେଙ୍ଗ୍ ତା କାମାୟ୍ କିନି କାଜିଙ୍ଗ୍ ବ୍ୟବହାର୍ କିଦ୍ନାନା। 11 ଲାଗିଙ୍ଗ୍ ଆନେଙ୍ଗ୍ ଆୟେଙ୍ଗ୍ କି, ଜେକନି ଚେଲାର୍ ଆୟେର୍ ଆପେଙ୍ଗ୍ ର ହାର୍ଦିକାବୁର୍ତିଙ୍ଗ୍ ଶୁଣାୟ୍ କିନାପା, ଇମ୍ଣାକା କି ଏପେଙ୍ଗ୍ ଆଗେ ପାର୍ତି କିତାଦେର୍ନା। ହାଃତିତାଙ୍ଗ୍ ଆରେରଗ ନିଙ୍ଗ୍ନି ବିଷୟ 12 ମାତର୍ ନଙ୍ଗୟ୍ ଏପେଙ୍ଗ୍ ନାଙ୍ଗେଙ୍ଗ୍ ୱେଚ୍ଚାଟ୍ ଯଦି ମିଙ୍ଗେଙ୍ଗ୍ ଆପେଙ୍ଗ୍ ଖ୍ରୀଷ୍ଟ ହାଃତିତାଙ୍ଗ୍ ଆରେରଗ ନିଙ୍ଗ୍ତାନ୍ ଇଞ୍ଜି ଶୁଣାୟ୍ କିତାପ୍ନା। ଲାଗିଙ୍ଗ୍ ଇନାକିଦେଙ୍ଗ୍ ମି ବିତ୍ରେତାଙ୍ଗ୍ କେତ୍ଜାଣ୍ ଇନାରା ହାଃତି ମାନାୟାର୍ ଆରେରଗ ଜିବୁନ୍ ଆଉର୍। 13 ଯଦି ହାଃତି ମାନାୟାର୍ ଆରେରଗ ଜିବୁନ୍ ଆନାକା ସତ୍ ଆକାୟ୍, ଲାଗିଙ୍ଗ୍ ଖ୍ରୀଷ୍ଟ ପା ଆରେରଗ ଜିବୁନ୍ ଆୱାତାନ୍ନା। 14 ଆରେ ଯଦି ଖ୍ରୀଷ୍ଟ ଆରେରଗ ଜିବୁନ୍ ଆୱାତାନ୍ନା, ଲାଗିଙ୍ଗ୍ ଆପେଙ୍ଗ୍ ଶୁଣାୟ୍ କିନାକା ୱିଜୁ ବେକାର୍ ଆନାତ୍ ଆରେ ଏପେଙ୍ଗ୍ ଈଶ୍ୱରତିଙ୍ଗ୍ ପାର୍ତି କିନାକା ପା ବେକାର୍ ଆନାତ୍। 15 ଯଦି ହାଃତି ମାନାୟାର୍ ଆରେରଗ ଜିବୁନ୍ ଆଉର୍, ଈଶ୍ୱର ଖ୍ରୀଷ୍ଟଙ୍ଗ୍ ଆରେରଗ ଜିବୁନ୍ କିନି ବିଷୟରେ ଆପେଙ୍ଗ୍ ମିଚ୍ ୱେଚ୍ଚାନାପା। 16 ଆରେ ଯଦି ହାଃତାକାର୍ ଆରେରଗ ଜିବୁନ୍ ଆନାକା ସତ୍ ଆକାୟ୍, ଲାଗିଙ୍ଗ୍ ଖ୍ରୀଷ୍ଟଙ୍ଗ୍ ଈଶ୍ୱର ଆରେରଗ ଜିବୁନ୍ କିୱାତାନ୍ନା। 17 ଆରେ ଯଦି ଖ୍ରୀଷ୍ଟ ହାଃତିତାଙ୍ଗ୍ ଆରେରଗ ଜିବୁନ୍ ଆୱାତାନ୍ନା, ଲାଗିଙ୍ଗ୍ ଏପେଙ୍ଗ୍ କିନି ପାର୍ତି ୱିଜୁ ବେକାର୍ ଆତାତ୍ନା, ଆରେ ମି ପାପ୍ କାଜିଙ୍ଗ୍ ନଙ୍ଗୟ୍ ପାତେକ୍ ଦସି ଆତାଦେର୍ନା। 18 ଯଦି ଖ୍ରୀଷ୍ଟ ହାଃତିତାଙ୍ଗ୍ ଆରେରଗ ଜିବୁନ୍ଆଜି ନିଙ୍ଗ୍ୱାତାନ୍ନା, ଲାଗିଙ୍ଗ୍ କେତେକ୍ ମାନାୟ୍ ତାଙ୍ଗେଙ୍ଗ୍ ପାର୍ତି କିଜି ହାଃତାର୍ନା। ହେୱାର୍ ୱିଜୁଦିନ୍ କାଜିଙ୍ଗ୍ ଈଶ୍ୱରତାଙ୍ଗ୍ ହେୱାର୍ ନଷ୍ଟ ଆତାର୍ନା। 19 ଯଦି ଆସେଙ୍ଗ୍ ଖ୍ରୀଷ୍ଟଙ୍ଗ୍ ଇ ପୁର୍ତିତାକେ ଜିଦେଙ୍ଗ୍ ନେ ଆହା କିନାସା, ଲାଗିଙ୍ଗ୍ ମାନାୟାର୍ ପୁର୍ତିତାକେ ଇନେରିଙ୍ଗ୍ କାନିକରମ୍ ଆୱିଲେକେ ମା କାଜିଙ୍ଗ୍ କାନିକରମ୍ ଆନି ଦର୍କାର୍। 20 ମାତର୍ ଖ୍ରୀଷ୍ଟ ଆରେରଗ ଜିବୁନ୍ ଆତାନ୍ନା। ହେୱାନ୍ ନେ ର ଗାଜା ତାସ୍ଲେକେ ପାର୍ତୁମ୍ ହାଃତାକାର୍ତାଙ୍ଗ୍ ଜିବୁନ୍ ଆତାନ୍ନା। 21 ଆଦମ କିତି କାମାୟ୍ କାଜିଙ୍ଗ୍ ଇ ପୁର୍ତିନି ୱିଜାର୍ ମାନାୟାର୍ ହାଃନାରା, ହେଲେକେ ଖ୍ରୀଷ୍ଟ କାଜିଙ୍ଗ୍, ଏଚେଜାଣ୍ ତାଙ୍ଗେଙ୍ଗ୍ ପାର୍ତି କିତାର୍ନା ହେୱାରିଙ୍ଗ୍ ପାଚେ ହେୱାନ୍ ଆରେରଗ ଜିବୁନ୍ କିନାନ୍। 22 ଆଦମ କିତି ପାପ୍ କାଜିଙ୍ଗ୍ ପୁର୍ତିନି ୱିଜାର୍ ମାନାୟାର୍ ହାଃନାରା, ମାତର୍ ଏଚେଜାଣ୍ ଖ୍ରୀଷ୍ଟଙ୍ଗ୍ ପାର୍ତି କିଜି ହାଃତାର୍ନା ଈଶ୍ୱର ହେୱାରିଙ୍ଗ୍ ଆରେରଗ ଜିବୁନ୍ ହିନାନ୍। 23 ମାତର୍ ୱିଜୁ ମାନାୟାର୍ ଟିକ୍ ସମୟରେ ଆରେରଗ ଜିବୁନ୍ ଆନାର୍। ଈଶ୍ୱର ମାଙ୍ଗେଙ୍ଗ୍ ପୁନି କିଦ୍ନି କାଜିଙ୍ଗ୍ ଖ୍ରୀଷ୍ଟଙ୍ଗ୍ ଆରେରଗ ପାର୍ତୁମ୍ ଜିବୁନ୍ କିତାନ୍। ଲାଗିଙ୍ଗ୍ ଏଚେପାଦ୍ନା ଖ୍ରୀଷ୍ଟ ଆରେରଗ ୱାନାନ୍ ତା ମାନାୟାରିଙ୍ଗ୍ ଆରେରଗ ଜିବୁନ୍ କିନାନ୍। 24 ତାପାଚେ ଈଶ୍ୱର ବିରଦ୍ କିଜି ମାନି ୱିଜୁ କରାପ୍ ଶାକ୍ତି, ଆଦିକାର୍ ଆରେ ସାସନ୍ କିନି ବିଷୟତିଙ୍ଗ୍ ନଷ୍ଟ କିନାନ୍, ଆରେ ଖ୍ରୀଷ୍ଟ ତା ଆବା ଈଶ୍ୱରତିଙ୍ଗ୍ ପୁରାପୁରି ସାସନ୍ କିଦେଙ୍ଗ୍ ଇ ପୁର୍ତିତିଙ୍ଗ୍ ତା କେଇଦ ହିନାନ୍। ହେପାଦ୍ନା ପୁର୍ତି ସେସ୍ ଆନାତ୍। 25 ଇନେସ୍କି ଈଶ୍ୱର ଖ୍ରୀଷ୍ଟନି ଶତ୍ରୁରିଙ୍ଗ୍ ଆରାୟ୍ କିଜି ତା କାଲ୍ପାନା ତାରେନ୍ ତାୱି ପାତେକ୍ ହେୱାନ୍ ରାଜାଆଜି ପୁର୍ତିତାକେ ସାସନ୍ କିନି ଦର୍କାର୍। 26 ଆରେ ହେୱାନ୍ ସେସ୍ ଶତୃ ମାରାଣ୍ତିଙ୍ଗ୍ ନଷ୍ଟ କିନାନ୍। 27 ଇନେସ୍କି ଦରମ୍ ସାସ୍ତର୍ ଇଲେକେ ୱେଚ୍ନାତା, “ଈଶ୍ୱର ହେୱାନିଙ୍ଗ୍ ୱିଜୁ ସାସନ୍ କିଦେଙ୍ଗ୍ ଆଦିକାର୍ ହିତାନ୍ନା।” ତା ଅର୍ତ ଇଦାଙ୍ଗ୍ ଆକାୟ୍ ଯେ ଈଶ୍ୱର ପା ଖ୍ରୀଷ୍ଟନି କଣ୍ଟ୍ରୁଲ୍ତାକେ ୱାନାନ୍, ମାତର୍ ଈଶ୍ୱର ନେ ୱିଜୁ ଜିନିଷ୍ ଜପି ଆଦିକାର୍ ଆରେ ସାସନ୍ କିନି କାଜିଙ୍ଗ୍ ହିତାନ୍ନା। 28 ଲାଗିଙ୍ଗ୍ ଏଚେପାଦ୍ନା ତା ଆଦିକାର୍ନି ତାରେନ୍ ୱାନାତ୍, ହେପାଦ୍ନା ତା ହିମ୍ଣା ଯୀଶୁ ନିଜେ ଈଶ୍ୱର ତାରେନ୍ ୱାନାନ୍। ଲାଗିଙ୍ଗ୍ ଖ୍ରୀଷ୍ଟଙ୍ଗ୍ ୱିଜୁ ଜିନିଷ୍ତିଙ୍ଗ୍ ସାସନ୍ କିଦେଙ୍ଗ୍ ହିତି ଈଶ୍ୱର ୱିଜୁ ବାହାତାକେ ଆରେ ୱିଜୁ ଜିନିଷ୍ ଜପି ସାସନ୍ କିନି କାଜିଙ୍ଗ୍ ଗାଜା ଆନାନ୍। 29 ଯଦି ହାଃତାକାର୍ ଆରେରଗ ଜିବୁନ୍ ଆନାକା ସତ୍ ଆକାୟ୍, ଲାଗିଙ୍ଗ୍ ହାଃତି ମାନାୟାର୍ ବାଦୁଲ୍ତ ଡୁବନ୍ ଅନି ନିତି ନିୟମ୍ ଇନା ଲାବ୍ ଆକାୟ୍। ଯଦି ଈଶ୍ୱର ହାଃତି ମାନାୟାରିଙ୍ଗ୍ ଆରେରଗ ଜିବୁନ୍ କିଉନ୍, ଲାଗିଙ୍ଗ୍ ଇ ନିତି ନିୟମ୍ତିଙ୍ଗ୍ ମାନାୟାର୍ ମାନିକିୱି ଦର୍କାର୍। 30 ଯଦି ହେଲେକେ ଆନାତ୍, ଲାଗିଙ୍ଗ୍ ଇନାକିଦେଙ୍ଗ୍ ଆସେଙ୍ଗ୍ ମାରାଣ୍ ମୁମ୍ଦ ହାନାସା? 31 ଏ ଟଣ୍ଡାର୍କାଦେର୍, ଆନେଙ୍ଗ୍ ପାର୍ମାଣ୍ କିଜି ୱେଚ୍ଚାନାଙ୍ଗା ଯେ, ଆନେଙ୍ଗ୍ ୱିଜୁଦିନ୍ ମାରାଣ୍ ମୁମ୍ଦ ହାନାଙ୍ଗା। ଆରେ ଆନେଙ୍ଗ୍ ଇଦାଙ୍ଗ୍ ହାର୍ଦାଙ୍ଗ୍ ପୁଚାଙ୍ଗ୍ନା ଯେ, ମା ମାପୃ ଯୀଶୁ ଖ୍ରୀଷ୍ଟ ନା କାଜିଙ୍ଗ୍ ଇଲେକେ କିନାନା, ଆରେ ଆନେଙ୍ଗ୍ ହେଦାଙ୍ଗ୍ କାଜିଙ୍ଗ୍ ବାଟ୍ପାଣ୍ ଆନାଙ୍ଗା। 32 ଆନେଙ୍ଗ୍ ଏପିସ ସହର୍ନି ହୁଣ୍ଡେର୍ ଲେଗ୍ଦି ମାନାୟାର୍ ହୁଦାଙ୍ଗ୍ ଜିକାଟାଣା ଆନାକା ଇନା ଲାବ୍ ଆକାୟ୍। ଯଦି ହାଃତି ମାନାୟାର୍ ଆରେରଗ ଜିବୁନ୍ ଆଉର୍, ଲାଗିଙ୍ଗ୍ ଆସେଙ୍ଗ୍ ବଜି କିଜି ୱାରିୟାଆନି ଦର୍କାର୍ ଯଦି ଆସେଙ୍ଗ୍ ବେଗି ହାଃନାସ୍। 33 ଲାଗିଙ୍ଗ୍ ଇଲେକେ ବେଣ୍ ୱେଚ୍ନି ମାନାୟାର୍ କାତା ୱେନ୍ଞ୍ଜି ଜାର୍ତିଙ୍ଗ୍ ଟକାୟ୍ କିୟାଆମାଟ୍, ଇନେସ୍କି “କରାପ୍ ମାନାୟ୍ ହୁଦାଙ୍ଗ୍ ମାହାଆତିସ୍ କରାପ୍ ବ୍ଯବହାର୍ କିୟିଆନାତ୍।” 34 ଏପେଙ୍ଗ୍ ଟିକ୍ ବିଷୟତିଙ୍ଗ୍ ହାର୍ଦାଙ୍ଗ୍ ଚିନ୍ତା କିୟାଟ୍, ଆରେ ପାପ୍ କାମାୟ୍ କିନାକା ବନ୍ଦ୍ କିୟାଟ୍। ଇନେସ୍କି ମି ବିତ୍ରେତାଙ୍ଗ୍ କେତ୍ଜାଣ୍ ମାନାର୍ ହେୱାର୍ ଈଶ୍ୱରତିଙ୍ଗ୍ ମୁଡ଼୍କେ ପୁନ୍ୱାତାର୍ନା ଆରେ ହେୱାରିଙ୍ଗ୍ ଲାଜୁ କିଦେଙ୍ଗ୍ ଇ ୱିଜୁ ବିଷୟରେ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା। ଆରେରଗ ଜିବୁନ୍ଆତି ଗାଗାଡ଼୍ 35 ଆରେ ଇନେର୍ ଯଦି ନାଙ୍ଗେଙ୍ଗ୍ ୱେନ୍ବା ଆଦ୍ନାର୍, “ଈଶ୍ୱର ଇନେସ୍କିଜି ହାଃତି ମାନାୟାରିଙ୍ଗ୍ ଆରେରଗ ଜିବୁନ୍ କିନାନ୍, ଆରେ ହେ ହାଃତି ମାନାୟାର୍ ଗାଗାଡ଼୍ ଇନେସ୍ ମାନ୍ଗାନାତ୍?” 36 ଇମ୍ଣାକାନ୍ ହେଲେକେ ପ୍ରଶ୍ନ ୱେନ୍ବାନାନ୍ ହେୱାନ୍ ବକୁୱା, ଏପେଙ୍ଗ୍ ହାର୍ଦାଙ୍ଗ୍ ପୁଚାଦେର୍ନା ଯେ ର ମାଞ୍ଜି ଜମିତାକେ ହାଃତିସ୍ ନେ ଗଜା ଆନାତ୍। 37 ଏପେଙ୍ଗ୍ କୁଲି ପାଡ଼ା କି ଗହମ୍ ମାଞ୍ଜିନି ମାର୍ତିଙ୍ଗ୍ ରୁଜୁଦେର୍, ମାତର୍ ଆପ୍କା ମାଞ୍ଜିତିଙ୍ଗ୍ ନେ ମାର୍ ଆନି କାଜିଙ୍ଗ୍ ରୁଜ୍ନାଦେର୍। 38 ଲାଗିଙ୍ଗ୍ ଈଶ୍ୱର ତା ଇଚା ଅନୁସାରେ ହେ ମାଞ୍ଜିତାଙ୍ଗ୍ ମାର୍ ନିକ୍ନାନ୍, ଆରେ ଈଶ୍ୱର ତା ଇଚା ଅନୁସାରେ ପୁନି ଗାଗାଡ଼୍ ହିଦ୍ନାନ୍। 39 ହେଲେକେ ପୁର୍ତିତାକେ ବାରବିନି ଗାଗାଡ଼୍ ମାନାତ୍, ର ପର୍କାର୍ ମାନାୟାର୍ ମାନାର୍, ର ପର୍କାର୍ ପଶୁଙ୍ଗ୍ ମାନିକ୍, ର ପର୍କାର୍ ପଟିଙ୍ଗ୍ ଆରେ ମିନ୍କୁ ମାନିକ୍। 40 ହେଲେକେ ବାଦାଡ଼୍ତାକେ ପା ଜିନିଷ୍ ମାନାତ୍, ଆରେ ତା ହଲ୍ନାକା ଅଲ୍ଗା ଆରେ ପୁର୍ତିତାକେ ପା ଅଲ୍ଗା-ଅଲଗା ଗାଗାଡ଼୍ ମାନାତ୍, ହେଦାଙ୍ଗ୍ ସରଗ୍ନି ଜିନିଷ୍ତାଙ୍ଗ୍ ଅଲ୍ଗା। 41 ହେଲେକେ ବାଦାଡ଼୍ତ ମାନିକିଙ୍ଗ୍ ୱେଡ଼ା, ଲେଞ୍ଜ୍ ଆରେ ହୁକାଙ୍ଗ୍ ଇ ତିନି ଗଟା ଜିନିଷ୍କାଙ୍ଗ୍ ଅଲ୍ଗା-ଅଲ୍ଗା ଅଜଡ଼୍ ମାନାତ୍। ଆରେ ହୁକାଙ୍ଗ୍ ପା ତା ବିତ୍ରେତାଙ୍ଗ୍ ଅଲ୍ଗା-ଅଲ୍ଗା ଅଜଡ଼୍ ମାନାତ୍। 42 ଟିକ୍ ହେଲେକେ ହାଃତିତାଙ୍ଗ୍ ଆରେରଗ ଜିବୁନ୍ ଆନାକା। ଏଚେପାଦ୍ନା ଆସେଙ୍ଗ୍ ହାଃନାସ୍ ମା ଇ ଗାଗାଡ଼୍ ଜମିତାକେ ରୁସ୍ତି ମାଞ୍ଜି ଲେକେ ଆତାତ୍ନା, ମାତର୍ ହେୱାରିଙ୍ଗ୍ ଈଶ୍ୱର ୱିଜୁଦିନ୍ କାଜିଙ୍ଗ୍ ଜିବୁନ୍ କିନାନ୍। 43 ଏଚେପାଦ୍ନା ହେୱାର୍ ଗାଗାଡ଼୍ତିଙ୍ଗ୍ ମୁଚ୍ନାର୍, ହେଦାଙ୍ଗ୍ ଦୁର୍ବଲ୍ ଆରେ ହଲ୍ୱାଦାଙ୍ଗ୍ ମାନାତ୍। ମାତର୍ ଏଚେପାଦ୍ନା ଈଶ୍ୱର ହେୱାରିଙ୍ଗ୍ ଜିବୁନ୍ କିନାନ୍ ହେୱାର୍ ହଲ୍ନାର୍ ଆରେ ଶାକ୍ତି ଆନାର୍। 44 ମା ଇ ପୁର୍ତିନି ଗାଗାଡ଼୍ ନଷ୍ଟ ଆନାତ୍, ମାତର୍ ଏଚେପାଦ୍ନା ଈଶ୍ୱର ମାଙ୍ଗେଙ୍ଗ୍ ଆରେରଗ ଜିବୁନ୍ କିଦ୍ନାନ୍, ଖ୍ରୀଷ୍ଟଙ୍ଗ୍ ମାଚି ଗୌରବନି ଗାଗାଡ଼୍ ଲେକେ ମାନ୍ଙ୍ଗାନାତ୍। ହେ ଗାଗାଡ଼୍ ଇ ପୁର୍ତିନି ଗାଗାଡ଼୍ ଲେକେ ଆରେ ଗୌରବନି ଗାଗାଡ଼୍ ଲେକେ ଆନାତ୍। 45 ସାସ୍ତର୍ତାକେ ଇଲେକେ ଲେକାଆତାତ୍ନା, “ପାର୍ତୁମ୍ ମାନାୟ୍ ଆଦମ ଜିବୁନ୍ ମାନାକାନ୍ ଆତାନ୍, ମାତର୍ ସେସ୍ ଆଦମ ଖ୍ରୀଷ୍ଟ ଜିବୁନ୍ ହିଦ୍ନି ଆତ୍ମା ଆତାନ୍ନା।” 46 ଈଶ୍ୱର ଇ ପୁର୍ତିତାକେ ମାଞ୍ଜେଙ୍ଗ୍ ମାଙ୍ଗେଙ୍ଗ୍ ଇ ପୁର୍ତିନି ଗାଗାଡ଼୍ ହିତ୍ତାନ୍ନା, ମାତର୍ ସରଗ୍ତାକେ ମାଞ୍ଜେଙ୍ଗ୍ ଈଶ୍ୱର ମାଙ୍ଗେଙ୍ଗ୍ ଗୌରବନି ଗାଗାଡ଼୍ ହିଦ୍ନାନ୍। 47 ଈଶ୍ୱର ପାର୍ତୁମ୍ ମାନାୟ୍ ଆଦମତିଙ୍ଗ୍ ଇ ପୁର୍ତିନି ଚିକ୍ଲାତାଙ୍ଗ୍ ରସ୍ତାନ୍, ମାତର୍ ଦୁଇ ନମ୍ବର୍ ଆଦମ ଯୀଶୁ ଖ୍ରୀଷ୍ଟ ସରଗ୍ତାଙ୍ଗ୍ ୱାଜିମାଚାନ୍। 48 ପୁର୍ତିନି ମାନାୟାର୍ ଗାଗାଡ଼୍ ଇ ପୁର୍ତିନି ଆଦମ ଗାଗାଡ଼୍ ଲେକେ, ମାତର୍ ସରଗ୍ନି ମାନାୟାର୍ ଗାଗାଡ଼୍ ସରଗ୍ନି ଖ୍ରୀଷ୍ଟ ଗାଗାଡ଼୍ ଲେକେ। 49 ନଙ୍ଗୟ୍ ଆସେଙ୍ଗ୍ ଇ ପୁର୍ତିନି ମାନାୟାର୍ ଆଦମଲେକେ ଚଞ୍ଜ୍ନାସା ଇନେରିଙ୍ଗ୍ ଈଶ୍ୱର ଚିକ୍ଲାତାଙ୍ଗ୍ ରସ୍ତାନ୍ନା। ହେଲେକେ ରଦିନ୍ ୱାନାତ୍ ଆସେଙ୍ଗ୍ ଖ୍ରୀଷ୍ଟ ଲେକେ ଚଞ୍ଜ୍ନାସ୍, ଇନେର୍ ସରଗ୍ତାଙ୍ଗ୍ ୱାଜିମାଚାନ୍। 50 ଏ ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ଇଦାଙ୍ଗ୍ ୱେଚ୍ଚେଦେଙ୍ଗ୍ ଇଚା କିନାଙ୍ଗା ଯେ, ମା ଇ ପୁର୍ତିନି ଗାଗାଡ଼୍ ହୁଦାଙ୍ଗ୍ ଈଶ୍ୱର ସାସନ୍ କିନି ରାଜିତାକେ ହଲିଆ ଆଉତ୍, ଆରେ ଇ ହାଃନି ଗାଗାଡ଼୍ ୱିଜୁଦିନ୍ ମାନି ବାହାତାକେ ହାଲିଆ ଆଉତ୍। 51 ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ର ଚାନିଆଆନି ଡ଼ୁକ୍ତି ବିଷୟ ୱେଚ୍ଚେଦେଙ୍ଗ୍ ଇଚା କିନାଙ୍ଗା। ଆସେଙ୍ଗ୍ ୱିଜାକାସ୍ ହାଃଉସ୍, ମାତର୍ ଈଶ୍ୱର ମା ଗାଗାଡ଼୍ନି ରୁପ୍ତିଙ୍ଗ୍ ବାଦ୍ଲାୟ୍ କିନାନ୍। 52 ହେଦାଙ୍ଗ୍ କାଣ୍କୁ ମିଟ୍କା ଇଡ଼୍ତିଲେକେ ହଟାତ୍ ୱାନାତ୍, ଏଚେପାଦ୍ନା ସେସ୍ ମରିନି ସବଦ୍ ଆନାତ୍ ହେପାଦ୍ନା ଏଚେଜାଣ୍ ଖ୍ରୀଷ୍ଟଙ୍ଗ୍ ପାର୍ତି କିଜି ହାଃତାର୍ନା ହେୱାନ୍ ହେୱାରିଙ୍ଗ୍ ୱିଜୁଦିନ୍ କାଜିଙ୍ଗ୍ ଆରେରଗ ଜିବୁନ୍ କିନାନ୍। ଆରେ ଆସେଙ୍ଗ୍ ଏଚେଜାଣ୍ ଜିବୁନ୍ ମାନାସ୍, ହେୱାନ୍ ମା ଗାଗାଡ଼୍ନି ରୁପ୍ତିଙ୍ଗ୍ ବାଦ୍ଲାୟ୍ କିନାନ୍। 53 ଇନେସ୍କି ମା ହାଃନି ଗାଗାଡ଼୍ ଇନାୱେଡ଼ାଙ୍ଗ୍ ହାଃୱି ଗାଗାଡ଼୍ତାଙ୍ଗ୍ ରୁପ୍ଲେକେ ବାଦ୍ଲା ଆୟା ଆନାତ୍। ଆରେ ମା ନଷ୍ଟ ଆନି ଗାଗାଡ଼୍ତାଙ୍ଗ୍ ଇନାୱେଡ଼ାଙ୍ଗ୍ ନଷ୍ଟ ଆୱି ଗାଗାଡ଼୍ ଲେକେ ରୁପ୍ ବାଦ୍ଲା ଆନି ଦର୍କାର୍। 54 ଲାଗିଙ୍ଗ୍ ଏଚେପାଦ୍ନା ମା ହାଃନି ଗାଗାଡ଼୍ ହାଃୱି ଗାଗାଡ଼୍ନି ରୁପ୍ତାକେ ବାଦ୍ଲା ଆନାତ୍, ଈଶ୍ୱରତି ଦରମ୍ ସାସ୍ତର୍ ପୁରାଆନାତ୍, “ଈଶ୍ୱର ମାରାଣ୍ତିଙ୍ଗ୍ ଆରାୟ୍ କିଜି ତାବେତାଙ୍ଗ୍ ଜିତାଆନାନ୍। 55 ଏ ମାରାଣ୍ ଏନେଙ୍ଗ୍ ଆରା ଆନାୟ୍, ଏ ମାରାଣ୍ ନିଙ୍ଗେଙ୍ଗ୍ ମାଙ୍ଗେଙ୍ଗ୍ ନଷ୍ଟ କିଦ୍ନି ଶାକ୍ତି ହିଲେତ୍।” 56 ଇନେସ୍କି ପାପ୍ ନେ ମାରାଣ୍ ତାନାତା, ଆରେ ଦରମ୍ ସାସ୍ତର୍ନି ନିୟମ୍ ପାପ୍ତିଙ୍ଗ୍ ଶାକ୍ତି ହିନାତା। 57 ମାତର୍ ଆନେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଙ୍ଗା ଯେ, ହେୱାନ୍ ମା ପାପ୍ତାଙ୍ଗ୍ ଆରେ ମା ମାପୃ ଯୀଶୁ ଖ୍ରୀଷ୍ଟ ମାଙ୍ଗେଙ୍ଗ୍ ମାରାଣ୍ତାଙ୍ଗ୍ ଜିତାୟ୍ କିଦ୍ନାନ୍। 58 ଲାଗିଙ୍ଗ୍, ଏ ଟଣ୍ଡାର୍କାଦେର୍, ଏପେଙ୍ଗ୍ ଖ୍ରୀଷ୍ଟଙ୍ଗ୍ ଆଦିକ୍ତାଙ୍ଗ୍ ଆଦିକ୍ ପାର୍ତି କିଜି ମାନାଟ୍, ଆରେ ମିଚ୍ ହିକ୍ଷା ଶୁଣାୟ୍ କିନି ମାନାୟାର୍ତାଙ୍ଗ୍ ଦେହା ହାଲ୍ମାଟ୍। ଇନେସ୍କି ତା କାମାୟ୍ କିଦେଙ୍ଗ୍ କଷ୍ଟ କିନାକା ବେକାର୍ ଆଉତ୍, ଇନେସ୍କି ଏପେଙ୍ଗ୍ ହାର୍ କିଜି ପୁଚାଦେର୍ନା ଯେ, ତା କାଜିଙ୍ଗ୍ କିନି କାମାୟ୍ ମି କାଜିଙ୍ଗ୍ ଲାବ୍ ଆଦ୍ନାତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation