୧ କରନ୍ତିୟ 14 - New Testament in Pengo Parja Languageପାଉଲ ପବିତ୍ର ଆତ୍ମାନି ଦାନ୍ ବିଷୟରେ ଆଦିକ୍ କାତା ୱେଚ୍ଚାନ୍ 1 ଲାଗିଙ୍ଗ୍ ଟଣ୍ଡାରିଙ୍ଗ୍ ଲାଡ୍ କିଦେଙ୍ଗ୍ ମି ୱିଜୁ ଶାକ୍ତି ୱିହାଟ୍। ପବିତ୍ର ଆତ୍ମା ଇମ୍ଣି ୱିଜୁ ଶାକ୍ତି ହିଦ୍ନାତା, ହେଦାଙ୍ଗ୍ ପାୟା ଆଦେଙ୍ଗ୍ ପା ମାନ୍ କିୟାଟ୍। ହେ ବିତ୍ରେତାଙ୍ଗ୍ ଈଶ୍ୱର କାତା ୱେଚ୍ଚେଙ୍ଗ୍ ଶାକ୍ତି ପାୟା ଆଦେଙ୍ଗ୍ ମାନ୍ କିୟାଟ୍। 2 ଇନେସ୍କି ଇନେର୍ ବୁଜାଆୱି ବାଷାତାଙ୍ଗ୍ ବେଣ୍ କିନାନ୍, ହେୱାନ୍ ମାନାୟାର୍ ହୁଦାଙ୍ଗ୍ ଆକାୟ୍, ମାତର୍ ଈଶ୍ୱର ହୁଦାଙ୍ଗ୍ ବେଣ୍ କିନାନା। ଇନେସ୍କି ମି ବେଣ୍ ଇନେର୍ ପା ବୁଜା ଆଉରା। ଏପେଙ୍ଗ୍ ଆତ୍ମାନି ଶାକ୍ତିତାଙ୍ଗ୍ ଡ଼ୁକ୍ତି ସତ୍ ବିଷୟରେ ବେଣ୍କିନାରା। 3 ମାତର୍ ଇନେର୍ ଈଶ୍ୱରତି କାତା ୱେଚ୍ନାନା, ମାନାୟାର୍ ହୁଦାଙ୍ଗ୍ ବେଣ୍ କିନାର୍। ଇନେସ୍କି ହେୱାରିଙ୍ଗ୍ ସାଇଜ, ସାର୍ଦା ଆରେ ଦୁଃକ୍ ନିକାରିଙ୍ଗ୍ ବୁଜାୟ୍ କିନାର୍। 4 ଇନେର୍ ବୁଜାଆୱି ବାଷାତାଙ୍ଗ୍ ବେଣ୍ କିନାନ୍, ହେୱାନ୍ ଜାର୍ ପାର୍ତିତିଙ୍ଗ୍ ଷ୍ଟ୍ରଙ୍ଗ୍ କିନାନ୍। ମାତର୍ ଇନେର୍ ଈଶ୍ୱର କାତା ୱେଚ୍ନାନ୍, ହେୱାନ୍ ୱିଜୁ ମଣ୍ଡ୍ଲିନି ପାର୍ତି କିନାକାରିଙ୍ଗ୍ ସାଇଜ କିନାନ୍। 5 ଏପେଙ୍ଗ୍ ୱିଜାଦେର୍ ବୁଜାଆୱି ବାଷାତାଙ୍ଗ୍ ବେଣ୍ କିତିସ୍ ଆନେଙ୍ଗ୍ ୱାରିୟା ଆନାଙ୍ଗ୍। ମାତର୍ ଏପେଙ୍ଗ୍ ଈଶ୍ୱର କାତା ୱେଚ୍ଚେଙ୍ଗ୍ ଶାକ୍ତି ପାୟାଆଡ ଇଞ୍ଜି ଆନେଙ୍ଗ୍ ଆଦିକ୍ ମାନ୍ କିନାଙ୍ଗା। ଇନେସ୍କି ବୁଜାଆୱି ବାଷାତାଙ୍ଗ୍ ଈଶ୍ୱର କାତା ୱେଚ୍ନାକା ମୁକ୍ଯ। ଯଦି ମଣ୍ଡ୍ଲିନିକାର୍ ଇନେର୍ ପା ହେୱାନ୍ ୱେଚ୍ଚି ବିଷୟନି ଅର୍ତ ବୁଜାୟ୍ କିତିସ୍ ଲାଗିଙ୍ଗ୍ ମଣ୍ଡ୍ଲିନି ୱିଜାକାର୍ ଆଦିକ୍ ପାର୍ତିକିନାର୍। 6 ଲାଗିଙ୍ଗ୍ ଏ ଟଣ୍ଡାର୍କାଦେର୍ ଆନେଙ୍ଗ୍ ମିତାକେ ୱାତିହିଙ୍ଗ୍, ବିନ୍-ବିନ୍ ବାଷାତାଙ୍ଗ୍ କାତା ୱେଚ୍ଚିତିସ୍, ମି ପାର୍ତି ବାଡା ଆଦେଙ୍ଗ୍ ସାଇଜ ଆଦୁତ୍। ମାତର୍ ଆନେଙ୍ଗ୍ ଈଶ୍ୱରତାଙ୍ଗ୍ ପାୟାଆତି କାତା, ଜ୍ଞାନ୍, ଈଶ୍ୱରତାଙ୍ଗ୍ ୱେଚି କାତା ହିକାଆନି ବିଷୟରେ ୱେଚ୍ୱିତିସ୍ ନେ ମି ପାର୍ତି ବାଡା ଆଦେଙ୍ଗ୍ ସାଇଜ ଆନାତ୍। 7 ହେଲେକେ ହୁର୍ଡ଼ି ଆୟେତ୍ କି ଡୁଡୁଙ୍ଗା ଆୟେତ୍, ଯଦି ବାଜା ଯନ୍ର ଟିକ୍ ବାବ୍ରେ ବାଜା ଆଡୁତ୍, ଲାଗିଙ୍ଗ୍ ହେବେ ଇନାକା ଆଡ଼୍ନାତା, ଇନେର୍ ପା ପୁଞ୍ଜେଙ୍ଗ୍ ଆଡୁର୍ ଯେ ହେଦାଙ୍ଗ୍ ହୁର୍ଡ଼ି କି ଡୁଡୁଙ୍ଗା। 8 ଆରେ ଯଦି ମରି ବାଜା ହାର୍ କିଜି ଆଡୁତ୍, ଲାଗିଙ୍ଗ୍ ସେନାର୍ ଯୁଜ୍ କିଦେଙ୍ଗ୍ ଜାଗ୍ରତ୍ ଆଉର୍। 9 ହେଲେକେ, ଯଦି ବୁଜାଆୱି ବାଷାତାଙ୍ଗ୍ ବେଣ୍ କିନାଦେର୍, ଲାଗିଙ୍ଗ୍ ହେଦାଙ୍ଗ୍ ଇନେର୍ ବୁଜା ଆଉର୍, ମାତର୍ ମି ବେଣ୍ତିଙ୍ଗ୍ ଡ଼ୁଇ ଉପ୍ଚି ଅତିଲେକେ ଆନାତ୍। 10 ପୁର୍ତିତାକେ କେତେକ୍ ବାଷା ମାନାତ୍, ହେ ୱିଜୁ ବାଷାକାଙ୍ଗ୍ ପା ଅର୍ତ ମାନାତ୍। 11 ଯଦି ନା ହୁଦାଙ୍ଗ୍ ବେଣ୍ କିଦ୍ନି ମାନାୟ୍ ବେଣ୍ ଆନେଙ୍ଗ୍ ବୁଜା ଆଉଙ୍ଗ୍, ଲାଗିଙ୍ଗ୍ ହେ ମାନାୟ୍ ନା କାଜିଙ୍ଗ୍ ବିନ୍ଦେସ୍ନି ଚିନ୍ କିୱିତି ମାନାୟ୍ ଲେକେ ଆନାନ୍, ଆରେ ଆନେଙ୍ଗ୍ ତା କାଜିଙ୍ଗ୍ ଚିନ୍ କିଦ୍ୱିତି ବିନ୍ଦେସ୍ନି ମାନାୟ୍ ଲେକେ ଆନାଙ୍ଗ୍। 12 ଲାଗିଙ୍ଗ୍ ଏପେଙ୍ଗ୍ ପବିତ୍ର ଆତ୍ମାନି ବିନ୍-ବିନ୍ ରକମ୍ନି ଦାନ୍ ପାୟା ଆଦେଙ୍ଗ୍ ମାନ୍ କିୟାଟ୍, ହେ ୱିଜୁତାଙ୍ଗ୍ ଇମ୍ଣି ୱିଜୁ ଦାନ୍ ମି ମଣ୍ଡ୍ଲିନି ମାନାୟାରିଙ୍ଗ୍ ଆଦିକ୍ ସାଇଜ କିୟିକିନାତ୍, ହେ ଦାନ୍ ପାୟା ଆଦେଙ୍ଗ୍ ଉପାୟ୍ କିୟାଟ୍। 13 ଲାଗିଙ୍ଗ୍, ଇନେର୍ ବୁଜାଆୱି ବାଷାତାଙ୍ଗ୍ କାତା ୱେଚ୍ନାନ୍, ହେୱାନ୍ ହେ କାତାନି ଅର୍ତ ବୁଜାୟ୍ କିଦେଙ୍ଗ୍ ଈଶ୍ୱର ଦାନ୍ ହିଦେନ୍ ଇଞ୍ଜି ପାର୍ତାନା କିୟେନ୍। 14 ଇନେସ୍କି ଆନେଙ୍ଗ୍ ଯଦି ବୁଜାଆୱି ବାଷାତାଙ୍ଗ୍ ପାର୍ତାନା କିନାଙ୍ଗ୍, ଲାଗିଙ୍ଗ୍ ନା ଆତ୍ମା ପା ପାର୍ତାନା କିନାତ୍, ମାତର୍ ନା କାଜିଙ୍ଗ୍ ବେକାର୍ ଆନାତ୍ ଇନେସ୍କି ଆନେଙ୍ଗ୍ ବୁଜା ଆଦେଙ୍ଗ୍ ଆଡୁଙ୍ଗା। 15 ହେଦାଙ୍ଗ୍ କାଜିଙ୍ଗ୍ ପବିତ୍ର ଆତ୍ମା ସାଇଜତାଙ୍ଗ୍ ଆନେଙ୍ଗ୍ ମି କାଜିଙ୍ଗ୍ ପାର୍ତାନା କିଦେଙ୍ଗ୍ ଇଚା କିନାଙ୍ଗା। ମାତର୍ ଆନେଙ୍ଗ୍ ଇଦାଙ୍ଗ୍ ପା ଇଚା କିନାଙ୍ଗା ଯେ ନା ୱିଜୁ କାତା ମାନାୟାର୍ ବୁଜା ଆଏର୍, ଆରେ ଆନେଙ୍ଗ୍ କେର୍କଣ୍ କେର୍ନିହିଙ୍ଗ୍ ପବିତ୍ର ଆତ୍ମା ହୁଦାଙ୍ଗ୍ କେର୍କଣ୍ କେର୍ଦେଙ୍ଗ୍ ଇଚା କିନାଙ୍ଗା। ମାତର୍ ଆନେଙ୍ଗ୍ କେର୍ତି କେର୍କଣ୍ ଅର୍ତତିଙ୍ଗ୍ ପା ମାନାୟାର୍ ବୁଜାଆନି ଦର୍କାର୍। 16 ଯଦି ଏପେଙ୍ଗ୍ ଈଶ୍ୱରତିଙ୍ଗ୍ ମି ଆତ୍ମା ହୁଦାଙ୍ଗ୍ ନେ ଜୟ୍-ଜୟ୍ କିନାଦେର୍, ଆରେ ଯଦି ଏପେଙ୍ଗ୍ ଈଶ୍ୱରତିଙ୍ଗ୍ ହିନି ଦନ୍ଯବାଦ୍ ପାର୍ତାନାତିଙ୍ଗ୍ ମାନାୟାର୍ ବୁଜା ଆଉର୍, ଲାଗିଙ୍ଗ୍ ହେୱାର୍ ମିହୁଦାଙ୍ଗ୍ ଈଶ୍ୱରତିଙ୍ଗ୍ ଜୟ୍-ଜୟ୍ ଆରେ ଦନ୍ଯବାଦ୍ କିଦେଙ୍ଗ୍ ଆଡୁର୍। ଇନେସ୍କି ହେୱାର୍ ଏପେଙ୍ଗ୍ ୱେଚ୍ଚି ବିଷୟତିଙ୍ଗ୍ ବୁଜା ଆଦେଙ୍ଗ୍ ଆଡୁରା। 17 ଏପେଙ୍ଗ୍ ଈଶ୍ୱରତିଙ୍ଗ୍ ହାର୍ କିଜି ଦନ୍ଯବାଦ୍ ହିଜି ମାନାଦେର୍, ମାତର୍ ହେଦାଙ୍ଗ୍ ଯଦି ଈଶ୍ୱରତିଙ୍ଗ୍ ଆଦିକ୍ ପାର୍ତିକିନି କାଜିଙ୍ଗ୍ ହେୱାରିଙ୍ଗ୍ ସାଇଜ କିଉତ୍, ଲାଗିଙ୍ଗ୍ ହେଦାଙ୍ଗ୍ ଇନା ଲାବ୍ ଆକାୟ୍। 18 ଆନେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଙ୍ଗା ଯେ, ଆନେଙ୍ଗ୍ ମିବେତାଙ୍ଗ୍ ଆଦିକ୍ ବୁଜାଆୱି ବାଷା ଇଞ୍ଜେଙ୍ଗ୍ ଆଡ୍ନାଙ୍ଗା। 19 ମାତର୍ ଯଦି ଆନେଙ୍ଗ୍ ମଣ୍ଡ୍ଲିତାକେ ପାର୍ତି କିନାକାରିଙ୍ଗ୍ ହିକାୟ୍ କିନି କାଜିଙ୍ଗ୍ ଦସ୍ ହାଜାର୍ ବୁଜାଆୱି ବାଷାତାଙ୍ଗ୍ ବୁଜାଆନି ପାଞ୍ଚ୍ଗଟା କାତା ୱେଚ୍ନାକା ହାର୍, ଇମ୍ଣାକା ହେୱାରିଙ୍ଗ୍ ୱିଜୁ ପର୍କାର୍ ସାଇଜ କିନାତ୍। 20 ଏ ଟଣ୍ଡାର୍କାଦେର୍, ଇ ୱିଜୁ ବିଷୟ ବୁଜା ଆଦେଙ୍ଗ୍ ଏପେଙ୍ଗ୍ ହିମ୍ଣାଙ୍ଗ୍ ଲେକେ ଆମାଟ୍। ପାପ୍ ବିଷୟରେ ପୁନ୍ୱି ହିମ୍ଣା ଲେକେ ଆଡ, ମାତର୍ ଇଲେଗ୍ଦି ବିଷୟତିଙ୍ଗ୍ ବୁଜା ଆଦେଙ୍ଗ୍ ଗାଜାକାର୍ଲେକେ ଆଡ। 21 ମୋଶା ଲେକିକିତି ନିୟମ୍ନି ସାସ୍ତର୍ତାକେ ଲେକା ମାନାତ୍ ମାପୃ ଇଲେକେ ୱେଚ୍ନାତା, “ଆନେଙ୍ଗ୍ ନାଲକ୍ ହୁଦାଙ୍ଗ୍ ପୁନ୍ୱିତି ବାଷା ଆରେ ବିନ୍ଦେସ୍ନି କାତାହୁଦାଙ୍ଗ୍ ବେଣ୍ କିନାଙ୍ଗ୍। ମାତର୍ ଏଲେଙ୍ଗ୍ କିତିସ୍ ପା ହେୱାର୍ ନା କାତାତିଙ୍ଗ୍ ୱେନୁର୍।” 22 ଲାଗିଙ୍ଗ୍ ଏପେଙ୍ଗ୍ ପୁଚାଦେର୍ନା ଯେ, ବୁଜାଆୱି ବାଷାତାଙ୍ଗ୍ ବିନ୍ଜାତିନି ମାନାୟାର୍ କାଜିଙ୍ଗ୍ ର ଚିନ୍ଲେକେ। ହେଦାଙ୍ଗ୍ ପାର୍ତି କିନାକାର୍ କାଜିଙ୍ଗ୍ ଆକାୟ୍। ଆରେ ଈଶ୍ୱର ୱେଚ୍ଚି କାତା ବିନ୍ଜାତିନି ମାନାୟାର୍ କାଜିଙ୍ଗ୍ ଆକାୟ୍, ହେଦାଙ୍ଗ୍ ପାର୍ତିକିନି ମାନାୟାର୍ କାଜିଙ୍ଗ୍। 23 ଲାଗିଙ୍ଗ୍ ଆରେ ଯଦି ବିନ୍ଜାତିନି ମାନାୟ୍ କି ଇ ବିଷୟତିଙ୍ଗ୍ ବୁଜାଆୱି ମାନାୟ୍ ମି ମଣ୍ଡ୍ଲିତାକେ ୱାନାର୍ ଆରେ ୱିଜାକାର୍ ବୁଜାଆୱି ବାଷାତାଙ୍ଗ୍ ବେଣ୍ କିନାକା ୱେନାର୍, ହେୱାର୍ ହାତ୍ପା ବାବିକିନାର୍ ଯେ ଏପେଙ୍ଗ୍ ପାଗଲ୍ ଆତାଦେର୍ନା। 24 ମାତର୍ ଯଦି ଏପେଙ୍ଗ୍ ୱିଜାଦେର୍ ଈଶ୍ୱର କାତା ୱେଚ୍ଚି ମାନାଦେର୍, ଆରେ ବିନ୍ଜାତି କି ଇଲେକେ ବିଷୟତିଙ୍ଗ୍ ବୁଜାଆୱି ମାନାୟାର୍ ମି ମଣ୍ଡ୍ଲିତାକେ ୱାନାର୍, ହେୱାର୍ ପାପ୍ କିତାର୍ନା ଇଞ୍ଜି ପୁଞ୍ଜେଙ୍ଗ୍ ଆଡ୍ନାର୍ ଆରେ ଏପେଙ୍ଗ୍ ୱେଚ୍ଚି ଅନୁସାରେ ହେୱାରିଙ୍ଗ୍ ବିଚାର୍ ଆନାତ୍। 25 ହେୱାର୍ ୱେଚି ପାଚେ ହେୱାର୍ ଇନେରିଙ୍ଗ୍ ୱେଚ୍ୱିତି ଚିନ୍ତାତିଙ୍ଗ୍ ପୁନ୍ୟା ଆନାତ୍, ଆରେ ହେୱାର୍ ମେଣ୍ଡାଙ୍ଗ୍ କୁନ୍ଦିକିଜି ଈଶ୍ୱରତିଙ୍ଗ୍ ହେବା କିନାର୍, ହେୱାର୍ ୱେଚ୍ନାର୍ ଯେ ଈଶ୍ୱର ହାତ୍ପା ମି ବିତ୍ରେ ମାନାନ୍। ମଣ୍ଡ୍ଲିତାକେ ଶାନ୍ତିତାଙ୍ଗ୍ ମାନି ଦର୍କାର୍ 26 ଲାଗିଙ୍ଗ୍ ଏ ଟଣ୍ଡାର୍କାଦେର୍, ଏପେଙ୍ଗ୍ ମଣ୍ଡ୍ଲିତାକେ ରୁଣ୍ଡା ଆତିହିଙ୍ଗ୍ ଇଲେକେ କିୟାଟ୍। ରକାନ୍ କେର୍କଣ୍ କେରେନ୍, ରକାନ୍ ହିକ୍ଷା ହିୟେନ୍, ରକାନ୍ ଈଶ୍ୱର କାତାତିଙ୍ଗ୍ ୱେଚେନ୍, ରକାନ୍ ବୁଜାଆୱି ବାଷା ଇନାନ୍ ଆରେ ରକାନ୍ ହେ ବାଷାନି ଅର୍ତତିଙ୍ଗ୍ ବୁଜାୟ୍ କିଏନ୍। ମାତର୍ ଏପେଙ୍ଗ୍ ଇନାକା ୱିଜୁ କିନାଦେର୍ ହେଦାଙ୍ଗ୍ ମିଙ୍ଗେଙ୍ଗ୍ ଈଶ୍ୱରତିଙ୍ଗ୍ ଆଦିକ୍ ପାର୍ତିକିନି କାଜିଙ୍ଗ୍ ସାଇଜ କିଦ୍ନି ଦର୍କାର୍। 27 ମି ବିତ୍ରେତାଙ୍ଗ୍ ରିୟାର୍ କି ତିନ୍ଜାଣ୍ ନେ ବୁଜାଆୱି ବାଷା ୱେଚ୍ନି ଦର୍କାର୍। ହେୱାର୍ ପାଚେ ରୱାନ୍ ବୁଜାଆୱି ବାଷା ୱେଚ୍ନି ଦର୍କାର୍ ଆରେ ଇନେର୍ ପା ହେୱାର୍ ୱେଚ୍ଚି କାତାନି ଅର୍ତତିଙ୍ଗ୍ ବୁଜାୟ୍ କିନି ଦର୍କାର୍। 28 ମାତର୍ ଯଦି ହେୱାର୍ ୱେଚ୍ଚି କାତାତିଙ୍ଗ୍ ବୁଜାୟ୍ କିଜି ୱେଚ୍ନାକାର୍ ହିଲ୍ଗୁର୍, ଲାଗିଙ୍ଗ୍ ହେୱାର୍ ମଣ୍ଡ୍ଲିତାକେ ଚିମ୍ରା ଆଜି ମାନି ଦର୍କାର୍ ଆରେ ଜାର୍-ଜାର୍ କାଜିଙ୍ଗ୍ ହେ ବୁଜାଆୱି ବାଷା ହୁଦାଙ୍ଗ୍ ଈଶ୍ୱର ହୁଦାଙ୍ଗ୍ ବେଣ୍ କିଏର୍। 29 ହେୱାର୍ତାଙ୍ଗ୍ ରିୟାର୍ କି ତିନ୍ଜାଣ୍ ନେ ଈଶ୍ୱର କାତା ୱେଚେର୍, ଆରେ ଜେକନିକାର୍ ହେୱାର୍ ୱେଚ୍ଚି କାତାତିଙ୍ଗ୍ ଜାଗ୍ରତ୍ ହୁଦାଙ୍ଗ୍ ପରିକ୍ଷା କିଏର୍। 30 ମାତର୍ ଇନେର୍ ଯଦି ଈଶ୍ୱର କାତା ୱେଚ୍ନାନା ଆରେ ଜେକନିକାନ୍ ମାପୃତାଙ୍ଗ୍ ହାର୍ଦିକାବୁର୍ ପାୟାଆନାନା, ଲାଗିଙ୍ଗ୍ ଇମ୍ଣାକାନ୍ ବେଣ୍ କିନାନା ହେୱାନ୍ ଚିମ୍ରା ଆନି ଦର୍କାର୍। 31 ହେଲେକେ ଏଚେଜାଣ୍ ଈଶ୍ୱର କାତା ୱେଚ୍ନାରା ରଞ୍ଜାଙ୍ଗ୍ ପାଚେ ରଞ୍ଜାଙ୍ଗ୍ ୱେଚ୍ନି ଦର୍କାର୍, ଲାଗିଙ୍ଗ୍ ୱିଜାର୍ ମାନାୟାର୍ ୱେନାର୍ ଆରେ ସାସ୍ ଆନାର୍। 32 ଏପେଙ୍ଗ୍ ମନେ ଇଟାଟ୍ ଯେ, ଇମ୍ଣାକାର୍ ଈଶ୍ୱର କାତା ୱେଚ୍ନାର୍ ହେୱାର୍ ୱେଚେର୍ କି ୱେଚ୍ମେର୍ ହେୱାର୍ ଜାର୍ ଆତ୍ମାନି କଣ୍ଟ୍ରୁଲ୍ତାଙ୍ଗ୍ ମାନ୍ଗାନାର୍। 33 ଇନେସ୍କି ଈଶ୍ୱର କଲ୍-କଲ୍ ଆନି ଈଶ୍ୱର ଆକାୟ୍, ମାତର୍ ଶାନ୍ତିନି ଈଶ୍ୱର, ଇନେସ୍ ୱିଜୁ ଈଶ୍ୱରନି ମଣ୍ଡ୍ଲିନି ମାନାୟାର୍ ପବିତ୍ର। 34 ମୋଶା ଲେକିକିତି ନିୟମ୍ନି ସାସ୍ତର୍ ଇଲେକେ ୱେଚ୍ନାତା, କଗ୍ଲେକ୍ କାତା ଆଜ୍ଞା ମାନିକିଜି ମାନି ଦର୍କାର୍। ହେୱେକ୍ ମଣ୍ଡ୍ଲିତାକେ ଚିମ୍ରା ଆଜି ମାନି ଦର୍କାର୍ ଆରେ ହେୱେକ୍ ମଣ୍ଡ୍ଲିତାକେ ବେଣ୍ କିନାକା ଟିକ୍ ଆକାୟ୍। 35 ଯଦି ହେ କଗ୍ଲେକାଙ୍ଗ୍ ଇନା ପ୍ରଶ୍ନ ମାନ୍ଗାନାତ୍, ଲାଗିଙ୍ଗ୍ ଇଞ୍ଜ ହାଚି ପାଚେ ଜାର୍-ଜାର୍ ଡକ୍ରାହିରିଙ୍ଗ୍ ୱେନ୍ବିନି ଦର୍କାର୍, ଇନେସ୍କି କଗ୍ଲେକ୍ ମଣ୍ଡ୍ଲିତାକେ ବେଣ୍ କିନାକା ଟିକ୍ ବିଷୟ୍ ଆକାୟ୍। 36 ଏପେଙ୍ଗ୍ ଇଲେକେ ବାବିକିମାଟ୍ ଯେ ଈଶ୍ୱର କାତା ମି ମଣ୍ଡ୍ଲିତାଙ୍ଗ୍ ଆରମ୍ ଆତାତ୍ନା। ଆରେ ଏପେଙ୍ଗ୍ ନେ ପାୟା ଆତାଦେର୍ନା। 37 ଏପେଙ୍ଗ୍ ଯଦି ଜାର୍ତିଙ୍ଗ୍ ଭବିଷ୍ଯତବକ୍ତା ଇଞ୍ଜି ୱେଚ୍ନାଦେର୍, ଆରେ ପବିତ୍ର ଆତ୍ମା ଦାନ୍ ହିତ୍ତାନ୍ନା ବାବିକିନାଦେରା, ଲାଗିଙ୍ଗ୍ ଏପେଙ୍ଗ୍ ପୁନି ଦର୍କାର୍ ଯେ ଆନେଙ୍ଗ୍ ଇମ୍ଣି ୱିଜୁ ଆଦେସ୍ ୱେଚ୍ନାଙ୍ଗା ହେଦାଙ୍ଗ୍ ମାପୃତାଙ୍ଗ୍ ୱାତାତ୍ନା। 38 ମାତର୍ ଆନେଙ୍ଗ୍ ୱେଚ୍ଚି କାତାତିଙ୍ଗ୍ ପାର୍ତି କିଉଦେର୍, ଲାଗିଙ୍ଗ୍ ମାନାୟାର୍ କାତାତିଙ୍ଗ୍ ପା ପାର୍ତି କିମାଟ୍। 39 ଲାଗିଙ୍ଗ୍ ଏ ନା ଲାଡ୍ନି ଟଣ୍ଡାର୍କାଦେର୍, ଈଶ୍ୱର କାତା ୱେଚ୍ଚେଙ୍ଗ୍ ଗରବ୍ତାଙ୍ଗ୍ ଇଚା କିୟାଟ୍ ଆରେ ଈଶ୍ୱର ଦାନ୍ ବୁଜାଆୱି ବାଷାତିଙ୍ଗ୍ ପା ୱେଚାଟ୍। 40 ମାତର୍ ମଣ୍ଡ୍ଲିତାକେ ଏପେଙ୍ଗ୍ ଇନାକା ୱିଜୁ କିନାଦେର୍ ହେଦାଙ୍ଗ୍ ଟିକ୍ ବାବ୍ରେ ଆରେ କଲ୍-କଲ୍ ଆୱାଦାଙ୍ଗ୍ କିୟାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation