୧ କରନ୍ତିୟ 13 - New Testament in Pengo Parja Languageଲାଡ୍କିନି ବିଷୟ 1 ଆନେଙ୍ଗ୍ ଯଦି ଜେକନିକାରିଙ୍ଗ୍ ଲାଡ୍ କିଉଙ୍ଗ୍, ସରଗ୍ନି ଦୁତ୍ କି ପୁର୍ତିତାକେ ମାନି ମାନାୟାର୍ ବାଷା ୱେଚ୍ଚିସ୍ ଇନା ଲାବ୍ ଆକାୟ୍। ହେଦାଙ୍ଗ୍ ମର୍ଦଲ୍ ଆରେ ଗିନି ଇସ୍ତିସ୍ ଇନେସ୍ ସାଉଣ୍ଡ୍ ଆନାକା ଇନେସ୍ ବେକାର୍, ହେଲେକେ ମି ବେଣ୍ ପା ଇନା ମୁଲ୍ଯ ଆକାୟ୍। 2 ଆରେ ଯଦି ଆନେଙ୍ଗ୍, ଈଶ୍ୱର କାତାତିଙ୍ଗ୍ ବୁଜାୟ୍ କିନି ଶାକ୍ତି ମାନାତ୍, ଆରେ ଈଶ୍ୱର ଡ଼ୁକ୍ତି ଉପାୟ୍ ବିଷୟତିଙ୍ଗ୍ ପୁନ୍ଞ୍ଜି ମାଚିସ୍ ପା, ମାତର୍ ଜେକନିକାରିଙ୍ଗ୍ ଲାଡ୍ କିୱିତିସ୍ ଇନା ଲାବ୍ ଆକାୟ୍। ଆରେ ନା ପାର୍ତି ଇଲେକେ ମାଚିସ୍ ପା, ଯଦି ଆନେଙ୍ଗ୍ ମାଡ଼ିତିଙ୍ଗ୍ ଇବେତାଙ୍ଗ୍ ହାବେ ଗୁଚାୟ୍ କିଦେଙ୍ଗ୍ ଆଡ଼୍ତିସ୍, ଆରେ ଆନେଙ୍ଗ୍ ଜେକନିକାରିଙ୍ଗ୍ ଲାଡ୍ କିୱିତିସ୍ ନାଦି ଇନା ମୁଲ୍ଯ ଆକାୟ୍। 3 ଯଦି ଆନେଙ୍ଗ୍ ନାସ୍କି ନିକାରିଙ୍ଗ୍ ନା ଦନ୍ ସମ୍ପତି ହିନାଙ୍ଗ୍, ଆରେ ଯଦି ଆନେଙ୍ଗ୍ ନା ଗାଗାଡ଼୍ତିଙ୍ଗ୍ କାଡିକିଦେଙ୍ଗ୍ ହିନାଙ୍ଗ୍, ହେ ବିଷୟ କାଜିଙ୍ଗ୍ ଆନେଙ୍ଗ୍ ବାଟ୍ପାଣ୍ ଆନାଙ୍ଗ୍। ମାତର୍ ଯଦି ଜେକନିକାରିଙ୍ଗ୍ ଲାଡ୍ କିଉଙ୍ଗ୍ ଇ ୱିଜୁ ନା କାଜିଙ୍ଗ୍ ଇନା ମୁଲ୍ୟ ଆକାୟ୍। 4 ଇମ୍ଣାକାର୍ ଜେକନିକାରିଙ୍ଗ୍ ଲାଡ୍ କିନାର୍, ହେୱାର୍ ୱିଜୁ ବିଷୟତିଙ୍ଗ୍ ସାମ୍ୱାଲି କିନାର୍ ଆରେ ୱିଜାକାରିଙ୍ଗ୍ ଦୟା କିନାର୍। ହେୱାର୍ ଆକାର୍ ଆଉର୍, ହେୱାର୍ ବାଟ୍ପାଣ୍ ଆଉର୍ ଆରେ ମାନ୍ ଗାର୍ବିୟା ଆଉର୍, ହେୱାର୍ ଜେକନିକାରିଙ୍ଗ୍ କରାପ୍ ବ୍ୟବହାର୍ କିଉର୍। 5 ହେୱାର୍ ଲବ୍ରା ଆଉର୍, ରିସା ଆଉର୍ ଆରେ ଆଗେ କିତି କରାପ୍ କାମାୟ୍ନି ଇସାବ୍ ଇଟୁର୍। ହେୱାର୍ ବିରଦ୍ତାକେ ଇନେର୍ ପା ପାପ୍ କିତିସ୍ ହେୱାର୍ ବେଗି କେମା କିନାର୍। 6 ମାନାୟାର୍ ଅଦରମ୍ କାମାୟ୍ କିତିସ୍ ହେୱାର୍ ୱାରି ଆଉର୍, ମାତର୍ ମାନାୟାର୍ ସତ୍ କାମାୟ୍ କିତିସ୍ ୱାରି ଆନାର୍। 7 ଇମ୍ଣାକାର୍ ସତ୍ ଲାଡ୍ କିନାରା, ହେୱାର୍ ୱିଜୁଦିନ୍ ସମ୍ବାଲି କିନାର୍, ହେୱାର୍ ପାର୍ତି ଇନାୱେଡ଼ାଙ୍ଗ୍ ଉଣା ଆଉତ୍, ହେୱାର୍ ୱିଜୁଦିନ୍ ଈଶ୍ୱରତାକେ ଆହା ଇଟ୍ନାର୍ ଆରେ ଇମ୍ଣି ପର୍କାର୍ ପରିସ୍ତିତି ମାଚିସ୍ ପା ସମ୍ବାଲି କିନାର୍। 8 ଲାଡ୍ ଇନାୱେଡ଼ାଙ୍ଗ୍ ପା ୱିଜୁତ୍, ମାତର୍ ଈଶ୍ୱର କାତା ୱେଚ୍ନି-ୱେଚ୍ନି ଦାନ୍, ପୁନ୍ୱିତି ବାଷାତାକେ ୱେଚ୍ନି ଦାନ୍ ଆରେ ଈଶ୍ୱର ବିଷୟରେ ବେସି ପୁନି ଜ୍ଞାନ୍ ସେସ୍ ଆନାତ୍। 9-10 ଇନେସ୍କି ଜ୍ଞାନ୍ ପାୟାଆନି ଦାନ୍ ଆରେ ଈଶ୍ୱର କାତା ୱେଚ୍ନି ଶାକ୍ତିନି ଦାନ୍ ଅଲପ୍ ପାୟାଆତାପ୍ନା, ମାତର୍ ଏଚେକାଡ଼୍ଦ ପୁରା ପାୟାଆନାପ୍ ଆରେ ଟିକ୍ ବାବ୍ରେ ୱାନାତ୍, ଲାଗିଙ୍ଗ୍ ହେ ଟିକ୍ ହିଲିତି ଦାନ୍ ଆରେ ମାନ୍ଗୁତ୍। 11 ହେଦାଙ୍ଗ୍ କାଜିଙ୍ଗ୍ ଇଲେକେ ଯେ, ଆନେଙ୍ଗ୍ ଏଚେପାଦ୍ନା ହିରୁକାଙ୍ଗ୍ ମାଚାଙ୍ଗ୍, ହିରୁ ହିମ୍ଣାଙ୍ଗ୍ ଲେକେ କାତା ୱେଚ୍ଚି ମାଚାଙ୍ଗ୍, ମାନ୍ତି କାତା, ଆରେ ହିରୁ ହିମ୍ଣା ଲେକେ ବାବିକିଜି ମାଚାଙ୍ଗ୍। ମାତର୍ ଆନେଙ୍ଗ୍ ଏଚେପାଦ୍ନା ଗାଜାକାଙ୍ଗ୍ ଆତାଙ୍ଗ୍, ହିରୁ ହିମ୍ଣା ଲେକେ ବ୍ଯବହାର୍ କିୱାଦାଙ୍ଗ୍ ଗାଜାକାନ୍ଲେକେ ବ୍ଯବହାର୍ କିତାଙ୍ଗ୍। 12 ଆରେ ହେଦାଙ୍ଗ୍ ଆସେଙ୍ଗ୍ ପାର୍ତିକିନାର୍ କାଜିଙ୍ଗ୍ ହାମାନ୍, ଇନେସ୍କି ର ମାନାୟ୍ ବାନ୍ଯା ଦାର୍ପାଣ୍ତାକେ ତା ମୁର୍ତି ହୁଡ଼୍ତି ଲେକେ ଆସେଙ୍ଗ୍ ଆତାସ୍ନା। ଇନେସ୍କି ଆସେଙ୍ଗ୍ ୱିଜୁ ବିଷୟରେ ନଙ୍ଗୟ୍ ପାତେକ୍ ପୁନୁସେ, ଏଚେପାଦ୍ନା ଆସେଙ୍ଗ୍ ଈଶ୍ୱର ହୁଦାଙ୍ଗ୍ ହାରାମୁମ୍ ଆନାସ୍, ହେପାଦ୍ନା ଆସେଙ୍ଗ୍ ୱିଜୁ ବିଷୟ କିଲେର୍ କିଜି ବୁଜା ଆଦେଙ୍ଗ୍ ଆଡ୍ନାସ୍। ନଙ୍ଗୟ୍ ନାବେ ଈଶ୍ୱରତି ଜ୍ଞାନ୍ ଉଣା ମାନାତ୍, ମାତର୍ ଦିନ୍ ୱାନାତ୍ ଈଶ୍ୱର ନାଙ୍ଗେଙ୍ଗ୍ ଇନେସ୍ ହାର୍ କିଜି ପୁନ୍ଞ୍ଚାନ୍ନା ହେଲେକେ ଆନାଙ୍ଗ୍ ପା ହେୱାନିଙ୍ଗ୍ ପୁନାଙ୍ଗ୍। 13 ଲାଗିଙ୍ଗ୍ ଇ ତିନ୍ଗଟା ଜିନିଷ୍ ଆସେଙ୍ଗ୍ କିନି ଦର୍କାର୍। ଈଶ୍ୱରତିଙ୍ଗ୍ ପାର୍ତି କିନାକା, ତା ପାର୍ମାଣ୍ତିଙ୍ଗ୍ ଆହା ଇଡ଼୍ତାକା ଆରେ ଜେକନିକାରିଙ୍ଗ୍ ଲାଡ୍ କିନାକା। ଇ ତିନ୍ଗଟା ଜିନିଷ୍ ବିତ୍ରେତାଙ୍ଗ୍ ଜେକନିକାରିଙ୍ଗ୍ ଲାଡ୍ କିନାକା ଗାଜା ବିଷୟ। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation