୧ କରନ୍ତିୟ 12 - New Testament in Pengo Parja Languageନାଙ୍ଗେଙ୍ଗ୍ ପବିତ୍ର ଆତ୍ମା ହିଦ୍ନାନ୍ 1 ଏ ଟଣ୍ଡାର୍କାଦେର୍, ମିଙ୍ଗେଙ୍ଗ୍ ପବିତ୍ର ଆତ୍ମାନି ଦାନ୍ ବିଷୟରେ କିଲେର୍ ବାବ୍ରେ ବୁଜାୟ୍ କିଦ୍ଦେଙ୍ଗ୍ ଇଚା କିନାଙ୍ଗା। 2 ଏପେଙ୍ଗ୍ ଖ୍ରୀଷ୍ଟାନ୍ ଆୱି ଆଗେ ପୁନ୍ଞ୍ଜି ମାଚାଦେର୍ ଯେ, ଏପେଙ୍ଗ୍ ବେଣ୍କିଦେଙ୍ଗ୍ ଆଡ୍ୱି ମୁର୍ତିକାଙ୍ଗ୍ ହେବା କିଦେଙ୍ଗ୍ ଇନେର୍ ମିଙ୍ଗେଙ୍ଗ୍ ଟକାୟ୍ କିଜି ମାନ୍ଞ୍ଚାନ୍। 3 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଯେ, ଈଶ୍ୱରତାଙ୍ଗ୍ ପବିତ୍ର ଆତ୍ମା ପାୟା ଆତାକାର୍ ଯୀଶୁଙ୍ଗ୍ ଅବିଶାପ୍ ହିଦେଙ୍ଗ୍ ଆଡୁର୍, ଆରେ ପବିତ୍ର ଆତ୍ମାତିଙ୍ଗ୍ ଇନେର୍ ପାୟା ଆୱାତାର୍ମା ହେୱାର୍ ଯୀଶୁଙ୍ଗ୍ ମାପୃ ଇଞ୍ଜି ୱେଚ୍ଚେଙ୍ଗ୍ ଆଡୁର୍। 4 ୱିଜୁ ପର୍କାର୍ ଆତ୍ମାନି ଦାନ୍ ମାନାତ୍, ଆରେ ହେ ୱିଜୁ ଦାନ୍ ପବିତ୍ର ଆତ୍ମା ହିଦ୍ନାତ୍। 5 ଆପେଙ୍ଗ୍ ମାପୃ କାଜିଙ୍ଗ୍ ଅଲ୍ଗା-ଅଲ୍ଗା କାମାୟ୍ କିନାପା, ମାତର୍ ଆପେଙ୍ଗ୍ ହେ ର ମାପୃତିଙ୍ଗ୍ ହେବା କିନାପା। 6 ଈଶ୍ୱର ତା ଶାକ୍ତି ମା ଜିବୁନ୍ତାକେ ୱିଜୁ ପର୍କାର୍ ଉପାୟ୍ କିଜି ଚଚ୍ଚାନାନା, ମାତର୍ ଇଦାଙ୍ଗ୍ ନେ ରଞ୍ଜାଙ୍ଗ୍ ହେ ଈଶ୍ୱର ମା ୱିଜାକାର୍ ଜିବୁନ୍ତାକେ ୱିଜୁ ଜିନିଷ୍ କାମାୟ୍ କିନାନା। 7 ୱିଜୁ ପାର୍ତି କିନାକାରିଙ୍ଗ୍ ସାଇଜ କିନି କାଜିଙ୍ଗ୍ ଈଶ୍ୱର ତା ପବିତ୍ର ଆତ୍ମାନି ଦାନ୍ ହିନାନ୍। 8 ଈଶ୍ୱର ରକାନିଙ୍ଗ୍ ତା ପବିତ୍ର ଆତ୍ମା ବୁଦିନି କାତା ୱେଚ୍ଚେଙ୍ଗ୍ ହିତାନ୍ନା, ଆରେ ହେ ଈଶ୍ୱର ରକାନିଙ୍ଗ୍ ତା ପବିତ୍ର ଆତ୍ମା ଜେକନିକାନିଙ୍ଗ୍ ଜ୍ଞାନ୍ନି କାତା ୱେଚ୍ନି କାଜିଙ୍ଗ୍ ଶାକ୍ତି ହିନାନ୍। 9 ଈଶ୍ୱର ରକାନିଙ୍ଗ୍ ତା ପବିତ୍ର ଆତ୍ମା ଆଦିକ୍ ପାର୍ତିକିନି ଶାକ୍ତି ହିତାନ୍ନା, ଆରେ ହେ ଈଶ୍ୱର ରକାନିଙ୍ଗ୍ ତା ପବିତ୍ର ଆତ୍ମା ଜେକନିକାର୍ ରଗ୍ତିଙ୍ଗ୍ ହାର୍କିନି ଶାକ୍ତି ହିତାତ୍ନା। 10 ଈଶ୍ୱର ରକାନିଙ୍ଗ୍ ତା ପବିତ୍ର ଆତ୍ମା ଚାନିଆଆନି କାମାୟ୍ କିନି ଶାକ୍ତି ହିତାନ୍ନା, ଆରେ ହେ ଈଶ୍ୱର ରକାନିଙ୍ଗ୍ ତା ପବିତ୍ର ଆତ୍ମା ଜେକନିକାନିଙ୍ଗ୍ ଈଶ୍ୱରତି କାତା ୱେଚ୍ଚେଙ୍ଗ୍ ଶାକ୍ତି ହିତାତ୍ନା। ହେ ପବିତ୍ର ଆତ୍ମା ଜେକନିକାରିଙ୍ଗ୍ ଈଶ୍ୱର ତା ପବିତ୍ର ଆତ୍ମା ପାୟାଆତାନ୍ନା କି, ଶୟତାନନି ଆତ୍ମା ପାୟା ଇଞ୍ଜି ପୁଞ୍ଜେଙ୍ଗ୍ ଶାକ୍ତି ହିନାନ୍। ଆରେ ପା ଜେକନିକାରିଙ୍ଗ୍ ପୁନ୍ୱି ବାଷାତିଙ୍ଗ୍ ପୁଞ୍ଜେଙ୍ଗ୍ ଶାକ୍ତି ହିନାନ୍, ଆରେ ଜେକନିକାରିଙ୍ଗ୍ ୱେଚ୍ଚି କାତାତିଙ୍ଗ୍ ଅର୍ତ ବୁଜାୟ୍ କିଦେଙ୍ଗ୍ ଶାକ୍ତି ହିତାନ୍। 11 ଇ ୱିଜୁ ପର୍କାର୍ ଦାନ୍ ପବିତ୍ର ଆତ୍ମା ତା ଇଚା ଅନୁସାରେ ୱିଜାରିଙ୍ଗ୍ ହିନାତା। ର ଗାଗାଡ଼୍ ଆରେ ଗାଗାଡ଼୍ନି ବେସି ଜିନିଷ୍ 12 ମାନାୟ୍ତିଙ୍ଗ୍ ର ଗାଗାଡ଼୍ ଆରେ ବେସି ଜିନିଷ୍ ମାନାତ୍, ମାତର୍ ଗାଗାଡ଼୍ନି ୱିଜୁ ଜିନିଷ୍ କାଜିଙ୍ଗ୍ ନେ ର ଗାଗାଡ଼୍ ଆନାତ୍। ଲାଗିଙ୍ଗ୍ ଇଦାଙ୍ଗ୍ ନେ ହେଲେକେ ଖ୍ରୀଷ୍ଟ ଆରେ ତାଙ୍ଗେଙ୍ଗ୍ ପାର୍ତିକିନି ମାନାୟାର୍ ହୁଦାଙ୍ଗ୍ ହାମାନ୍ ଆନାତ୍। 13 ଲାଗିଙ୍ଗ୍ ଆସେଙ୍ଗ୍ ଯିହୁଦି ଆଜି ମାଚିସ୍ କି, ବିନ୍ଜାତି ଆଜି ମାଚିସ୍ କି, ଚାକର୍ ଆଜି ମାଚିସ୍ କି, ଆରେ ଚାକର୍ ଆୱାଦାଙ୍ଗ୍ ମାଚିସ୍ ପା ଆସେଙ୍ଗ୍ ୱିଜାକାସ୍ ର ଆତ୍ମା କାଜିଙ୍ଗ୍ ଡୁବନ୍ ଅଜି ଈଶ୍ୱର ଗାଗାଡ଼୍ତାକେ ଏକ୍ ଆତାପ୍ନା, ଆରେ ଆପେଙ୍ଗ୍ ହେ ଆତ୍ମାତିଙ୍ଗ୍ ନେ ପାୟାଆତାପ୍ନା। 14 ଇନେସ୍କି ଗାଗାଡ଼୍ ରଞ୍ଜାଙ୍ଗ୍, ମାତର୍ ତା ଗାଗାଡ଼୍ତାକେ ବେସି ଜିନିଷ୍ ମାନାତ୍। 15 ଯଦି କାଲ୍ପାନା ୱେଚ୍ନାତ୍, ଆନେଙ୍ଗ୍ କେଇ ଆକାୟ୍, ଇନେସ୍କି ଆନେଙ୍ଗ୍ ଗାଗାଡ଼୍ନି ଜିନିଷ୍ ଆକାୟ୍, ଲାଗିଙ୍ଗ୍ ହେ କାଲ୍ପାନା ହେଲେକେ ୱେଚ୍ଚିସ୍ପା ହେଦାଙ୍ଗ୍ ଗାଗାଡ଼୍ନି ର ଜିନିଷ୍। 16 ଯଦି କିତୁଲ୍ ୱେଚ୍ନାତ୍, ଆନେଙ୍ଗ୍ କାଣ୍କୁ ଆକାୟ୍, ଇନେସ୍କି ଆନେଙ୍ଗ୍ ଗାଗାଡ଼୍ନି ର ଜିନିଷ୍ ଆକାୟ୍, ଲାଗିଙ୍ଗ୍ ହେ କିତୁଲ୍ ହେଲେକେ ୱେଚ୍ଚିସ୍ପା ହେଦାଙ୍ଗ୍ ଗାଗାଡ଼୍ନି ର ଜିନିଷ୍। 17 ଯଦି ର ଗାଗାଡ଼୍ତ ୱିଜୁ ନିପଣ୍ କାଣ୍କୁ ମାନିକ୍, ଲାଗିଙ୍ଗ୍ ହେୱାନ୍ ଇନେସ୍ କିଜି ୱେନାନ୍? ଆରେ ଯଦି ମି ଗାଗାଡ଼୍ତ ଗାଜା କିତୁଲ୍ ମାନ୍ଙ୍ଗାନାତ୍, ଲାଗିଙ୍ଗ୍ ଏପେଙ୍ଗ୍ ଇନେସ୍ କିଜି ବାସ୍ନା ମୁଞ୍ଜ୍ନାଦେର୍? 18 ମାତର୍ ଈଶ୍ୱର ମା ଗାଗାଡ଼୍ତାକେ ବେସି ଜିନିଷ୍ ରସ୍ତାନ୍ନା ଆରେ ହେୱାନ୍ ତା ଇଚା ଅନୁସାରେ ଗାଗାଡ଼୍ତାକେ ଜିନିଷ୍ତିଙ୍ଗ୍ ଟିକ୍ ବାହାତାକେ ଜଡ଼ାୟ୍ କିତାନ୍ନା। 19 ଆରେ ଯଦି ଗାଗାଡ଼୍, ଗାଗାଡ଼୍ନି ର ଜିନିଷ୍ ଆତାତ୍ମା, ଲାଗିଙ୍ଗ୍ ଆରେ ଗାଗାଡ଼୍ ମାନ୍ୱାତାତ୍ମା। 20 ହେଦାଙ୍ଗ୍ କାଜିଙ୍ଗ୍ ବେସି ଜିନିଷ୍ ମାନାତ୍, ମାତର୍ ର ଗାଗାଡ଼୍। 21 କାଣ୍ଙ୍ଗା ଇନାୱେଡ଼ାଙ୍ଗ୍ ପା କେଇଦିଙ୍ଗ୍ ୱେଚୁତ୍, “ଏନେଙ୍ଗ୍ ନାଙ୍ଗେଙ୍ଗ୍ ଦର୍କାର୍ ଆକାୟ୍।” ଆରେ କାପ୍ଡ଼ା ପାନାତିଙ୍ଗ୍ ଇଞ୍ଜେଙ୍ଗ୍ ଆଡୁତ୍ ଏନେଙ୍ଗ୍ ନାଙ୍ଗେଙ୍ଗ୍ ଦର୍କାର୍ ଆକାୟ୍। 22 ମାତର୍ ଗାଗାଡ଼୍ନି ଇମ୍ଣି ଜିନିଷ୍ ଦୁର୍ବଲ୍ ଲେକେ ଚଞ୍ଜ୍ନାତ୍ ଆରେ ମୁକ୍ଯ ଇଞ୍ଜି ବାବିକିଉତ୍ ହେଦାଙ୍ଗ୍ ନେ ବେସି ଗାଗାଡ଼୍ତିଙ୍ଗ୍ ଦର୍କାର୍ଆନି ଜିନିଷ୍। 23 ଆରେ ଇମ୍ଣି ଗାଗାଡ଼୍ନି ଜିନିଷ୍ତିଙ୍ଗ୍ ମୁକ୍ଯ ଇଞ୍ଜି ବାବିକିଉରା ହେଦିଲିଙ୍ଗ୍ ନେ ଆସେଙ୍ଗ୍ ଆଦିକ୍ ଜାଗ୍ରତ୍ ହୁଦାଙ୍ଗ୍ ଜାତୁନ୍ ଅନାସା। ଆରେ ଆସେଙ୍ଗ୍ ହେ ଗାଗାଡ଼୍ନି ଜିନିଷ୍ତିଙ୍ଗ୍ ମାନାୟାର୍ ହୁଡ଼୍ଦେମେର୍ ଇଞ୍ଜି ଜାଗ୍ରତ୍ କିଜି ହେନ୍ଦ୍ରା ଉସ୍ପାନାସା। 24 ମାତର୍ ଆସେଙ୍ଗ୍ ଇମ୍ଣି ଗାଗାଡ଼୍ନି ଜିନିଷ୍ତିଙ୍ଗ୍ ଆଦିକ୍ ସନ୍ମାନ୍ ହିନାସା, ହେଦିଲିଙ୍ଗ୍ ଆଦିକ୍ ଜାତୁନ୍ କିନି ଦର୍କାର୍ ଆକାୟ୍। ଇନେସ୍କି ଆଦିକ୍ ସନ୍ମାନ୍ ହିଦ୍ନି ଗାଗାଡ଼୍ନି ଜିନିଷ୍ ଆରେ ଇମ୍ଣି ଗାଗାଡ଼୍ନି ଜିନିଷ୍ତିଙ୍ଗ୍ ମୁକ୍ଯ ଇଞ୍ଜି ବାବିକିଉସା ଈଶ୍ୱର ହେଦାଙ୍ଗ୍ ର ଗାଗାଡ଼୍ତାକେ ଜଡ଼ାୟ୍ କିତାନ୍ନା। 25 ଈଶ୍ୱର ଇଲେକେ କିତାନ୍, ଇନେସ୍କି ଗାଗାଡ଼୍ନି ଜିନିଷ୍ ହେୱାର୍ ବିତ୍ରେ ଜିକାଟାଣା ଆମେର୍, ଲାଗିଙ୍ଗ୍ ହେୱାର୍ ଜାର୍-ଜାର୍ବିତ୍ରେ ଜାତୁନ୍ ଆନାର୍। 26 ଯଦି ଗାଗାଡ଼୍ନି ର ଜିନିଷ୍ ଦୁଃକ୍ ପାୟା ଆନାତା, ଲାଗିଙ୍ଗ୍ ଗାଗାଡ଼୍ନି ୱିଜୁ ଜିନିଷ୍ ପା ଦୁଃକ୍ ପାୟାଆନାତ୍। ଆରେ ଯଦି ଗାଗାଡ଼୍ନି ର ଜିନିଷ୍ ସନ୍ମାନ୍ ପାୟାଆନାତ୍, ଲାଗିଙ୍ଗ୍ ଗାଗାଡ଼୍ନି ୱିଜୁ ଜିନିଷ୍ ପା ୱାରିୟା ଆନିକ୍। 27 ଏପେଙ୍ଗ୍ ନଙ୍ଗୟ୍ ୱିଜାଦେର୍ ଖ୍ରୀଷ୍ଟନି ଗାଗାଡ଼୍ ଆତାଦେର୍ନା, ଆରେ ଏପେଙ୍ଗ୍ ୱିଜାଦେର୍ ଗାଗାଡ଼୍ନି ଜିନିଷ୍ ଲେକେ। 28 ଖ୍ରୀଷ୍ଟତି ମଣ୍ଡ୍ଲିତାକେ ଈଶ୍ୱର ମାଙ୍ଗେଙ୍ଗ୍ ବିନ୍ବିନ୍ କାମାୟ୍ନି ଦାୟିତ୍ପ ହିତ୍ତାନ୍ନା। ହେୱାନ୍ ମଣ୍ଡ୍ଲିତାକେ ପାର୍ତୁମ୍ କେତ୍ଜାଣ୍ତିଙ୍ଗ୍ ତା ବାଚିକିତି ଚେଲା ଆଦେଙ୍ଗ୍ ବାଚି କିତାନ୍ନା। କେତ୍ଜାଣ୍ତିଙ୍ଗ୍ ଭବିଷ୍ଯତବକ୍ତାର୍ କିଜି ବାଚି କିତାନ୍ନା, କେତ୍ଜାଣ୍ତିଙ୍ଗ୍ ମାଷ୍ଟେର୍ ଆଦେଙ୍ଗ୍ ବାଚି କିତାନ୍ନା, ଚାନିଆଆନି କାମାୟ୍ କିଦେଙ୍ଗ୍ ଆଦିକାର୍ ହିତାନ୍ନା, କେତ୍ଜାଣ୍ତିଙ୍ଗ୍ ରଗ୍ ହାର୍କିନି ଅଦିକାର୍ ହିତାନ୍ନା, କେତ୍ଜାଣ୍ତିଙ୍ଗ୍ ଜେକନିକାରିଙ୍ଗ୍ ସାଇଜ କିନି କାଜିଙ୍ଗ୍ ଶାକ୍ତି ହିତାନ୍ନା। ଆରେ କେତ୍ଜାଣ୍ତିଙ୍ଗ୍ ନେତା କିତାନ୍ନା ଆରେ କେତ୍ଜାଣ୍ତିଙ୍ଗ୍ ପବିତ୍ର ଆତ୍ମା ସାଇଜତାଙ୍ଗ୍ ପୁନ୍ୱିତି ବିନ୍ବିନ୍ ବାଷା ୱେଚ୍ଚେଙ୍ଗ୍ ଶାକ୍ତି ହିତାନ୍ନା। 29 ହେୱାନ୍ ୱିଜାରିଙ୍ଗ୍ ତା ବାଚିକିତି ଚେଲା ଆଦେଙ୍ଗ୍ ବାଚି କିୱାତାନ୍ନା, ୱିଜାରିଙ୍ଗ୍ ଭବିଷ୍ଯତବକ୍ତାକିଜି ବାଚି କିୱାତାନ୍ନା, ୱିଜାରିଙ୍ଗ୍ ମାଷ୍ଟେର୍ ଆଦେଙ୍ଗ୍ ବାଚି କିୱାତାନ୍ନା, ୱିଜାରିଙ୍ଗ୍ ଚାନିଆଆନି କାମାୟ୍ କିଦେଙ୍ଗ୍ ହିୱାତାନ୍ନା। 30 ଆରେ ହେୱାନ୍ ୱିଜାରିଙ୍ଗ୍ ରଗ୍ତିଙ୍ଗ୍ ହାର୍କିଦେଙ୍ଗ୍ ହିୱାତାନ୍ନା, ୱିଜାରିଙ୍ଗ୍ ପୁନ୍ୱିତି ବାଷାତିଙ୍ଗ୍ ଇଞ୍ଜେଙ୍ଗ୍ ହିୱାତାନ୍ନା ଆରେ ୱିଜାରିଙ୍ଗ୍ ପୁନ୍ୱିତି ବାଷାନି ଅର୍ତତିଙ୍ଗ୍ ବୁଜାୟ୍ କିନି ଶାକ୍ତି ହିୱାତାନ୍ନା। 31 ମାତର୍ ଏପେଙ୍ଗ୍ ୱିଜୁତାଙ୍ଗ୍ ଗାଜା ଦାନ୍ ପାୟା ଆଦେଙ୍ଗ୍ ଉପାୟ୍ କିୟାଟ୍, ଆରେ ହେ ଗାଜା ଦାନ୍ ବିଷୟରେ ୱେଚ୍ଚେଦେଙ୍ଗ୍ ଇଚା କିନାଙ୍ଗା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation