୧ କରନ୍ତିୟ 11 - New Testament in Pengo Parja Language1 ଆନେଙ୍ଗ୍ ଇନେସ୍ ଖ୍ରୀଷ୍ଟଙ୍ଗ୍ ହୁଡ଼୍ଜି ହିକାଆତାଙ୍ଗ୍ନା ହେଲେକେ ଏପେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଜି ହିକାଆଡ। କଗ୍ଲେକ୍ ପାର୍ତାନା କିନିହିଙ୍ଗ୍ କାପ୍ଡ଼ାତାକେ ଅଡ୍ଣା ହିଜି କୁଚ୍ନି ଦର୍କାର୍ 2 ଏ ସାଙ୍ଗ କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ଲାଡ୍ କିଦ୍ନାଙ୍ଗା। ଆନେଙ୍ଗ୍ ହିତ୍ତି ୱିଜୁ ଖ୍ରୀଷ୍ଟାନ୍ ହିକ୍ଷାତିଙ୍ଗ୍ ମାନି କିନାଦେରା, ଆରେ ନାଙ୍ଗେଙ୍ଗ୍ ଏପେଙ୍ଗ୍ ୱିଜୁଦିନ୍ ଏତ୍ କିଦ୍ନାଦେରା। 3 ମାତର୍ ଆନେଙ୍ଗ୍ ଆରେ ର ଜିନିଷ୍ ୱେଚ୍ଚେଦେଙ୍ଗ୍ ଇଚା କିଦ୍ନାଙ୍ଗା। ୱିଜୁ ଆଣ୍ଡ୍ରାଙ୍ଗ୍ ଜପି ଖ୍ରୀଷ୍ଟତି ଅଦିକାର୍ ମାନାତ୍, ୱିଜୁ କଗ୍ଲେକ୍ ଜାର୍-ଜାର୍ ଆଣ୍ଡ୍ରାଙ୍ଗ୍ ଜପି ଅଦିକାର୍ ମାନାତ୍, ଆରେ ଖ୍ରୀଷ୍ଟ ଜପି ଈଶ୍ୱରତି ଅଦିକାର୍ ମାନାତ୍। 4 ଇମ୍ଣି ଆଣ୍ଡ୍ରେନ୍ ଯଦି ପାର୍ତାନା କିନିହିଙ୍ଗ୍ କି ଈଶ୍ୱର କାତା ୱେଚ୍ନିହିଙ୍ଗ୍ କାପ୍ଡ଼ାତାକେ ଅଡ୍ଣା ହିନାନ୍, ହେୱାନ୍ ଖ୍ରୀଷ୍ଟଙ୍ଗ୍ ଲାଜ୍ କିନାନା। 5 ମାତର୍ ଯଦି ଇମ୍ଣି କଗ୍ଲେ ପାର୍ତାନା କିନିହିଙ୍ଗ୍ କି ଈଶ୍ୱର କାତା ୱେଚ୍ନିହିଙ୍ଗ୍ କାପ୍ଡ଼ାତାକେ ଅଡ୍ଣା ହିୱିତିସ୍, ହେଦେଲ୍ ତା ଡକ୍ରାହିଙ୍ଗ୍ ଲାଜ୍ ପାଇ କିନାତ୍। ହେଦେଲ୍ ର ମୁଣ୍ଡ୍ରି କଗ୍ଲେ ଲେକେ ଆନାତ୍। 6 ଯଦି ହେ କଗ୍ଲେ କାପ୍ଡ଼ାତାକେ ଅଡ୍ଣା ହିଦେଙ୍ଗ୍ ମୁନା କିନାତ୍, ଲାଗିଙ୍ଗ୍ ତା କାପ୍ଡ଼ା କୁରାଇ କିଆୟେତ୍। ହେଦାଙ୍ଗ୍ ତା କାଜିଙ୍ଗ୍ ଲାଜ୍ନି ବିଷୟ, ହେଦାଙ୍ଗ୍ କାଜିଙ୍ଗ୍ ତା କାପ୍ଡ଼ାତାକେ ଅଡ୍ଣା କିନି ଦର୍କାର୍। 7 ରକାନ୍ ଆଣ୍ଡ୍ରେନ୍ ପାର୍ତାନା କିନିହିଙ୍ଗ୍ ତା କାପ୍ଡ଼ାତାକେ ଅଡ୍ଣା କିନି ଦର୍କାର୍ ଆକାୟ୍, ଇନେସ୍କି ଈଶ୍ୱର ତା ଗୌରବ କାଜିଙ୍ଗ୍ ଜାର୍ଲେକେ କିଜି ରସ୍ତାନ୍ନା। ମାତର୍ କଗ୍ଲେ ଆଣ୍ଡ୍ରାଙ୍ଗ୍ତି ଗୌରବ। 8 ଇନେସ୍କି ପାର୍ତୁମ୍ ଆଣ୍ଡ୍ରେନ୍ କଗ୍ଲେତାଙ୍ଗ୍ ୱାୱାତାନ୍ନା, ମାତର୍ ପାର୍ତୁମ୍ କଗ୍ଲେ ଆଣ୍ଡ୍ରେନ୍ତାଙ୍ଗ୍ ୱାତାତ୍ନା। 9 ଲାଗିଙ୍ଗ୍ ଈଶ୍ୱର ଆଣ୍ଡ୍ରେନିଙ୍ଗ୍ କଗ୍ଲେଙ୍ଗ୍ ସାଇଜ କିନି କାଜିଙ୍ଗ୍ ରହ୍ୱାତାନ୍ନା, ମାତର୍ କଗ୍ଲେ ଆଣ୍ଡ୍ରେନିଙ୍ଗ୍ ସାଇଜ କିନି କାଜିଙ୍ଗ୍ ରସ୍ତାନ୍ନା। 10 ଲାଗିଙ୍ଗ୍ କଗ୍ଲେକ୍ କାପ୍ଡ଼ାତାକେ ଅଡ୍ଣା ହିନି ଦର୍କାର୍, ଇନେସ୍କି ସରଗ୍ଦୁତ୍କୁ ପା ପୁନିକ୍ ଯେ ଇ କଗ୍ଲେ ତା ଆଣ୍ଡ୍ରେନ୍ କାତା ମାନିକିନାତା। 11 ମାତର୍ ମାପୃଙ୍ଗ୍ ପାର୍ତିକିନି ମାନାୟାର୍ ବିତ୍ରେତାଙ୍ଗ୍, କଗ୍ଲେକ୍ତାଙ୍ଗ୍ ଆଣ୍ଡ୍ରାଙ୍ଗ୍ ବିନେ ମାଞ୍ଜେଙ୍ଗ୍ ଆଡୁର୍, ଆରେ ଆଣ୍ଡ୍ରାଙ୍ଗ୍ତାଙ୍ଗ୍ କଗ୍ଲେକ୍ ବିନେ ମାଞ୍ଜେଙ୍ଗ୍ ଆଡୁକ୍। 12 ଈଶ୍ୱର କଗ୍ଲେ ଆଣ୍ଡ୍ରେନ୍ତାଙ୍ଗ୍ ଉବ୍ଜା ଆତିସ୍ପା, ନଙ୍ଗୟ୍ ହେ କଗ୍ଲେ ଆଣ୍ଡ୍ରେନିଙ୍ଗ୍ ଜନମ୍ କିନାତ୍। ମାତର୍ ୱିଜୁ ଜିନିଷ୍ ଈଶ୍ୱରତାଙ୍ଗ୍ ୱାନାତା। 13 ଇନାକା ହାର୍ ଇଞ୍ଜି ଏପେଙ୍ଗ୍ ବିଚାର୍ କିୟାଟ୍। ଯଦି ର କଗ୍ଲେ ମଣ୍ଡ୍ଲିତାକେ ଈଶ୍ୱରତିଙ୍ଗ୍ ପାର୍ତାନା କିନିହିଙ୍ଗ୍ କାପ୍ଡ଼ାତାକେ ଅଡ୍ଣା ମୁଗୁତା? ହେଦାଙ୍ଗ୍ ଟିକ୍ କି? ଆକାୟ୍ ଇଦାଙ୍ଗ୍ ଟିକ୍ ଆକାୟ୍। 14 ଇ ପୁର୍ତିତାଙ୍ଗ୍ ହିକା ଆନାପା ଯେ, ଯଦି ଇମ୍ଣି ଆଣ୍ଡ୍ରେନ୍ କଗ୍ଲେ ଲେକେ ତେମୁଲ୍ ପିହ୍ନାନ୍, ହେଦାଙ୍ଗ୍ ତା କାଜିଙ୍ଗ୍ ଲାଜ୍ନି କାତା। 15 ମାତର୍ କଗ୍ଲେକ୍ ତେମୁଲ୍ ପାନି କିତିସ୍, ହେଦାଙ୍ଗ୍ ହେୱେକ୍ କାଜିଙ୍ଗ୍ ହାର୍। ଇନେସ୍କି ଈଶ୍ୱର ତା କାପ୍ଡ଼ାତାକେ ପାକ୍ତେଙ୍ଗ୍ ପାନ୍ତି ତେମୁଲ୍ ହିତାନ୍ନା। 16 ଯଦି ଇମ୍ଣାକାନ୍ ଆନେଙ୍ଗ୍ ୱେଚ୍ନି କାତାତିଙ୍ଗ୍ ବୁଲ୍ ଇଞ୍ଜି ବାବିକିନାନା, ଲାଗିଙ୍ଗ୍ ଇ ରିତିନିତି ପିସ୍ତି ଆରେ ଜେକନିକା ହିଲେତ୍। ହେଦିଲିଙ୍ଗ୍ ଆପେଙ୍ଗ୍ ଆରେ ଈଶ୍ୱରତାକେନି ୱିଜୁ ମଣ୍ଡ୍ଲିନିକାର୍ ନେ ମାନି କିନାରା। ପ୍ରବୁବଜ୍ 17 ଆନେଙ୍ଗ୍ ମିହୁଦାଙ୍ଗ୍ ଆରେ ର ବିଷୟରେ ବେଣ୍ କିଦ୍ଦେଙ୍ଗ୍ ଇଚା କିନାଙ୍ଗା। ଏପେଙ୍ଗ୍ ପାର୍ତାନା କିଦେଙ୍ଗ୍ ରବେ ରୁଣ୍ଡା ଆତିହିଙ୍ଗ୍ ନାଙ୍ଗେଙ୍ଗ୍ ର ବିଷୟ ମାନ୍ତ ୱାୱାତାତ୍। ଇନେସ୍କି ଏପେଙ୍ଗ୍ ରବେ ରୁଣ୍ଡାଆତି କାଜିଙ୍ଗ୍ ହାର୍ ବିଷୟ ଗଟା ଆଉତା, ମାତର୍ ତା ବାଦୁଲ୍ରେ କରାପ୍ ଗଟାଆନାତା। 18 ହେଦାଙ୍ଗ୍ ଏପେଙ୍ଗ୍ ଈଶ୍ୱରତିଙ୍ଗ୍ ପାର୍ତାନା କିଦେଙ୍ଗ୍ ମଣ୍ଡ୍ଲିତାକେ ରୁଣ୍ଡା ଆତିହିଙ୍ଗ୍ ମି ବିତ୍ରେତାଙ୍ଗ୍ ବାଗ୍-ବାଗ୍ ଆଜି ବିରଦ୍ କିବାଆନାଦେରା। ଆନେଙ୍ଗ୍ ପାର୍ତି କିନାଙ୍ଗା, ଇନେସ୍କି କେତ୍ଜାଣ୍ ନାଙ୍ଗେଙ୍ଗ୍ ୱେଚ୍ଚାନାରା। 19 ଏଲେଙ୍ଗ୍ ଆନାକା ହାର୍, ଯଦି ଏପେଙ୍ଗ୍ ହେଲେକେ ବାଗ୍-ବାଗ୍ ଆନାଦେର୍, ଲାଗିଙ୍ଗ୍ ଈଶ୍ୱର ଇନେରିଙ୍ଗ୍ ଆସ୍ତାନ୍ନା ଇଞ୍ଜି ପୁନ୍ୟା ଆନାତ୍। 20 ଏପେଙ୍ଗ୍ ଏଚେପାଦ୍ନା ପ୍ରବୁବଜ୍ ତିନିହିଙ୍ଗ୍ ରବେ ରୁଣ୍ଡା ଆନାଦେରା। ଏପେଙ୍ଗ୍ ଇନେସ୍କିଜି ପ୍ରବୁବଜ୍ ତିନି ଦର୍କାର୍, ଏପେଙ୍ଗ୍ ଚିନ୍ତା କିଉଦେରା। 21 ଇନେସ୍କି ପ୍ରବୁବଜ୍ ତିନିହିଙ୍ଗ୍ ଜେକନିକାରିଙ୍ଗ୍ କାୱାଦାଙ୍ଗ୍ ଜାର୍ କାଦି ତିନାଦେରା, ହେଦାଙ୍ଗ୍ କେତ୍ଜାଣ୍ ଅଙ୍ଗୁର୍ ରାସ୍ ଉଣ୍ଜି ହଚ୍ଚାର୍ନା, ମାତର୍ ଜେକନିକାର୍ କେତ୍ଜାଣ୍ ନାସ୍କି ମାନାର୍। 22 ମିଙ୍ଗେଙ୍ଗ୍ ଜାର୍ ଇଲ୍କୁ ମାନିକ୍, ହେବେ ମି ଇଚା ଅନୁସାରେ ଚିଞ୍ଜେଙ୍ଗ୍ ଉଣ୍ଡେଙ୍ଗ୍ ଆଡ୍ନାଦେର୍। ଏପେଙ୍ଗ୍ ମଡ଼ି ଆଜି ଈଶ୍ୱରନି ମଣ୍ଡ୍ଲିନି ମାନାୟାରିଙ୍ଗ୍ ଇନସ୍ତା କିନାଦେରା। ଲାଗିଙ୍ଗ୍ ଇ ୱିଜୁ ବିଷୟରେ ଆନେଙ୍ଗ୍ ଇନାକା ୱେଚ୍ଚାନାଙ୍ଗ୍? ଆରେ ଏପେଙ୍ଗ୍ ହେଲେକେ କାମାୟ୍ କିତି କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ମୁଡ଼୍କେ ଜୟ୍-ଜୟ୍ କିଦେଙ୍ଗ୍ ଆଡ଼୍ଦୁଙ୍ଗ୍। 23-24 ଆନେଙ୍ଗ୍ ଇମ୍ଣି ହିକ୍ଷା ହିତ୍ତାଙ୍ଗ୍ନା, ହେଦାଙ୍ଗ୍ ଆନେଙ୍ଗ୍ ମାପୃତାଙ୍ଗ୍ ପାୟାଆତାଙ୍ଗ୍ନା, ଇମ୍ଣି ମିକା ଯୀଶୁଙ୍ଗ୍ ସତୃର୍ କେଇଦ ଆହିକିତାର୍। ହେୱାନ୍ ହେୱାରିଙ୍ଗ୍ ୱେଚ୍ଚାନ୍ ନାଙ୍ଗେଙ୍ଗ୍ ଏତ୍କିଦ୍ଦେଙ୍ଗ୍ ଇଲେକେ କିୟାଟ୍ ଆରେ ହେୱାର୍ ତିନିହିଙ୍ଗ୍ ଯୀଶୁ ରୁଟି ଆସ୍ତି ଈଶ୍ୱରତିଙ୍ଗ୍ ଦନ୍ଯବାଦ୍ କିତାନ୍ ଆରେ ରୁଟି ଡ୍ରିକ୍ଚି ଚେଲାହିରିଙ୍ଗ୍ ହିଜି ୱେଚ୍ଚାନ୍, “ଆହାଟ୍, ଆରେ ତିନାଟ୍ ଇଦାଙ୍ଗ୍ ନା ଗାଗାଡ଼୍।” 25 ଆରେ ହେୱାନ୍ ହେୱାରିଙ୍ଗ୍ ୱେଚ୍ଚାନ୍, “ନାଙ୍ଗେଙ୍ଗ୍ ଏତ୍କିଦ୍ଦେଙ୍ଗ୍ ଇଲେକେ କିୟାଟ୍।” ହେୱାର୍ ତିନ୍ଞ୍ଜି ୱିସ୍ତି ପାଚେ ହେଲେକେ ଯୀଶୁ ଅଙ୍ଗୁର୍ ରାସ୍ ମାନିଗିଲାସ୍ ଆସ୍ତି ଈଶ୍ୱରତିଙ୍ଗ୍ ଦନ୍ଯବାଦ୍ ହିଜି ଚେଲାରିଙ୍ଗ୍ ହିଜି ୱେଚ୍ଚାନ୍, “ମି କାଜିଙ୍ଗ୍ ଅଙ୍ଗୁର୍ ରାସ୍ ନା ନେତେର୍ତାଙ୍ଗ୍ ପୁନି ନିୟମ୍ ଆନାତ୍।” 26 ଏପେଙ୍ଗ୍ ଏଚେହଟ୍ ଇ ରୁଟି ତିନାଦେର୍ ଆରେ ଇ ଅଙ୍ଗୁର୍ ରାସ୍ ଉଣାଦେର୍, ଏପେଙ୍ଗ୍ ମାପୃ ଆରେରଗ ପୁର୍ତିତାକେ ୱାନି ପାତେକ୍ ମାନାୟାରିଙ୍ଗ୍ ୱେଚ୍ନାଦେରା ଯେ, ହେୱାନ୍ ମା କାଜିଙ୍ଗ୍ ହାଃତାନ୍ନା। 27 ଲାଗିଙ୍ଗ୍ ଇମ୍ଣାକାନ୍ ମାପୃଙ୍ଗ୍ ମାନିକିୱାଦାଙ୍ଗ୍ ଇ ରୁଟି କି ଅଙ୍ଗୁର୍ ରାସ୍ ଉଣାନ୍, ଲାଗିଙ୍ଗ୍ ହେୱାନ୍ ମାପୃ ଗାଗାଡ଼୍ନି ବିରଦ୍ତାକେ ଆରେ ତା ନେତେର୍ ବିରଦ୍ତାକେ ପାପ୍ କିଜି ଦସି ଆନାନ୍। 28 ହେଦାଙ୍ଗ୍ କାଜିଙ୍ଗ୍ ହେ ରୁଟିତିଙ୍ଗ୍ ଆରେ ଅଙ୍ଗୁର୍ ରାସ୍ ଉଣି ଆଗେ ଆନେଙ୍ଗ୍ ଟିକ୍ କି ଆକାୟ୍ ଇଞ୍ଜି ଜାର୍ ମାନ୍ତିଙ୍ଗ୍ ପରିକ୍ଷା କିନି ଦର୍କାର୍। 29 ଯଦି ଏପେଙ୍ଗ୍ ଖ୍ରୀଷ୍ଟ ଗାଗାଡ଼୍ତିଙ୍ଗ୍ ସନ୍ମାନ୍ ହିୱି କାଜିଙ୍ଗ୍, ହେ ରୁଟି ଆରେ ଅଙ୍ଗୁର୍ ରାସ୍ ଉଣାଦେରା, ଲାଗିଙ୍ଗ୍ ଏପେଙ୍ଗ୍ ତିନାକାଦିଙ୍ଗ୍ ଆରେ ଉଣାକାଦିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ଦଣ୍ଡ୍ ହିଦ୍ନାନ୍। 30 ହେଦାଙ୍ଗ୍ କାଜିଙ୍ଗ୍ ମି ବିତ୍ରେତାଙ୍ଗ୍ ବେସିହେନି ମାନାୟାର୍ ନଚ୍ଚାର୍ ଆରେ ଗାଗାଡ଼୍ ଦୁର୍ବଲ୍ ଆତାତ୍। ଆରେ ପା କେତ୍ଜାଣ୍ ହାଃତାର୍, ଇନେସ୍କି ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିତାନ୍। 31 ଯଦି ଆସେଙ୍ଗ୍ ପାର୍ତୁମ୍ ଜାର୍ ବ୍ଯବହାର୍ତିଙ୍ଗ୍ ପରିକ୍ଷା କିନାସ୍, ଲାଗିଙ୍ଗ୍ ମାଙ୍ଗେଙ୍ଗ୍ ଈଶ୍ୱର ଦଣ୍ଡ୍ ହିଦୁନ୍। 32 ଯଦି ଈଶ୍ୱର ମାଙ୍ଗେଙ୍ଗ୍ ହେଲେକେ ଦଣ୍ଡ୍ ହିଦ୍ନାନା, ହେୱାନ୍ ମାଙ୍ଗେଙ୍ଗ୍ ହିକାୟ୍ କିଦ୍ନାନା, ଲାଗିଙ୍ଗ୍ ହେୱାନ୍ ତାଙ୍ଗେଙ୍ଗ୍ ଇ ପୁର୍ତିନି ପୁନ୍ୱିତି ମାନାୟାରିଙ୍ଗ୍ ବିଚାର୍ ହିନି ନାଞ୍ଜିଙ୍ଗ୍ ମାଙ୍ଗେଙ୍ଗ୍ ଦଣ୍ଡ୍ ହିଦୁନ୍। 33 ଏ ନା ଟଣ୍ଡାର୍କାଦେର୍, ଏପେଙ୍ଗ୍ ଏଚେପାଦ୍ନା ପ୍ରବୁବଜ୍ ତିନିହିଙ୍ଗ୍ ରୁଣ୍ଡା ଆନାଦେର୍, ୱିଜାକାର୍ ୱାନି ପାତେକ୍ କାସିମାନାଟ୍। 34 ଯଦି ମିଙ୍ଗେଙ୍ଗ୍ ନାସ୍କି କିଦ୍ନାତା, ମିଞ୍ଜ ଉଣାଟ୍। ଲାଗିଙ୍ଗ୍ ଏଚେପାଦ୍ନା ଏପେଙ୍ଗ୍ ର ବାହାତାକେ ରୁଣ୍ଡା ଆନାଦେର୍, ଏପେଙ୍ଗ୍ ହାର୍ କିଜି ବ୍ଯବହାର୍ କିନାଦେର୍ ଆରେ ଈଶ୍ୱର ମିଙ୍ଗେଙ୍ଗ୍ ବିଚାର୍ କିଦ୍ମେନ୍। ଆନେଙ୍ଗ୍ ମି ଲାଗେ ୱାତି ପାଚେ ଜେକନି ବିଷୟତିଙ୍ଗ୍ ହିକ୍ଷା ହିଦ୍ନାଙ୍ଗ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation