୧ କରନ୍ତିୟ 10 - New Testament in Pengo Parja Languageପାଉଲ ମୁର୍ତି ପୁଜାକିନି ବିଷୟରେ ଜାଗ୍ରତ୍ କିନି କାତା 1 ଏ ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ଏତ୍କିଜି ହିଦ୍ନାଙ୍ଗା, ବେସି ଆଗେ ମା ଆକଦାଦିରିଙ୍ଗ୍ ହେ ଚିମ୍ରା ବାହାତାକେ ଇନାକା ଗଟାଆଜି ମାଚାତ୍। ଈଶ୍ୱର ହେୱାର୍ ଆଗେ ବାଦାଡ଼୍ ପକ୍ଚି ରକ୍ଷା କିଜି ମାଚାନ୍ ଆରେ ହେୱାନ୍ ସୁପ ହାମ୍ଦୁର୍ତିଙ୍ଗ୍ ୱାଚିକିଜି ହେୱାରିଙ୍ଗ୍ ଜାଗ୍ରତ୍ତାଙ୍ଗ୍ ତାତାନ୍। 2 ଆସେଙ୍ଗ୍ ଯୀଶୁ ଖ୍ରୀଷ୍ଟ ଚେଲା ଆନି କାଜିଙ୍ଗ୍ ଆସେଙ୍ଗ୍ ଡୁବନ୍ ଅନାସା, ହେଲେକେ ହେୱାର୍ ପା ମୋଶା ଚେଲା ଆନି କାଜିଙ୍ଗ୍ ବାଦାଡ଼୍ ଆରେ ସୁପ ହାମ୍ଦୁର୍ତିଙ୍ଗ୍ ହାଚାର୍। 3 ଈଶ୍ୱର ହେୱାରିଙ୍ଗ୍ ସରଗ୍ କାଦି ଚିଞ୍ଜେଙ୍ଗ୍ ହିଜିମାଚାନ୍। 4 ଆରେ ଈଶ୍ୱର ହେୱାରିଙ୍ଗ୍ ସରଗ୍ନି ଚେଚ୍ରାତାଙ୍ଗ୍ ଏଜୁଙ୍ଗ୍ ହପ୍ଚି ଉଣ୍ଡେଙ୍ଗ୍ ହିଜିମାଚାନ୍। ଇମ୍ଣି ଚେଚ୍ରାତାଙ୍ଗ୍ ହେୱାରିଙ୍ଗ୍ ଈଶ୍ୱର ଉଣ୍ଡେଙ୍ଗ୍ ଏଜୁଙ୍ଗ୍ ହିଜିମାଚାନ୍, ହେ ଚେଚ୍ରା ଯୀଶୁ ଖ୍ରୀଷ୍ଟ ମାଚାନ୍ ଆରେ ହେୱାନ୍ ହେୱାର୍ ହୁଦାଙ୍ଗ୍ ହାଲ୍ଜି ମାଚାନ୍। 5 ଈଶ୍ୱର ହେୱାର୍ କାଜିଙ୍ଗ୍ ଏଚେକ୍ କିତିଲେ ପା, ହେୱାର୍ ତାଙ୍ଗେଙ୍ଗ୍ ସାର୍ଦା କିନିଲେକେ କାମାୟ୍ କିୱାଦାଙ୍ଗ୍ ମାଚାର୍, ଆରେ ଈଶ୍ୱର ହେୱାରିଙ୍ଗ୍ ହେ ଟାଙ୍ଗ୍ରାବାହାତାକେ ବିନାସ୍ କିଦେଙ୍ଗ୍ ହେୱାରିଙ୍ଗ୍ ପକ୍ତାନ୍। 6 ଇ ୱିଜୁଗଟ୍ନା ମାଙ୍ଗେଙ୍ଗ୍ ସାବ୍ଦାନ୍ କିଦ୍ନି କାଜିଙ୍ଗ୍ ଗଟାଆତାତ୍ନା, ଲାଗିଙ୍ଗ୍ ଆସେଙ୍ଗ୍ ହେୱାର୍ କିତିଲେକେ କରାପ୍ ଚିନ୍ତା କିଉସ୍। 7 ଇନେସ୍କି ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ମୁର୍ତି ପୁଜା କିତାର୍, ଇନେସ୍କି ଦରମ୍ ସାସ୍ତର୍ତାକେ ଲେକାଆତାତ୍ନା, “ବିନ୍ଜାତିନି ମାନାୟାର୍ଲେକେ ମୁର୍ତିନି ଚାରିବେଣ୍ତାଙ୍ଗ୍ ଚିଚାର୍ ଉଟାର୍ ଆରେ ଏନ୍ଦ୍ନାରା।” 8 ଆରେ ଆସେଙ୍ଗ୍ ହେୱାର୍ କିତିଲେକେ କିୱି ଦର୍କାର୍, ଇନେସ୍କି ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ଦାରି କାମାୟ୍ କିଜି ର ନାଞ୍ଜିଙ୍ଗ୍ ୨୩,୦୦୦ ଜାଣ୍ ହାଃତାର୍। 9 ଆରେ ପା ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ଈଶ୍ୱରତିଙ୍ଗ୍ ପରିକ୍ଷା କିଜି ରାଚ୍ ଡୟାଆଜି ହାଃତାର୍, ହେଲେକେ ଏପେଙ୍ଗ୍ ଖ୍ରୀଷ୍ଟଙ୍ଗ୍ ପରିକ୍ଷା କିମାଟ୍। 10 ଆରେ ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ଇନେସ୍ ଈଶ୍ୱରତିଙ୍ଗ୍ ବିରଦ୍ କିଜି ୱେଚ୍ଚାର୍, ଲାଗିଙ୍ଗ୍ ଈଶ୍ୱର ବିନାସ୍ କିନି ଦୁତ୍ତିଙ୍ଗ୍ ପକ୍ଚି ହେୱାରିଙ୍ଗ୍ ବିନାସ୍ କିତାନ୍। ଲାଗିଙ୍ଗ୍ ଆସେଙ୍ଗ୍ ଈଶ୍ୱରତିଙ୍ଗ୍ ବିରଦ୍ କିଜି ଇନ୍ୱି ଦର୍କାର୍। 11 ଇମ୍ଣି ମାନାୟାର୍ ଇ ପୁର୍ତି ସେସ୍ ଆନିହିଙ୍ଗ୍ ଜିବୁନ୍ ମାନାର୍। ଇ ୱିଜୁ ବିଷୟ ମାଙ୍ଗେଙ୍ଗ୍ ହିକାୟ୍ କିଦ୍ନି କାଜିଙ୍ଗ୍ ଗଟାଆତାତ୍ନା, ଆରେ ମାଙ୍ଗେଙ୍ଗ୍ ଜାଗ୍ରତ୍ ଆନି କାଜିଙ୍ଗ୍ ଲେକାଆତାତ୍ନା। 12 ଲାଗିଙ୍ଗ୍ ଇମ୍ଣି ପାର୍ତିକିନି ଟଣ୍ଡେନ୍ ଈଶ୍ୱରତିଙ୍ଗ୍ ବେସି ପାର୍ତି ଆରେ ଇଲେକେ ପାପ୍ କାମାୟ୍ କିଉଙ୍ଗା ଇଞ୍ଜି ବାବିକିନାନା, ଲାଗିଙ୍ଗ୍ ହେୱାନ୍ ଜାଗ୍ରତ୍ ଆଜି ମାନି ଦର୍କାର୍। 13 ମାତର୍ ଈଶ୍ୱର ଇନାକା ୱେଚ୍ଚାନ୍ନା ହେୱାନ୍ ହେଦାଙ୍ଗ୍ କିନାନ୍, ହେୱାନ୍ ଆସେଙ୍ଗ୍ ସମ୍ୱାଲି କିଦେଙ୍ଗ୍ ଆଡ୍ୱି ପରିକ୍ଷାତାକେ ମାଙ୍ଗେଙ୍ଗ୍ ପରିକ୍ଷା କିଦୁନ୍। ମାତର୍ ହେୱାନ୍ ମିଙ୍ଗେଙ୍ଗ୍ ହେ ପାପ୍ କାମାୟ୍ତାଙ୍ଗ୍ ଦେହା ମାଞ୍ଜେଙ୍ଗ୍ ଶାକ୍ତି ହିଦ୍ନାନ୍। ଇନେସ୍କି ଇଲେକେ ପାପ୍ କାମାୟ୍ କିନି ଇଚା ୱିଜାକାରିଙ୍ଗ୍ ଆନାତ୍, ଆରେ ହେୱିଜୁ ପାପ୍ କାମାୟ୍ କିୱି କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ଉପାୟ୍ ହିଦ୍ନାନ୍। ଈଶ୍ୱର ମୁର୍ତି ପୁଜା କିନାକାରିଙ୍ଗ୍ ଦଣ୍ଡ୍ ହିନାନ୍ 14 ଲାଗିଙ୍ଗ୍ ଏ ନା ଟଣ୍ଡାର୍କାଦେର୍ ଏପେଙ୍ଗ୍ ର ବିପତ୍ ୱାତିସ୍ ଇନେସ୍ ହନ୍ଞ୍ଚି ହାନାଦେର୍, ହେଲେକେ ମୁର୍ତି ପୁଜା କିନିତାଙ୍ଗ୍ ଦେହା ମାନାଟ୍। 15 ଆନେଙ୍ଗ୍ ବୁଦି କାଟାକାରିଙ୍ଗ୍ ୱେଚ୍ଚିଲେକେ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଆନେଙ୍ଗ୍ ଇନାକା ୱେଚ୍ଚାନାଙ୍ଗା ହେଦାଙ୍ଗ୍ ସତ୍ କି ଆକାୟ୍ ଇଞ୍ଜି ଏପେଙ୍ଗ୍ ବିଚାର୍ କିୟାଟ୍। 16 ଆପେଙ୍ଗ୍ ଏଚେପାଦ୍ନା ପ୍ରବୁବଜ୍ କିଦେଙ୍ଗ୍ ରବେ ରୁଣ୍ଡା ଆନାପ୍, ହେପାଦ୍ନା ଆପେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିଜି ହେ ଗିଲାସ୍ନି ଅଙ୍ଗୁର୍ ରାସ୍ତିଙ୍ଗ୍ ଉଣାପ୍। ହେ ଅଙ୍ଗୁର୍ ରାସ୍ ଯୀଶୁ ଖ୍ରୀଷ୍ଟତି ନେତେର୍ ଉଟିଲେକେ ଆନାତ୍, ଆରେ ଏଚେପାଦ୍ନା ଆପେଙ୍ଗ୍ ରୁଟି ଚିଞ୍ଜେଙ୍ଗ୍ ଡ୍ରିକ୍ତାପ୍, ହେ ରୁଟି ଯୀଶୁ ଖ୍ରୀଷ୍ଟତି ଗାଗାଡ଼୍ତିଙ୍ଗ୍ ଚିଚିଲେକେ ଆନାତ୍। 17 ଆରେ ଆପେଙ୍ଗ୍ ହେ ର ରୁଟିତିଙ୍ଗ୍ ଗନ୍ଦା-ଗନ୍ଦା କିଜି ତିନାପ୍, ହେ ର ରୁଟି ଯୀଶୁ ଖ୍ରୀଷ୍ଟ ଗାଗାଡ଼୍ ଲେକେ ଆରେ ତା ଅର୍ତ ଇଦାଙ୍ଗ୍ ଯେ, ଆପେଙ୍ଗ୍ ବେସିହେନି ଆତିସ୍ପା ଯୀଶୁ ଖ୍ରୀଷ୍ଟ ଗାଗାଡ଼୍ତାକେ ଏକ୍ ଆତାପ୍ନା। 18 ଏପେଙ୍ଗ୍ ଇସ୍ରାଏଲନି ମାନାୟାର୍ ନିୟମ୍ତିଙ୍ଗ୍ ମାନ୍ତ ଏତ୍କିୟାଟ୍, ହେୱାର୍ ଈଶ୍ୱରତିଙ୍ଗ୍ ହେବାକିନି କାଜିଙ୍ଗ୍ ବଳି ପୁଜା କିନାର୍ ହେଦାଙ୍ଗ୍ ହେୱାର୍ ବିତ୍ରେ ବାଗ୍ ବାଟାକିଜି ତାନାର୍। ହେଲେକେ ଇମ୍ଣାକାର୍ ମୁର୍ତିତିଙ୍ଗ୍ ବଗ୍ହିତି କାଦିତିଙ୍ଗ୍ ତିନାର୍, ଲାଗିଙ୍ଗ୍ ହେୱାର୍ ପା ମୁର୍ତିତିଙ୍ଗ୍ ହେବାକିନାରା। 19 ଆନେଙ୍ଗ୍ ମିଙ୍ଗେଙ୍ଗ୍ ଇଦାଙ୍ଗ୍ ୱେଚ୍ଚେଦେଙ୍ଗ୍ ଉପାୟ୍ କିନାଙ୍ଗା ଯେ, ବିନ୍ଜାତିନି ମାନାୟାର୍ ହେବାକିନି ମାପୃ ସତ୍ ଆକାୟ୍ ଆରେ ହେୱାର୍ ଇମ୍ଣି ମୁର୍ତିତିଙ୍ଗ୍ ବଳି ପୁଜା ହିନାର୍ ହେଦାଙ୍ଗ୍ ଇନା ମୁଲ୍ଯ ଆକାୟ୍। 20 ହେୱାର୍ ଇମ୍ଣି ବଳି ପୁଜା କିନାରା ହେଦାଙ୍ଗ୍ ଈଶ୍ୱର କାଜିଙ୍ଗ୍ ଆକାୟ୍, ମାତର୍ ବୁତ୍କୁକାଙ୍ଗ୍ ପୁଜା କିନାରା। ଲାଗିଙ୍ଗ୍ ଆନେଙ୍ଗ୍ ଇଚା କିନାଙ୍ଗା ଯେ, ଏପେଙ୍ଗ୍ ଶୟତାନ ହୁଦାଙ୍ଗ୍ ମାହା ଆମାଟ୍। 21 ଏପେଙ୍ଗ୍ ପ୍ରବୁବଜ୍ ଆରେ ଶୟତାନନି ବେଦିତାଙ୍ଗ୍ କାଦି ଚିଞ୍ଜେଙ୍ଗ୍ ଆଡୁଦେର୍। ହେଲେକେ ଏପେଙ୍ଗ୍ ମାପୃ ଆରେ ଶୟତାନନି ଟେବୁଲ୍ତାଙ୍ଗ୍ ଅଙ୍ଗୁର୍ ରାସ୍ ଉଣ୍ଡେଙ୍ଗ୍ ଆଡୁଦେର୍। 22 ଆସେଙ୍ଗ୍ ଯଦି ହେଲେକେ କିନାସ୍ ଲାଗିଙ୍ଗ୍ ମାପୃ ମାଙ୍ଗେଙ୍ଗ୍ ବେସି ରିସା ଆଦ୍ନାନ୍, ଆରେ ମାଙ୍ଗେଙ୍ଗ୍ ମାପୃତାଙ୍ଗ୍ ବେସି ଶାକ୍ତି ହିଲେତ୍। 23 ମି ବିତ୍ରେତାଙ୍ଗ୍ କେତ୍ଜାଣ୍ ୱେଚ୍ନାର୍ ଆପେଙ୍ଗ୍ ୱିଜୁ ଜିନିଷ୍ କିଦେଙ୍ଗ୍ ଇନେର୍ ମୁନା କିଦୁର୍, ହେଦାଙ୍ଗ୍ ସତ୍ ମାତର୍ କେତେକ୍ ଜିନିଷ୍ ମାନାତ୍ ମାଙ୍ଗେଙ୍ଗ୍ ଈଶ୍ୱରତିଙ୍ଗ୍ ପାର୍ତି କିନାକା ଦୁର୍ବଲ୍ କିଦ୍ନାତ୍। 24 ଇନେର୍ ପା ଜାର୍ ହାର୍ କାଜିଙ୍ଗ୍ ନେ ଇନସ୍ତା କିମେନ୍, ମାତର୍ ଜେକନି ଖ୍ରୀଷ୍ଟାନ୍ ଟଣ୍ଡାର୍ କାଜିଙ୍ଗ୍ ପା ହାର୍ଦି ଚିନ୍ତା କିୟାଟ୍। 25 ମି ମାନ୍ତିଙ୍ଗ୍ କିଲେର୍ କିଜି ଇଟ୍ନି କାଜିଙ୍ଗ୍ ଇନା ପ୍ରଶ୍ନ ୱେନ୍ବାୱାଦାଙ୍ଗ୍ ଆଡ଼୍ତ ପନି ଜେଇତିଙ୍ଗ୍ ଜାର୍ ଇଚାତାଙ୍ଗ୍ ଚିଞ୍ଜେଙ୍ଗ୍ ଆଡ୍ନାଦେର୍। 26 ଇନେସ୍କି ଇ ପୁର୍ତି ଆରେ ପୁର୍ତିନି ୱିଜୁ ଜିନିଷ୍ ମାପୃତି। 27 ଯଦି ମିଙ୍ଗେଙ୍ଗ୍ ବିନ୍ଜାତିନି ମାନାୟାର୍ତାଙ୍ଗ୍ ଇନେର୍ ଉଣ୍ଡେଙ୍ଗ୍ ହିର୍ବାଆଦ୍ନାନ୍, ଲାଗିଙ୍ଗ୍ ଏପେଙ୍ଗ୍ ଇଚା କିତିସ୍ ହାଲାଟ୍। ଆରେ ହେୱାନ୍ ମିଙ୍ଗେଙ୍ଗ୍ ଇନା ଇନାକା ହିଦ୍ନାନ୍ ହେଦାଙ୍ଗ୍ ପୁଜା କିତାକା କି ଆକାୟ୍ ଇଞ୍ଜି ପ୍ରଶ୍ନ ୱେନ୍ବାୱାଦାଙ୍ଗ୍ ତିନାଟ୍। ଲାଗିଙ୍ଗ୍ ଏପେଙ୍ଗ୍ ଦସ୍ ପାୟା ଆଉଦେର୍, ଯଦି ହେ କାଦିତିଙ୍ଗ୍ ମୁର୍ତିତିଙ୍ଗ୍ ହିଜିମାନାର୍। 28-29 ମାତର୍ ଯଦି ଇନେର୍ ମିଙ୍ଗେଙ୍ଗ୍ ଇଞ୍ଜ୍ନାନ୍, “ଇ କାଦି ମୁର୍ତିତିଙ୍ଗ୍ ପୁଜା କିତାକା,” ଲାଗିଙ୍ଗ୍ ଏପେଙ୍ଗ୍ ତିନ୍ମାଟ୍। ଏପେଙ୍ଗ୍ ମି ମାନ୍ କିଲେର୍ କାଜିଙ୍ଗ୍ ଆକାୟ୍, ମାତର୍ ଇମ୍ଣାକାନ୍ ଇନ୍ଞ୍ଚାନ୍ ତା ମାନ୍ କିଲେର୍ କିନି କାଜିଙ୍ଗ୍। କିଲେର୍ ହିଲିତି ମାନାୟାର୍ ମାନ୍ ଇନେସ୍କିଜି ହେୱାନ୍ ନାବେ ମାନି ଅଦିକାର୍ତିଙ୍ଗ୍ ବିଚାର୍ କିଦ୍ନାନ୍? 30 ଯଦି ଆନେଙ୍ଗ୍ ହେ କାଦିତିଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିଜି ତିନାଙ୍ଗ୍, ହେଦାଙ୍ଗ୍ ହାର୍। ଲାଗିଙ୍ଗ୍ ଆନେଙ୍ଗ୍ ହେ କାଦି ଚିନ୍ଞ୍ଜି ଇନାକିଦେଙ୍ଗ୍ ଦସ୍ ପାୟାଆନାଙ୍ଗ୍। 31 ଏପେଙ୍ଗ୍ ତିନାଟ୍ କି ଉଣାଟ୍ ଆରେ ଏପେଙ୍ଗ୍ ଇନାକା ପା କିୟାଟ୍, ହେ ୱିଜୁ ଈଶ୍ୱରତିଙ୍ଗ୍ ଗୌରବ କିଦେଙ୍ଗ୍ କିୟାଟ୍। 32 ଆନେଙ୍ଗ୍ ଇମ୍ଣାକା ୱିଜୁକିନାଙ୍ଗା ୱିଜାକାର୍ ସାର୍ଦା ଆନିଲେକେ କିନାଙ୍ଗା। ଆନେଙ୍ଗ୍ ନା ଜାର୍ ହାର୍ କାଜିଙ୍ଗ୍ ଚିନ୍ତା କିଉଙ୍ଗା ମାତର୍ ୱିଜାର୍ କାଜିଙ୍ଗ୍, ଲାଗିଙ୍ଗ୍ ହେୱାର୍ ଉଦାର୍ ପାୟାଆନାର୍। ହେଲେକେ ଏପେଙ୍ଗ୍ ପା ଯିହୁଦି ଜାତିନିକାଙ୍ଗ୍ କି ବିନ୍ଜାତିନିକାରିଙ୍ଗ୍ କି ଈଶ୍ୱରନି ମଣ୍ଡ୍ଲିନି ମାନାୟାର୍ ଆୟେର୍ ପାପ୍ କାମାୟ୍ କିଦେଙ୍ଗ୍ ସାସ୍ ହିମାଟ୍। 33 ହେଲେକେ ଆନେଙ୍ଗ୍ ପା ୱିଜାରିଙ୍ଗ୍ ୱିଜୁ ନିପଣ୍ ସାର୍ଦା କିନି କାଜିଙ୍ଗ୍ ଉପାୟ୍ କିନାଙ୍ଗା। ଆନେଙ୍ଗ୍ ନା ଜାର୍ ହାର୍ କାଜିଙ୍ଗ୍ ଉପାୟ୍ କିଉଙ୍ଗା, ମାତର୍ ମାନାୟାର୍ ରକ୍ଷା ପାୟାଆନି କାଜିଙ୍ଗ୍ ଇମ୍ଣାକା ହାର୍ ହେଦାଙ୍ଗ୍ କିନାଙ୍ଗା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation