୧ କରନ୍ତିୟ 1 - New Testament in Pengo Parja Languageପାଉଲ କରନ୍ତିୟ ମଣ୍ଡ୍ଲିତିଙ୍ଗ୍ ଜୁଆର୍ ଜାଣାୟ୍ କିନାନା 1 ଆନେଙ୍ଗ୍ ପାଉଲ, ଇ ଚିଟି ଲେକିକିନାଙ୍ଗା, ଆରେ ନା ହୁଦାଙ୍ଗ୍ ପାର୍ତିକିନି ଟଣ୍ଡେନ୍ ସୋସ୍ତିନା ମାନାନ୍ ହେୱାନ୍ ନାଙ୍ଗେଙ୍ଗ୍ ସାଇଜ କିଦ୍ନାନା। ଈଶ୍ୱର ଇଚାକିଜି ନାଙ୍ଗେଙ୍ଗ୍ ତା ମେହି ଯୀଶୁ ଖ୍ରୀଷ୍ଟ ହାର୍ଦିକାବୁର୍ ଶୁଣାୟ୍ କିନି କାଜିଙ୍ଗ୍ ବାଚିକିତି ଚେଲା କିଜି ପକ୍ତାତାନ୍ନା। 2 ଆନେଙ୍ଗ୍ କରନ୍ତିୟ ସହର୍ନି ଈଶ୍ୱର ମଣ୍ଡ୍ଲିତାକେ ଇ ଚିଟି ଲେକିକିନାଙ୍ଗା, ଈଶ୍ୱର ମିଙ୍ଗେଙ୍ଗ୍ ତା ପବିତ୍ର ମାନାୟ୍ ଆନି କାଜିଙ୍ଗ୍ ବାଚିକିତ୍ତାନ୍। ଏଚେଜାଣ୍ ମାନାୟ୍ ଇମ୍ଣି ବାହାତାକେ ମାଚିସ୍ ପା ଯୀଶୁ ଖ୍ରୀଷ୍ଟ ମା ମାପୃ ଇଞ୍ଜି ପାର୍ତାନା କିନାରା, ହେୱାରିଙ୍ଗ୍ ପବିତ୍ର କିତିଲେକେ ହେୱାନ୍ ମିଙ୍ଗେଙ୍ଗ୍ ପା ପବିତ୍ର କିତ୍ତାନ୍ନା। ଇନେସ୍କି ଯୀଶୁ ଖ୍ରୀଷ୍ଟ ନେ ମା ୱିଜାକାର୍ ମାପୃ। 3 ଆବା ଈଶ୍ୱର ଆରେ ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା ଆରେ ଶାନ୍ତି ହିଦେନ୍। ପାଉଲ ଈଶ୍ୱରତିଙ୍ଗ୍ ଦନ୍ଯବାଦ୍ ହିତାନ୍ 4 ଆନେଙ୍ଗ୍ ୱିଜୁଦିନ୍ ଈଶ୍ୱରତିଙ୍ଗ୍ ମି କାଜିଙ୍ଗ୍ ଦନ୍ଯବାଦ୍ ହିନାଙ୍ଗା, ଇନେସ୍କି ଯୀଶୁ ଖ୍ରୀଷ୍ଟ ହୁଦାଙ୍ଗ୍ ଏକ୍ ଆନି କାଜିଙ୍ଗ୍ ହେୱାନ୍ ମିଙ୍ଗେଙ୍ଗ୍ ଦୟା କିତ୍ତାନ୍ନା। 5 ଏପେଙ୍ଗ୍ ଯୀଶୁ ଖ୍ରୀଷ୍ଟ ହୁଦାଙ୍ଗ୍ ଏକ୍ ଆଜିମାଚି କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ବେସି ଆଶ୍ରିବାଦ୍ କିତ୍ତାନ୍ନା। ହେଦାଙ୍ଗ୍ ଇଲେକେ ଆଶ୍ରିବାଦ୍ ଯେ, ଏପେଙ୍ଗ୍ ଈଶ୍ୱରତି ହାର୍ଦିକାବୁର୍ତିଙ୍ଗ୍ ଜେକନିକାରିଙ୍ଗ୍ ୱେଚ୍ନି ଶାକ୍ତିତିଙ୍ଗ୍ ପାୟା ଆତାଦେର୍ନା, ଆରେ ତା କାତାତିଙ୍ଗ୍ ବୁଜା ଆଦେଙ୍ଗ୍ ଆଡ୍ନାଦେରା। 6 ଏପେଙ୍ଗ୍ ଈଶ୍ୱରତାଙ୍ଗ୍ ଇମ୍ଣି ଆଶ୍ରିବାଦ୍ ପାୟା ଆତାଦେର୍ନା, ହେଦାଙ୍ଗ୍ ଖ୍ରୀଷ୍ଟତି ହାର୍ଦିକାବୁର୍ତିଙ୍ଗ୍ ସତ୍ ଇଞ୍ଜି ପୁନିକିନାତା। 7 ହେଦାଙ୍ଗ୍ ପବିତ୍ର ଆତ୍ମା କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ୱିଜୁ ପର୍କାର୍ ଆଶ୍ରିବାଦ୍ ହିତ୍ତାନ୍ନା, ଇ ୱିଜୁ ପବିତ୍ର ଆତ୍ମାନି ଦାନ୍ ମା ମାପୃ ଯୀଶୁ ଖ୍ରୀଷ୍ଟ ଆରେରଗ ୱାନାନ୍ ଇଞ୍ଜି କାତିହିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ହିତ୍ତାନ୍ନା। 8 ଈଶ୍ୱର ମିଙ୍ଗେଙ୍ଗ୍ ମା ମାପୃ ଯୀଶୁ ଖ୍ରୀଷ୍ଟ ପୁର୍ତିତାକେ ଆରେରଗ ୱାନିଦିନ୍ ପାତେକ୍ ପାର୍ତି କିଜି ମାନି କାଜିଙ୍ଗ୍ ସାଇଜ କିଦ୍ନାନ୍, ଆରେ ହେୱାନ୍ ମିଙ୍ଗେଙ୍ଗ୍ ଦସି ଆଦେଙ୍ଗ୍ ହିଦୁନ୍। 9 ଈଶ୍ୱର ମିଙ୍ଗେଙ୍ଗ୍ ତା ମେହି ମା ଯୀଶୁ ଖ୍ରୀଷ୍ଟ ହୁଦାଙ୍ଗ୍ ଏକ୍ ଆଦେଙ୍ଗ୍ ବାଚି କିତାନ୍ନା, ଆରେ ଈଶ୍ୱର ଇମ୍ଣାକା କିନାଙ୍ଗ୍ ଇଞ୍ଜି ୱେଚ୍ନାନ୍ ହେଦାଙ୍ଗ୍ ପୁରା କିନାନ୍। ଲାଗିଙ୍ଗ୍ ଏପେଙ୍ଗ୍ ହାର୍ କିଜି ପୁନ୍ଞ୍ଜି ମାନାଟ୍ ଯେ, ଈଶ୍ୱର ହେ କାମାୟ୍ କିନାନ୍। ପାଉଲ ପାର୍ତିକିନି ଟଣ୍ଡାରିଙ୍ଗ୍ ଏକ୍ ଆଜି ମାଞ୍ଜେଙ୍ଗ୍ ହିକ୍ଷା ହିତାନ୍ 10 ଏ ପାର୍ତିକିନି ଟଣ୍ଡାର୍କାଦେର୍, ଆନେଙ୍ଗ୍ ମା ମାପୃ ଯୀଶୁ ଖ୍ରୀଷ୍ଟ ଅଦିକାର୍ତାଙ୍ଗ୍ ଗୁୱାରି କିଜି ୱେଚ୍ଚାନାଙ୍ଗା ଯେ, ଏପେଙ୍ଗ୍ ୱିଜାଦେର୍ ଜାର୍-ଜାର୍ କାତାତିଙ୍ଗ୍ ରାଜି ଆଡ ଆରେ ମି ବିତ୍ରେତାଙ୍ଗ୍ ବାଗ୍-ବାଗ୍ ଆୱାଦାଙ୍ଗ୍ ମାହାଆଜି ମାନାଟ୍। ଆରେ ଏପେଙ୍ଗ୍ ୱିଜାଦେର୍ ର ମାନ୍ କିୟାଟ୍ ଆରେ ର ଚିନ୍ତା କିୟାଟ୍ ଆରେ ଏକ୍ ଆଜି କାମାୟ୍ କିୟାଟ୍। 11 ଏ ଟଣ୍ଡାର୍କାଦେର୍, ଏପେଙ୍ଗ୍ ଜାର୍-ଜାର୍ବିତ୍ରେ ଜିକାଟାଣା ଆନାଦେରା, ଇବିଷୟ ଖ୍ଳଇ କୁଟୁମ୍ତାଙ୍ଗ୍ କେତ୍ଜାଣ୍ ନାଙ୍ଗେଙ୍ଗ୍ ଇନ୍ଞ୍ଚାର୍। 12 ଏପେଙ୍ଗ୍ କେତ୍ଜାଣ୍ ଇଲେକେ ୱେଚ୍ଚି ବାଗ୍-ବାଗ୍ ଆନାଦେରା ଯେ, “ଆନେଙ୍ଗ୍ ପାଉଲତି ଚେଲା,” ଆରେ କେତେକ୍ ମାନାୟ୍ ଇଞ୍ଜ୍ନାରା ଯେ, “ଆନେଙ୍ଗ୍ ଆପୋଲନି ଚେଲା ଇନେର୍-ଇନେର୍ ଇନାରା ଆନେଙ୍ଗ୍ କେପା ଚେଲା,” ଆରେ କେତେକ୍ ମାନାୟ୍ ଇଞ୍ଜ୍ନାରା ଯେ, “ଆନେଙ୍ଗ୍ ଖ୍ରୀଷ୍ଟନି ଚେଲା।” 13 ହେଦାଙ୍ଗ୍ ହାର୍ ଆକାୟ୍, ଇନେସ୍କି ଖ୍ରୀଷ୍ଟ ମି କାଜିଙ୍ଗ୍ ବାଗ୍-ବାଗ୍ ଆୱାତାନ୍ନା। ଆନେଙ୍ଗ୍ ପାଉଲ ମି କାଜିଙ୍ଗ୍ କୃଶକାଟ୍ତାକେ ହାଃୱାତାଙ୍ଗ୍ନା। ଆରେ ଆନେଙ୍ଗ୍ ମିଙ୍ଗେଙ୍ଗ୍ ଡୁବନ୍ ପା ହିଦ୍ୱାତାଙ୍ଗ୍ନା 14 ଆନେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଙ୍ଗା ଯେ, ମା ପାର୍ତିକିନି ଟଣ୍ଡାର୍ କ୍ରିଷ୍ପ ଆରେ ଗାୟ୍ଙ୍ଗ୍ ପିସ୍ତି ମି ବିତ୍ରେତାଙ୍ଗ୍ ଇନେରିଙ୍ଗ୍ ପା ଡୁବନ୍ ହିୱାତାଙ୍ଗ୍ନା। 15 ଲାଗିଙ୍ଗ୍ ଇନେର୍ ପା ୱେଚ୍ଚେଙ୍ଗ୍ ଆଡୁର୍ ଯେ, ହେୱାର୍ ନା ତର୍ଦାଙ୍ଗ୍ ଡୁବନ୍ ଅତାର୍ନା। 16 ଆଁ ନଙ୍ଗୟ୍ ଏତ୍ୱାତାତ୍ ଯେ, ସ୍ତିପାନ କୁଟୁମ୍ତିଙ୍ଗ୍ ଆନେଙ୍ଗ୍ ଡୁବନ୍ ହିତାଙ୍ଗ୍ନା। ହେୱାରିଙ୍ଗ୍ ପିସ୍ତି ଆରେ ଜେକନିକାରିଙ୍ଗ୍ ଡୁବନ୍ ହିତାକା ମାନ୍ତ ୱାଉତା। 17 ଇନେସ୍କି ଖ୍ରୀଷ୍ଟ ନାଙ୍ଗେଙ୍ଗ୍ ଡୁବନ୍ ହିଦେଙ୍ଗ୍ ପକ୍ତାୱାତାନ୍ନା, ମାତର୍ ହାର୍ଦିକାବୁର୍ ୱେଚ୍ଚେଙ୍ଗ୍ ପକ୍ତାତାନ୍ନା। ଆନେଙ୍ଗ୍ ନା ଜ୍ଞାନ୍ ଅନୁସାରେ ହାର୍ଦିକାବୁର୍ ଶୁଣାୟ୍ କିଉଙ୍ଗା, ଯଦି ହେଲେକେ କିତାଙ୍ଗ୍ମା ମାନାୟାର୍ ନା ଜ୍ଞାନ୍ତିଙ୍ଗ୍ ପାର୍ତି କିତାର୍ମା, ଆରେ ହେୱାର୍ ଖ୍ରୀଷ୍ଟ କୃଶକାଟ୍ତାକେ ହାଃତି ଶାକ୍ତିତିଙ୍ଗ୍ ପୁନ୍ୱାତାର୍ମା। ଈଶ୍ୱରତି ଜ୍ଞାନ୍ 18 ଆନେଙ୍ଗ୍ ପୁଚାଙ୍ଗ୍ନା ଯେ, ଈଶ୍ୱର ଇମ୍ଣି ମାନାୟାରିଙ୍ଗ୍ ଦଣ୍ଡ୍ ହିଦେଙ୍ଗ୍ ଅଲ୍ଗା କିତାନ୍ନା, ହେୱାର୍ କାଜିଙ୍ଗ୍ ଖ୍ରୀଷ୍ଟ କୃଶକାଟ୍ତାକେ ହାଃତି ବିଷୟ ବେକାର୍ ଇଞ୍ଜି ବାବିକିନାରା। ମାତର୍ ମାଙ୍ଗେଙ୍ଗ୍ ଏଚେଜାଣ୍ତିଙ୍ଗ୍ ରକ୍ଷା କିତ୍ତାନ୍ନା, ହେଦାଙ୍ଗ୍ ଈଶ୍ୱର ଶାକ୍ତି ଇଞ୍ଜି ଆପେଙ୍ଗ୍ ପୁଚାପ୍ନା। 19 ଇନେସ୍କି ଦରମ୍ ସାସ୍ତର୍ତାକେ ଲେକା ମାନାତ୍, ଈଶ୍ୱର ୱେଚ୍ନାନା ଯେ, “ଜ୍ଞାନ୍କାଟି ମାନାୟାର୍ ଜ୍ଞାନ୍ତିଙ୍ଗ୍ ବେକାର୍ ଇଞ୍ଜି ଚଚ୍ନାଙ୍ଗ୍, ଆରେ ହେୱାରିଙ୍ଗ୍ ଅଲପ୍ପା ବୁଦିହିଲୁତ୍ ଇଞ୍ଜି ୱେଚ୍ନାଙ୍ଗ୍।” 20 ଲାଗିଙ୍ଗ୍ ଆପେଙ୍ଗ୍ ପୁଞ୍ଜେଙ୍ଗ୍ ଆଡ୍ନାପା ଯେ, ପୁର୍ତିନି ବୁଦିକାଟି ମାନାୟାର୍ ବୁଦି ଇନା ଲାବ୍ ଆକାୟ୍। ଇମ୍ଣି ପଣ୍ଡିତ୍ ପା ହେୱାନ୍ ବୁଜାଆନି ଶାକ୍ତି ପା ଇନା ଲାବ୍ ଆକାୟ୍, ଆରେ ଇମ୍ଣି ମାନାୟାର୍ ଚାଲାକି ଆଜି କାତା ୱେଚ୍ଚେଙ୍ଗ୍ ପୁନାର୍ ହେୱାର୍ କାତା ପା ଇନା ଲାବ୍, ଇନେସ୍କି ଈଶ୍ୱର ହେୱାରିଙ୍ଗ୍ ବକୁୱା ଆରେ ହେୱାର୍ ବୁଦିତିଙ୍ଗ୍ ବେକାର୍ ଇଞ୍ଜି ଚଚ୍ଚାନ୍ନା। 21 ହେଦାଙ୍ଗ୍ କାଜିଙ୍ଗ୍ ଈଶ୍ୱର ତା ଜ୍ଞାନ୍ତାଙ୍ଗ୍ ପୁଞ୍ଜେଙ୍ଗ୍ ଆଡ଼୍ତାନ୍ ଯେ, ପୁର୍ତିନି ମାନାୟାର୍ ଜାର୍ ବୁଦିତାଙ୍ଗ୍ ଈଶ୍ୱରତିଙ୍ଗ୍ ଦାସ୍ତେଙ୍ଗ୍ ଆଡୁର୍। ଏଚେଜାଣ୍ ମା ହାର୍ଦିକାବୁର୍ତିଙ୍ଗ୍ ୱେନ୍ଞ୍ଜି ପାର୍ତି କିତାର୍, ଲାଗିଙ୍ଗ୍ ହେୱାର୍ ମା ବକୁୱା ଇଞ୍ଜି ବାବିକିଜି ଶୁଣାୟ୍ କିନି କାତା ୱେନ୍ଞ୍ଜି ପାର୍ତିକିନି ମାନାୟାରିଙ୍ଗ୍ ଉଦାର୍ କିତାନ୍। 22 ଈଶ୍ୱରତି ଇ ଉପାୟ୍ତିଙ୍ଗ୍ ଯିହୁଦି ଜାତିନି ମାନାୟାର୍ ବେକାର୍ ଇଞ୍ଜି ବାବିକିନାରା। ଇନେସ୍କି ହେୱାର୍ ସତ୍ ଇଞ୍ଜି ପୁଞ୍ଜେଙ୍ଗ୍ ସରଗତାଙ୍ଗ୍ ର ଚିନ୍ ଦାହ୍ନାରା, ଆରେ ବିନ୍ଜାତିନି ମାନାୟାର୍ ପା ବେକାର୍ ଇଞ୍ଜି ବାବିକିନାରା, ଇନେସ୍କି ହେୱାର୍ ତା ଜ୍ଞାନ୍ ଅନୁସାରେ ପାର୍ତିକିନାରା। 23 ଏଚେପାଦ୍ନା ଆସେଙ୍ଗ୍ ଯୀଶୁ ଖ୍ରୀଷ୍ଟ ମାଙ୍ଗେଙ୍ଗ୍ ଉଦାର୍ କିଦ୍ନି କାଜିଙ୍ଗ୍ କୃଶକାଟ୍ତାକେ ହାଃତାନ୍ ଇଞ୍ଜି ଶୁଣାୟ୍ କିନାସା। ଯିହୁଦି ଜାତିନି ମାନାୟାର୍ ମାଙ୍ଗେଙ୍ଗ୍ ଇନସ୍ତା କିଦ୍ନାରା ଆରେ ବିନ୍ଜାତିନି ମାନାୟାର୍ ଇଦାଙ୍ଗ୍ ବେକାର୍ ଇଞ୍ଜି ୱେଚ୍ନାରା। 24 ମାତର୍ ଯିହୁଦି ଜାତିର୍ ଆରେ ବିନ୍ଜାତିର୍ନି ଏଚେଜାଣ୍ତିଙ୍ଗ୍ ଈଶ୍ୱର ଉଦାର୍ କିଦ୍ନି କାଜିଙ୍ଗ୍ ବାଚି କିତ୍ତାନ୍ନା। ହେୱାର୍ କାଜିଙ୍ଗ୍ ଖ୍ରୀଷ୍ଟ ନେ ଈଶ୍ୱର ଗାଜା ଶାକ୍ତି ଆରେ ଈଶ୍ୱରତି ବୁଦି। 25 ହେଦାଙ୍ଗ୍ କାଜିଙ୍ଗ୍ ଈଶ୍ୱର ବକୁୱା ଉପାୟ୍ ବୁଦିକାଟି ମାନାୟାର୍ ବୁଦିତାଙ୍ଗ୍ ଗାଜା, ଆରେ ଈଶ୍ୱରତି ଦୁର୍ବଲ୍ ଆନାକା ମାନାୟାର୍ ଶାକ୍ତିତାଙ୍ଗ୍ ଗାଜା। 26 ଏ ଟଣ୍ଡାର୍କାଦେର୍, ଏପେଙ୍ଗ୍ ପୁଚାଦେର୍ନା ଯେ, ଈଶ୍ୱର ମିଙ୍ଗେଙ୍ଗ୍ ଯୀଶୁ ଖ୍ରୀଷ୍ଟନି ଲକ୍ ଆଦେଙ୍ଗ୍ କୁକ୍ତିତିହିଙ୍ଗ୍ ମି ବିତ୍ରେତାଙ୍ଗ୍ କେତେକ୍ ହେନି ମାନାୟାର୍ ଇ ପୁର୍ତିନି ମାନାୟାର୍ ଆଗେ ବୁଦି କାଟାକାଦେର୍ ମାଚାଦେର୍। ଆରେ ଅଲପ୍ ମାନାୟ୍ ଶାକ୍ତି ମାନାକାଦେର୍ ମାଚାଦେର୍ ଆରେ ଅଲପ୍ ମାନାୟ୍ ହାଉକାର୍ କାଦେର୍ ମାଚାଦେର୍। 27 ହେଦାଙ୍ଗ୍ କାଜିଙ୍ଗ୍ ଈଶ୍ୱର ଇ ପୁର୍ତିନି ବୁଦିକାଟି ମାନାୟାରିଙ୍ଗ୍ ଲାଜ୍ କିଦେଙ୍ଗ୍, ବକୁୱା ମାନାୟାରିଙ୍ଗ୍ ବାଚି କିତାନ୍ନା। ଆରେ ହେୱାନ୍ ଶାକ୍ତି ମାନାକାରିଙ୍ଗ୍ ଲାଜ୍ କିଦେଙ୍ଗ୍ ଶାକ୍ତି ହିଲାକାରିଙ୍ଗ୍ ବାଚି କିତାନ୍ନା। 28 ଇ ପୁର୍ତିନି ମାନାୟାର୍ ଇମ୍ଣାକାଦିଙ୍ଗ୍ ମୁକ୍ଯ ଇଞ୍ଜି ବାବିକିନାରା, ହେଦାଙ୍ଗ୍ ବେକାର୍ ଇଞ୍ଜି ପୁନିକିଦେଙ୍ଗ୍ ଈଶ୍ୱର ପୁର୍ତିନି ଇମ୍ଣି ମାନାୟାରିଙ୍ଗ୍ ଇନସ୍ତା କିନାରା, ହେୱାରିଙ୍ଗ୍ କିଜ୍ରାଇ କିନାରା ଆରେ ବେକାର୍ ଇଞ୍ଜି ୱେଚ୍ନାରା ହେୱାରିଙ୍ଗ୍ ବାଚି କିତାନ୍ନା। 29 ଲାଗିଙ୍ଗ୍ ଇନେର୍ ପା ଈଶ୍ୱର ମୁମ୍ଦ ଆନେଙ୍ଗ୍ ଗାଜାକାଙ୍ଗ୍ ଇଞ୍ଜି ଚଞ୍ଜିଆ ଆଦେଙ୍ଗ୍ ଆଡୁର୍। 30 ମାତର୍ ଈଶ୍ୱର ମିଙ୍ଗେଙ୍ଗ୍ ଖ୍ରୀଷ୍ଟ ଯୀଶୁ ହୁଦାଙ୍ଗ୍ ଏକ୍ କିତ୍ତାନ୍ନା, ଆରେ ଖ୍ରୀଷ୍ଟ କାଜିଙ୍ଗ୍ ହେୱାନ୍ ମିଙ୍ଗେଙ୍ଗ୍ ବୁଦି ହିଦ୍ନାନ୍। ଈଶ୍ୱର ମା ୱିଜୁ ପାପ୍ତାଙ୍ଗ୍ ମୁକ୍ତି କିତ୍ତାନ୍ ଆରେ ହେୱାନ୍ ମାଙ୍ଗେଙ୍ଗ୍ ଯୀଶୁ ଖ୍ରୀଷ୍ଟ କାଜିଙ୍ଗ୍ ପବିତ୍ର ଆରେ ତା ମୁମ୍ଦ ଦରମ୍ ମାନାୟ୍ କିଦ୍ନାନ୍। 31 ହେଦାଙ୍ଗ୍ କାଜିଙ୍ଗ୍ ଦରମ୍ ସାସ୍ତର୍ତାକେ ଲେକା ମାନାତ୍ ଯେ, “ଇମ୍ଣି ମାନାୟ୍ ଗାର୍ବି ଆଦେଙ୍ଗ୍ ଇଚା କିନାନା, ହେୱାନ୍ ମାପୃ ତା କାଜିଙ୍ଗ୍ ଇନାକା କିତାତ୍ନା ହେଦାଙ୍ଗ୍ କାଜିଙ୍ଗ୍ ଗାର୍ବି ଆନି ଦର୍କାର୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation