Psalm 82 - Pennsylvania Dutch Bible

Da 82. Psalm. Da Haychsht Richtah

En Psalm fumm Asaph.

¹ Gott nemd sei blatz in di grohs fasamling, un is richtah unnich di gettah.

² Vi lang zayla diah unrecht richta, un ufshtay fa di gottlohsa? (Sela)

³ Shtaynd uf fa di oahma un di kinnah unni eldra, helfet di shvacha un nunnah-gedreddana fa iahra recht greeya.

⁴ Machet selli frei es oahm sinn un noht henn, machet si frei funn di gottlohsa iahra gvald.

⁵ Dee gettah vissa nix, un fashtayn nix, si lawfa rumm im dunkla; awl di foundations funn di eaht sinn kshiddeld.

⁶ Ich habb ksawt, “Diah sind gettah, un sind awl kinnah fumm Alli-Haychshta.

⁷ Avvah diah zaylet shtauva vi mensha, diah zaylet falla grawt vi ennichah anra roolah.”

⁸ Shtay uf, oh Gott, un richt di eaht; awl di kaynich-reicha sinn dei eahbshaft.