Psalm 6 - Pennsylvania Dutch Bible

Da 6. Psalm. En Gebayt Fa Hilf Deich Dreebsawl

En Psalm fumm Dawfit. Zumm foah-singah: fa foah-kshpeeld sei mitt en acht kshtringdi harf.

¹ Oh Hah, zank mich nett in deim zann; shtrohf mich nett vann du bays bisht.

² Sei bamhatzich zu miah, oh Hah, fa ich binn shvach; hayl mich, oh Hah, mei gnocha sinn gedruvveld.

³ Mei sayl is oahrich bedreebt, vi lang, oh Hah, vi lang zayld's sei?

⁴ Kumm zrikk, oh Hah, un mach mei sayl frei, mach mich saylich veil du mich leebsht.

⁵ Ebbah dohdes denkt nett an dich. Veah kann dich danka im grawb?

⁶ Ich binn meet funn meim geyammah; alli nacht is mei bett nass, un mei kissi is ksohkt mitt awwa-vassah.

⁷ Mei awwa sinn dreeb funn feel dreebsawl; si vadda shvach deich awl mei feinda.

⁸ Machet eich vekk funn miah, awl diah es evil doond, fa da Hah hott mei shtimm keaht am heila.

⁹ Da Hah hott mich keaht naus roofa fa bamhatzichkeit, da Hah nemd mei gebayt oh.

¹⁰ Awl mei feinda zayla sich shemma un oahrich gedruvveld sei; si zayla zrikk drayya un bletzlich fashohmd sei.